LUKE 11
11
Jesu wí ma wi ploʔofɛɛ ploʔo nyɛrimi ní
(Mat 6:9-13; 7:7-11)
1Wlɛʔɛ kà na, Jesu wi dáa Nyɛʔɛlɛ nyɛri le deʔe kà na. Wi gâ gɔ nyiŋi ga na ge, wi ploʔofɛɛ à wà moo po: «Wò fɔlɔ, ma wo ploʔo Nyɛʔɛlɛ li nyɛrimi ní me nɛ pa Jan wi dá wi ploʔofɛɛ ploʔo be pomo ma na ge.» 2Wɔ̀ɔ pé po: «Nà ye da Nyɛʔɛlɛ nyɛri le nyiŋi ga na ge, ye yo:
‹To, kí ma yala
pee ma yegmala kpɔʔɔ le.
Ma masaʔa ki da ban.
3Wó na cori bru ŋa na ge,
ma dɔɔ kanʔa wo ma
wlɛʔɛ kì bɛfu na.
4Ma wò kapere yaʔa de wo kan,
mɛjɛn wòó fanna
wó na ti yari hɛɛn bee kan
pé na kapere hanri wo na ge.
Mò gá wo po bì wo wele gbanʔa.› »
5Wɔ̀ɔ pé po: «Mí bi ki lɛgɛ tyɛʔɛ ge ye na, kí ga: Nàʔa po wà nyɛ wa ye ni, nagoro nyɛ wí ma, wɔ̀ɔ kɛri wì krugu nyilɛlɛ na mà yɔ́ɔ̀ po: ‹Na nagoro, ma na cin bru tanri ní. 6Mɛjɛn na nagoro wà ma jɛ tanʔala na mà bâ drigi na na. Yraʔa kà wòó mɛɛ nyɛ ná ma bìʔi kân wí ma.› 7Di wi nagoro nòo ko wa go lama ni me bì yo: ‹Mò ga na te. Mí ma goyɛʔɛ pari ge kɔ. Mì nì, na pii ní à wo syɛn kɔ. Mi ìn bi gban bì jɛ bùu kân má ma.› 8Yeʔe wèlé, ali nàʔa ja bo wi ìn bi jɛ bùu kân wí ma nagoro kɔsɔ na ge, di, pɔɔ gá noo fɛn kanla fun ge, pɔɔ wi cromo yrɛbɛ pì bɛfu kan wí ma. 9Ki kala na, mí biʔi yo ye kan bì yo: Ye da nyɛrí, pa ye da. Ye da ja, pa yeʔe nya. Ye da goyɛʔɛ kmo ge, paʔa nyɛʔɛ ye kan. 10Mɛjɛn hɛn wì bɛfu ŋa wí na nyɛri ge wi naa daʔa. Ŋa wí na ca, wi naa nyaʔa. Ŋa wí na goyɛʔɛ kmo ge, paʔa nyɛʔɛ wí kan. 11To wiwii nyɛ naʔa ye ni, ŋa wí pyɔ nòo fyɔ nyɛri wí ma, pɔɔ wɔgɔ kan wí ma fyɔ wi nolo ni le? 12Dee di, nòo gocɛnlɛ nyɛri wí ma, pɔɔ nó kan wí ma yo? Ayo dɛ. 13Yèé fanna, ali nàʔa ja bo yé nyɛ hɛnpeele, yé maʔa cɛn mà yo kí ma yala ye akmaʔa kan yè pii ma be. Nàʔa po ban, To Nyɛʔɛlɛ la lí nyɛ kmala ge, lí bi Nyɛʔɛlɛ li Nyìli kan le bee ma pé na li nyɛri ge.»
