LUKE 21
21
Kucɔ wi tambayee syɛn kanma kayoʔo
(Mar 12:41-44)
1Wi dá yugu jrɛʔɛ ge mà wele mà hɔlɔ mà masaa nya be pé na pe akanra ni de wa Nyɛʔɛlɛ li sràʔá go gbejanra kɛsu ni we. 2Wɔ̀ɔ kucɔ wà nya ŋa wí nyɛ fyomo fɔlɔ ge. Wɔ̀ɔ tambayee syɛn le wa. 3Jesu wɔ̀ɔ yo: «Mí biʔi yo ye ma kanyɛmɛ na, ki kucɔ ŋa fyomo fɔlɔ we, ga wí ma le wa kí ma kpɔʔɔ mà toro pè bɛfu woʔo na. 4Mɛjɛn pe tɔɔ pè bɛfu pe ìn jori gbejanra da na ge, pé ma tà kpe mà ti le wa. Ɛɛn di, ki cɔ wí ma wi cromo woro tì bɛfu le wa, da nì wi dá bì da wì jo ge.»
Nyɛʔɛlɛ li sràʔa go ki jabumu kayoʔo
(Mat 24:1-2; Mar 13:1-2)
5Nyiŋi ga na pèè dáa nyu Nyɛʔɛlɛ li sràʔá go kala na le mâ yo pé maʔa fan kmaʔa ŋglɛngmara ní, ní yrɛbɛ ba nì pe dá Nyɛʔɛlɛ kpɔʔɔ pí ni ge, Jesu wɔ̀ɔ pé po: 6«Ki yrɛbɛ ba yé na nyaʔa ba be, nyiŋi kà na pan wa ga ŋglɛnʔɛ kɛ̀ ìn bi ba go paʔa kà na ge. Pé bi ba tì bɛfu can.»
Drunya wi tonnyiŋi cɔlɔʔɔ kayoʔo
(Mat 24:3-14; Mar 13:3-13)
7À poo yugu mà yo: «Krɛʔɛfɔlɔ, ki kaʔa gee ké bi ba hanri nyaʔa nyiŋi na? Jɛnlɛ lilii li lí bi baʔa tyɛʔɛ wo na, woʔo cɛn wó yo ki nyiŋi kí ma no kɔ ge?»
8Wɔ̀ɔ pé po: «Ye da yè kɔrɔsi. Yò gá hɛn wà yaʔa wi ye fanla. Mɛjɛn hɛɛn fafaʔabaa bi baa ban na yele na le bì yo, pé nyɛ Nyɛʔɛlɛ li wofràa be bì yo nɛ, nyiŋi kí ma kɔ kɔ. Di yò ga ba pé na. 9Nà ye gaʔa loʔo bì yo pé na mlara kmo bì nì bì yo pé na can pè ní ge, yò gáa fyaʔa. Mɛjɛn kí ma yala ki kaʔa gee ke ba hanri kpɛn. Di kòo bo drunya wi tonnyiŋi kí ma no kpɛn.» 10Wɔ̀ɔ ní ma pe po: «Klòʔo ké bi baa dun kè na. Masaa pé bi baa dun pè na kpo.
11Tra tí bi ba gboʔoro ceŋge dere fafaʔa na. Funŋu kí bi ba do. Tiflɛʔɛ yara pa ti bo wa. Wa namuru ni de, fyara yrɛbɛ ní, ní jɛnkpandoʔo bi baa hanri.
12Di sanni ki kaʔa kè bɛfu ké bi ba hanri ge, pé bi baa ye cun bì da ye cɔlɔ. Ki pomo na me, pé bi baa ye ni Juwifiyee sɛrigoro kiti konfɛɛ pe kyɛrɛ̀ ni de bì nì bì da ye ni kaso nî. Ee, pé bi baa ye kle bì da sye ye nì masaa ní klo fɛɛ krugu be na kɔsɔ na. 13Ki woʔo ga paʔa ba yohaʔa kan ye ma, ye gbàn ye da kayotanʔa nyu pe ma. 14Yeʔe cò wa yè lama ni me, yò ga glu bì daʔa honri bì yo wó bi gà ba nyaʔa yo bí wo syɔ ki nyiŋi na ge.#21:14-15 ma wèle wa Luk 12:11-12 ni wè. 15Mɛjɛn mí bi ticlimi kayoro kan ye ma, jango yè bɛnfɛɛ wà nigbe wò gá gbàn bì da ye jin, ná kiì ban, bì da kakara wa ye nì. 16Yè hefɛɛ ní, yè cyɛɛn ní, yè lɛɛ ní, yè heme woo ní, ní yè nagroboo ní pé bi ba ye le yè bɛnfɛɛ pe kyɛrɛ̀ ni de. Ali pé bi baa pèè kpun ye ni. 17Hɛɛn pè bɛfu pé bi ba ye cɛ na kala na le. 18Di yèé wà yujokanla ìn bi ba bunŋu.
19Ye da ki kaʔa kunnu ge yè nî. Nàʔa po ban, pa ye yè syɔ.
