Mateo 28
28
Jesús iniu kisie'e ti tajla'm pi a'no' (Mc 16.1-8; Lc 24.1-12; Jn 20.1-10)
1Yam'nijiye jakiak jloma i'nio 'wanjlijyi'n, jloma 'yakaja'n jiwek siojokia jloma inia'ne jla'a inkijmaye, María Magdala jleliki siu'neje jlaja María 'neje, yama'nijpe ti i'yenisi ki a'no'. 2Kawojliyisi pa jakayi ti ajnat ti'wesiye ti pansak'iyi, jakap'anijpe ti nama isia'm ni injlojwanik, Sinia' jijliujwanik ti tal poliyi, ti ijiots'e yi'i ki a'no'. Yiyi ja a'no' ti 'yumaja t'ipi jakia sisaj ti tip'onatajaja'm, sekyi'i ti yiyejen'ni ape'e. 3Ataj ena 'ate ni tak'ajyi ni iyo ti 'esi', kia'iyo jak injlojwanik poli jlele, siojowa ji'wuye iyo pet 'ate ni wi'yit. 4Siojopo tokis ti i'winayis kititiyeyis'ni lapakawo ti je ijwiyisie, jlam sek iniuyeyi'ik'iji'n jiwek, 'yiniye ti ijiatayi ka 'najle'n. 5'Yina injlojwanik poli jlele ijliuye'ni japo asejnia ti iyo'ate:
—Jweyitiejyits'i. Ts'ajane pi awone ti jak jiwoyetajyin'ni Jesús, ja tik'iejwata'a jlaja cruz. 6'Nak je yi'i. Iniu kisie'e ti tajla'm ni a'no', siojo iyopi ti inijwe'el.#Mt 16.21; 17.23; 20.19 Jon ka'yenayi siunie tena'a 'neye. 7Maye'ni kets'iyeyi japo t'eyasajnas, wonayijna'a 'ate ka awayetiejenie'e, “Saka'niona iniu kisie'e. Janan ts'iji ask'ioye Galiléaja. Sek jani'wenayi'ina'a.” 'Nak ajwe'lase'm.
8Tajlayisi ja a'no', t'osiyeyijits'i'ni, ejlo'o wek ki iyo ti jnots'ijnits'i. 'Yina inkase'n jiwek ti yam'ni, ti iyo jika'niyejayi japo t'eyasajnas.
9'Yina ti yiji ki ji'niayi japo asejnia, Jesús ini'wenkijnam'ne, sekyi'i iyone 'ate, ti itijwila:
—Kamaja.
I'winis jiwek ta'a ti yamisi ti iyunitis, its'iewayisiap jawa jisietis. 10Sekyi'i ti Jesús iyonayi 'ate:
—Jweyitiejyits'i. Maye'ni ka ajwelayi japo i'niayi ijwienjliyi ka ijnoyis Galiléaja. Sek awo ka ani'wene'e.
Siupapo tokis ijwilik'iji'n pet siupa iyo pa i'winis
11'Yina ti yam'ni japok asejnia, siojopo tokis ti ti'yenkinaja ki a'no' yama'ni pet japo ijia ti ijioyis isija'm, ti takajwejlane japo pa'yijis jika anechiyasas ti ijwile siukia iyo ti i'winis. 12Initotiek'i wita'm japok pa'yijis jika anechiyasas siu'neje japo kijilas, ti iyo ka inipe'yayisi siunie jawoyisi. Wuj japa wikiniet'aj iwijna'm japo tokis, 13ti iyone 'ate:
—Kiak woyeyinie'e 'ate, “'Yina je 'esiji ti amakiet'ik'iji'n, je alata'ne ilia'm japo t'eyasajnas. Yamisi'ne ki t'ajwes ki Jesús.” 14Siuti anechiyas janjieyi, ejlo'o wekie'e. Kaspo' ala, janitojmatajayijna'a sa'am ja 'nakayi ti ja lajak'ipa ka woyeyi.
15Siojopo tokis isimayits'i ilia'm jakia wikiniet'aj, je iyo ka inkamits'i ape'e siukia tijliukieje kawoyi. 'Yina kiaka siukia ji'lij ti je ijiatk'i, siu'niwa jlomas yamjliyi ti iyoyisi napo Judíojos.
Jesús iyotajank'iye ka tikiniejeje niwa jlamtis napo i'nio' yi' ape'e 'ni ajnat
(Mc 16.14-18)
16Ijiatjliyi japo itijwa'm niwa sikioye ijwienjli tom'niji t'eyasajnas yam'ni'ne ti ijioyis Galiléaja.#Mt 26.32 Yiyis sekaja, sekyi'i ti ijioyisi ape'e siujlieja tikijnaki Jesús pajk'i ti yitine. 17Sekyi'i ti ini'wenayisi ja Jesús iyunitis'ne. Ijiate po' siojopo i'winatajas, 'yina je ijiate paka inwoyisi ka je inkakiuyis. 18Sekyi'i Jesús ijliasayi, iyo'ne 'ate:
—Inia' yikialk'i ka iyo anechiyasa' ape'e wikie'eyi siuniwa yi' poliyi, siu'neje niwa yi' ajnat'e. 19'Yina maye'ni, joyek'i'ni napo i'nio' yi' ape'e 'ni ajnat ka wo ika kia'lisa' pet. Najienajyi'n, najiene ni Inia' jle', jla'yi ni Jlas jle', siu'neje jana Inia' jikimet jle'. 20'Eyasanayi pet siunie ajloye'ase'm ka woyeyi, ja 'nakayeyijna'a ti jani'neyasanisi. 'Yina ti ya'am ajwel pet ti ja ke pajna'a ka itiaj'lase'm, paj ka ineyeyinie'e ti ajnat jano'we.
လက္ရွိေရြးခ်ယ္ထားမွု
Mateo 28: CRT97
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Nuevo Testamento en Chorote © Sociedades Biblicas Unidas, 1997.