Halloo 34
34
Diini Shocheyoo
1Ikke areddoon Liyi Yaaqobich shiyeti maache bushee Diini are showeexi maacheenaꞌon beegga kechahan. 2Are showee iraashoo tuneti, Hiwee asho Hamoorichi bushoo Shekeemi busheen bi beeggiyooba, giidoona yechii qeyiye. 3Kashoona busheen shunniye; busheenoo maanjii yibbaatehe. 4Shekeemiyoo bi nihoo Hamoorin “Hini busheen ta shaaggemmoyich tuniibe” iye.
5Yaaqobiyoo bi bushee Diinin Shekeemi giidoona bi yeshon waayehe. Ebiyooba Yaaqobichi anaami bushiisheenaꞌo bi gijjeenaꞌon gaddooch quyee beeheete. Ebich Yaaqobi bi bushiishoo waammi wottoon cikkii beehe.
6Arooba Shekeemichi nihoo Hamoori Yaaqobin yibbaatiiya waahe. 7Yaaqobi bushiisheenaꞌo ebi tuneti mooyon waayeꞌi gaddoochee bekkech waaheete. Shekeemi Yaaqobi busheen giidoona bi yeshona tun bedaani, yeelliibeeti mooyon Israꞌeelee yareenaꞌo toommooch bi tuniitoyich, oogeton ayiniyeete; oogetonoo ippee shineheete.
8Tunebaani Hamoori boonoshich ishichiye: “Ta bushoo Shekeemi ittoshi busheen oogichii shunnitone; doogena bi shaaggemmoyich daaggibote. 9Naachebone; ittoshi maache bushiishoon no anaami bushiishoyich imbote. Ittoshiyoo no maache bushiishoon ittoshi anaami bushiishoyich daambote. 10Noonna tookki no showooch kotebote; ittoshi shunnimmi xaaꞌooch kotebote; beebote; giixebote. Ittoshi hajjoo tuneti showoon yeshote” iye.
11Shekeemi wotta bi nihoona tookkii beetone. Biyoo Diinichi nihoonaa maneenaꞌonoyich ishichiye: “Gaawe aafoona baach taan ciinotani, ittoshi echemmo bullin immemmo taane. 12Xilooshoon tuneba wojjoon, ittoshi qaawitoommon echebote. Busheen baach ta shaaggemmoyich daaggibotani ittoshi echemmon immemmo taane” iye.
13Yaaqobichi anaami bushiisheenaꞌo boonoshi manee Diini toommooch tuneti, yeelliibeeti mooyon boonoshi mulloona yechiichii, Shekeeminaa bi nihoo Hamoorinon mariꞌi, 14ishichiyeete: “No maneen dokireyaani ashich imo nooch hakkeyaani mooyone; oogeton yeelliibeeti mooyon nooch tunemmone. 15Deꞌa no gettemmo, noochoommon ittoshi anaaminaꞌo bulli dokireegaata baachiye. 16No maache bushiishoon ittoshi anaami bushiishoyich no immemmo, ittoshi maache bushiishoonoo no anaami bushiishoyich no deebemmo, ikke ashoonoo tuneree ittoshina tookki no beeyemmo, ebiyee gubbiye. 17Tunebaani no gettaa beeton waayeꞌi dokireyoo ittoshi qayigaata, no busheen yeshiree hammemmo noone” iyeete.
18Ebi boonoshi gettiti mooyo Hamoorinaa bi bushoo Shekeeminoyich gaaweto tunee bekkehe. 19Shekeemiyoo Yaaqobi busheen oogeton bi shunnitoyich, boonoshi gettito bullin yagaanoon tuniyoyich giyiye. Biyoo bi nihoo kechi asheenaꞌo daggooch boonoshi oogiibeeti bushoone. 20Ebich Hamoorinaa bi bushoo Shekeemina ebin are katemeexi boonoshi asheenaꞌoyich getoyich, boonoshi katemee kellooch hammiyeete; ishichiinoo iyeete: 21“Hini asheenaꞌo noonna shunechi asheenaꞌone. No showee daggooch beebeete; giixebeete; boonoshi kotemmoyich showoo gaminoone. Boonoshi maache bushiishoon no anaami bushiishoyich deebone; no maache bushiishoonoo boonoshi anaami bushiishoyich imbone. 22Tunetaa ebi asheenaꞌo noonna tookki ikke asho tuneree beemoyich boonoshi deꞌa gettemmo, ikke mooyon no tuniigaata baachiye; ebiyoo no anaaminaꞌo bulli boonoshichoommon dokiree gaatane. 23Ebin no tuniigaata, boonoshi gijjoonaa boonoshich beeto bullina noocho tunemmone. Noonna tookki boonoshi kotemmoyich, ebi mooyona baach boonoshich deꞌa getone” iyeete.
24Katemee kellooch kiceeti asheenaꞌo bulli Hamoorinaa bi bushoo Shekeemina gettiton deꞌa iyeete; katemooch beeti anaaminaꞌo bulliyoo dokireeheete.
25Keejjinnee qemooba asheenaꞌo batt mayeꞌi beetaa, Diinichi maneenaꞌo, Yaaqobichi gutte bushiisheenaꞌo, Simooninaa Lewina boonoshi goraadoon yechiꞌi, diqqoona katemooch giyiyeete; anaaminaꞌo bullinoo wuxii ciichiyeete. 26Hamoorinaa bi bushoo Shekeeminon goraadoona wuxiyeete. Boonoshi manee Diininoo Shekeemi kexoochee yechii katemoochee kechiyeete. 27Ebiyee gubb, echeti Yaaqobi bushiisheenaꞌo boonoshi manee toommooch tuneti, yeelliibeeti mooyoyich nichoon kichoyich qititi asheenaꞌo waan waaꞌi, are katemooch beeti mooyo bullin hokkii daammiyeete. 28Bageenaꞌonaa emmisheenaꞌonon, miiminaꞌon, kureenaꞌon, are katemoonaa bi guudoonooch beeto bullinoo daammiyeete. 29Are asheenaꞌochi gijjoo bullin, boonoshi maacheenaꞌonaa bushiisheenaꞌo bullinon keccii, kexi kexoochee daneto bullin yechii hammiyeete.
30Yaaqobiyoo Simooninaa Lewinoyich ishichiye: “Hini showooch beeti Kanaaneenaꞌonaa Ferizeenaꞌona waanaa ta shigo gondemmoyich tuniiꞌi, ta toommooch xuuxoon deebiyote. No, haddoona giishecho noone. Ikkottee ta toommooch boonoshi tiyigaata, taannaa ta kechi asheenaꞌona aallesh toone no gettemmo?” iye.
31Tunebaani Lewinaa Simoonina “Ishigaata, no maneen yahechin yeshoommon yesha?” iyeete.
လက္ရွိေရြးခ်ယ္ထားမွု
Halloo 34: KBRC
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
SIM International, 2020.