मत्ती 22
22
पा़हमाकी डेनगी तेहन्दाला पे
(लूक १४:१५-२४)
1येशूगी येहपाराङ खुङया़ला पे च्यी़ ज़्या़दी सुङ नाङसीन, 2“किन्ज्योगी क्याहल्सीनी राहङगी पुहगी पा़हमाला डोम्बोया़ला डेन तेर्च्येला क़े क्याहप्केन स्यिहङगामगी क्याहल्बु च्यी़ ङ्याम्बु तुहर ख़ूएँ। 3ओ़ह क्याहल्बुगी डोम्बोया़ला क़े क्याहप्च्येला राहङगी योक्पुया़ला ताङ चाहङसीन। यिहॱनाङ डोम्बोया़ ओहङज्ये सेम माहबे। 4ओहले येहपाराङ खोगी लेहमेन योक्पुया़ला दि ल़ेहमु म़ेदी ताङसीन, ‘सोङ काहल्दी ओ़ह क़े क्याहप्क्योगी डोम्बोया़ला, “ता़ह छ्येके ती़हजी काहल्सीन, छोम्बु-छोम्बु सेम्ज्येनया़ सेत्ती ठाबे पेहती येहबा पा़हमाला फेप नाङदोङ” म़ेदी म़ेदोङ’ म़ेदी मासीन। 5यिहॱनाङ ओ़ह डोम्बोया़गी नाङदाराङ माहताङबा पेहती राहङ-राहङगी ल़ेहला काहल्सीन। लाहला राहङगी स्यिहङला फार काहल्सीन ओहले लाहलादी राहङगी छोङ क्याहप्च्येला काहल्सीन। 6ओहले लेहमेन डोम्बोया़गीदी क्याहल्बुगी योक्पुया़ला ज़ुङदी तुहङदा तेर्ती सेसीन। 7ओहले ओ़ह क्याहल्बु स्यिहताङगी मेहॱराङ बार्सीन ओहले खोगी राहङगी माक्मीया़ला ताङदी राहङगी योक्पुया़ला सेकेंन मिहया़ला से च्य़ूसीन ओहले खुङया़गी क्याहसाला मेह ताङ तेर्सीन।”
8 “ओ़ह तिङले खोगी येहपाराङ राहङगी योक्पुया़ला मासीन, ‘पा़हमागी डेननी ठाबे येह, यिहॱनाङ ङाहगी क़े क्याहप्क्योगी डोम्बोया़दी दि डेन साहज्येला सी़हज्ये मिहन्दु। 9ओ़ह सोङबे ख्याया़ लाहमया़ला सोङ ओहले सु सुला च्य़ेह सिहन्गे, खुङया़ला पा़हमागी डेनला क़े क्याहप्ती ख्येर-स्यो।’ 10ओहले योक्पुया़ लाहमला काहल्दी काह च्य़ेह सिहन्गे, मिह या़हबु चोक्पा थाम्ज्यीलाराङ रूदी ख्योङसीन। दि ल़ेहमु पेहती पा़हमाकी खाङबा डोम्बोया़गी काहङसीन।”
11 “ओहले क्याहल्बु डोम्बोया़ला ज़ी़ज्ये म़ेदी नाहङला फेप नाङगेमु क्याहल्बुगी पा़हमाला केहन्गेन्गी काप्च्या माहकेहन्बागी मिह च्यी़ला ज़ी़ नाङसीन। 12ओहले क्याहल्बुगी खोला, ‘ए रो़ह, ख्ये पा़हमाला केहन्गेन्गी काप्च्या माहकेहम्बा पेहती नाहङला काहन्डुमु पेहती स्य़ूहबा?’ म़ेदी टी़ह नाङसीन। यिहॱनाङ ओ़ह मिहगी च्यिॱआङ ल़ेहन क्याहप मा़हखु। 13ओहले क्याहल्बुगी राहङगी योक्पुया़ला सुङ नाङसीन, ‘दि मिहला काङबा लाहक्पा ताहम्दी फिला ना़-जुबेला क्युर चोहङ। खो ओ़हला सो मुहर्ती, ङी़हदी तेहच्यु’!”#मत्ती ८:१२; २५:३०; लूक १३:२८
14ज्युक्स्योलला येशूगी सुङ नाङसीन, “क़े क्याहप्क्योया़नी माहङबुराङ येह, यिहॱनाङ दाम्ग्योया़दी ङ्युहङसे़ च्यी़राङ येह।”
ठाल च्याल्गेन्गी तेहन्दाला टी़हदाप
(मर्क १२:१३-१७; लूक २०:२०-२६)
