Halloo 39
39
Yooseefinaa Phoxifaari Mecheenochi Mooyo
1Giixechi Ishmaꞌeeleenaꞌo Yooseefin Gibits daammiyeete. Faroonichi iraasheenaꞌoochee ikkoo, taatoo quyee naayinaꞌochi iraashoo tuneti, Gibitsee asho Phoxifaarich Yooseefin kemmiyeete.
2Doono Yeeriyoo Yooseefina tookkii bi tunetoyich, bi doono Gibitsee asho kexooch bi beetaa, mooyo bulli biich kaamehe. 3Doono Yeeri Yooseefina tookkii bi tunoonaa bi shuunoo bullin biich kaachito bi tunoonon Phoxifaari beeggiye. 4Ebich Yooseefi bi aafoochaa gidoon danehe; biich katini gaddiretoonoo tuniihe; bi kexonaa biich beeto bullinochi toommooch ukkiriihe. 5Yooseefin bi ukkiriiti aaboochee tiijjiꞌi, Doono Yeeri Gibitsee asho Phoxifaari kexon Yooseefichi naboona diiriye. Doono Yeeri bi kexonaa bi budonooch beeti mooyo bullin diiriye. 6Ebich Phoxifaari biich beeto bullin Yooseefichi kishooch tuniihe. Bi maabeeti maayoyee besh bare amee mooyonona gabaanoone.
Yooseefi gaawe neexechonaa mallet gaawoonane. 7Ebiyee gubb, bi doono Phoxifaari mechee Yooseefin ciinnaa bi shunnetoyich, “Tookki qebone” iyaa echahan.
8Tunebaani aroo deꞌa getaanoone. Biyoo ureyich ishichiye: “Ta doono biich beeti mooyo bullin ta kishooch tuniitone. Ta beetoyich, bi kexooch beeti amee mooyoyichona aaxxiyaanoone. 9Hini kechi daggooch taach beeti ukkirittino biichoommone; taach bi imaani mooyo, bi mechee ne tunetoyich, neen baachiye. Ishigaata, ebi shaahe gonde mooyon tuniyoona aabichiree Yeeri aafooch axaaxoon shuunebote?” iye. 10Ureyoo qemi qemona biin echaa beehan; tunebaani aroo biinna tookkii qemon tuneba bi gaꞌooch shagon qaawaanoone.
11Ikke areddoon Yooseefi shuunoon shuuneya kexooch giyiye. Kechi daggooch shuuneebeeti gaddireteenaꞌo daggoochee koniyoona kexooch aalloone. 12Ureyoo Yooseefin bi tahoona gaappaa yechaꞌa, “Ne waataa qebone” iyan. Tunebaani bi tahoon ure kishooch duppiichii, muriccii kexoochee wocona maaxooch kechiye.
13Yooseefi bi tahoon bi kishooch duppiichii, kechii bi wocon beeggaꞌa, 14bare gaddireteenaꞌon ceeggaa boonoshich ishichiyan: “Ebin beegote! Ta keno deebiti, ebi Hibiroo noon coonii beetone. Taan giidoona yeshi qeya, ta beetooch waa giyiye; tunebaani ta qaaroon oogichaꞌa uukkiyoye. 15Ta uukkoon waayeꞌi, bi tahoon ta gaꞌooch duppiichii, kexoochee kechii wocciye” iyan.
16Yooseefichi doono waammi wottoon, ebi tahoon bi gaꞌooch geddaa quyaa beehan. 17Bi waammona ebi mooyon ishichaꞌa biich gettahan: “Ne kexooch ne deebeti ne guuno, ebi Hibiroo taan cooniiya iꞌi, taan giidoona yeshi qeya, ta beetooch waa giyiye. 18Tawoo ta qaaroon oogichaꞌa ta uukkaa, bi tahoon ta gaꞌooch duppiichii kechii wocciye” iyan.
19Yooseefichi doono “Ne guuno taan ebin tuniihe” iyaa bi mechee getteti mooyon waayeꞌi ippee kaarehe. 20Biinoo daammii, taatoochi qoppeenaꞌo beeti cuyee kexooch cuchiye.
Tunebaani Yooseefi are cuyee kexooch bi beeti aabo bullin, 21Doono Yeeri biinna tookkii tunee beehe; bi shoodoonoo biich bekkiihe; cuyee kechi ukkiroo aafoochaa gidoon bi danemmoyich tuniihe. 22Ebich cuyee kechi ukkiroo qoppeenaꞌo bulli toommooch Yooseefin ukkiriihe. Cuyee kexooch beeti mooyo bullich ukkiroo tunehe. 23Doono Yeeri Yooseefina tookkii tuneꞌi, bi tuniibeeti mooyo bullin kaachii bi beetoyich, cuyee kechi ukkiroo Yooseefichi kishooch beeti mooyo bullich amoonolla gabaanoone.
လက္ရွိေရြးခ်ယ္ထားမွု
Halloo 39: KBRC
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
SIM International, 2020.