Jesu ní, Bɛlisebuli nì
(Mat 12:22-30; Mar 3:20-27)
14Nyiŋi kà na, Jesu wi dáa gbosyo bobo wà prɔ naŋa wà ni. Gbosyo wi gâ nyini nyiŋi ga na ge, bobo wɔ̀ɔ taʔa na nyu kpo. Àʔa hɛɛn fo be. 15Di à pèè ma yo: «Bɛlisebuli, ŋa wí nyɛ gbosuu pe kundiʔi we wiì fanŋa ni Jesu wí na gbosuu prɔ be.»#11:15 ma wèle wa Mat 10:25 ni wè. 16Pèè dáa ki ca bùu po bùu wele. À pe yo wi namuru jɛnlɛ là hanri, wi li tyɛʔɛ pé na, jango peʔe cɛn pe yo wi fanŋa ki jɛ́ Nyɛʔɛlɛ ma.#11:16 ma wèle wa Mat 12:38; 16:1; Mar 8:11 ni wè. 17Di Jesu wɔ̀ɔ pe honriʔi cɛn ge mà pe po: «Klotele woolo, nà pe da jan pè ní, pe klo pa li ba jɔʔɔ, li goro hɛɛn pa pe baa dun pè na. 18Kiì tege gi, Sotanri nòo da jan wì ní, wi klo fɛrɛ pa ti go mɛlɛ? Yèé yé naʔa nyu mà yo Bɛlisebuli fanŋa ni mí na gbosuu prɔ be. 19Nàʔa po domi mí na pe prɔ Bɛlisebuli fanŋa ni ge, yè hɛɛn pé na pe prɔ han fanŋa ni? Yè woo pee pè tala pé biʔi tyɛʔɛ ye na yeʔe cɛn ye yo tanʔa wò nyɛ ye ma. 20Di nàʔa po mí na pe prɔ Nyɛʔɛlɛ liì fanŋa ni ge, paʔa bo Nyɛʔɛlɛ li masaʔa kí ma no ye na kɔ.
21Nyiŋi o nyiŋi ga na mlaʔa kmo yrɛbɛ bi bo fanŋa fɔlɔ wà ma, nòo da wi kasyɛn kɔrɔsi ge, wi kyɛʔɛ yrɛbɛ pi na kò wì kân yeʔeke. 22Di nà wà bí bo fanŋa nì wiì na we, ki woo nòo pan wì krugu bì bɔɔ ja ge, mlaʔa kmo yrɛbɛ ba na wi dáa honri ná pa ge, ki woo pɔɔ pi syɔ wí ma bì wi kyɛʔɛ yrɛbɛ pì bɛfu kpe bì pi tiʔibi wi nagroboo na be.
23Ŋa woò ylama ni ná ni ge, wiì wi wí na can ná ni ge. Welé, ŋa woò na hɛɛn kpoʔolo be ná ni ge, ki woo wí na pe craʔa ná ma.#11:23 ma wèle wa Mar 9:40 ni wè.
Jesu wí ma gbosyo wi hrubanma kayoʔo yo
(Mat 12:43-45)
24Gbosyo nòo nyini hɛn wà ni ge, wi na kɛrí mà yáa nyari wa sinbriʔi dere ni de na fyonrihaʔa ca. Nòo kí ca bi dé ge, wi na yo: Mí bi hru bì gɛri bì yà je wa na go nî ge nɛ, ga ni mi da glú mâ po ge. 25Nòo pan, wi na báʔà nya pé maʔa hanri màʔa pɛ mà ki yrɛbɛ tyɛʔɛ wa pi deʔe na ge. 26Ki nyiŋi na ge, wi na kɛrí mà yâ gbosuu nasyɛn bee yeri pé nyɛ tipee mâ toro wiì na we mà pe haʔa wì na. Pe na bâ je mà ko wa, ki hɛn wi tanʔahaʔa kaʔa ke na po gbanʔala mà toro wi kplɛʔɛ woʔo na ge.»
Jesu wí ma frɛjɛnmɛ kayoʔo yo
27Nyiŋi ga na wi dá bo na ki kayoro nyu de, cɛlɛ wà dà bo wa janma nulala ni le. Wɔ̀ɔ taʔara mòo po: «Cɛlɛ ŋa wi da má he mâ ma kân á ma ŋori ge, wi nyɛ frɛmɛ ní.» 28Di Jesu wɔ̀ɔ wí po: «Kà gi, ɛɛn di, frɛjɛnmɛ nyɛ bee ma pé na Nyɛʔɛlɛ kayoro nuru mâ na ti kpɔʔɔ ge.»
Hɛɛn pé na jɛnlɛ nyɛri
(Mat 12:38-42)
29Hɛɛn à pe da gâ gboʔolo wì tanla fafaʔabaa ge, wɔ̀ɔ ki hli na nyu mà yo: «Ŋaŋa hɛɛn pé nyɛ kapere hanrifɛɛ. À pe ní na jɛnlɛ ca. Di jɛnlɛ lɛ̀ ìn bi hanri pé kan, nà ki ìn bo Jonasi wi wolo liì li ge.#11:29 ma wèle wa Mat 16:4; Mar 8:12 ni wè.
