Marcos 10
10
Jesús ijwi'il siunie i'nio' ti iyo ka ileyi jana jik'iemjla
(Mt 19.1-12; Lc 16.18)
1Jesús yam'ne ti tajla'm siujlieja Capernaum, ti teje 'niji siujlieja ajnat Judea, siu'neje jawa ajnatis iniwajleje'n ja tewuk Jordán. Sekyi'i ti initajayi'iji papo i'nio', jike' iyont'iyiji'nijpe jla'am ti 'yiyasajne'n papo i'nio', 'yina pak iyoyi. 2Po' papo Fariséojos ijioyi ja Jesús ti jla'm iyo ka ijnejlitis, i'yasayisin'ni ti iyo'ate:
—¿Ma 'esiji ni i'nio' ka inleyi japa jik'iemjla?
3Jesús isiujlie ti iyo'ate:
—¿Ten siupa Moisés ijliuye'ase'm ka woyeyi?
4'Yina iyoyis'ne 'ate ti isiujlieyisi pet:
—Moisés iwijna'm pa ti iyo ka inleyi japa jik'iemjla, jak je iyoyi ka je inlesaneje k'iye pa jip'esinik, siupa ti ijwi'il ti inileyi japa jik'iemjla.#Deut 24.1-2
5Jesús iyo 'ate:
—Tepa jawo pa Moisés ka je inlesane niwak inamtis t'ipi, 'yina ti int'onie. 6'Yina jlampet ti 'nelanjie'e ti k'iejli poye niwa wask'i'nelaja, “Sinia' ilisane ni ayinie siu'neje jana asejnia, ti sa'm ti i'niots'e'm.#Gén 1.27 7'Yina nak jant'emina ti siunie i'nio' jantajla napo jiniewot ti jani'nopijieteje jana jik'iemjla, 8jak je iyoyiji 'yiniyijna'a ka injwanjli ni i'nio', napoka ti times.”#Gén 2.24 Ijiatjliyi je pa timesie', 'yina ijwienjliye. 9It'imina ti je 'esiji ka ilan wita'm ni i'nio' siunie Sinia' pajk'i ti 'yupijiet wita'm.
10Jlampa 'yakamajayis'ni ji'wet'e sekyi'i yikiajlayisi'iji ti i'yasis'ni ja jika anechiyasis ka injwejla'm kiaka, ki iyo ti 'nelanjie'e. 11Jesús iyo'ate ti isiujlie:
—I'nio' ni janleyi jana jik'iemjla, 'yina janeyi jana jikiecha, yija'm ni siunie 'nojieye 'yina jitis poyi ilia'm jana siojona iniajnat jik'iemjla. 12Jlampet ti janaka asejnia ti takaleja'n, kia'iyo yija'm pet siunie jimawo ti je 'es, ti ikajyi'n siunie jijwa'ajiye.#Mt 5.32; 1 Co 7.10-11
Jesús jikio' yink'i ape'e papo kia'lis
(Mt 19.13-15; Lc 18.15-17)
13Sekyi'i Jesús titiuniejanijipi papo kia'lis ka jikio' nenk'i ape'e, 'yina siojopo t'eyasajnas 'yakawonisi papok i'nio' ti itiuntiejesi'ni. 14'Yina siuti Jesús i'winayiji jwesie'ne, sekyi'i iyone'ne 'ate japo t'eyasajnas:
—Ena'yate, ká atoma'ni k'iye napo kia'lis kajnoyisk'i. Kajeyepa ti siunapo i'nio' yiji nak Sinia' jika anechijiayas kia'iyo 'napoka siu'napo kia'lis. 15Siu'nie jayoyi ijiatk'i, ti siunie i'nio' kiak ja ke iniwone 'ate iyo ni kia'le ti janki'm ilia'm ni jika anechijiayas ni Sinia', 'yina naka ja ke 'noyi.
16Sekyi'i isima kiajwe papo kia'lis ti its'iewijin'ni, jla'yi ti jikio' yink'i ape'e ti iwijna'm pa 'es.
I'nio' siupa jwajla'a i'wi'in i'yase'n pa Jesús
(Mt 19.16-30; Lc 18.18-30)
17K'iejlijimpa iyoyeyipi kanek ja Jesús, ti yiyejenipi paka pa i'nio' ti t'osi'yi ape'e, t'akosjlete'l itiyeyijin kiajwe ti i'yase'n ti iyone 'ate:
—'Ni ika'niona ti i'nes, ¿tepat'e ka iniwontaja ka yija'm pet jana i'wiesankiye ti t'o'n?
