OMOCHANKO 23
23
Ogokwa gwa Sara. Ibrahimu okogora aase akomotindeka
1Sara nigo akoorete emiaka rigana erimo, na emerongo ebere, na etano na ebere (127); eye nero emiaka y’obogima bwa Sara. 2Sara agakwera ase Kiriati‐Ariba, agwo nao Heburoni, ase ense ya Kanani. Ibrahimu akaba okomoreera Sara na kweumia ase engencho yaye.
3Ibrahimu akaimoka korwa ase egetondo kiaye, agatebia Abahiti, 4“Inche nomomenyi inde, imenyete ase egati yaino; komoranche mong’e aase ntindeke omokungu one onkwereire, imorusie ase obosio bwane.”
5Abahiti bakairaneria Ibrahimu, bakamotebia, 6“Omonene, totegerere! Aye nigo ore omonto omonene o Nyasae ase egati yaito. Tindeka omokungu oo ase embeera ende yonsi engiya orachore. Onde tari ase egati yaito orakorine embeera yaye gose agotange totindeka omokungu oo.”
7Ibrahimu akaimoka, agatung’ama inse ase amasio ’Abahiti, abanto b’ense eria. 8Ere agakwana nabarabwo, akabora, “Komoranche mong’e ribaga ntindeke omokungu one, imorusie ase obosio bwane, monyigwe na monsabere ase Efuroni, omwana o Sohari, 9ang’e rikuruma riaye, erio rire agwo Makipela, ase ensinyo y’oboremo bwaye. Ase rigori riikeranu tiga ang’ere ase amasio aino, togoranereo, ribe aase aane ndabe ngotindeka abakure.”
10Bono Efuroni nigo arenge oikaransete agwo ase egati y’Abahiti. Ere Efuroni, Omohiti, akairaneria Ibrahimu ekero Abahiti bonsi, abaare goetera egeita ki’omochie oye, bamotegererete, 11agateba, “Yaya, omonene one, ntegerera. Oboremo boria nakoeire amo ne rikuruma riria rire imeo, ase amaiso ’abanto baminto nakobieire; otindeke mokao aroro.”
12Erio Ibrahimu agatung’ama inse ase amasio ’abanto b’ense eria. 13Agatebia Efuroni ekero abanto b’ense eria bamotegererete, “Koranche, ntegerera! Inche nindue rigori ri’oboremo; naye obogorie chifeta korwa asende, na inche nintindeke mokane aroro.”
14Efuroni akairaneria Ibrahimu, 15akamotebia, “Omonene one, ntegerera! Oboremo obwo bwe rigori rie chisekeli chi’efeta amagana ane, ngento ki toengereranie inche naye? Tindeka mokao agwo.” 16Ibrahimu bagaancherana na Efuroni; na Ibrahimu akarengera Efuroni chifeta chiria atebete Abahiti kobaigwete, chisekeli chie chifeta amagana ane, koreng’ana nekerengo giancheranire nabaonchoreria.
17Oboremo bw’Efuroni obwo bware agwo Makipela moocha ya Mamure, oboremo amo ne rikuruma riria riare imeo na emete yonsi yarengeo, ensemo eria yonsi Ibrahimu akayeegwa. 18Igo ayeetwe ase amasio ’Abahiti, abwo bonsi baare gosoera egeita kiaye.
19Nyuma y’ayio Ibrahimu agatindeka Sara mokaye ase rikuruma ri’oboremo bware agwo Makipela, moocha ya Mamure, agwo nao Heburoni, ase ense ya Kanani. 20Nabo oboremo boria, ne rikuruma riria riare imeo, Ibrahimu akabinyora korwa ase Abahiti bibe aase aye agotindeka abakure.
လက္ရွိေရြးခ်ယ္ထားမွု
OMOCHANKO 23: EKEGUSIIBBLE
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
OLD EKEGUSII BIBLE PROTESTANT EDITION
©Bible Society of Kenya, 2020