Jerusalɛmu kàʔà jabumu kayoʔo
(Mat 24:15-21; Mar 13:14-19)
20Nà ye gá yè bɛnfɛɛ pe mlagmoo nya pé na Jerusalɛmu kàʔà hɔlɔ ge, yeʔe cɛn ye yo ki cɔʔɔnyiŋi kí ma no. 21Ki nyiŋi na, bee pé gà bo wa Jude klo ni le, kí ma yala pe da fé, pee sye angogoo na. Bee pé gà bo wa Jerusalɛmu kàʔà lama ni me, pee fé, pe nyini kí ni. Nà bee bí bo kere ni, pò ga je wa kàʔà ni ge. 22Mɛjɛn ki wlɛrɛ da ni de, Nyɛʔɛlɛ lí bi ba li hɛɛn cɔlɔ be bì ba kì bɛfu funŋu ga kí nyɛ wa nyoŋoʔo li sɛbɛ ni we.#21:22 ma wèle wa Ose 9:7 ni wè.
23Ki wlɛrɛ ni de, cɔlɔʔɔ bi ba do cɛɛ bee na pé bi ba bo acɛnŋɛɛ ní ge, ní bee ní pé bi ba bo pii ní bee pé na ŋori ge. Mɛjɛn cɔlɔkpɔʔɔ bi ba do ki klo na le. Nyɛʔɛlɛ li nàʔà fanna, paʔa ba do ki hɛɛn na be. 24Pé bi ba pèè kpo mlaʔa kpegee ní bì pèè kle bì gɛri pé ni klòʔo ke tɔɔ ni ge, jango pe ya bo wa ŋkloolo. Klòʔo ke tɔɔ hɛɛn pé bi ba Jerusalɛmu kàʔà ja ge bìʔi faʔara fɔ pe nyiŋi ki ba gɔ.
Hɛn Pyɔ wi hrubanma kayoʔo
(Mat 24:29-31; Mar 13:24-27)
25Jɛnʔɛ bi ba hanri wa yaa nì, yege nì, ní ŋoŋoo na ge. Yɛgbanʔa bi ba do hɛɛn na naʔa tra na de. Pe lama pa mi wlele pé na nyugbɔmo mi kpoʔoromo tunnumu kala na le.#21:25 ma wèle wa Esa 13:10; Jow 3:4; Tyɛ 6:12-13 ni wè.
26Hɛɛn bee pé na ki kaʔa gee hanni ké na pan wa drunya klɛnmɛ mì bɛfu ni ge, pé bi ba jrigi fyakpɔrɔ ti kala na le, mɛjɛn namuru fangbɔrɔ tí bi ba gboʔoro. 27Ki nyiŋi na ge, ‹pa pe Hɛn Pyɔ nya wí na pan wa faʔa kà ni› fangbɔʔɔ ní, ní wi kmara tì bɛfu ní.#21:27 ma wèle wa Dan 7:13-14; Tyɛ 1:7 ni wè.
28Ki kaʔa nà ke gá ba hli nyiŋi ga na ge, ye hanri ye yèré ye yè yuru jrɛʔɛ de namuru, mɛjɛn yè syɔmo mí na nori.»
Fige tiʔi yomɛlɛ
(Mat 24:32-35; Mar 13:28-31)
29Wɔ̀ɔ yomɛlɛ kmo pé kan mà yo: «Ye fige tiʔi wele ge, ní tiri ti tɔ nì de. 30Nà ti punŋu bì wɛfonro yrigi, ye naʔa cɛn yè ma mà yo hɔrɔ pannyiŋi kí ma no. 31Ki podeme na me, yèé fanna, nà ye gá ba ki kaʔa nya ké na hanri nyiŋi ga na ge, yeʔe cɛn ye yo, Nyɛʔɛlɛ li masaʔa kí ma no. 32Mí biʔi yo ye ma kanyɛmɛ na, ki nyiŋi ga hɛɛn pe ìn bi gu bì gɔ kí po ki kaʔa kè bɛfu ke ìn jé hanri kpɛn ge. 33Namuru ní, tra ní, pí bi gà gɔ, di na noyomo mi ìn bi je ga gɔ fyeu.
Kí ma yala wo kò nyɛmɛɛ
34Ye da yè kɔrɔsi, jango yè lama mò gáa wlele ye na fɛtiyee na be, ní hunmù jɔdinmi ní me, ní ki drunya ŋa wi kaʔa ke honrimi nì me, jango ki wlɛʔɛ kò gá ye fo, 35nɛ pa gɔlɔ li hîn yraʔa co pomo ma na ge. Mɛjɛn kí bi ba no hɛɛn pè bɛfu na bee pé nyɛ wa drunya klɛnmɛ mì bɛfu ni ge. 36Ye kò nyɛmɛɛ. Ye da Nyɛʔɛlɛ nyɛri le nyiŋi kì bɛfu na, jango ye fanŋa ta, ye syɔ kaʔa gee ma ké na pan wa ge, ye gbàn ye yèré wa Hɛn Pyɔ wi yɛʔɛ̀ ma ge.»
37Ki nyiŋi na, wi dáa hɛɛn krɛʔɛ be wa Nyɛʔɛlɛ li sràʔá go ni kpɛnmɛ na. Wɔ̀ɔ na sye angolo la na pé na yeri olifé tiri angolo le yaakwɔʔɔ kì bɛfu na mà yáa syɛn wa. 38Jɛfantutuʔu na ge, hɛɛn pè bɛfu pe dáa sye wa Nyɛʔɛlɛ li sràʔá go ni mà yáa wi kayoro nuru de.
လက္ရွိေရြးခ်ယ္ထားမွု
LUKE 21: NLK10
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Bible Society of Côte d'Ivoire