18Jesús isiujlie ti iyo'ate:
—¿Yot'iyi'ni ti jijwe'el ka ts'es? Jlam'ne ijwienjli jla'am pa Sinia' ti ijiate ti 'es. 19K'iejli je 'najane siuniwa Sinia' iyojonk'iye ka tiwoki, siuniwa ti iyo'ate: “Ká akalanki, ká 'o'ni, ká akajla'n, ká awo sintiyeja'm napo a'lejwas, ká ak'emijiet ni akiecha, 'esiji ka i'namaja ni ana' et kia'iyojliyi 'niji.”#Ex 20.12-16
20Iyo'ne 'ate pa i'nio':
—'Ni ika'niona, siuti awo jwemik jlasa, ta'ape ti awoyi, 'yina lajk'ipa ka iniayi'i niwaka.
21Jesús siupi jitiej iyone ti i'yejne'n, 'yakaja'a ti yimi'n pak i'nio', sekyi'i ti iyonayi 'ate:
—Ijwienjliyi siunie jinia'yi. Maj, wen'ni wikie'eyi siuniwa yi'a akijmatis, sek jane'yi siojopa ja lajaye jawenajamna'a pet napo p'ijliusis. 'Yina je ijiat ka je ajwos pet niwa ja akijmatisa ts'iji poliyi. Sek jane'yi ka namana'a, ti ja najmin'ni ijyik'i pa jajiojwi.
22Siupa i'nio' ti ipi'yaye ti kia'iyo sekyi'i je ijwiyeyiji'ni, lapakawo ti ijiatt'iyijpe ti jwajla'a i'wi'in paka i'nio', paj ti yamat'ipi, ejlo'o wek pi iyo ti jijliak'ali.
23Jesús jitiej itieteje papo i'nio' nojwajap, sekyi'i ti kiak iyonayiji japo t'eyasajnas 'ate:
—¡Ijiat ti ti'nita wat k'iye siunapo i'nio' jwajla'a i'wi'in ka 'noyi ni Sinia' jika anechijiayas!#Pr 11.28
24Kiwak jlamtis iyone ja Jesús yisi'lietk'i japo t'eyasajnas, 'yina kiak t'ipa iyonayiji'ijyi 'ate:
—Kia'lis, ¡ijiate wat ti ti'nita ka t'oyeje ni jika anechijiayas pa Sinia'! 25Ataj kiam kiu' amitayi siujlie'e ti kia'iyo tiwak'i ape'e jikiayi kosoki po' ti kia'iyo je int'ayiji'n ti ja ke ijnolk'i ka 'noyi jana jitiete ni k'itie'en kajeyepa ti je jlase'. 'Yina ti kia'iyo ti jla'm ijiatayi ti ti'nita naka i'nio' ti jwajla'a i'wi'in ka 'noyi ni jika anechijiayas ni Sinia'.
26'Yina siojopo t'eyasajnas ti ipi'yayeyits'iji, kat'ajat'iyijpe pa iyoyisi kawojlijinisipi pa, 'yina jla'am ini'yasisie, ti iyoyits'i 'ate:
—¿Tent'ipa janjwa'a jla'am, siuti kia'iyo?
27Jesús jitiej yikiajlayi, sekyi'i ti iyonayi 'ate:
—'Yejne'n, siuti sa'am ti i'niots'e'm je kasts'ajane paka iyonaja naka, 'yina jlampet ti naka Sinia' lajk'ipa ka inayi'i pa ka je 'najane pa ka wone.
28Sekt'i tajla'ape ja Pedro ti iyo'ate:
—Siuti 'nelanjie'e anamajape ajak'i, jlam sek alekieyi'i jiwek jawa sikijmatis.
