Marcos 9
9
1Jesús iyoyejempe'eje 'ate:
—Ijiatk'i siunie jayo ti jajwi'lase'm, ti siuti asa'am ti jleye'ne ti ajwel 'nakayi japoye napo ja'wasanaja'n ka netieje janak siojona jloma ti jane met ni Sinia' jika anechijiayas siu'neje ni jijweye ti je jlase'.
Jesús initataja'm pa jloniye ti 'es
(Mt 17.1-13; Lc 9.28-36)
2Ijwienjli sikio' itij'we ijwienjli tom'niji puwa jlomas yam'niji, Jesús ijio ape'e siojopa tikijnaki toj pijia'm, ti i'nialkit japo Pedro, Santiago, jaka 'neje ja Juan, ti ya'am.#2 P 1.17-18 'Yina pakayi ti i'winisieje ti initataja'm siupa jloniye kiecha. 3Jak je iyoyiji siupuwa ji'wuye intaj je ijwi'yi 'yaka isis jla'yi ti ijiat ti lemiyi. 'Wanjliyi 'neje ka kiak iwone ka ijiatayiji ka inlej paka ji'wuye, 'yina ja ke ijnojliji pa k'iejliyi. 4Sekyi'i i'winis pa Elías, Moisés 'neje ti takamtijnienisi ja Jesús. 5Pedro iyone'ne 'ate ja Jesús:
—Inka'neyasajnayewo, ¡'esp'an ka je itiajla'a'na! Jalisanajajna'a puwa najapeja as'wuki'l jilisa', jajwanjli japa jajna'ya'm 'ni Ika'niona, jajwanjli 'neje japa jajna'yi ni Moisés, 'yina jikiecha 'neje japa jajna'yi ni Elías.
6Lapakawo ka kiak je iwo ja Pedro iyo jiwek siupa iyo ti tamti, siu'neje japo ijia 'yina ti jnots'ijnits'i.
7Jlampa iyoye 'ate japak poli ti na'm isia'm 'yina siupa jipe'el paka ti ip'io'n ape'e. Sekyi'i pesiejayi pa ina'lap tojma'm ti iyo'ate:
—'Nak yas ti ijiat ti ts'amaja.#Mc 1.11 K'iuyeyi.
8Sekyi'i ti i'yenatajas jijwayisk'i kan'wene papo ka inkasitiape'n, 'yina ijwienjli jla'm ja Jesús ti i'winisi.
9Jlampa yapilieyis ajnat'e, Jesús iyone'ne 'ate japok t'eyasajnas:
—¡Ká ajwelanie'e siukia iyo ki ji'wena'! Ijiatjliyijna'a ka inotie kisie'e ni I'nio' Jlas, jiwekie'ajana'a ka amtiyeyi.
10Ijiatjliyi, kiaka'ne siukia ti je iyo ka intanisi'ni, 'wenajliyi ti jlamis jiwek jla'am ti 'yijenisi pi iyonisi kiaka, siu'neje ti 'yotatis. 'Yina ejlo'o jiwek ti ininekiajlisi ti ini'yasis, ti iyoyis 'ate:
—¿Tepat'e iyo siukia ti iyo'ate, “I'nio' Jlas jano kisie'e ti jantajli ni a'no'”?
11Jak je iyoyiji ti i'yasayisi'n ti iyonisi 'ate:
—¿Yot'iyi'ni siunapo taka'neyasane ni Moisés jika'neyasajnaye, ti ijwi'il pa Elías pak jana'an ti ja'nes?#Mal 4.5; Mt 11.14
12Jesús isiujlie ti iyo'ate:
—Ja ijiatayi, siunie ti Elías jana'an ti ja'nes, 'yina janakaye'ne siunie ti ja'notatk'i wikie'eyi siuniwa wask'i'nelaja. ¿Tempa it'imina siuniwa inamtis ti ijwi'il pa I'nio' Jlas ti ja wujwa ti janilayiti siupa ja tiwonaja, siu'neje ti jawoyisi jiliakikie? 13'Yina ya'am ajwe'lase'm ti Elías pajk'i ti 'nes, itimisi siukia iyo kanwonisi, iyo niwa inamtis siukia jiwet'ia jawoyi.
