LUKE 20
20
Jesu wi sye wí ma jɛ hanbe
(Mat 21:23-27; Mar 11:27-33)
1Wlɛʔɛ kà na, Jesu wi dáa hɛɛn krɛʔɛ be wa Nyɛʔɛlɛ li sràʔá go ni ge na kayotanʔa nyu ge pe kân. Sraʔá farafɔlɔ kpangbanŋa ní, ní Furu sɛbɛ cɛnfɛɛ ní à pe kɛri wa lagwɔɔ ní be, 2mà yɔ́ɔ̀ po: «Maʔa yo wo ma, ma na ki kaʔa gee hanri ge nyaʔa sye ní? Han ma ki sye kan ma ma?» 3Wɔ̀ɔ pé po: «Mì fanna, mí bi ye yugu kayoʔo kà nigbe ní. Yeʔe yo ná kan. 4Han wi wi dá Jan tun we mâ yo wi baa hɛɛn batise ge? Nyɛʔɛlɛ li, dee di, hɛɛn bɛ?» 5À pe na kakara wa pè ní mà yo: «Nà wo yo: ‹Nyɛʔɛlɛ li li dɔɔ́ tun naʔa ge,› pɔɔ wo po: ‹Nyaʔa dá gan ye ìn ba Jan na we?› 6Nà wo ní bì yo: ‹Hɛɛn bɛ pe dɔɔ́ tun naʔa ge,› ki hɛɛn pè bɛfu pa pe wo wa ŋglɛnrɛ ní, mɛjɛn pé ma paʔa na mà yo Jan wi dá bo Nyɛʔɛlɛ leyoo wà wi.» 7À poo po: «Ŋa wi daʔá yo Jan ma we mâ yo wi baa hɛɛn batise ge, wòó wo ìn wi cɛn.» 8Jesu wɔ̀ɔ pé po: «Nàʔa po ban, mì fanna mi ìn bi ki sye ŋa wi tyɛnlɛ nyɛli le ye kan kpo.»
Hrɛsɛn nagɔ falifɛtipee kayoʔo
(Mat 21:33-46; Mar 12:1-12)
9Ki nyiŋi na, wɔ̀ɔ taʔa mà ki yomɛlɛ la kmo le hɛɛn kan be mà yo: «Naŋa wà dà hrɛsɛn nagɔ kon jango bì da dufɛn hanri mòo kan falifɛɛ pèè ma mà yo pe dɔɔ hanri wí kan sràʔà na. Wiì ma jɛ mà kɛri klo là ni mà yâ mo wa.#20:9 ma wèle wa Esa 5:1-7 ni wè.
10Tiʔi pibi cɔnyiŋi ki gâ ba dyɛʔɛ ge, wɔ̀ɔ wi tungɔɔ wà tun wa nagɔ wi falifɛɛ ma be mà yo wi ya pe po pe wi tama kan wi ma. Nagɔ falifɛɛ à pe yɔ́ɔ̀ kmo mòo troʔo waʔafe. 11Wɔ̀ɔ ní mà tungɔɔ wà troʔo wa nɛ. À pe yâ nì mà ki woo kmo we mòo faʔara mòo troʔo nɛ waʔafe. 12Wɔ̀ɔ ní mà tanriwoo tun wa nɛ. À pe yâ ki woo kmo mòo kla mòo prɔ. 13Hrɛsɛn nagɔ fɔlɔ wɔ̀ɔ yo: ‹Mí bi nyaʔa hanri? Mí bi na piglaan tun we wa. Kana, pé bi yà fɛrɛ ta wí na.› 14Pa nagɔ falifɛɛ pe gɔ́ɔ̀ nya ge, à pe naʔa nyu pè ma mà yo: ‹Krɔʔɔ lifɔlɔ wiì wi ŋa we. Ye pan, woo kpo jango wi krɔʔɔ ki klɛn ki wòó kan.› 15À poo co mòo yrígi wa nagɔ kruʔu ma ge mà yɔ́ɔ̀ kpo.
Nagɔ fɔlɔ nòo gá ban, pɔɔ ba nyaʔa hanri pé na si? 16Pɔɔ ba hru bì ban bì ba ki nagɔ falifɛɛ kpo be bì nagɔ kan we pèè ma nɛ pè yɛ.»
