LUKE 12
12
Noyomo syɛn syɛn kayoʔo
(Mat 10:26-27)
1Ki nyiŋi na ge, hɛɛn saamo pii fafaʔa dà gboʔolo fɔ na pè tanri. Jesu wɔ̀ɔ yo wi ploʔofɛɛ ní be kpɛn mà yo: «Ye da yè kɔrɔsi Farisiyee pe noyomo syɛn syɛn ní ŋa wí na kaʔa kè bɛfu nyini nɛ pa bru ajrɛʔɛgɛ wɛgɛ nyɛ ge.#12:1 ma wèle wa Mat 16:6; Mar 8:15 ni wè. 2Mɛjɛn yraʔa o yraʔa ga kí nyɛ tonŋò ge, pa pe baʔa nya. Ee yraʔa o yraʔa ga kí nyɛ hraʔa ge, pa pe baʔa cɛn.#12:2 ma wèle wa Mar 4:22; Luk 8:17 ni wè. 3Ki pomo na me, kayoro tì bɛfu da ye dá yo yeblimi ni me, pé bi ba ti loʔo kpɛnmɛ na. Ee, kayoro da ye dá yo kaplɛmɛ ni naakpoʔo tanla wa go lama ni me, pé bi ba ti jari foroba dere na.
Kí ma yala wo da Nyɛʔɛlɛ fyaʔa le
(Mat 10:28-31)
4Na nagroboo, kanyɛmɛ na, yò gáa fyaʔa bee na pé na wre kpun de, áʔa hín bo, pòo gban bí yraʔa kà hanri nɛ ga kí nyɛ tipeʔe mâ toro ki woʔo na ge. 5Di kí ma yala yé da fyàʔá ŋa na ge mí buu tyɛʔɛ ye na. Ye da fyàʔá Nyɛʔɛlɛ na. Mɛjɛn nà li hɛn kpo we kɔ ge, fanŋa nyɛ lí ma li gbàn li yɔɔ wa wa cɔlɔʔɔ deʔe nî ge. Ee, kí ma yala ye da fyàʔá liì na dɛ.
6Poò na gbɛ̀nhɛ̀nʔɛ kɔgunnu pɛrɛ wɛɛ pii syɛn na yo? Ɛɛn di, Nyɛʔɛlɛ loò na lama wo kee là nigbe ní. 7Ali, lí ma yè yujoro tì bɛfu no cɛn. Yò gáa fyaʔa mɛjɛn yé nyɛ pɛgbanra na mà toro gbɛ̀nhɛ̀nʔɛ fafaʔa pɛrɛ na de.
Bee pe ce Jesu ma we
(Mat 10:32-33; 12:32; 10:19-20)
8Kanyɛmɛ na, hɛn o hɛn ŋa wí biʔi yo hɛɛn yɛʔɛ́ na bí yo wi klɛ́n mà mì kan ge, mì Hɛn Pyɔ pa mi baʔa yo kpo mlɛŋɛyee pe yɛʔɛ̀ na ge bì yo ki woo wi klɛ́n mà mì kan. 9Di hɛn ŋa wí bi je ná ma hɛɛn pe yɛʔɛ̀ na ge, Hɛn Pyɔ pɔɔ ba je ki woo ma we kpo mlɛŋɛyee pe yɛʔɛ̀ na ge.
10Hɛn ŋa wí bi kayopere yo Hɛn Pyɔ kan we, pa ti yaʔa wí kan. Di ŋa wí bi Nyɛʔɛlɛ li Nyìli li yele cɔʔɔ le, ki kapeʔe kùu yaʔa wí kà fyeu.#12:10 ma wèle wa Mat 12:32; Mar 3:29 ni wè.
11Nà pe gá baa ye kle bì da sye ye nì Juwifiyee pe sɛrigoro ni de, ná kiì ban, klo fɛɛ ní fanŋa fɛɛ ní pe yɛʔɛ̀ na nyiŋi ga na ge, jango bi yá kiti kon ye na ge, yò gáa honri pomo ma na yé bi yà yo ge ní kayoro da nì yé bi yà yo ge.#12:11-12 ma wèle wa Mar 13:11; Luk 21:14-15 ni wè. 12Mɛjɛn ga kí ma yala yé yo ge, Nyɛʔɛlɛ li Nyìli pa li ye krɛʔɛ ki ní ki nyidege na ge.»
Masa naŋa letɔʔɔ yomɛlɛ
13Naŋa wà dà bo wa janma ni me, wɔ̀ɔ wí po: «Krɛʔɛfɔlɔ, maʔa yo na lɛ ma we, moo po wi yèré, wo wò to wi krɔʔɔ yɛ ge wò ma.»