Jesús ijwiejiet pa jwemik jitiej je 'es
(Mt 17.14-20; Lc 9.37-43)
14Jlajmiliet, siuti yapilieyi siupa yi'i japo t'eyasajnas ijia, sekyi'i i'winayi papo 'nak nojwa'm jiwos pet pak Moisés jika'neyasajnaye ti iniewitiji'n japo t'eyasajnas. 15Jak je iyoyiji ti i'winayis ilia'm ja Jesús, jlam jnots'inayijits'i'ni, sekyi'i t'osiyeyis ilia'm ti itijwilisie. 16Jesús sekyi'i i'yasa'm ti iyo'ate:
—¿Ten siupa jinitajlatayi ti jiniewitie?
17'Yina tamtiye siupa ijwienjli yits'e yiji papo i'nio' ti iyo'ate:
—Ika'neyasajnayewo, anamtaja'ajajyi 'ni yas, tiwet'ia, siupa iliaki iyojwa'n 'ne'liaja. 18Yi'iji siupa yi'i, ti yiyetaja iyone jla'am pa iliaki sek itietayi'iji 'neje, 'yakaja'aja ni jisiep ti tal jikiwitk'i, sekyi'i ti jikinte yasa'aja, 'yina jiyel initiajnata'aja, je k'asayik'i. Ajotiejeje'ijyi napo 'eyasajnas 'yina je ikajle'n inta ka inojwa'n kisie'e siupa iliaki.
19Sekyi'i Jesús iyo'ne 'ate ti ipi'yaye ti kia'iyo:
—¡Ijiate wat 'napo yi'ne, kakiujnietasat'itie'ase'm! ¿Jot'i ja k'ieyeyik'i'ni ka yi'asap? ¿Jot'i ja k'ieyeyik'i'ni ka inilayit'i aselia'm? ¡Maj! Mayeyi pa jwemik. Namayi'ne.
20Ijiatjliyi tikiniejayiji pa jwemik, 'yina siupa yiji pak jwemik siuti i'wina ja Jesús, sek itietayi'iji'ni jiwek, jlam sek topatits'i'ni sekyi'i 'yakaja pa jisiep tal jikiwitk'i. 21Jesús i'yasen'ne siupa jinia' pa jwemik ti iyone 'ate:
—¿Mi pajk'i ki iyo 'ni jiwet'ia?
Isiujlie ti iyo'ate:
—Jlam kia'iyo ta'a ti samjlie'e. 22Je ijwienjliyiji ka je inoyi'ni jwata'm, yi'i pa jloma ti iniuyijyi'n pa i'niat, iyone jla'am siupa yiji ti iyo ka ila'an. It'imina ti ka 'najane wat paka wone, kasp'elisi'n, noyits'e'm.
23Jesús isiujlie ti iyo'ate:
—¿Yot'iyi'ni ti a'lej kiak jiwone ti jiwo'ate: “Ka 'najane wat paka wone”? ¡Siunie i'nio' ijiate ti jitienkiujnieye po', jwajla'a je t'o'ni k'iye!
24'Yina iyo'ne 'ate pak jinia' pa jwemik ka kia'iwo ka inilaki:
—¡Je akakiu! ¡Jakajliete, noyijk'i'm 'nakayi ti ja ijiatayiji pet ti ja itienkiujnieye poye!
25Jesús i'ye'en ti 'loj papo i'nio' ti ikapajle, sekyi'i ijyijlitayi ti ijliu' kisie'e paka imosik ti yiji pa jwemik, ti iyone 'ate:
—¡Imosik ti je pechijien'ni jla'yi ti jiwojwa'n 'ne'liaja 'ni siu'nie jwemik, tal 'naka'a 'yina ká ekiajlena'a ka 'ojia'm 'ni jwemik!