29-30Jesús iyo'ne 'ate ti isiujlie:
—Ijiatk'i siunie jayoyi, ti siuti japoye siunie ti janajmin'ni ijyik'i, ti naka jla'am ni Sinia' jika'niye ti 'es ti iyoyi, 'yina ti iliyi jiwek seka'a japa ji'wuk, siupapo ji'niayi ijwienjliyi, siojopa jlet jinia' kia'iyojliyi, ni'ne ka jilisa' papo, jika ajnat, awo'ate siuti je t'ekijli'ijyi ape'e 'ni ajnat 'yina jlajma ijiatayijijna'a pet ti janjwos niwa ji'wukila, janjwos napo ji'niayi ijwienjliyi, janjwos napo jiniewota, jika ajnatis kiak iwojliyinie'e, jilis janjwos, 'yina jla'm janajataja pet siunie ja tiwonaja ti ja titieye ilia'm. Ma ja jejliye pet ti siunie jloma jana'am siojona ji'wasankiye ti t'o'n jantaj ni i'nio'. 31'Yina awo'ate ti siu'nie jloma je pini' siunapo inian'ni, napok ja'wanjliyek'i'yi pet isia'am, 'yina jlampet siunapo 'wanjlik'i isia'm ti kia'iyo 'loj, napokaye'eje pet ti janan'ni.
Jesús 'najapejayiji ti inijwel'ni ti ja tiliana
(Mt 20.17-19; Lc 18.31-34)
32Jesús pa yamisk'i'ni ti ijioyis 'niji jlaja Jerusalén, 'yina Jesús iniajnin'ni k'iye japo t'eyasajnas. 'Yina kawojlijinipi japo t'eyasajnas ti i'winis ti je k'iejliyi paka woyi ka int'as isia'm, jlampet siupapo 'wanjli isia'm je ijwiyisk'i. Sekyi'i ti tanayi'i japo t'eyasajnas ti i'nialkit, ti ijwijla'm siupa jiliaye jawoyi ti ja tiliana. 33Kiak t'ipa iyonayipi 'ate:
—'Yejne'n, siuti ajok 'niji yi'i jana Jerusalén, ja pakayeyi siupa ti I'nio' Jlas ja tekiajla kiojyi napo i'nio' pa'yijis jika anechiyasas, napoka 'neje jla'am siunapo jiwos pet na Moisés jika'neyasajnaye. Jawoyisink'iye ka inlanis, sekjane'yi ka inekiajlayisinie'e napo i'nio' Roma jlele. 34'Yina napoka ti janlakiyis, siu'neje ti janjwats'iunisk'i'ni, napoka 'neje napo ti janajask'i'ni, janeyi ts'iji janlanis. 'Yina ja jlama'ne pet ni jawoyi jlomas najape puwa janejyi, ka inapiliena'a pijia'm ti jantajli ni a'no'.
Siupa ti'yasane papo Santiago jla'yi pa Juan
(Mt 20.20-28)
35Siojopo Zebedeo jilis, Santiago jla'yi ja Juan yiyisiapen'ni ja Jesús, ti i'yasisi'n ti iyonisi 'ate:
—'Ni Saka'niona jla'm ajok'ia, awoktajank'iye ka je ents'e'm siunie ja'yasanaja.
36Sekyi'i ti Jesús i'yasaja'm japoka ti iyo'ate:
—Jejlikiamaye kiu' siupa jajwela'.
37Sekyi'i iyoyis'ne 'ate:
—Awoktajank'iye ka iwieki'najap siuka atie'ejenna'a siunie iyo ni aka anechijiayas ti je jlase' ni jijweye, janjwanjli ni jantome ajweyeje, jikiecha ni jantome a'lame, 'nakayi ti kiak jayoki jayok anechiyasasa'.
38Jesús isiujlie ti iyo'ate:
—Je 'najanayi ni siunie ji'yasanayi. ¿Jot'i ka akajlajyi ti ja'yayejyi pet siunie ja si'yayinaja ti pajyi? ¿Jot'i ka akajlajyi ka anilayitieyi siunie jawo ti ja a'tiejak'i, ti ja'yakajli ti janilayiti ya'am?#Lc 12.50
39Isiujlisie ti iyoyists'i 'ate:
—Ja'yakajlaje.
'Yina Jesús iyone'ne 'ate japoka:
—Ijiate, siuti asa'am 'wena ja ke awoyeyi, jawoye 'ate awo ti akajli ti ja'yaje siunie pajyi, siu'neje ti ja'yakajli ti janilayiti ti siunie a'tiek'i. 40'Yina jlampet siunie ji'yasanayi ka yinajyi'n 'niji ijwiyeje, i'lieme 'neje, nak je ts'ajane paka iyone 'yaka je tijnak'i'm ka kia' iyone pa. 'Wenajliyi jla'am ni Sinia' ti 'yijene pi iyone ti janekiajle pa ka ne'ne siuniwa iyo jla'am ka ine'nik'i ti jla'am ti iwiakajlanit k'iye.
