OMOCHANKO 30
30
1Ekero Raeli aroche ng’a tari koiborera Yakobo abana, akarorera mosubati omwabo ribero, agatebia Yakobo, “Ing’a abana! Otabang’eti, rirorio nigo ndakwe!”
2Yakobo akabea Raeli mono, akamoboria, “Inee! Ninche inde ribaga ria Nyasae, oyogotangete tikwanyora abana?”
3Erio akamoiraneria, “Nimbwate omosomba one omoiseke, Bilia. Motware, erinde inyore abana korwa asare, barokwe abana baane, na goetera asare na inche inyore oroiboro.” 4Naboigo Yakobo akaegwa Bilia, omosomba omoiseke o Raeli, abe mokaye, na Yakobo akaba nere. 5Bilia akaba morito, akaiborera Yakobo omwana omoisia. 6Erio Raeli akabora, “Nyasae ong’eire oboronge bwane, amaene, oigure ekerero kiane, ong’eire omwana omoisia.” Ase ayio akamoroka Dani.#30:6 Dani, engencho yaye: ong’eire oboronge bwane 7Bilia, omosomba o Raeli, akaba morito naende, akaiborera Yakobo omwana omoisia o kabere. 8Raeli akabora, “Ase okoamererania okonene nabeire nkoamererania na mosubati ominto, nabuire.” Ase igo akamoroka Nafutali.#30:8 Nafutali, engencho yane: okoamere rania
9Ekero Lea achia korora ng’a otenenire koibora, akaimokia Silpa, omosomba oye omoiseke, akamomoa Yakobo, abe mokaye. 10Erio Silpa, omosomba omoiseke o Lea, akaiborera Yakobo omwana omoisia. 11Lea akabora, “Ninde negesio.” Akamoroka Gadi.#30:11 Gadi, engencho yaye aande: egesio ekiya 12Silpa, omosomba o Lea, akaiborera Yakobo omwana omoisia o kabere. 13Lea akabora, “Inche ninde nomogoko omonene, naki abakungu nabandoke Oyore nomogoko.” Ase igo akamoroka Aseri.#30:13 Aseri, engencho yaye: omogoko
14Ase engaki ye rigesa ri’engano Reuben akagenda akanyora amasooni ng’ombe getii, akayatwa, akayarentera Lea ng’ina.
15Erio Raeli agasaba Lea amwatanere amasooni ng’ombe ay’omwana oye, korende Lea akamoiraneria, “Inee! Nering’ana rike kwang’urire omosacha one, na bono korigetie koira amasooni ng’ombe ay’omwana one boigo?”
Raeli akamoiraneria, “Rero nache arare naye, korang’e amasooni ng’ombe ay’omwana oo.”
16Ekero Yakobo arenge koirana korwa mogondo mogoroba, Lea akagenda komorotota, akamotebia, “Rero goika orare mwane, nakogorire namasooni ng’ombe ay’omwana one.” Ase obotuko obwo akarara nere.
17Nyasae akaigwa Lea, na ere akaba morito, akaiborera Yakobo omwana omoisia o gatano. 18Lea akabora, “Nyasae ong’eire eng’eria yane, ekiagera naete omosacha one omosomba one omoiseke.” Ase igo akaroka omwana oria Isakaru#30:18 Isakaru, engencho yaye aande: eng’eria. 19Lea akaba morito naende, akaiborera Yakobo omwana omoisia o gatano na rimo. 20Erio Lea akabora, “Nyasae ong’eire ekeegwa ekiya; bono omosacha one nansike, ekiagera namoiboreire abana abaisia batano nomo.” Ase igo akamoroka Sabuloni.#30:20 Sabuloni, engencho yaye aande: okomanya, gose: amasikani 21Nyuma yaye akaibora omwana omoiseke, akamoroka Dina.
22Korende Nyasae akaba okoinyora Raeli, akaigwa ogosaba kwaye, akaigora enda yaye; 23ere akaba morito, akaibora omwana omoisia, akabora, “Nyasae onduseirie ogochaywa kwane.” 24Akaroka omwana oria Yusufu#30:24 Yusufu, engencho yaye: amente oyonde, akabora, “Omonene karanche amentere omwana onde omoisia.”
