Matius 10
10
Yesus nfil Ni manglartar buti resin du
10:1-4
(Mrk. 3:13-19; Luk. 6:12-16)
1-4Na ler sa e, Yesus ntar Ni manglarat buti resin du ma rabut sir. Ma tomwatar rtar sir feti mangsidkwar. Sir a ne ngarnir farye: Simon ma Yesus nafngare i a na Petrus, ma wainy Andreas. Yakobus ma Yohanes, radu ye Zebedeus angkir. Filipus, Bartolomeus, Tomas, ma Matius mangtak ulbati, Yakobus Alfeus anaky, ma Tadeus. Simon ma nof faburat Zelot, ma Yudas Iskariot ma keta nfenri Yesus. I nafburat sir ma nal kuase ber sir ma ratian smwangat yatkar, ma rafngamone mangafansar nof nir maningkyar felnir mpane.
Yesus nsiduk Ni manglartar buti resin du
10:5-15
(Mrk. 6:6-13; Luk. 9:1-6)
5Yesus nsiduk Ni manglarat buti resin du a ne, ma I nfalak ber sir, “Ka kete mtyi tomwatar ma to Yahudi sir a ne nir nusar, ma kete mtyi kotar ma tomwat Samariar ramin a nbal. 6Nempa ka mtyi mikmat baluan tomwat Israelar ma ratliur Ratu, sir a ne feleles farlan dombayar ma rlai. 7Noak ma mtyi e, ka mifwibar ber sir feti to dodo a nbal e, Ratu neluk Rai ma nfarete tomwatar lo.#Luk. 10:4-12 8Ma ka mifngamone mangafansar, mifmyorip a mbyali mangmwatar, mifngamone mangampalwar, ma mitian kalin smwangat yatkar. Noak ma Yakw kal kuase ber a kmi ma myose kabanir a ne, kmi to mpyerlu ma mbyayar. Mpa ka myose kabanir la mtyulung tomwatar e kete mtyak sewe myof sir a nbal. 9Noak ma mtyi e ka kete myon doit mase, doit perak, nre doit tembaga na mir lufwar. 10Ma ka mtyi e kete myon kodnar, rabit seselu, sabatwemar nre tetekan, fali tomwate ma nkarya ber Ratu keta nonri ni perluar nof tomwatar ma nafwibar Ratu Ni ngribatnir ber sir a ne.#1Kor. 9:14; 1Tim. 5:18 11Farlan mtyi kotar sa nre pnuar sa, ka minriak tomwatar sa ma nangamon ma nmpeang ma nlangun a kmi a na ni das. Ma ka mimin iane terik ma mtyi a mtyate kote ne. 12Ma farlan mtyi dasar sa ma keta mimin, ka mfyalak ber das dalam a ne, ka weni Ratu nal maline ma nberkat a kmi. 13Ma farlan rlangun a kmi na das a ne ma nangafel e keta Ratu nal berkat ber sir. Nempa farlan to rlangun a kmi e keta Ratu nal a nbali berkat a ne ber a kmi. 14Ma farlan myait kotar sa nre dasar sa, ma tomwatar na iane to rlangun a kmi nre to rdengar mir anftutwar, ka mtyi a mtyate kote ne nre das a ne, ma mitetar afu myof emir. Iane ma neluk faniak feti keta Ratu nukun sir.#Kis. 13:51 15Mdyengar ma kfwalak ber a kmi, na lere ma Ratu nukun saryamprene, keta nukun tomwatar na kote ne maberat a nlengan nof tomwatar na kote Sodom ma Gomora luryain a ne.”#Kej. 19:24-28; Mat. 11:24
Yesus nafbotin ber Ni manglartar feti keta sir rkoman suse
10:16-33
(Mrk. 13:9-13; Luk. 21:12-19)
