मत्ती 21
21
यरूशलेमला येशूला ज्यिबुराङ चा़ पेहती फेप स्युहक्यो
(मर्क ११:१-११; लूक १९:२८-४०; यूह १२:१२-१९)
1यरूशलेम क्याहसाला फेप-फेप्पा काहङला खुङ फ़ेबेॱया यरूशलेम पोहगी जैतून काहङला येहकेन्गी बेथफागे माएँ ग्या़ला लेप नाङसीन। ओ़ह ग्या़ले येशूगी स्याहप्च्यी ङ्यी़ला दि ल़ेहमु सुङदी ताङ नाङसीन, 2“ख्या ङ्यी़ ओ़ह फार्केन देपकी युहलला सोङ। युहलला स्य़ूहलुङ म़ेहबा ख्याया़गी पुहङगु पी़हरु आमा ङ्याम्बुराङ ता़ ज़्या़क्यो च्य़ेह सिहन्ज्ये येह। ओ़हया़ला ताङदी ङाहसाला ख्येर-स्यो। 3का़हलेॱआङ सुज्यीगी ख्याया़ला च्यिॱआङ मासीमाना ‘चो़वोला दिगी कोहपु येहबा’ म़ेदी म़ेदोङ ओहले खुङगी लाहम्साङराङ ताङ चाहङज्ये येह।”
4लुहङतेम्बागी सुङरापला प्रुहक्योगी दि स्याहल तेहन्दा डुप्च्यु म़ेदीराङ दि ल़ेहमु काहल्ग्यो यिहम्बा–
5“सियोन#२१:५ सियोन : माएँदी यरूशलेम क्याहसाला माक्यो यिहम्बा। जक ९:९ साने़की मिहया़ला म़े तेर,
‘त़ेदोङ, ता़ह ख्याया़गी क्याहल्बु छ्यिम्बु फेप नाङगेराङ येहबा,
मिहरो स्यिहवा जे-नाङदी पुहङगु खाला स्येहन्दी फेप नाङगेराङ येह,
मिहरो पुहङगु पी़हरु थो़ला स्येहन्दी फेप नाङज्ये येह’।”
6ओ़ह स्याहप्च्यी ङ्यी़ काहल्दी येशूगी सुङ नाङग्यो ल़ेहमुराङ पेहसीन। 7खुङगी पुहङगु पी़हरु आमा ङ्याम्बुराङ ख्योङदी ओहङसीन ओहले पुहङगु थो़ला राहङ-राहङगी काप्च्याया़ तिङसीन ओहले येशू ओ़ह थो़ला स्येहन नाङसीन। 8मिहया़गी राहङ-राहङगी काप्च्याया़ पित्ते लाहमला फार तिङसीन। लाहला मिहया़गीदी तोहङबोगी याहल्गाया़ च्या़दी लाहमला तिङसीन। 9येशूगी तोहङ तिङ ओहङगे मिह मिह-माहङया़गी दि ल़ेहमु म़ेदी क़े तेन्सीन, “दाऊदगी स़ेबुला होसन्ना ओहङज्यु! चो़वो किन्ज्योगी छेनला फेप नाङगेन्दी काहजे सोनाम-साक्पु! थाम्ज्यी म़ेदी थो़ला स्यिहङगामला ज़्य़ू नाङगेन किन्ज्योला होसन्ना ओहङज्यु!”#भज ११८:२५,२६
10येशू यरूशलेम क्याहसाला स्य़ूह नाङगेमु क्याहसा थाम्ज्यीला लोहङटी काहल्सीन ओहले मिहया़गी टी़हसीन, “दि मिह सु यिहम्बा?” 11मिह मिह-माहङगी ल़ेहन क्याहप्सीन, “दि खोनी गालील साने़की नासरतले फेप नाङग्योकी लुहङतेम्बा येशू यिहम्बा।”
येशू यरूशलेम छ्योखाङला फेप नाङग्यो
