Matius 9
9
Yesus nafngamone mangamluktwar sa
9:1-8
(Mrk. 2:1-12; Luk. 5:17-26)
1Yesus nor Ni manglartar rfangat sori ma ral far kote ma I namin#9:1 Noak ma Yesus ntabw ma nkarya ber Ratu I namin kote Kapernaum. Kote ne feleles farlan koko i ni pnue. . 2Lama Yesus ka rait e, tomwatar ketnir ror mangamlukut na mpeluk ber Yesus. Noak ma Yesus nsalan ma rose farane, I nafai feti sir ralele desar I ma bise ma nafngamone mangamlukut a ne. Mpa I nfalak ber tomwate ne, “Amo, mulele Yakw, klwure nim salar lo!” 3Mpe mangaftutu Musa ni faretar ketnir rdengar ma Yesus nfalak farane sir rfalak na dalmir, “Ali tomwate ye Ratu I e! I nafbwere Ratu lo!” 4Nempa Yesus nafai nir andanwar, mpa I nfalak ber sir, “Safema mir andaun yatak farane? 5Impe ma merawe, kfwalak feti, ‘Klwure nim salar,’ nre ‘mpwote ko ma mpwan?’#9:5 Tomwat Yahudyar na are Yesus ne ralele feti farlan tomwatar sa nangamon nof ni maninik iane nfatutu feti Ratu nlure ni salar lo. 6Nempa lere ye kuftutu ber a kmi nema mifai feti na saryamprene ye Yakw, Tomwate Anaky Ningw kuase ma klwure tomwatar nir salar.” Ne Yesus nfalak ber mangamlukut a ne, “Mpwote ko, mwal nim mpeluk ma mbwali ko!” 7Ne tomwate ne npote desar i ma nbali i far ni das. 8Noak ma tomwat ngayadin rsalan ngrie ne, sir rampriang desar ma rdangin Ratu fali nal Ni kuase ma nlie nlengan a ne ber tomwatar.
Yesus ntar Matius mangtak ulbati ne ma nlarat I
9:9-13
(Mrk. 2:13-17; Luk. 5:27-32)
9Noak ma Yesus nbie nof ain a ne, I nsalan mangtak ulbatyar sa ngarany Matius. I namtoran ain ma rtak ulbati. Ne Yesus nfalak ber i, “Mlwarat Yakw.” Mpe i namdir ma nlarat Yesus. 10Mpene Yesus nor Ni manglartar rti rtame na Matius ni das. Noak ma rtame e, tomwatar yadin rma ma rtame ror sir a nbal. Sir a ne mangtak ulbatyar, ma tomwatar ma tomwat walyetar rdaun feti tomwat salar sir. 11Noak a ne tomwat Farisyar ketnir ramin iane nbal ma rsalan sir. Mpe sir rfalak ber Yesus Ni manglartar, “Safema mir tuangguru ne ntame nor mangtak ulbatyar ma tomwat salar ye?”#Luk. 5:30; 15:1-2 12Noak ma Yesus ndengar ma sir rfalak farane, I nfalak ber sir, “Tomwatar ma to rafanas to ranriak dokter, lan mangafansar.” 13Mpa mbyali kmi ma mireke ma mifai feti Ratu Ni ngribatnir ye isiny farpe. Ratu Ni ngribatnir a ne farye: Tomwatar ma rfatutu nir lolompang ber tomwat walyetar, sir a ne ma rafsenange dalangw. Ma Yakw kmpweang sir nlengan nof tomwatar ma rloik nir snyompar nempa to nir lolompang ber tomwat walyetar. Fali Yakw kmwa e, to ktwar tomwatar ma rase feti sir rose kabain botunar na Ratu sounlury, nempa yak kmwa ber tomwat salar nema rtate nir salar.#Hos. 6:6; Mat. 12:7
Yesus Ni anftutwar to naordeng nor tomwat Yahudyar nir yayatrwar
9:14-17
(Mrk. 2:18-22; Luk. 5:33-39)
14Mpene Yohanes ni manglartar rma ma rakmat Yesus ma rfalak, “Kam ma tomwat Farisyar e mpuase ma safema Nim manglartar e tate?” 15Mpe Yesus nfalak tnyanuk pupule ber sir, “Tomwatar ma ramin festa nika, keta rampumpuki sir ror merwan mangafsaw beberi ne. Ma sir to rpuase noak ma merwan mangafsaw beberi ne lolone nor sir. Nempa keta nait ni tewat ma tomwatar ral merwan mangafsaw beberi ne nof sir. Na lere ne betno rpuase. 16Ne Yesus nfalak tnyanuk pupul walyetar a nbal farye: Tomwatar to ral maloly beberi ris la raban nir rabit wangim. Fali farlan rtefe rabit a ne, keta maloly beberi ris a ne nalulun, nwayat ma rabit ma raban a ne ntafal ma ntarbis silai. 17Farlan a nbal tomwatar to rbui anggur beberi na lufw kulit wangim, fali noak ma anggur a ne ni lalabusar rmadas e keta nafyatak lufu ne nwayat ma anggur a ne ntarbui. Mpa anggur beberi ka tbui na lufw beberi nbal nema lufu ne kete ntarbis ma anggur a ne ntarbui.”#9:17 Nof tnyanuk pupule ne Yesus naftutu tomwat Farisyar ma kete ralompe Ni anftutw beberi nor nir anftutw wangim.