Hɛɛn pe gâ ki kayoro loʔo de nyiŋi ga na ge, à pe yo: «Ki woʔo ga kò gá hanri fyeu.» 17Di Jesu wɔ̀ɔ pe wele mà hɔlɔ mà yo: «Nàʔa po ban, ki kayoro da ti kɔ̀rɔ́ wí nyɛ nyaʔa ní? Tí nyɛ wa nyoŋoro Nyɛʔɛlɛ li sɛbɛ ni we mà yo:
‹Ŋglɛnʔɛ ga go fanfɛɛ pé kloʔo mâ wa ge,
àʔa bâ grɛʔɛ go noʔoma ŋglɛngblɛʔɛ.›#20:17 ma wèle wa Ŋuʔu 118:22-23 ni wè.
18Hɛn o hɛn ŋa wí bi do ki ŋglɛnʔɛ na ge, pɔɔ gaʔabu. Nàʔa to hɛn ŋa na ge, paʔa wi ploolo mɛli mɛli.»
Pé ma Jesu yugu we misari kanma kayoʔo ní
(Mat 22:15-22; Mar 12:13-17)
19Ki nyidege na ge, Furu sɛbɛ cɛnfɛɛ ní, ní sraʔá farafɔlɔ kpangbanŋa ní à pe naʔa ca bùu kpo, mɛjɛn pe daʔa cɛ́n mà yo wí ma ki yomɛlɛ la kmo le pee na. Di pe dáa fyaʔa hɛɛn na be. 20Pe dáa nyidanra ca mà kɔrɔsifɛɛ kpe sràʔà na mà yo pe ya pè krɛʔɛ nɛbo hɛnsinbee bɛ mà pe tun wa jango pe ya Jesu co we wi noyomo na me. Nàʔa po ban, pa pe gban bùu le klo fɔlɔ wi kyɛrɛ̀ ni, ŋa wí nyɛ fanŋa fɔlɔ we. 21Ki kɔrɔsifɛɛ à pe yáʔà yo Jesu ma we mà yo: «Krɛʔɛfɔlɔ, wó maʔa cɛn mà yo ga má na nyu hɛɛn ma be ná pe krɛʔɛ ge, kí nyɛ sinŋi. Moò na hɛn wà ponro wà na. Di má na pe krɛʔɛ Nyɛʔɛlɛ kloʔó ní mà yala kanyɛmɛ nì me. 22Kí ma yala wo da misari sari we klòʔo fɔlɔ Sesare ma we, dee di, ki ìn yala wo dɔɔ sari?» 23Jesu pɔɔ da gâ pe dɛnbɛrɛ cɛn we, wɔ̀ɔ pé po: 24«Ye ba tamba wà tyɛʔɛ ná na. Han yɛʔɛ́ gi ga pe pá wa wi na ge, dee di, han yele li pe nyoŋó wa wi na ge?» À pe yo: «Klòʔo fɔlɔ Sesare wi.» 25Wɔ̀ɔ pé po: «Nàʔa po ban, ga kí nyɛ Sesare woʔo, yeʔe kan Sesare ma we. Ga kí nyɛ Nyɛʔɛlɛ woʔo, yeʔe kan Nyɛʔɛlɛ ma le.»
26Pe ìn gban bùu co wi nohɛnrɛ na hɛɛn pe yɛʔɛ̀ na ge. Pomo ma na wí ma krumahru kan pe kayoro ma de, àʔa pé fo fɔ à pe pyeri.
Kuu pe nyɛmanyinimi kayoʔo
(Mat 22:23-33; Mar 12:18-27)
27Bee pe ìn dàá ba hɛɛn pe nyɛmanyinimi na me, á pe na pe yeri Saduseyee ge, à pèè ma pan mà báʔà yo Jesu ma we,#20:27 ma wèle wa Pit 23:8 ni wè. 28mà yo: «Krɛʔɛfɔlɔ, Mowisi wi daʔa nyoŋó wo kan mà yo: ‹Naŋa nà wà bí gu bì wi cɔ yaʔa we pyɔ fun, wi conlo wà buú kpe, jango ŋa wí ku ge wi kluʔu ki po be.›#20:28 ma wèle wa Lado 25:5-6 ni wè.