(मर्क ११:१५-१९; लूक १९:४५-४८; यूह २:१३-२२)
12येशू किन्ज्योगी छ्योखाङला फेप नाङसीन ओहले छ्योखाङला छोङ क्याहप्के मिह थाम्ज्यीलाराङ ङ्ये चाहङ नाङसीन। येशूगी टाङगा च्येहप्केनया़गी#२१:१२ टाङगा च्येहप्केनया़: ओ़ह ती़हजीला सु मिह किन्ज्योगी छ्योखाङला ओहङगेन खोकी फुल्गेन्गी डेल्बा दाङ सेम्ज्येनया़ ङ्योहज्येगी लागीला छ्योखाङदी राहङसाराङ टाङगा ओहङगो येहकें। ओ़ह टाङगादी छ्योखाङला च्य़ेहप्च्येला ज्योर्को येहकें। च्योक्चीया़ लो़री क्याहप्नाङसीन, ओहले पुहर्कानी चोङगे मिह तेहसाया़ लो़री क्याहप नाङसीन। 13ओहले येशूगी खुङया़ला सुङ नाङसीन, “सुङरापला दि ल़ेहमु प्री़हदी येहबा– ‘ङाहगी खाङबाला सोल्वाङ ताप्केन्गी खाङबा म़ेदी माज्ये येह।’ यिहॱनाङ ख्याया़गीनी दि छ्योखाङला ज्याक्पाया़गी फुक्पा गा ज़ोसीन दुबा!”#यशै ५६:७; यर ७:११
14ओ़ह तिङले मी़ मेहथोङगे दाङ काङबा कुच्या काहल्ग्योया़ छ्योखाङला येशूसाला ओहङसीन। येशूगी खुङया़ला टा़ह च्य़ू नाङसीन। 15दि याहम्जेन छ्येवागी छ्या़लेया़ थोङदी छ्योखाङला पेहजाया़गी “दाऊदकी स़ेबुला होसन्ना ओहङज्यु!” म़ेदी मासीन। दि थे़दी पूजाहारी छ्यिम्बु दाङ छ्य़े-ठिमकी लोबेनया़ स्यिहताङ लाहङसीन। 16खुङया़गी येशूला मासीन, “दि पेहजाया़गी च्यि म़ेदी क़े तेन्गु दु, राहङगी सेन मेहनाङ दु?” “ङ्यिहन्गेराङ येहबा, यिहॱनाङ ‘ओ़ चो़वो, पेहजा फेमाया़ दाङ पेहजा ल़ेनुया़लाॱआङ राहङगी त़ेरा तेच्या फुल च्य़ू नाङदी येह’ म़ेदी सुङरापला प्रुहक्योगी स्याहल च्यि ख्याया़गी मा़हटाहबा?” म़ेदी येशूगी ल़ेहन क्याहप नाङसीन।#भज ८:२ 17ओहले येशू खुङया़ला क्युर ज़्या़दी क्याहसाले थेन्दी बेथानिया माएँ युहलला फेप नाङसीन ओहले नुहङमु ओ़हलाराङ ज़्य़ू नाङसीन।
को़स्यीङ मा़हयाबागी तोहङबो
(मर्क ११:१२-१४,२०-२४)
18नाहङबार ङाटु नाहम-सेमुराङ क्याहसाला फार लो़हदी फेप नाङगेमु येशू छ्याल टे़दी येहकें। 19लाहमकी सुहरला को़स्यीङ तोहङबो ज़ी़दी को़स्यीङ या़हक्यो येहबा नि म़ेदी येशू ओ़ह तोहङबो पोहला फेप नाङसीन, यिहॱनाङ ओ़ह तोहङबोला लाहप्तीज्यी मिहम्बानी लेहमेन च्यिॱआङ म़ेहबा येहकें। येशूगी ओ़ह तोहङबोला सुङ नाङसीन, “ता़ह यिहन्ज्यु ख्येला नाहमॱआङ को़स्यीङ मा़हयाहज्यु।” ओ़ह को़स्यीङ तोहङबो ओ़ह ती़हजीलाराङ काम्सीन।
