OMOCHANKO 29
29
Yakobo ogoika enka ya Labani
1Erio Yakobo akabwatia orogendo rwaye, agaika ense y’abanto ba moocha. 2Agwo akarora ensoko yare aase aarabu, na amaicho atato e ching’ondi araire ensoko ensemo, ekiagera ase ensoko eyio nao amaicho are konywera amache. Na ndiarengeo rigena rinene igoro y’omonwa bw’ensoko. 3Agwo nao amaicho onsi arenge gosangererekana, na abarisia nigo baare korusia rigena riria korwa ase omonwa bw’ensoko banyoisia ching’ondi, naende bariirania ase omonwa bw’ensoko.
4Yakobo akababoria, “Baminto, ng’ai seino?”
Bakamoiraneria, “Seito naiga Harani.”
5Naende akababoria, “Inee! Momanyete Labani, mochokoro o Nahori?” Barabwo bakamoiraneria, “Ee, ntomomanyete.”
6Naende akababoria, “Mbuya are?”
Bakamoiraneria, “Ee, mbuya are; na rigereria, Raeli, omoiseke oye oyio ogocha ne ching’ondi!”
7Akabatebia, “Rigereria, bono mobaso, chinsa chi’ogosangereria amaicho tichiraika, nyoisia ching’ondi, naende mochiire gochirisia.”
8Korende barabwo bakamoiraneria, “Titokonyara gokora bo goika ekero amaicho onsi arache asangererekane amo, erinde abarisia bamanye gotigeria rigena korwa ase omonwa bw’ensoko; erio tomanye konyoisia ching’ondi.”
9Ekero arenge ogendererete gokwana nabarabwo, Raeli agacha obwate ching’ondi chia ise, naki nere orenge gochirisia. 10Bono ekero Yakobo achia korora Raeli, omoiseke o Labani, ng’ina rome, okorenta riicho ria Labani, akaimoka, agatigeria rigena riria korwa ase omonwa bw’ensoko, akanyoisia ching’ondi chia Labani, ng’ina rome. 11Erio Yakobo akanyunyunta Raeli, akarera na koiyeria amariga. 12Agatebia Raeli, “Inche nomoigwa o iso inde, omwana o Rebeka.”
Raeli akaminyoka, agatebia ise amang’ana ayio. 13Ekero Labani achia koigwa amang’ana a Yakobo, omoigwa oye, akaminyoka gochia komorotota, akamoboania na komonyunyunta, akamoira nka bwoye. Yakobo agatebia Labani amang’ana onsi. 14Erio Labani akamotebia, “Amaene, aye namanyinga ’omobere one.” Ere akamenya bwoye ase engaki y’omotienyi oyomo.
Yakobo ogokorera Labani ase okonyora Raeli na Lea
15Erio Labani agakwana na Yakobo, akamotebia, “Nonya kore omoigwa one, tegwenereti onkorere bosa. Ntebia eng’eria yao ninki ndakoe!” 16Bono Labani nigo abwate abaiseke babere; omoiseke oria omonene nigo are korokwa Lea, na oria omoke Raeli. 17Lea amaiso aye nigo arenge amatu, korende Raeli nigo arenge omonyakieni, naende omwasioku.
18Yakobo konya omwanchire Raeli, na ase ayio agatebia Labani, “Ningokorere emiaka etano na ebere, erinde ong’e Raeli, omoiseke oo omoke.”
19Labani akamoiraneria, “Ayio mbuya. Tiga nkomoe aye kobua nkomoa omonto onde; menya aa bwone.” 20Ase igo Yakobo akamokorera emiaka etano na ebere aegwe Raeli. Emiaka eyio ekarorekana asare buna namatuko amake oka, ekiagera amwanchete mono.
21Erio Yakobo agatebia Labani, “Bono naikeranirie engaki yane, ing’a mokane, torare komo.” 22Ase igo Labani akarangeria abanto bonsi b’ensemo eria, agakora omoyega. 23Rigachia koba mogoroba akaimokia Lea, omoiseke oye, akamorentera Yakobo, na barabwo babere bakaba bakorara amo. 24Ase ekero ekio Labani akarua omosomba oye omoiseke okorokwa Silpa, abe ogokorera Lea, omwana oye. 25Bogachia gokia mambia, Yakobo akanyora ng’a Lea aetwe. Erio akaboria Labani, “Inki eke gwankorerete? Tinagokorerete, erinde ong’e Raeli? Naki gwakorete okang’aina?”
26Labani akamoiraneria, “Aiga seito intwe titori gokora bo, gosokia omoiseke omoke, na gotiga omonene. 27Tiga omoyega bw’amatuko aya atano na abere oraera bw’oyio omonene, erio noegwe na oria omoke, naende aye onkorere emiaka etano na ebere ende.”
28Yakobo agancha bo, agaikerania amatuko ayio atano na abere. Erio Labani akamomoa Raeli, omoiseke oye, abe mokaye. 29Labani akamoa Raeli, omwana oye, omokoreri, nere Bilia, omosomba oye omoiseke. 30Yakobo akaba na Raeli; agancha Raeli mono kobua Lea. Erio Yakobo agakorera Labani emiaka etano na ebere ende.
Abana ba Yakobo
31Ekero Omonene aroche ng’a Lea tanchiri, akaigora enda yaye, korende Raeli akagombaa. 32Lea akaba morito, akaibora omwana omoisia, akamoroka Reuben,#29:32 Reuben, engencho yaye: rora omomura naki nigo atebete, “Omonene nigo aroche buna nchayire. Bono omosacha one nanyanche.” 33Naende Lea akaba morito, akaibora omwana omoisia, akabora, “Omonene ororire ng’a tinyanchiri, ong’eire noyo nere omoisia boigo,” akamoroka Simeoni.#29:33 Simeoni, engencho yaye aande: okoigwa 34Naende akaba morito, akaibora omwana omoisia, akabora, “Bono engaki eye omosacha one nabwatane amo nainche, ekiagera namoiboreire abana abaisia batato.” Ase ayio akamoroka Lawi.#29:34 Lawi, engencho yaye aande: obwateranirie 35Akaba morito naende, akaibora omwana omoisia, akabora, “Engaki eye nintogie Omonene.” Ase ayio akamoroka Yuda.#29:35 Yuda, engencho yaye aande: ogotogigwa Erio agatenena koibora.
လက္ရွိေရြးခ်ယ္ထားမွု
OMOCHANKO 29: EKEGUSIIBBLE
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
OLD EKEGUSII BIBLE PROTESTANT EDITION
©Bible Society of Kenya, 2020