14Jesu wɔ̀ɔ wí po: «He, naŋa, han ma na tɛnŋɛ bì bo yè kiti konfɔlɔ, ná kiì ban, yè krɔʔɔ yɛfɔlɔ ge?» 15Wɔ̀ɔ kí yo hɛɛn ma be mà yo: «Yè wèlé, ye da yè kɔrɔsi krɔʔɔ cadroʔo ní ge dɛ, mɛjɛn hɛn nòo ja krɔʔɔ fafaʔa ta, kòo gban bì nyuwyecɛnŋɛ kan wí ma.» 16Jesu wɔ̀ɔ yomɛlɛ kmo pé kan mà yo: «Masa naŋa wà dà bo wa. Wi kere akaba à pi no wí kan ceŋge. 17Wɔ̀ɔ naʔa honri wa wi lama ni me mà yo: Mí bi nyaʔa hanri? Mɛjɛn akaba lehaʔa kpangbanŋa wò nyɛ ná ma. 18Wɔ̀ɔ yo: Ga mí bi hanri ge kí ga: Mí bi na bogoo jaabu ge bì kèè fan gee ké bi gbondo kplɛʔɛ woʔo na ge bì na akaba pì bɛfu le wa ní na kyɛʔɛ yrɛbɛ ní be. 19Ki kruʔu ma, pa miʔi yo nà ma bì yo: Ŋaŋa ni ge, yrɛbɛ fafaʔa nyɛ wa ma ma tyɛʔɛhaʔa bì gban bì yɛʔɛ fafaʔa kɔ. Maa fyonri maa lí, maa jo, ma po lafiʔimi nì. 20Di Nyɛʔɛlɛ à luu po: ‹Letɔʔɔ, ki yebliʔi ga ni ge, pé bi ma nyuwyeʔe syɔ ma ma. Nàʔa po ban, ma yrɛbɛ ba má ma kpoʔolo ge, pa pi glɛn bì han kan?› » 21Jesu wɔ̀ɔ yo: «Kí nyɛ ban kpo hɛn ŋa ma wí na krɔʔɔ fafaʔa kpoʔolo wì kân ge, áʔa hín bo krɔcɛnŋɛ wò nyɛ wí ma Nyɛʔɛlɛ li yɛʔɛ̀ na ge.»
Wo pà Nyɛʔɛlɛ na le
(Mat 6:25-34)
22Ki nyiŋi na ge, wɔ̀ɔ kí yo wi ploʔofɛɛ ma be mà yo: «Ki kala na, mí biʔi yo ye ma bì yo: Ga yé bi li ge, kò gá yè lama wlele me ye na yè nyuwyeʔe kala na le. Ga yé bi le ge, kò gá yè lama wlele me ye na yè wre kala na le. 23Mɛjɛn nyuwyeʔe ki kala lí ma kpɔʔɔ mà toro akaʔa kala na le. Wre ti kala à li ní mà kpɔʔɔ ga na ye corí bí le ge. 24Ye da honri dubayee kala na le. Ki kajɛnrɛ da toò na akaba pibi nyraʔa. Toò na pi kon. Pi konhara nì, ní bogoo wò nyɛ tí ma. Ɛɛn di, Nyɛʔɛlɛ lí na ti kanʔa à ti na li. Yèé yè kala lí nyɛ kpangbanla mà toro kajɛnʔɛ wolo na le ceŋge. 25Di wiwii nyɛ naʔa ye ni ŋa wí bi gban bí wlɛʔɛ nigbe ta buu haʔá wa wi nyuwyeʔe na ge wi lama wleleme fanŋa ni ge? 26Nàʔa po yòo gban bì ki woʔo ga cɛnri hanri ge, nyaʔa ma kan á ye na yè lama wlele me yè na kaʔa ke tɔɔ ní ge? 27Ye da honri nya wofyɛnrɛ kala na le. Toò na tunŋu ko. Toò na jese huʔuru. Di, kiì nì kì bɛfu ní, mí biʔi yo ye ma, Salomo, wi kmara tì bɛfu ní, wi ìn dà gban bì wì feri nɛ pa ki woʔo ga kà nigbe nyɛ ge.#12:27 ma wèle wa 1Mas 10:4-7; 2Masa 9:3-6 ni wè.