16Yesus nfalak ber sir a nbal, “Wangur, mdyengar fen ngamone! Yakw kswiduk a kmi ma mtyi myorip myor tomwat yatkar. Iane farlan domba ma nmorip nor asw alas tair. Mpa ka mir andaun melawas farlan kasi, ma dalmir a ramlonry farlan manik merpati.#Luk. 10:3
17Nempa ka mijake kmi fali keta tomwatar ketnir romat a kmi ma ror a kmi far mangtetak agamar. Ma keta rsil a rbabal a kmi na Yahudyar nir das sampayang. 18Ma keta ror a kmi far mangfaretar ma rayar fali mlyarat Yakw. Ma iane let ber a kmi ma mifwibar Ibar Ngamone na Yakw ber sir ma ber tomwatar ma to rafai Ratu. 19Ma farlan ror a kmi ma rsidang a kmi e kete dalmir suse feti keta mfyalak safe nre mitanuk farpe. Fali na lere ne nbal keta Ratu Smwangtany nafbotin ber a kmi na safe ma keta mfyalak. 20Fali noak ma mitanuk e iane to nof koko kmi mir andaun nempa iane nof Amninrar Ratu Smwangtany ma namin a kmi.#Mrk. 13:9-11; Luk. 12:11-12; 21:12-15
21Keta nait e, tomwatar ror wanir rma ma rfen sir. Feleles a nbal farlan makenar ma ranrenre angkir ma rfen sir. Ma kangkir keta rbangal enir amnir ma ror sir ber tomwatar ma rfen sir a nbal.#Mrk. 13:12; Luk. 21:16 22Ma keta tomwatar monuk rkedan a kmi fali mlyarat Yakw. Nempa tomwate ma namkoran ma nalele Yakw terik ma nmat, keta nonri momorip dedesar.#Mat. 24:9; 13; Mrk. 13:13; Luk. 21:17 23Ma farlan tomwatar na kote sa rsiksa kmi, ka mifla mbyie kote ne ma mtyi kote walyetar. Yakw kfwalak ber a kmi, ni botuan e, keta kmi to mtyi monuk kotar na Israel a fuky e, Yakw Tomwate Anaky kmwa baluan lo. 24To manglarat fen lese nbal ma tomwatar ralang i rlengan nof ni tuangguru. Ma to mangkaryae fen lese ma tomwatar ralang i rlengan nof ni bos.#Luk. 6:40; Yoh. 13:16; 15:20 25Ma manglarat biase nlarat ni tuangguru ni adat. Ma mangkaryae biase nlarat ni bos ni adat. Mpa ka mijake kmi fen ngamone fali Yakw e kweluk mir Mangnrure, ma kmi e myeluk Ni manglartar. Farlan tomwatar ma to ralele Ratu rfalak Yakw feti Beelzebul#10:25 Beelzebul ye iane ngarany ber smwangat yatkar nir ulun , keta rfalak a kmi ma mlyarat Yakw ne nayatak a nlengan nof a ne nbal.”#Mat. 9:34; 12:24; Mrk. 3:22; Luk. 11:15
Kete mimtaut tomwatar ma rose suse kmi
10:26-33
(Luk. 12:2-9)
26“Mpa ka kete mimtaut tomwatar ma rbangal kmi a ne, fali nir adat yatak ma rose ramudim a ne, keta Ratu nfatutu. Ma safe-safe monuk ma tomwatar to rafai ne keta I nfatutu ber sir.#Mrk. 4:22; Luk. 8:17 27Ma safe-safe ma kfwalak ber a kmi ma tomwat walyetar to rafai fuky a ne, ka mifbotin ber tomwatar monuk nema rafai. Ma safe-safe ma kusarmpumpu na tlingmir a ne, ka mfyalyere na tomwatar monuk sonirlury nema rafai. 28Kete mimtaut tomwatar ma rfen a kmi. Fali keta rfen lan tenmir, nempa to nir kuase ma ryebas smwangtimir far neraka. Ka mimtaut lan Ratu! Fali Ni kuase ma nfen a kmi, ma Ni kuase nbal ma nyebas a kmi far neraka.