29Nabii nasyɛn dà bo wa, pe dá bo hedeme woo. Kplɛɛ wɔ̀ɔ bâ cɛlɛ pɔri mà ku. Wi ìn pyɔ he wí na. 30Syɛnwoo wɔ̀ɔ wí kpe mà ku mòo yaʔa be nɛ pyɔ fun. 31Tanriwoo wɔ̀ɔ wí kpe mà ku mòo yaʔa be nɛ pyɔ fun. Àʔa hanri ban ki hɛɛn nasyɛn wì bɛfu ní. Pè bɛfu à pe ku. Wi ìn pyɔ he pee wà nigbe ma. 32Ki kruʔu ma, cɛlɛ wɔ̀ɔ bâ gu. 33Ki kala na, kuu nà pe gá ba nyɛ bì nyíni nyiŋi ga na ge, ki cɔ pɔɔ bo wiwii woo ki nabii ni be, mɛjɛn ki hɛɛn nasyɛn pè bɛfu pé moo kpe cɛlɛ?»
34Jesu wɔ̀ɔ pé po: «Naʔa ki drunya ni we, nabii ní, cɛɛ ní pé na pè pori. 35Di bee pé ma yala drunya ŋa nì wí na pan wa ge ní kuu pe nyɛmanyinimi ní me, ki nabii ní, ki cɛɛ ní pe ìn bi baa pè pori. 36Pa pe ba bo nɛ pa mlɛŋɛyee nyɛ be, pòo gban bì gu adi. Pa pé ma nyɛ̀ mâ nyini kuu ni be, pé nyɛ Nyɛʔɛlɛ li pii. 37Ali Mowisi wi daʔá yo màʔa fligi wo kan mà yo kuu pé bi ba nyɛ bì nyíni. Deʔe ga na wí ma tiple li kayoro nyoŋo ge, wɔ̀ɔ Nyɛʔɛlɛ yeri le “Abrahamu wi Nyɛʔɛlɛ, Isake Nyɛʔɛlɛ, Jakɔbe Nyɛʔɛlɛ”.#20:37 ma wèle wa Nyi 3:6 ni wè.
38Nyɛʔɛlɛ lí nyɛ bee woolo pé nyɛ nyuwyeʔe na ge. Loò nyɛ kuu wolo. Mɛjɛn hɛɛn pè bɛfu pé nyɛ nyuwyeʔe na li yɛʔɛ̀ na ge.» 39Furu sɛbɛ cɛnfɛɛ à pèè moo po: «Krɛʔɛfɔlɔ, má ma yo kmaʔa.» 40Pe ìn dà dihon ta bùu yugu kayoʔo kà nì adi.
Nyɛʔɛlɛ li wofràa nì, Dafide nì
(Mat 22:41-46; Mar 12:35-37)
41Jesu wɔ̀ɔ pé po: «Nyaʔa ma kan pé naʔa nyu mâ yo: Nyɛʔɛlɛ li wofràa wí nyɛ Dafide pyɔ ge? 42Mɛjɛn Dafide wiì tapolo wí naʔa nyu wa Ŋuru Sɛbɛ ni we mà yo:
‹Wò fɔlɔ wí maʔa yo
na fɔlɔ ma we mà yo:
Ta ban ma ba glɛn na kaligi na,#20:42-43 ma wèle wa Ŋuʔu 110:1 ni wè.
43fɔ bì ba ma bɛnfɛɛ
krɛʔɛ ma cyeʔe pahaʔa.›
44Ki kala na, nàʔa po Dafide wi dáa wi yeri wi fɔlɔ, paʔa bo mɛlɛ wí gban wí po wi pyɔ ge?»
Jesu wi ploʔofɛɛ kalima Furu sɛbɛ cɛnfɛɛ kala ní
(Mat 23:1-36; Mar 12:38-40)
45Pa hɛɛn pè bɛfu pe da gâ bo wa ná nuru ge, Jesu wɔ̀ɔ kí yo wi ploʔofɛɛ ma be mà yo: 46«Ye da yè kɔrɔsi Furu sɛbɛ cɛnfɛɛ ní be. Pee bɛ pé naʔa ca bì da nyari drekpɔrɔ ní mâ nì mâ cori hɛɛn pe da pe syerí foroba dere na de. À pe ní naʔa ca bì da glɛn wa hɛnkpandoo aconro na wa Juwifiyee pe sɛrigoro ni, ní pe fɛtiyee ní be. 47Ali nàʔa ja bo pé na kucaa pe kyɛʔɛ yrɛbɛ pì bɛfu li ge, pé na Nyɛʔɛlɛ nyɛri na mori, jango hɛɛn pe daʔa honri pe yo pé nyɛ sinbee. Ɛɛn di, ki woo pe cɔlɔʔɔ kí bi ba gbɔʔɔ bì doro pe tɔɔ pe woʔo na ge.»
လက္ရွိေရြးခ်ယ္ထားမွု
LUKE 20: NLK10
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Bible Society of Côte d'Ivoire