15फरिसीया़ काहल्दी येशू खोगी तामला च्यिॱआङ क्येन ता़ज्ये म़ेदी टे़ह क्याहप्सीन। 16ओहले खुङया़गी राहङगी स्याहप्च्यीया़ला क्याहल्बु हेरोदगी मिहया़ ङ्याम्बुराङ येशूसाला ताङसीन। ओहले खुङया़गी काहल्दी येशूला स्युहसीन, “लोबेन ला़ह, राहङगी तेहन्दामगी स्याहल च्यी़राङ सुङ नाङगे म़ेदी ङ्यिहला क्यी़ह येह। ओहले मिहया़ला लोप नाङगेमु राहङगी तेहम्बा-तेहन्सुम जेती किन्ज्योगी लाहम तेन नाङगे। मिहया़गी च्यि मारो म़ेदी राहङगी नाङदा जे मेहनाङगे। च्यिबेमाना राहङगी सुॱलाङ ङ्येम्बा-ङ्य़ेहरी जे मेहनाङगे! 17ओ़ह सोङबे ङ्यिहला सुङ नाङदोङ, कैसरला ठाल च्याल्ज्ये ठाबे यिहम्बा नि मिहम्बा?” 18खुङगी सेम चोक्पा च्याङग्योदी ङोह ख्येन्दी येशूगी सुङ नाङसीन, “ए यिहन्दो तेन्गेनया़, ङाहला च्यिबे ङ्याहम च्येकें? 19केरे ठाल च्याल्गेन्गी ङुल-टाङ तेन्दोङ ले।” खुङगी येशूला टाङगा ख्योङदी तेन्सीन। 20येशूगी खुङया़ला, “देला सुगी छेन दाङ पार दुबा?” म़ेदी टी़ह नाङसीन। 21खुङगी येशूला मासीन, “कैसरदी” ओहले येशूगी खुङया़ला सुङ नाङसीन, “ओ़हठी यिहन्सीमाना कैसरती कैसरलाॱराङ तेर्तोङ ओहले किन्ज्योदी किन्ज्योलाॱराङ फुल्दोङ।” 22येशूगी ल़ेहन क्याहप्क्यो थे़दी खुङया़ ज्यिबुराङ ह्अ ल़ेहसीन ओहले येशूला क्युर ज़्या़दी राहङ-राहङगी लाहम स्य़ूहसीन।
स्यी़दी सोम्बो लाहङगेन्गी तेहन्दाला टी़हदाप
(मर्क १२:१८-२७; लूक २०:२७-४०)
23मिह स्यी़दीले येहपाराङ सोम्बो मे़हलोहएँ माएँ सदुकीया़ ओ़ह ङ्यिहमुराङ येशूसाला ओहङसीन। ओहले खुङया़गी येशूला,#ल़ेह २३:८ 24“लोबेन लाह, मोशागी दि ल़ेहमु सुङ नाङदी येहबा, क्येप-ख्योवा च्यी़ राहङगी पेहजा मा़हक्येबा पेहती स्यिसीमाना खोगी नो़हगी आदागी तेहन्दाला पेहजा ओहङज्यु म़ेदी आदागी पी़हमीला पा़हमा पेह कोहकें।#व्य २५:५ 25ता़ह ङ्यिहगी पाहरक्यीला आदा-नो़ह पिन तिहन येहकें। आदा छ्येस्योगी पा़हमा पेहसीन, यिहॱनाङ पेहजा मा़हक्येबा पेहती स्यिसीन। ओ़ह सोङबे पुह पाहर्पागी नामाला पा़हमा पेहसीन। 26यिहॱनाङ खोॱआङ पेहजा मा़हक्येबा पेहती स्यिसीन। आहन्डा पेहतीराङ खो चो़गी नो़हया़ॱलाङ ओ़ह ल़ेहमुराङ काहल्सीन ओहले ओ़ह ल़ेहमु पेहती खुङ पिन तिहनगीॱराङ पा़हमा पेहसीन यिहॱनाङ पेहजा म़ेहबा पेहती स्यिसीन। 27ओ़ह तिङलेनी ओ़ह पी़हमीॱआङ स्यिसीन। 28ओ़ह सोङबे ता़ह स्यी़दीले सोम्बो लो़हगे ती़हजीला ओ़ह पिन तिहन नाहङला ओ़ह पी़हमी सुगी छ्युङमा ओहङगे? च्यिबेमाना ओ़ह पी़हमीनी ओ़ह पिन तिहनदीॱराङ छ्युङमा काहल सिहन्दी येहकें।”
