OMOCHANKO 24
24
Isaka okorenterwa Rebeka abe mokaye
1Bono Ibrahimu konya obeire omogotu, akoorire emiaka emenge; na Omonene konya omosesenirie ase amang’ana onsi. 2Ibrahimu akarangeria omosomba oye oyorenge konya omokoreire ase emiaka emenge mono, na orendete enibo yaye yonsi, akamotebia, “Beka okoboko kwao inse y’ekebono kiane, 3na inche ninkoborie otiane ase Omonene Nyasae o igoro na ense, ng’a tokorigeria omwana one omokungu korwa ase abaiseke b’Abakanani, aba imenyete ase egati yabo. 4Korende ogende ase ense yane na ase eamate yane, orentere omwana one Isaka omokungu korwa aroro.”
5Omosomba oria akamoiraneria, “Aande, omokungu oria atancheraneti gocha amo nainche goika ase ense eye; Inee, nigo ndaire omwana oo goika ase ense eria kwarwete?”
6Ibrahimu akamoiraneria, “Bwerende, tobaisa koira omwana one aroro. 7Omonene, Nyasae o igoro na ense, oyondusetie o tata korwa ase ense eria naiboreretwe, ere nigo akwanete nainche na gotiana, ogoteba: Ning’ee ororeria rwao ense eye, ere natome omomalaika oye agotang’ane; aye norentere omwana one omokungu korwa aroro. 8Na omokungu oria atancheti moche komo, rirorio nosiborwe korwa ase eira eye okoria asende, korende tobaisa koira omwana one gochia aroro.” 9Erio omosomba oria akabeka okoboko kwaye inse y’ekebono kia Ibrahimu, omonene oye, akerama ase ring’ana erio.
10Erio omosomba oria akarusia chingamia ikomi chi’omonene oye, akaimokia na ebiegwa ebinge ebiya; akaimoka, akagenda gochia Mesopotamia, agaika omochie oria Nahori amenyete. 11Agwo agatimokeria chingamia isiko y’omochie ang’e nensoko y’amache engaki ya mogoroba, ekero abakungu bagocha kobuucha amache. 12Ere agasaba, agateba, “Aye Omonene, Nyasae bw’omonene one Ibrahimu, nagosabire, onsesenie ase amang’ana aane a rero, okorere omonene one Ibrahimu obuya. 13Rora, ninteneine aiga ase ensoko y’amache, na abaiseke b’omochie oyo ngocha bare kobuucha amache. 14Tiga ebe iga; Kondaborie oyomo obo: Koranche obeke enyongo yao inse, inche inywe amache, na ere karang’iranerie: Ee, kanywe aye, na nimbuuchere chingamia chiao nachirochio; otige oyio abe nere gwachoreire omosomba oo Isaka, na inche erio nimanye ng’a gwakoreire omonene one obuya.”
15Ritang’ani atarakoora ogosaba kwaye, akarora Rebeka ogocha obogoretie enyongo yaye mareko. Ere nomoiseke o Betueli, na Betueli nomwana o Milka, moka Nahori, momura omwabo Ibrahimu. 16Na omoiseke oria nigo arenge omonyakieni, naende nomwekungi, otaraba na mosacha onde. Agatirimboka gochia ase ensoko, agaichoria enyongo yaye amache, agatiira. 17Erio omosomba oria akaminyoka bwango gochia komorotota, akamosaba, “Koranche, ong’e amache inywe.”
18Ere akamoiraneria akamotebia, “Kanywe, omonene one!” Agatoora enyongo yaye bwango, akayebeka koboko kwaye, akamoa, na ere akanywa. 19Gakoorire komoa amache, akabora, “Ne chingamia chiao boigo ninchibuuchere, na chirochio chinywe.” 20Akaayerera, akaumora amache aria arenge ase enyongo ase orotuba ime, akaminyoka bwango ase ensoko naende, agachibuuchera chingamia chiaye chionsi. 21Erio omonto oria akamobeta amaiso, akaba okirete kiri, erinde amanye gose Omonene osesesenirie orogendo rwaye, gose taibo.