29Almunar du kotkir lan senar du#10:29 Senar du a ne iane feti kotkyan marumat desar.. Boloka farane farlan Amninrar Ratu to ninrang, keta to manik fen lese nof mangkyar a ne ma rmat. 30Feleles farlan kmi a nbal fali Ratu nfayaki monuk ulmir bukrir lo. 31Mpa kete mimtaut, fali na Ratu sounlury e kotkimir nlengan nof almunar a ne.
32Mdyengar fen ngamone: Ise ma nyoding Yakw na tomwat ngayadin sonirlury feti Ningw manglarat ber i, keta Yakw kyoding i a nbal na Amangw ma namin surga sounlury feti Ningw manglarat ber i. 33Nempa ise ma namsoal Yakw na tomwat ngayadin sonirlury feti to Ningw manglarat ber i, keta kumsoal i a nbal na Amangw ma namin surga sounlury feti to Ningw manglarat ber i.”#2Tim. 2:12
Yesus nma saryamprene nwayat ma tomwatar raale sir
10:34-42
(Luk. 12:51-53; 14:26-27)
34Yesus nfalak a nbal, “Wangur, kete mdyaun feti Yakw kmwa saryamprene ye ma kose ma tomwatar rmorip e rangamon ror tomwat walyetar. Tate. Nempa Yakw kmwa e kose ma tomwatar raale sir. 35-36Ma keta tomwatar ma rlarat Yakw ma tomwatar ma to rlarat Yakw e, raale sir. Ma keta kanak merwane nabangal nor amany. Kanak bate nabangal nor enany, ma bat ketam nabangal nor yanany bate.#Mi. 7:6
37Tomwate ma nkamis enany nre amany nlengan nof Yakw, keta i to ubany ma neluk Ningw manglarat. Farlan a nbal tomwate ma nkamis anaky bate nre merwane nlengan nof Yakw, keta i to ubany ma neluk Ningw manglarat. 38Fali tomwate ma to nabare ni sangwalu ma nlarat Yakw, keta i to ubany ma neluk Ningw manglarat.#Mat. 16:24; Mrk. 8:34; Luk. 9:23 39Tomwate ma ndaun lan ni momorip na saryamprene keta to nonri momorip dedesar. Nempa tomwate ma to ndaun ni momorip ma ninrang ma nmat fali nlarat Yakw, keta nonri momorip dedesar.”#Mat. 16:25; Mrk. 8:35; Luk. 9:24; 17:33; Yoh. 12:25
Ratu nal sewe ber tomwatar ma rlangun I
10:40—11:1
(Mrk. 9:41)
40Yesus nfalak a nbal, “Tomwate ma nlangun a kmi, iane feti i nlangun Yakw. Ma tomwate ma nlangun Yakw, iane feti i nlangun I ma nsiduk Yakw.#Mrk. 9:37; Luk. 9:48; 10:16; Yoh. 13:20 41Tomwate ma nlangun nabyar sa fali nafai feti i a ne nabi, keta Ratu nal sewe ber i ma feleles farlan sewe ma Ratu nal ber nabyar. Ma tomwate ma nlangun tomwatar sa ma nose kabain botunar na Ratu sounlury fali nafai feti i nose kabain botunar, keta Ratu nal sewe ber i feleles farlan ma nal sewe ber tomwatar monuk ma rose kabain botunar na sounlury. 42Ma ise ma ntulung Ningw manglarat sa ma to ubany, boloka nal motak krawe ber i, ni botuan e Ratu la nal sewe ber i.”
လက္ရွိေရြးခ်ယ္ထားမွု
Matius 10: YMD
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© Yayasan Pemberdayaan Masyarakat Desa © Wycliffe Bible Translators, Inc. All rights reserved.