28Nya wofyɛnʔɛ ga kí nyɛ wa kere ni alaʔa nî ge, mâ po kwɔʔɔ kí bi baʔa hogo ki kpɛntoʔo na ge, nàʔa po Nyɛʔɛlɛ lí naʔa feri ban ge, nà li yèé feri be, kòo bo lí ma lafiʔimi nì ceŋge bì doro ki woʔo na ge yo? Yè pama mí nyɛ tatunmu dɛ. 29Yèé be, yò gáa honri wɛʔɛ ga na yé bi li ge ní ga nì yé bi jɔ ge. Yè lama mò gáa wlele ye na. 30Mɛjɛn drunya basɛriyee bɛ pé na honri ki yrɛbɛ pì bɛfu na ge. Di yè To wí maʔa cɛn mà yo yé ma cori pi na. 31Ɛɛn di, ye da honri wi masaʔa na ge. Nàʔa po ban, pɔɔ ba yrɛbɛ pi tɔ haʔa wa ye ma.
Wo da krɔʔɔ kpoʔolo wa wò kân Nyɛʔɛlɛ kaʔa ni ge
(Mat 6:19-21)
32Yèé bee mbadaple ge, yò gáa fyaʔa, mɛjɛn yè To wí ma cori bì wi masaʔa kan ge ye ma. 33Ye yè kyɛʔɛ yrɛbɛ pɛrɛ be, ye pi gbejanra kan fyomo fɛɛ ma be. Ye gbejanra alere da ca yè kân ti ìn bi gà lɛ ge. Ye nì ye da krɔʔɔ bajegɔ kpoʔolo yè kân wa namuru ni de, deʔe ga na nikonŋo woò na nori wa ge, mâ po donŋo fanna, wòo gban bìʔi cɔʔɔ ge. 34Mɛjɛn ma krɔʔɔ nàʔa po deʔe ga na, ma honriʔi paʔa bo wa kpo.
Tungɔɔ bee pé na kori nyɛmɛɛ ge
35Kí ma yala ye kondó ye yaʔa. Ye yè pwɔ anuʔulu ní. Ye yè lambaa hanri pe da nyí pe da bari. 36Ye po nɛ pa hɛɛn bee nyɛ pe hîn na pe kundiʔi hanni we fɔ wi ga jɛ̀ wa fonŋo deʔe na, wí pan, jango nòo gaâ no wa bí goyɛʔɛ kmo ge, pe fyala, peʔe nyɛ̀ʔɛ́ wí kan ge. 37Tungɔɔ bee pe kundiʔi wí bi gà ban bí ba pe nya nyɛmɛɛ ge, ki woo pé bi bo frɛmɛ ní. Kanyɛmɛ na, pe kundiʔi pɔɔ wì pwɔ wi anuʔulu ní le bì pe tɛnŋɛ lihaʔa na bì da hro kanʔa pe ma. 38Nòo pan nyilɛlɛ na yoo, ná kiì ban, gopɛɛ konlo na yoo, nòo ba ki tungɔɔ bee nya nyɛmɛɛ ge, pa pe bo frɛmɛ ní. 39Ye ki woʔo cɛn ge kpo: Nàʔa po go fɔlɔ wà dì nikonŋo wi pannyiŋi cɛn ge, wòo ki yaʔa nikonŋo wi wi go fru ge. 40Kí ma yala yèé fanna ye da yè kondo, mɛjɛn Hɛn Pyɔ wí gà ban nyiŋi ga na yoò na honri ge.»
Tungɔkmaa ní, ní tungɔpee ní pe kayoʔo
(Mat 24:45-51)
41Pyɛri wɔ̀ɔ wí po: «Kundiʔi, má ma ki yomɛlɛ la kmo le wòó kan, dee di pè bɛfu wolo li?» 42Di wò fɔlɔ wɔ̀ɔ yo: «Han wi ŋa wí nyɛ hɛn wà go welefɔlɔ mâ po kafungee fɔlɔ mâ po leticliŋi ge. Wiì wi ŋa wi kundiʔi wí buu tɛnŋɛ wi tungɔɔ pè bɛfu yugu na, jango wi da akaba kanʔa pé ma pi kannyiŋi na ge. 43Ki tungɔɔ wi kundiʔi nòo gá ban bí bɔɔ nya wí na ki woʔo ga hanri ge ban ge, ki tungɔɔ pɔɔ bo frɛmɛ ní. 44Mí biʔi yo ye ma kanyɛmɛ na, pɔɔ ba ki woo tɛnŋɛ wi kyɛʔɛ yrɛbɛ pì bɛfu yugu na. 45Di ki tungɔɔ nòo daʔa honri wa wi lama ni me bì yo: Na kundiʔi wí bi mo wa, nòo ki hli bì do tungɔɔ pe tɔɔ na be, nabii bɛ yoo, cɛɛ bɛ yoo, bì da pe kmo ge bì da li bì da hunmù jo bì da dinni mí na ge, 46ki tungɔɔ wi kundiʔi pɔɔ gà ban wlɛʔɛ kà na, ki wlɛʔɛ ga wiì woò na honri ge, ní nyiŋi ga nì wi ìn jɛn, pɔɔ bɔɔ cɔlɔ ceŋge, wi nì wi wi tama ta wa basɛriyee ní be.