29ओहले येशूगी खुङया़ला सुङ नाङसीन, “ख्याया़ जोल्दी तेहक्यो दुबा। ख्याया़गी सुङरापगी स्याहल दाङ किन्ज्योगी ओङगी तेहन्दाला ङोह स्य़ेदी मिहन्दु। 30स्यिक्यो मिहया़ सोम्बो लो़ह फान्ज्योनी खुङया़गी पा़हमा पेहकें दाङ पा़हमा पेह तेर्केन केच्याराङ मेहयोहङगे। खुङया़नी स्यिहङगामला तेहकेन्गी स्यिहङगामकी स्याहप्च्यीया़ ल़ेहमुराङ ओहङगे। 31-32स्यिदी येहपाराङ सोम्बो लो़हगेन्गी तेहन्दाला किन्ज्योगी ख्याया़ला च्यि सुङ नाङदी येहबा, ओ़ह ख्याया़गी मा़हटाहबा? ‘ङाह अब्राहामकी किन्ज्यो, इसहाककी किन्ज्यो ओहले याकूबकी किन्ज्यो यिहम्बा।’ किन्ज्योनी स्यिक्यो मिहया़दी किन्ज्यो मिहम्बा, सोम्बो मिहया़दी गा किन्ज्यो यिहम्बा।”#प्रस ३:६ 33येशूगी नाङग्योगी सुङदेन थे़दी मिह थाम्ज्यीराङ ह्अ ल़ेहसीन।
चा़ छ्यिम्बु का
(मर्क १२:२८-३४; लूक १०:२५-२८)
34येशूगी सदुकीया़ला तिमे ज़ोसीन दु माएँ थे़दी फरिसीया़ येशूसाला ओहङसीन। 35खुङया़ नाहङगी छ्य़ेगी खेम्बु च्यी़गी येशूला खोक्पा कोर्ती स्युहसीन, 36“लोबेन ला़ह, छ्य़े-ठिमगी थाम्ज्यी म़ेदी छ्येस्यो का का़हन्दी यिहम्बा?” 37ओहले येशूगी सुङ नाङसीन, “ख्येगी चो़वो छ्येवा राहङगी किन्ज्योला राहङगी निङ थाक्पालेगी, ऊ थाम्ज्यीगी, ओहले रिहक्स्यी थाम्ज्यीगी चेवा डुप्तोङ।#व्य ६:५ 38थाम्ज्यी म़ेदी छ्येस्यो दाङ छ्यिम्बु का दिराङ यिहम्बा। 39ओहले ओ़ह म़ेदी चो़ला का छ्यिम्बु च्यी़ येहबा, ‘ख्येगी राहङ खिम्जीला राहङला ल़ेहमुराङ चेवा पेहतोङ।’#लेवी १९:१८ 40मोशागी थाम्ज्यी छ्य़े-ठिम दाङ लुहङतेम्बाया़गी लोप्च्युङया़गी ब्राम दि का ङ्यी़ॱराङ यिहन।”#लूक १०:२५-२८
मास्यीकाकी तेहन्दाला टी़हदाप
(मर्क १२:३५-३७; लूक २०:४१-४४)
41फरिसीया़ छो़बा क्याहप्ती तेहक्यो ती़हजीला येशूगी खुङया़ला टी़ह नाङसीन, 42“थार्पा नाङगे क्याहल्बु मास्यीकाकी तेहन्दाला ख्याया़ च्यि साम्लु ताङगो येहबा? खो सुगी स़ेबु यिहम्बा?” खुङया़गी मासीन, “खोनी दाऊदकी स़ेबु यिहम्बा।” 43येशूगी खुङया़ला सुङ नाङसीन, “आहन्डा यिहन्सीमाना च्यिबे दाऊदला किन्ज्योगी थुगी मिहरोला ‘चो़वो’ म़ेदी मा च्य़ू नाङग्यो? च्यिबेमाना दाऊद खो राहङगीराङ दि ल़ेहमु म़ेदी माक्यो येहकें–
44 चो़वो छ्येवागी ङाहगी चो़वोला सुङ नाङसीन, # २२:४४ “चो़वो छ्येवागी ङाहगी चो़वोला सुङ नाङसीन” म़ेदी माक्योदी हिब्रू बाइबलला तासीमाना “चो़वो छ्येवागी” माक्यो ग्या़ला “याहोवागी” म़ेदी माक्यो येहबा। याहोवादी किन्ज्यो याहपकी छेन यिहम्बा।
‘ङाहगी ख्येगी टाहया़ला ख्येगी काङबा चो़ला छ्यि मा़हच्यु थु
ख्ये ङाहगी योबा ङो़ले तेहतोङ’।” #
भज ११०:१
45 “दाऊद राहङगीराङ मास्यीकाला चो़वो म़ेदी मा फान्ज्योनी काहन्डुमु पेहती मास्यीकाला दाऊदगी स़ेबु म़ेदी मा ख़ूएँ ले?” 46यिहॱनाङ सुज्यीगीॱआङ येशूला ल़ेहन क्याहप मा़हखु। ओहले ओ़ह ङ्यिहमा यिहन्ज्यु सुज्यीगीॱआङ येशूला ताम टी़ह मा़हखु।
လက္ရွိေရြးခ်ယ္ထားမွု
मत्ती 22: HYLM
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2023 (Active), Wycliffe Bible Translators, Inc. All rights reserved.