30Mɛjɛn Jonasi wi da bâ bo Ninife kàʔà woo ma be jɛnlɛ pomo ma na, Hɛn Pyɔ wí bi ba bo jɛnlɛ ŋaŋa hɛɛn ma be kpo.#11:30 ma wèle wa Jon 3:4 ni wè. 31Klo fɔlɔ cɛlɛ ŋa wi dá jɛ wa yaa prama na, wí bi ba yere kiti konwlɛʔɛ na ŋaŋa hɛɛn ní be bì kiti kon pé na, mɛjɛn wi dá jɛ leʔe wa klo kanla na mà pan, jango bì ba Salomo wi ticlimi kayoro loʔo de. Di welé, yraʔa kà gi ga ki kpɔʔɔ́ Salomo na we, kí nyɛ naʔa.#11:31 ma wèle wa 1Mas 10:1-10; 2Masa 9:1-12 ni wè.
32Kiti konwlɛʔɛ na, Ninife kàʔà hɛɛn pé bi ba yere ki ŋaŋa hɛɛn ní be bì baa kiti kon pé na. Mɛjɛn pe dá kruʔu wa pe kapere ma de Jonasi wi kayoro fanŋa ni. Di welé, yraʔa ga ki kpɔʔɔ́ Jonasi na we, kí nyɛ naʔa.#11:32 ma wèle wa Jon 3:5 ni wè.
Wre ti kpɛnmɛ kayoʔo
(Mat 5:15; 6:22-23)
33Hɛn wà ná jé lamba mu bì bɔɔ tyɛʔɛ hrama ni, ná kiì ban, bùu le so noʔo na. Di wi noo tyɛʔɛ wi tyɛʔɛhaʔa na, jango bee pé na jin wa go ni ge, pe da wi kpɛnmɛ nyaʔa me. 34Mɛjɛn ma nyɛlɛ lí nyɛ nɛbo ma wre ti lamba wi. Nyiŋi ga na ma nyɛlɛ lí bi bo kmala ge, ma wre tì bɛfu ti na po kpɛnmɛ na. Di ma nyɛlɛ nà li po tipele, ma wre tì bɛfu ti na po yeblimi ni. 35Ki pomo na me, ma da mà kɔrɔsi jango kpɛnmɛ ma mí nyɛ wa ma nî ge, mò gá grɛʔɛ yeblimi. 36Mɛjɛn nàʔa po ma wre tì bɛfu tí nyɛ kpɛnmɛ na ge, nàʔa po yeblimi wò wa deʔe kà na ge, tì bɛfu pa ti bo kpɛnmɛ nɛbo lamba wi hîn na nyi pomo ma na ge na kpɛnmɛ pari má kan ge.»
Farisiyee ní Furu sɛbɛ cɛnfɛɛ pe klomo
(Mat 23:1-36; Mar 12:38-40)
37Nyiŋi ga na Jesu wi da gâ yo kɔ ge, à Farisiyee naŋa wà mòo yeri mà yo wi ya lì wa wi ní. Wɔ̀ɔ yâ je mà klɛn bì da li. 38Farisiyee naŋa pɔɔ da gɔ́ɔ̀ nya wí na li kyɛrɛ̀ nì bajeʔere ge, àʔa wí fo. 39Di wò fɔlɔ wɔ̀ɔ wí po: «Yèé Farisiyee be, yé na cɛnjɔʔɔ ní hro alegee kadoro jeʔe de, ɛɛn di, yè lama mí ma nyi fungbɔʔɔ nì, ní tipere ní de. 40Letɔɔlɔ, Nyɛʔɛlɛ la li dá kadoro fan de liì ban yo la li dá lama fan me kpo ge? 41Di ba pí nyɛ wa yè cɛnjɔʔɔ ní, ní yè hro alegee lama ni me, ye pi kan fyomo fɛɛ ma be. Ki pomo na me, yrɛbɛ pì bɛfu pa pi bo ye ma ylɛbɛ Nyɛʔɛlɛ li yɛʔɛ̀ na ge.