47Mɛjɛn tungɔɔ ŋa wí ma wi kundiʔi wi nadanma cɛn me, nà wi ìn da wì kondo bì da mi hanri ge, pa pe ba ki woo kmo we kmoro fafaʔa nì. 48Di nà wà bí bo wi ìn wi kundiʔi wi nadanma cɛn me, nòo yraʔa kà hanri bì yala kmoro nì de, pa pe ki woo kmo we kmoro cɛnri nì. Mɛjɛn pé ma fafaʔa kan hɛn o hɛn ŋa ma ge, pa pe baa fafaʔa ca wí ma. Ee, pé ma fafaʔa le hɛn ŋa kyɛ̀rɛ́ ni de, pa pe baa fafaʔa yugu wí ma ceŋge.
Jesu wi kayoʔo kí bi hɛɛn kon be pe na
(Mat 10:34-36)
49Mí ma pan bì ba kwɔʔɔ wo tra na de. À mi coriʔi na ceŋge mà yo ki cò ŋaŋa ni ge. 50Batɛmu wà nyɛ ná ma, ŋa wí ma yala bì da ge. Kanyɛmɛ na, na lama mí ma wlele ná na fɔ bì ba no wi tanyiŋi na ge.#12:50 ma wèle wa Mar 10:38 ni wè. 51Yé naʔa honri mà yo mí ma pan bì ba hɛɛn hanri pe po ylama ni pè ní yo? Ayo dɛ. Mí ma pan bì ba hɛɛn hanri pe da gon pè ní. 52Ki tɔ na ge, hɛɛn kɔgunnu bi ba bo go nigbe ni bì da gon pè ní. Pé bi ba gon syɛn. À hɛɛn tanri bí jɛ hɛɛn syɛn krugu. Hɛɛn syɛn wi jɛ̀ hɛɛn tanri krugu we kpo. 53To bi ba jɛ pyɔ krugu, pyɔ wi jɛ̀ wi to krugu we kpo. No wí bi ba jɛ picɛpii krugu we, picɛpii wiì fanna, wi jɛ̀ wi no krugu we. Naŋa wi no wí bi ba jɛ wi pyɔ cɔ krugu we. Pyɔ wi cɔ wiì fanna, wi jɛ̀ kpo wi pɔlɔ wi no krugu we.»#12:53 ma wèle wa Mis 7:6 ni wè.
Nyiri kaʔa conrimo cɛnmɛ
(Mat 6:2-3)
54Jesu wɔ̀ɔ kí yo janma ma me nɛ mà yo: «Nà ye faʔa nya ki jɛ́ wa yaa jehaʔa na ge, ye na fyala mà yo hɔgɔ kí bi ban. Kí na hanri ban. 55Nà ye ní bì tiflɛʔɛ nya kí na jrɛʔɛ wa yaa ki jɛhaʔa kamolo namyɛʔɛ na ná funnu ge, ye na yo kafuʔu kí bi da nyɛʔɛrɛ ceŋge. Kí na hanri ban kpo. 56Yèé bee, yé na noyomo syɛn syɛn nyu we, nà ye tra ní namuru nya de, ye na ti kaʔa ke conrimo cɛn me. Di nyaʔa ma kan ye ìn ki nyiŋi ga ki kaʔa conrimo cɛn me?
Ma po ylama ni ŋa nì wí na can má ni ge
(Mat 5:25-26)
57Nyaʔa ma kan yoò na gbanni bì da kasingee tyonri ge yè ma ge? 58Mɛjɛn mo ní, ŋa nì wí na can má ni ge, nà ye plɛn bì da sye kiti konhaʔa na ge, nyiŋi ga na yé bi da sye kloʔò ni ge, ma mà kpanŋi ye yo ye flìn, mo ní, wiì nì we, jango wò ga ma kle bì gɛri má ni kiti konfɔlɔ krugu we fanŋa na, kiti konfɔlɔ wi ma kan sorasiyee ma, pe ma le kaso nî. 59Kanyɛmɛ na, mòo nyíni wa fyeu kí po mɛ ìn ki sari ge, ali kɛ̂ kɛ̂ wà nigbe wóo gori.»
လက္ရွိေရြးခ်ယ္ထားမွု
LUKE 12: NLK10
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Bible Society of Côte d'Ivoire