25Ekero Raeli aiboire Yusufu, Yakobo agatebia Labani, “Ing’a ribaga ngende seito, ase ense yane. 26Ing’a abakungu baane na abana baane, aba nabeire nkogokorera, ontige ngende seito; naki nomanyete obokoreri nabeire nkogokorera.” 27Labani akamoiraneria, “Nigo nganetie ogwancherwa korwa asore, nigo namanyire boronge ng’a Omonene onsesenirie mono ase engencho yao. 28Bono ntebia eng’eria yao oganetie, na inche ninkoyee.” 29Yakobo akamoiraneria, “Aye omonyene nomanyete buna nabeire nkogokorera, na amaicho ao buna abeire ase oborendi bwane. 30Naki enibo yao nigo yarenge enke ritang’ani ekero ntaracha aa, korende bono yamentekanire mono. Omonene ogosesenirie aande onsi nabeire nkogenda. Korende bono indi ndabe nkoroisia amang’ana a bwone inche omonyene?” 31Labani akamoboria, “Ninki ndakoe rende?” Yakobo akamoiraneria, “Tinganeti ong’e kende. Oise gonkorera ring’ana eri ndagotebie rioka, rirorio naende ningenderere korisia amaicho ao, na koyarenda. 32Tiga ng’ete rero ase amaicho ao onsi, ndusie korwao kera eng’ondi emechege na egesembe, na emanwa y’eng’ondiemwamu, na kera embori nyankororo na nyankanga. Echio nachio chirabe eng’eria yane. 33Ase amatuko arache ekero orachiche korora eng’eria yane, oboronge bwane nabombere kirori. Kera embori etari nyankanga gose nyankororo, na kera emanwa y’engondi etari emwamu, onye ekonyorekana asende, oyebare ng’a eyio nigo eibire.” 34Labani agancha amang’ana ayio, agateba, “Tiga abe buna gwatebire.” 35Ase rituko erio erio Labani akarusia chigoree chimarera ne chinkororo, ne chimbori chiaberi, echiare chinkanga ne chinkororo, na kera eyare nebimoa ebirabu ase omobere oye, na kera eng’ondi eyare emwamu. Echio chionsi agachiaa abana baye abamura bachirende. 36Erio ageatanana korwa ase Yakobo oboare bw’orogendo rw’amatuko atato; na Yakobo agatigerwa okorisia riicho ria Labani eriatigarete.
37Yakobo agatwa ebite ebibese bi’emete gete enga buna omosobeti, na omolozi, na omouru, akabisata chinsemo, erinde emeng’ororia emerabu ekarorekana ase ebite biria. 38Erio akabeka ebite biria ase chintuba chi’amache ase amaicho are gocha konywera. Na ekiagera ching’iti chiria chiare koa chinkungu amarieme, ekero chigocha konywa amache, 39chirochio chikanyora amarieme bosio bw’ebite ebio, chikabiara chimanwa chire chimarera, ne chinkanga, ne chinkororo. 40Na Yakobo agaatanana ching’ondi chimingichi, ne ching’ondi chinkungu agachisang’anania ne chimingichi chie riicho ria Labani echiarenge namagwari, na echiare chimwamu. Naboigo akenyorera amaicho aye ere omonyene, ayio atabegete amo naya Labani. 41Kero kende gionsi chimbori gose ching’ondi echiare ne chinguru gochiaganirie amarieme, Yakobo nigo are kobeka ebite biria bosio bwe ching’iti ase chintuba chiria chinyare konyora amarieme gochikorigereria ebite ebio. 42Korende echiare chinyoro tare gochibekera ebite ebio. Ase igo echiare chinyoro nigo chiare koba echia Labani, na echiare ne chinguru chiba echia Yakobo. 43Naboigo Yakobo akaba okomenteka koba omotenenku, akaba namaicho amange, na abasomba, abaiseke na abamura, ne chingamia, ne chitigere.
လက္ရွိေရြးခ်ယ္ထားမွု
OMOCHANKO 30: EKEGUSIIBBLE
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
OLD EKEGUSII BIBLE PROTESTANT EDITION
©Bible Society of Kenya, 2020