41Jak je iyoyiji siojopo t'eyasajnas 'neje itijwa'm sikioye, ti 'yijenayisi pi iyonisi japo Santiago siu'neje ja Juan siupa iyoyisi, sekyi'i jwesiejayisia'm. 42'Yina Jesús ijwienjli iyo'me'ne ti tanayi japo t'eyasajnas, ti iyone 'ate:
—'Yejne'n, je int'ayeyiji'n wikie'eyi siunapo i'nio' yi' ape'e 'ni ajnat, siupapo jika anechiyasas je tasa'ne, kajeyepa ti jla'am ti isie ape'e. 43Siuti asa'am ja ke poyena'a paka kiak iniwone 'ate iyo ni iniwonisi. Siuti japoye ni i'nio' ti kiak janiwone ti jani'najnatk'i ape'e napo ijia, 'esiji kanwo ijia jikawoye. 44'Yina jlampet siunie iyo ka awoyeyi aska anechiyasa', nak kiak jawo 'esiji ka iniwojwa'n askipinikie' ti asa'am. 45Siunie I'nio' Jlas ti 'nes, je na'am ka woyi jikawosa' napo i'nio', 'yina 'wenajliyi jla'am ti iniwojwa'n inkawoye,#Jn 13.12-15 siu'neje ti inilayiti ti iniwe'n ape'e siojopa 'najlati iyo lapakawo ti iyo ka injwajiete'n napo i'nio' ti je pini'.
Jesús i'wijnajne'n pa i'nio' talok jle' iyo'ate Bartimeo
(Mt 20.29-34; Lc 18.35-43)
46Jlampa 'nesa'ni yi'i jlajak isi' jle' iyo'ate Jericó, 'yina paj ti iyoyet'iyi'ijyi ka nek'ni, jlam papokajle papo i'nio' ti je pini' ti yamk'i. Sekjimpa yiye'epe paka i'nio' ti talok jle' iyo'ate Bartimeo, Timeo jlas, ti yijin'ni jikiuts'i pa 'nayi ti jikio' ijiets'i'ni papo i'nio' ti iyota ka tiwok ji'wajieta'. 47Je 'es jla'am ti ipi'yayek'i'ni papo i'nio' ti jitiej ijiutisie ti jaka Jesús ti sek 'nejts'e, Nazaret jlele. Sekyi'i ti tanat'ijyin'nipe k'iye ti iyo'ate:
—¡Jesús, David jika kia'le, sip'elisi'n wata'a!
48'Loj papo ijliutieje'ni ti iyone 'ate:
—¡K'iu'wate!
'Yina je iyo ka ink'iuye papo, jlam yinjliyi ape'e ti iyo'ate:
—¡Jesús, David jika kia'le, sip'elisi'n wata'a!
49Sekyi'i Jesús yajapaja'n ti ipi'yayeyi, 'yina iyo'ne 'ate:
—Mayeyi, toniemit.
Sekyi'i ti yamat'iyisipi, iyonayisi 'ate ti ijliuyisie'ni:
—Jwajla'a wat paka wo. Naj, kasit, jomet, jon kajoyi sie Jesús.
50Jlam sek itietayi'iji'n jiwek pa ji'wu', lapakawo ti jlam sek taj'le ti yamat'ipi ti tikiniejayi ti tokiji ja Jesús. 51Sekyi'i Jesús i'yasaja'n ti iyone 'ate:
—¿Tek'iayi, pa k'iejlit'iyi pa jiwo ka iyo'na?
Isiujlie ti iyo'ate:
—'Ni Ika'niona, awotajank'iye pet ka 'wijne'n.
52Sekyi'i Jesús iyone'ne 'ate:
—'Esiji. Maj ka api. I'nes lapakawo ti atankiujnieye po' jiwekie'e.
Ka kia'iwo ka paja'ni ape'e paka talok ti i'winaja'n, je iyo ka lek'i ja Jesús ti ijliasa'aja.
လက္ရွိေရြးခ်ယ္ထားမွု
Marcos 10: CRT97
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Nuevo Testamento en Chorote © Sociedades Biblicas Unidas, 1997.