22Ekero chingamia chiakoorire konywa amache, omonto oria akamoruseria ekegera gi’etahabu, kiare noborito bwe chigiramu isano na isato, na ebitange bibere bie chitahabu ase amaboko aye, ebiare noborito bwe chigiramu rigana erimo, na emerongo etano, 23akamoboria, “Nomoiseke o ng’o ore? Naende ontebie gose ribaga ndire mwa iso toranyare korara botuko.”
24Ere akamoiraneria, “Inche nomoiseke o Betueli, oyo Milka aiborerete Nahori.” 25Naende akamotebia, “Seito obonyansi mboreo, na aase tokorisia aisaine, na enyomba y’abageni bakorara nereo.”
26Erio omonto oria agatung’ama inse, agasasima Omonene, 27agateba, “Omonene, Nyasae bw’omonene one Ibrahimu, atogigwe! Ere tatigeti koorokia omonene one obuya na obwegenwa. Omonene ondaaire enchera, naikire enka y’abamwabo omonene one.”
28Erio omoiseke oria akaminyoka, agaika inka sobo, agatebia abanto ba nyomba mwa ng’ina amang’ana ayio. 29-30Rebeka nabwate momura omwabo ore korokwa Labani. Ekero Labani aroche ekegera na ebitange ase amaboko ’omoiseke omwabo, na kaigure amang’ana omonto oria atebetie Rebeka, agasoka, akaminyoka gochia ase ensoko ase omonto oria arenge, akamorora oteneine ase chingamia chiaye, 31akamotebia, “Inchuo, aye osesenirie n’Omonene! Naki oteneine isiko aa? Inche nakoroiseirie enyomba ase ogochia korara, na aase e chingamia chiao.”
32Erio omonto oria agasoa nyomba, na Labani agasiborera chingamia chigurube chiabo, agachia obonyansi, na chirochio chikaria. Naende akarentera omonto oria amache, akarentera na abwo barenge komo, bagesibia amagoro. 33Erio akarenterwa na endagera, korende agateba, “Tinkoria goika ndateba amang’ana aane.”
Labani akairaneria, “Gaki, yakwane!”
34Erio agateba, “Inche nomosomba o Ibrahimu. 35Omonene Nyasae osesenirie omonene one mono, na ere obeire omotenenku. Omoeire amaicho e ching’ondi, na aye chiombe, chifeta ne chitahabu, na abasomba, abamura na abaiseke, chingamia ne chitigere. 36Na Sara, moka omonene one, akamoiborera omwana omomura ekero abeire omogotu; na omonene one oeire omwana oyio bionsi ebiabwate. 37Omonene one akamboria ntiane, agantebia: Torigeria omwana one omokungu korwa ase abaiseke b’Abakanani, aba imenyete ase ense yabo; 38Korende ogende ase omochie o tata, ase eamate yane, orentere omwana one omokungu korwa aroro. 39Na inche ngatebia omonene one: Aande omokungu oria atancheraneti gocha amo nainche. 40Korende agantebia: Omonene oyo ngendererete ase obosio bwaye, natome omomalaika oye amo naye, asesenie orogendo rwao. Naye orentere omwana one omokungu korwa ase eamate yane, korwa ase omochie o tata; 41erio nosiborwe korwa ase eira eyio nakoboririe otiane. Ekero oraike ase eamate yane, onye tibagokoa omoiseke oyio, aye rirorio nobe gwasiboirwe korwa ase ogotiana kwao.
42“Inche nacha rero ase ensoko, nasaba iga: Aye Omonene, Nyasae bw’omonene one Ibrahimu, koranche onsesenie bono ase orogendo rwane nkogenda. 43Rora ninteneine aiga ase ensoko y’amache. Tiga ebe iga: Omoiseke onde omo orache kobuucha amache, na inche imosabe oyio: Koranche ong’e amache make korwa ase enyongo yao inywe. 44Onye ere okong’iraneria: Ee, kanywe, na nimbuuchere chingamia chiao nachirochio; otige oyio abe nere omokungu Omonene achoreire omwana bw’omonene one.