20दि थोङदी स्याहप्च्यीया़गी याहम्जेनज्यी ने़दी, “देजे ग्यो़बाराङ दि तोहङबो काहन्डुमु पेहती काम्बा?” म़ेदी स्युहसीन। 21ओहले येशूगी सुङ नाङसीन, “तेहम्बाराङ, ङाह ख्याया़ला माएँ, ख्याया़गी थेचुम माहबेबा पेहती तेहपा डुप्सीन माना दि को़स्यीङ तोहङबोला ङाहगी पेहक्यो ल़ेहमु ख्याया़गीॱआङ पेह ख़ूज्ये येह। ओहजेच्यीराङ मिहम्बा, ख्याया़गी दि काहङदोला, ‘पो़हदी छो-क्याहम्जोला ताहप सोङ!’ म़ेदी माॱनाङ ओ़ह ल़ेहमुराङ ओहङज्ये येह।#मत्ती १७:२०; १ कोर १३:२ 22ख्याया़गी यिह-छ्य़े पेहती सोल्वाङ ताप्सीमाना, ख्याया़गी च्यि लाङगे ओ़हदी ज्योर्च्ये येह।”
येशूगी ओङगी तेहन्दाला टी़हदाप
(मर्क ११:२७-३३; लूक २०:१-८)
23ओहले येशू छ्योखाङला फेप्ती सुङदेन नाङदी ज़्य़ू नाङसीन। ओहले सुङदेन नाङगेमु पूजाहारी छ्यिम्बु दाङ यहूदीया़की एल्डरया़ येशूसाला ओहङदी, “राहङगी का़हलेगी ओङ ज्योर्ती दि छ्या़लेया़ जे नाङग्यो? दि ओङ राहङला सुगी नाङबा?” म़ेदी स्युहसीन। 24ओहले येशूगी सुङ नाङसीन, “ङाहॱआङ ख्याया़ला ताम च्यी़ टी़हगे, ख्याया़गी ल़ेहन क्याहप्सीमाना ङाहगी का़हलेगी ओङ ज्योर्ती दि ल़ेहया़ पेहक्यो माएँदी ख्याया़ला स्येकें। 25लो म़ेदोङ ले, बप्तिस्मा तेर्केन यूहन्नागी का़हलेगी ओङ ज्योर्पा? मिहलेगी नि किन्ज्योलेगी?” म़ेदी येशूगी टी़ह नाङसीन। दि थे़दी खुङ राहङ नाहङदोङराङ दि ल़ेहमु म़ेदी ताम माज्ये छ़ूसीन, “ता़ह ओहराङगी च्यि ल़ेहन क्याहप्च्ये? किन्ज्योलेगी माज्ये माना, ‘च्यिबे ख्याया़गी यूहन्नाला यिह मा़हछ्येबा?’ म़ेदी मिहरोगी टी़ह नाङज्ये येह। 26ओहले मिहलेगी माज्ये मानानी, मिह मिह-माहङया़गी ओहराङला सेकेन्गी ज्यी़सु येहबा च्यिबे मासीमाना मिह थाम्ज्यीगीराङ यूहन्नाला लुहङतेम्बा यिहन म़ेदी चा़ पेहकें।”
27ओ़ह सोङगोराङ खुङगी, “स्युस्ये, ङ्यिहलानी क्यी़ह म़ेह!” म़ेदी ल़ेहन क्याहप्सीन। ओहजेला येशूगी, “ओ़ह ल़ेहमु यिहन्सीमाना ङाहगी का़हलेगी ओङ ज्योर्ती दि थाम्ज्यीराङ ल़ेहया़ पेहकेनॱराङ येहबा माएँ ताम ङाहॱआङ ख्याया़ला मे़हस्ये” म़ेदी सुङ नाङसीन।
पुह ङ्यी़गी पेताम