26Sekyi'i ti tajwiyeje'n siupa imosik, 'yina yikiajlayi'iji ti itiete pak jwemik ti jiwekie'aja t'ipi ti tajli, 'yiniye ka ijiatayi ka 'na'al. Jak je iyoyi siupapo i'nio' ti i'winayis, sekyi'i iyoyis'ne 'ate:
—Ijiatp'aneje ti 'ya'al.
27Jlam'ne ti siuti Jesús isima jikio'yi inijien pijia'm, 'yina takasitie pa jwemik.
28'Yina pa yit'i'yipe puwa 'wukiu'l pakayik'i ti Jesús pa yiyits'i, siojopo t'eyasajnas jla'am i'wi'in ti 'najli pa yiyits'i, sekyi'i ti i'yasayisi'n ja jika anechiyasis, ti iyonisi 'ate:
—¿Yot'iyit'i'ni ti je akajla paka siupa yiji jak jwemik?
29Jesús iyo'ate ti isiujlieyi:
—Siuti kia'iyo ti yiji pa, nak jikie' pet ni 'najlaye.
Jesús yikiajlayi'iji ti ijwi'il ti ja tiliana
(Mt 17.22,23; Lc 9.43-45)
30Siuti yama'ni ti tajlayits'i siupa yiyits'i, 'yina iniuyeyis 'niji yi'i jlajak Galilea. 'Yina Jesús je iyo ka t'ijieyeje siupa yi'i. 31Lapakawo ti jla'am 'yakatatjliyi ti 'yiyasajne'n japo t'eyasajnas ti iyone 'ate ti ijwijla'm:
—Siunie I'nio' Jlas ja tekiajla jikiojia'm napo i'nio', siunie janwonisi ti janlanis. 'Yina ja jlam'neja pet siunie jawoyi jlomas janajapeja ja inoyena'a kisie'e ti jantajli ni a'no'.
32'Yina siukia iyo ti tamti, siojopo t'eyasajnas ti je itijnisisk'i, 'wenajliyi ti isipits'i ka in'yasis'nine.
“¿Tepat'e yi'i siupa ti jwajla'a iyo'ni wat?”
(Mt 18.1-5; Lc 9.46-48)
33Siuti 'nesajan'nipe yi'i jlajak isi' Capernaum, jlampa 'yakamajan'nipe kiu' wat ji'wet'e, sekyi'i Jesús i'yasaja'n japo t'eyasajnas ti iyone 'ate:
—¿Ten siupi jiniewitayi ape'e 'najk'i?
34Ka jikiwita pa japo t'eyasajnas, jlam'ne siukia iyo ti itiajlatis ti iniewitis, ti iyoyits'i 'ate:
—¿Tepat'e yi'i ti siupa jwajla'a iyo'ni wat jla'am?
35'Yina Jesús yiyeje'n, sekyi'i ti tanayi japoka itijwa'm sikioye times tom'niji t'eyasajnas ti iyone'ate:
—I'nio' ni iyojonk'iye ka jlama ka inajne'n, nak janitojmate pijiame, siu'neje ti janiwojwa'n ijia jikawoye.#Mc 10.42-44
36Sekyi'i ti isimayi pa kia'le ti yin jikiowe'e japo, ti its'iewijin'ni. 'Yina iyo'ne 'ate:
37—I'nio' ni jane'yi ni janki'm ilia'm ni kia'le 'ate iyo 'ni siu'nie, lapakawo ti janakaye jla'am ni yi'i ti janeyi, kia'iyo lapakawo ti je 'wena paka inki'm ilia'm ya'am ti isi'm ijyilia'm ni i'nio'. 'Yina je yamkata ka inki'm ijyilia'm, kia'iyo isi'm ilia'm ni siunie sijliu'.