Yesus nafmorip tomwate ma neluk ulun na das sampayang anak ma nafngamone bate ma biase dare nbotin i a ne
9:18-26
(Mrk. 5:21-43; Luk. 8:40-56)
18Noak ma Yesus lolone natanuk nor Yohanes ni manglartar, tomwat sa ma neluk ulun na das sampayang a ne nma ma nakmat Yesus. Tomwate ne nsatngur a na sounlury ma nfalak, “Maken, anakw bate betno nmat, nempa mtwulung ma mtwi ma mswaup limar na i nrela, nema nmorip a nbali.” 19Mpe Yesus npote I ma nlarat tomwate ne far ni das. Ma Ni manglartar rlarat I a nbal. 20Noak ma lolone ramin dalamtene let e, batar sa nlarat sir. Bate ne biase dare nbotin i. Ma ni maninik a ne doan ngarak buti resin du lo. I nmpan nof mudy ma nti nlosir Yesus ma nasyol Ni rabit melawas suin. 21I nose farane fali nfalak na dalamy feti, “Farlan kusyol Ni rabit melawas suin motak e kungamon lo.” 22Ne Yesus nmange I ma nsalan bate ne ma nfalak, “Ano, ka mufkoran dalam! Mulele Yakw mpa mungamon lo.” Ntabw nof a ne bate ne nangamon desar.
23Yesus naloran Ni mpampane far tomwate ma neluk ulun na das sampayang ne ni das. Lama nait iano I nsalan tomwatar ma roup bulyar ma tomwatar yadin rtasing ma ralol. 24Ne nfalak ber sir, “Hei, mbyie monuk myof ye! Kanak ye to nmat nempa narwa motak.” Noak ma tomwat ngayadin rdengar ma Yesus nfalak farane sir rmalip I. 25Lama tomwat ngayadin a ne rti burit, Yesus nti kamar dalam ma nomat kanak a ne limany, ne kanak a ne npote desar i. 26Mpe ngrie ne nsor monuk yamprene ne ni kateman.
Yesus nafngamone tomwat matbolar du
9:27-31
27Nof a ne Yesus naloran Ni mpampane. Na dalamtene let e tomwat matbolar du rlarat I. Ne sir rafwayak, “Hei Daud empuny, mlwompang kam!”
28Ne Yesus nti dasar sa, ma tomwat matbolar du a ne rlarat I a nbal. Ma Yesus nenrat sir, “Ali kmi milele feti Ningw kuase ma kufngamone kmi e?” Ne sir rfalak, “Au Maken, kam malele Ko.”
29Mpe Yesus nomat matnir ma nfalak, “Kmi milele Yakw mpa mikeban lo farlan ma milele Yakw ne.” 30Ntabw nof a ne sir rakeban desar. Ma Yesus nose nteri sir ma rasaur desar ngrie ye ber tomwate fen lese nbal. 31Nempa lama rbali sir e rasaur monuk ngrie ne na yamprene ni kateman.
Yesus nafngamone tomwat momou sa
9:32-34
32Noak ma tomwat matbolar du a ne rbali sir e tomwatar ror tomwat momou ma smwangat yatak nsung i a ne ber Yesus. 33Ne I natian kalin smwangat yatak nof tomwat momou ne. Ntabw nof a ne i natanuk desar. Mpe tomwat ngayadin ma ramin iane rampriang ma rfalak, “To lain sa ma tsalan ngrie ma farye na nus Israel a fuky.”
34Nempa tomwat Farisyar a ne rfalak, “I nal smwangat yatkar nir ulun ni kuase la natian smwangat yatkar.”#Mat. 10:25; 12:24; Mrk. 3:22; Luk. 11:15
Yesus nlompang desar tomwat ngayadin a ne
9:35-38
35Mpe Yesus nmpan a nlole nof kotar sa ma nti kotar sa, ma pnuar monuk na propinsi Galilea. I naftutu tomwat Yahudyar na nir das sampangar. Ma nafwibar Ibar Ngamone feti keta Ratu neluk Rai ma nfarete tomwatar. Ma I nafngamone nbal tomwatar rof nir maningkyar felnir mpane.#Mat. 4:23; Mrk. 1:39; Luk. 4:44 36Noak ma Yesus nsalan tomwat ngayadin a ne, I nlompang resi sir. Fali nir susar yadin ma to kekes ma rtulung sir. Ma sir farlan dombayar ma to nir mangajake.#Bil. 2:17; 1Raj. 22:17; 2Taw. 18:16; Yeh. 34:5; Za. 10:2; Mrk. 6:34 37Mpe Yesus nfalak tnyanuk pupule ber Ni manglartar, “Let isnir ma keta tal ye yadin desar nempa mangkaryayar lan du. 38Mpa ka mtyak myof lete nruany ma ntafal mangkaryayar nema ral let isnir ye.”#Luk. 10:2
လက္ရွိေရြးခ်ယ္ထားမွု
Matius 9: YMD
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© Yayasan Pemberdayaan Masyarakat Desa © Wycliffe Bible Translators, Inc. All rights reserved.