28ओहले येशूगी येहपाराङ सुङ नाङसीन, “ख्याया़गी च्यि साम्लु येहबा? मिह च्यी़दी पुह पिन ङ्यी़ येहकें। ओहले खो पुह छ्येवा साला काहल्दी, ‘पुह, ख्ये तिहरीङ कुहन्डुम स्यिहङला ल़ेह पेह सोङ लोह!’ म़ेदी मासीन। 29ओहले पुहगी, ‘ङाहनी मेहन्डो!’ म़ेदी मासीन। यिहॱनाङ तिङले खोगी सेम ग्युर्ती ल़ेहला काहल्सीन। 30ओहले आबागी काहल्दी लेहमेन पुहॱलाङ ओ़ह ल़ेहमुराङ मासीन। खोगी, ‘ओहङगे आबा, ङाह डोएँ’ म़ेदी मासीन। यिहॱनाङ खो ल़ेहलादी माहकाहल। 31ता़ह ओ़ह पुह पिन ङ्यी़ नाहङला का़हन्दीगी आबागी ताङग्योगी केपाला ङ्यिहम्बा?” म़ेदी येशूगी टी़ह नाङसीन। “आदादीगी!” म़ेदी खुङया़गी ल़ेहन क्याहप्सीन। ओहले येशूगी खुङया़ला सुङ नाङसीन, “तेहम्बाराङ ङाह ख्याया़ला माएँ, ठाल तुहएँया़ दाङ बान्डन पेहकेया़ ख्याया़ म़ेदी तोहङले किन्ज्योगी क्याहल्सीला स्य़ूहज्ये येह। 32बप्तिस्मा तेर्केन यूहन्ना तेहन्दामगी लाहम तेन्ज्येला ख्याया़साला ओहङसीन, यिहॱनाङ ख्याया़गी यिह मा़हछ्ये। यिहॱनाङ ठाल तुहएँ दाङ बान्डन पेहकेनया़गी गा यिह छ्य़ेसीन। दि थाम्ज्यीराङ थोङदीॱआङ ख्याया़ राहङ-राहङगी सेमगी स्या़बा पेहती तिहक्पा माहपाङ ओहले खोला यिह मा़हछ्ये” म़ेदी येशूगी सुङ नाङसीन।#लूक ३:१२; ७:२९,३०
कुहन्डुमगी स्यिहङ दाङ स्यिहङ फेताप क्याहप्कें मिहया़
(मर्क १२:१-१२; लूक २०:९-१९)
33येशूगी सुङ नाङसीन, “ता़ह येहपाराङ लेहमेन पेताम च्यी़ ङ्यिहन्दोङ। तोहङ तोहङले स्यिहङ ताहक्पु च्यी़ येहकें। ओहले खोगी राहङगी स्यिहङला कुहन्डुम तोहङबो च़ूसीन। ओहले कोर-क्यिहलेॱराङ ओहर्ता क्याहप्ती कुहन्डुम च्यिर्केन्गी कोल दाङ स्यिहङ सुङज्येला पालीप ज़ोसीन। ओहले ओ़ह स्यिहङ फेताप क्याप्केया़ला चि क्याहप्ती खोराङदी फि-युहलला फार काहल्सीन।#यशै ५:१,२ 34ओहले कुहन्डुम छे़गेन ती़हजी काहल फान्ज्यो खोगी राहङगी योक्पुया़ला राहङगी बोला थोप्केन्गी कुहन्डुम लेहन्ज्येला स्यिहङ फेताप क्याहप्कें मिहया़साला ताङ चाहङसीन। 35ओहले स्यिहङ फेताप क्याहप्कें मिहया़गी डी़दी योक्पुया़ला ज़ुङदी, च्यी़ला तुहङसीन, लेहमेनदीला तोहगी क्याहप्सीन, ओहले राहङसालादी सेसीन। 36ओहले येहपाराङ स्यिहङ ताहक्पुगी तोहङले म़ेदीॱआङ माहङबु योक्पुया़ फेताप क्याहप्केनया़ साला ताङ चाहङसीन। यिहॱनाङ खुङया़ॱलाङ स्यिहङ फेताप क्याहप्केनया़गी ओ़ह ल़ेहमुराङ पेहसीन।”