45“Ritang’ani ntarakoora ogosaba ase omoyo one, narora Rebeka ogocha obegete enyongo yaye mareko, ogotirimboka gochia ase ensoko kobuucha amache, na inche namosaba: Koranche, ong’e amache inywe. 46Ere orusia enyongo yaye bwango korwa ase amareko aye, oyebeka inse, ontebia: Kanywe, ne chingamia chiao ninchinyoisie boigo. Erio ong’a, nanywa, oa ne chingamia, nachirochio chianywa. 47Erio namoboria: Nomoiseke o ng’o ore? Ere ong’iraneria: Inche nomoiseke o Betueli oyo Milka aiborerete Nahori. Agwo namobekera ekegera chimioro chiaye, na ebitange ase amaboko aye. 48Erio natung’ama inse nasasima Omonene. Naende namotogia Omonene, Nyasae bw’omonene one Ibrahimu, oyontang’anete ase enchera endonge, erinde imorentere omwana bw’omonene one omokungu korwa ase eamate yaye. 49Bono rende, onye morigetie gokorera omonene one amaya, na ayare boronge, montebie; onye taibo, montebie, ngende ensemo ende eng’ao korigia.”
50Erio Labani na Betueli bakamoiraneria, bakamotebia, “Amang’ana aya nigo arure ase Omonene; intwe titokonyara gokwana ande, amabe gose amaya. 51Rora, Rebeka oyio ore ase obosio bwao, moire, mogende komo, achie koba omokungu bw’omwana bw’omonene oo, buna Omonene konya atebire.”
52Ekero omosomba o Ibrahimu aigwete amang’ana abo, agatung’ama inse ase obosio bw’Omonene. 53Erio omosomba oria akarusia ebinto bi’ogwechabera bie chitahabu, na ebie chifeta, amo ne chianga, akaa Rebeka. Naende akaa momura omwabo amo na ng’ina ebiegwa bie rigori rinene.
54Ere na abanto baria barenge komo bakaria na bakanywa, erio bakarara aroro. Mambia kobwachia gokia akabatebia, “Ing’a ribaga ng’irane ase omonene one.”
55Momura omwabo Rebeka na ng’ina bakamotebia, “Tiga omoiseke oyo arabeere aiga koreng’ana amatuko ikomi; nyuma y’ayio mogende komo.”
56Ere akabatebia, “Timobaisa gontebania, ekiagera Omonene onsesenirie ase orogendo rwane; ing’a ribaga ngende ase omonene one.”
57Bakamotebia, “Tiga torangerie omoiseke, tomoborie, toigwe buna agoteba.” 58Bakarangeria Rebeka, bakamoboria, “Inee! Inabwanche ogende nomonto oyo?”
Akairaneria, “Ee, nanchire, ngende nere.”
59Erio bakaa Rebeka ribaga amo nomoreri oye bagende nomosomba o Ibrahimu na abanto baye. 60Bagasesenia Rebeka, bakamotebia,
“Oyominto, obe ng’ina abanto chilifu ne chilifu;
ororeria rwao inarobue emechie y’ababisa bao, royegambere!”
61Erio Rebeka akaimoka amo nabaiseke baye abasomba, bakariina chingamia, bagatunyana omonto oria. Naboigo omosomba oria akaira Rebeka, akagenda nere sobo.
62Bono Isaka konya orure ase ensoko ya Beeri‐Lahai‐Roi, ekiagera nigo amenyete ase ense ya Negebu. 63Isaka nigo agendete mogondo ekero kia mogoroba, akaba ore nebirengererio. Agwo akaimokia amaiso aye, akarora chingamia chigocha. 64Rebeka nere akaimokia amaiso aye, akarora Isaka; erio agaika bwango korwa ase engamia igoro, 65akaboria omosomba oria, “Monto ki oria ogotaara ase omogondo, ogocha koumerana naintwe?”
Omosomba oria akamoiraneria, “Oria nere omonene one.” Erio omoiseke oria akabwata egietubo kiaye, agetuba.
66Na omosomba oria agatebia Isaka amang’ana onsi, buna akorete. 67Isaka agasoyia Rebeka ase eema ya ng’ina ime, akaba omonyuomire, naende akaba omwanchete. Ase igo Isaka akaremigwa korwa ase omoichano bw’ogokwa kwa ng’ina.
လက္ရွိေရြးခ်ယ္ထားမွု
OMOCHANKO 24: EKEGUSIIBBLE
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
OLD EKEGUSII BIBLE PROTESTANT EDITION
©Bible Society of Kenya, 2020