42Cɔlɔkpɔʔɔ nyɛ yèé Farisiyee na be dɛ. Yé na kà lari wa kɛ̂ kɛ̂ na we naʔa kanʔa Nyɛʔɛlɛ ma le manite nì, hru nì, ní hyɛʔɛ yrɛbɛ pi tɔ nì be. Di yòo na kasingee hanri. Nyɛʔɛlɛ loò na ye glanʔa. Ki dí yala ye da ki woʔo ga hanri ge. Ɛɛn di, yò gá lama wɔ kplɛʔɛ wobo ní be.#11:42 ma wèle wa Sraʔa 27:30 ni wè.
43Cɔlɔkpɔʔɔ nyɛ yèé Farisiyee na be dɛ, mɛjɛn yé ma cori bì da glɛn aconkpandoro na wa yè sɛrigoro ni de. À ye cori hɛɛn pe da ye syeri, pee ye kpɔʔɔ wa foroba dere na de. 44Cɔlɔkpɔʔɔ nyɛ ye na dɛ, mɛjɛn yé ma fanra da lɛ̀ hɛɛn pe ìn ti dere cɛn de. Pa pòo gaa ti fonʔomo dere cɛnni de, à pe na ti tanri.»
45Sɛbɛ cɛnfɛɛ à wà moo po: «Krɛʔɛfɔlɔ, kaʔa gee má na nyu ge, má na wòó teri kpo.»
46Wɔ̀ɔ wí po: «Cɔlɔkpɔʔɔ nyɛ yèé sɛbɛ cɛnfɛɛ na be dɛ, mɛjɛn yé na tuʔuru pa hɛɛn ma da tí nyɛ tugubɛnrɛ ge. Di yèé tapoboo ye ín jeʔe ta bì pe haʔa ali kabɛlɛ nigbe ní. 47Cɔlɔkpɔʔɔ nyɛ ye na dɛ, mɛjɛn yé na fanfan Nyɛʔɛlɛ leyoo pe fanra feri de, àʔa hín bo yè tokpɔɔ pee bɛ pe da pe kpó ge. 48Ki pomo na me, yé naʔa teri hɛɛn na be peʔe cɛn pe yo yé ma yere yè tokpɔɔ pe kahranʔa na ge. Mɛjɛn pee pe dá fanfan Nyɛʔɛlɛ leyoo kpo be. Yèé à ye pe fanra feri de. 49Ki kala na, Nyɛʔɛlɛ li ticlimi mí maʔa yo mà yo: ‹Mí bi na leyoo ní pitunbee troʔo pé kan. Pé bi baa pèè kpun bì da pèè cɔlɔ.› 50Nàʔa po ban, Nyɛʔɛlɛ pa li ba ki ŋaŋa hɛɛn cɔlɔ li leyoo pe kpomo kala na, bee hɛɛn pe da gbó mà kpe drunya wi hlinyiŋi na ge, 51mà kpe Abɛli kpomo na fɔ bì ba no Sakari womo na me, ŋa pe da gbó wa sraʔá farahaʔa ní sraʔá go ní pi kpafoʔo ni ge. Ee, kanyɛmɛ na, Nyɛʔɛlɛ lí bi ba ki ŋaŋa hɛɛn cɔlɔ ki kpomo mì bɛfu kala na.#11:51 ma wèle wa Hli 4:8; 2Masa 24:20-21 ni wè.
52Cɔlɔkpɔʔɔ nyɛ ye na dɛ, yèé bee yé nyɛ sɛbɛ cɛnfɛɛ be. Mɛjɛn lakle ŋa wí na kacɛnmɛ goyɛʔɛ nyɛri ge, yé moo kpe. Yèé tapoboo ye ìn je wa, à ye ní mà bee yrigí, pé ma cori bi jé wa ge.»
53Jesu wi gâ jɛ be ki deʔe na ge kɔ ge, Furu sɛbɛ cɛnfɛɛ ní Farisiyee ní be pe lama à mi gban pè na ceŋge. À pe noo yugu kafafaʔagaa ní. 54Pe dáa wi kɔrɔsi ceŋge, jango bùu ta bùu co wi kayoro na de.
လက္ရွိေရြးခ်ယ္ထားမွု
LUKE 11: NLK10
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Bible Society of Côte d'Ivoire