37 “तिङस्योला स्यिहङ ताहक्पुगी, ‘ङाहगी पुहलानी खुङगी चा़ पेहॱराङ पेहकें’ माएँ साम्लु ताङदी राहङ पुहलाॱराङ स्यिहङ फेताप क्याहप्केनया़ साला ताङ चाहङसीन। 38यिहॱनाङ ओहले स्यिहङ फेताप क्याहप्कें मिहया़गी पुहदीला थोङदी राहङ नाहङदुङ मासीन, ‘लो खोनी स्यिहङ ताहक्पुदीॱराङ पुह यिहम्बा। स्यो, ता़हनी खोला सेकें, खोगी क्युह ओहराङॱराङ ज़्या़गे!’ 39ओहले खुङया़गी खोला ज़ुङदी कुहन्डुम स्यिहङलेगी फिला टिहती ख्येर्ती सेसीन।”
40ओहले येशूगी टी़ह नाङसीन, “लो म़ेदोङ, ता़ह कुहन्डुमगी स्यिहङ ताहक्पु खोराङ ओहङदी ओ़ह स्यिहङ क्याहप्केनया़ला च्यि पेहटो?” 41“खो ओहङदी ओ़ह मिह ङ्येहम्बाया़ला सेॱराङ सेच्ये येह ओहले राहङगी ज्योर कोहकेन्गी बो या़हबु पेहती तेर्केन स्यिहङ क्याहप्केनया़ला ओ़ह कुहन्डुम स्यिहङ क्याहप्च्येला तेर्च्ये येह।” 42ओहले येशूगी खुङला सुङ नाङसीन, “च्यि ख्याया़गी सुङरापला प्रुहक्योगी दि केच्या टा़हदी म़ेहबा?–
चिक्सो-खे़बागी फेन मे़हथोएँ म़ेदी क्युर चाहङग्योगी तोहॱराङ
खाङबागी ब्राम तिङगेमु सुहर-तोह काहल्सीन।
दि ल़ेहमुनी चो़वो किन्ज्यो राहङगीराङ डो च्य़ू नाङग्यो यिहम्बा,
दिनी काहजे याहम्जेन छ्येवागी छ्या़ले दुबा!” #भज ११८:२२-२३
43 “ओ़ह सोङबे ङाह ख्याया़ला माएँ, किन्ज्योगी क्याहल्सी ख्याया़लेगी फ्रो़दी सेदो या़ह च्य़ूगेन्गी लेहमेन क्यिहपा च्यी़ला तेर्च्ये येह। 44ओ़ह तोह खाला नार्तो क्याहप्केया़ फेतोर कोहतोर डोज्ये येह ओहले येहपाराङ का़हन्दी मिह थो़ला ओ़ह तोह ताहप्कें ओ़ह मिह थाला फुङे डोज्ये येह।”
45येशूगी सुङ नाङग्योगी दि पेतामया़ थे़दी पूजाहारी छ्यिम्बु दाङ फरिसी छो़बागी ताहम्बु छ्य़े पेहकें मिहया़गी दि केच्या खुङया़गी तेहन्दालाराङ सुङ नाङग्यो यिहम्बा म़ेदी ङोह स्येसीन। 46ओ़ह सोङबे खुङया़गी येशूला ज़ुङज्ये छोल्सीन, यिहॱनाङ खुङया़ मिह मिह-माहङ ङ्याम्बु ज्यी़सीन च्यिबेमाना मिहया़गी येशूला लुहङतेम्बा यिहम्बा म़ेदी चा़ पेहको येहकें।
လက္ရွိေရြးခ်ယ္ထားမွု
मत्ती 21: HYLM
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2023 (Active), Wycliffe Bible Translators, Inc. All rights reserved.