“Siunie ti je teje selia'm, nak tal siwa'm”
(Mt 10.42; Lc 9.49,50)
38Sekyi'i Juan iyone'ne 'ate ja Jesús ti ijwijla'm
—'Yaka'niona, pope ja i'nio' a'wena ti inineti'najape ti yokiosk'i kisie'e puwa yijits'i japo i'nio'. Je 'es jla'am ti a'wena ti je tal siwa'm, sekyi'i je enaja 'ate ka woyi. 39'Yina Jesús isiujlie ti iyo'ate:
—¡Je'e, ena'yate! Kajeyepa ti siunapo ti setijnape ti i'winki'n siuniwa ti yisi'lietk'i napo i'nio', ja ke inets'e ka ke ineyi ts'ijiye ka injwe'el ka je ts'es. 40Kajeyepa ti siunie je teje selia'm, naka 'neje ti tal siwa'm. 41Ijiatk'i siu'nie jayoyi, ti siuti po' ni janwe'nase'm ja ke tiwet'ianaja ka i'niata wek paka a'yayejyi, lapakawo ti janakaye jla'am ti ini'nopijietak'i, ijiate nak japoye pet ni jatena jikiojyi.
Jiliaye ni i'nio' yija'm ni jike'
(Mt 18.6-9; Lc 17.1,2)
42“I'nio' ni jankajmajna'm ni jike' jane'yi pa siunapo ti lajk'iyi paka iwo ti je sakakiu, 'ate iyo siu'nie kia'le, nak 'esiji ka tilie'nitie ji'woyi siojona sisaj ti kiojieti, sekjane'yi ka titietayi ni i'niat lajlik'i. 43Siuti ja nakaye akio' ti jant'emina ti ja ajia'm ni ake', esiti. Ja ejloye'e wek ka injwanjlik'i ni akio', 'yina lapajawo ti ja ajia'm jiwek jana a'wasankiye ti t'o'n. 'Yina ja ke i'nesi pet siuti ja'wanjliye wita'm niwa akioye, siuka kia' awotajanie'e ti ja ajyi siunie ji'wet pet naka injlak'ali ti t'o'n, naka ti je paj ka 'no'me.#9.43 Siuniwa vv 44 siu'neje 46 je yiji siupuwa inamtis t'ipi ti jlame, ti inkio' tikienaja. Siuniwa ti iyo'ate: Siunie ajnat awos ji'wet pet ti jiliaye je isie'ne, ti itiujw papo i'nio', siu'neje ni jwat ti je paj ka 'no'me (9.43,45). 45Jlampet ti ja nakaye asat ti jant'emina ti ja ajia'm ni ake', kia'iyojliyi esiti. 'Yina ja ejlo'oye wek ka asat injwanjlik'i, lapajawo ti ja ajia'm jana a'wasankiye ti t'o'n. Jlampet ti kiak jawo ja 'wanjliye wita'm niwa asatis, nak je i'nesi pet, siuti ja intataje siunie ji'wet pet nak injlak'ali ti t'o'n. 47Jlampet ti janakaye atate ti jant'emina ti ja ajia'm ni ake', lajni. 'Yina ja ejloye wek ti janjwanjli jana atate, lapakawo ti ja ajia'm ni jika anechijiayas pa Sinia'. Jlampet siuti kiak jawo jajnol wita'm niwa atate, nak je i'manit, siuti ja intataje ni ji'wet pet naka inlaye ti t'o'n, 48yi'i niwa awos ti jiliaye je isie'ne, ti itiujw papo i'nio', naka'neje jla'am ni siunie jwat ti je paj ka 'no'me.
49“Kajeyepa ti ja wikie'eyeyi napo ti ja titiusinietajajets'i ni jwat. 50Siunie sijwonie ti jitiusi 'wanjliji, 'es.#9.50 Ti pajank'ipe siunie sijwonie, pojompe siupa ti ijiat ti 'es jitiusi je ta'a ka no'we, 'yina po 'neje siupa ti jitiusi je t'o'ni (9.50). 'Yina jlampet ti jano'we, ¿tepat'e ka wona itieje ka ekiajla'yi ka tosiyeje? 'Esiji ka nitosijietajyits'ipe, 'yina nikimayi nak asts'amankiye.”
လက္ရွိေရြးခ်ယ္ထားမွု
Marcos 9: CRT97
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Nuevo Testamento en Chorote © Sociedades Biblicas Unidas, 1997.