Juɛl a pwɔdɛn tɛ Mak 2
2
1YECU bɛnɛ Kapernaum mokɛ, cocɛn dokɛ. Ninkɛ bɛnɛ burɛ aŋɛ yitɛn juɛl piyɛn, Yecu ballɛ tɛ puwɛ ban ji. 2Ɔci ma ɔcɛn ban Eke a coŋɛn a coŋɛn, non kumɛ a kwumtɛn, ɣon toka ɣolɛ, makɛ coŋɛn ballɛ ciyɛn ɔntɔ, wontɛ Yecu lotɛn ma tɛ jig. 3Ma bɛnɛ aŋanɔ kɛrcɛn minɛ warɛ yayɛn tɛ aŋgen, pɔy a kacɛ ɣora bawɛ, 4eken pirtɛn ɣon taŋɛ ti, kaicɛn nyalɔ ɣon winyu ti, ɣon winyu a purŋɛn. Ɔci ɣon winyu lakyɛ ma aŋkɛ minɛ warɛ yayɛn dwulcɛn inyu Yecu ti tɛ aŋgen. 5Yecu gɔrcɛn jithɛn ballɛ eken ti aŋkɛ gɔkjɛn minɛ ti: Kacɛ, nɔjɛ wieŋɛn ɔntɔ dokɛ. 6Ɔci makɛ ballɛ, makɛ kijɛ wɛragɛ ballɛ pukɛ juɛl yumgɛn ti: 7Minɛ gɔkɛ ɔŋ, ɣogɛ? Eke dhurŋɛ Juɔŋ a Tolɛn ti: minɛ yakɛn ti tɛ nɔjɛ wiektɛ ɔntɔ bawɛ; Juɔŋ a Tolɛn yakɛn ti parɛ, nɔtɛn nɛnɛ. Ma pukɛ ɔŋ. 8Ɔci aca nɛntɛ Yecu gɔrcɛn jig paŋɛ ma, gɔkjɛn eken ti: Ɣɛke pukɛ juɛl a nɛnɛ yumgɛn ti ɣogɛ? 9Aginɛ cwɔkɛn ti, juɛl nɔjɛ wiektɛ ɔntɔ; walɛ juɛl jɔŋdɛ nyalɔ, aŋgen luldɛ, otɛ ban ji; juɛl a ɔki a cwɔlɛn? 10Aŋkɛ i gɔrtɛ Tɔl Maban yakɛn ti nɔjɛ wiekyɛn ɔntɔ tɛ ban ji, (Yecu gɔkjɛn minɛ warɛ yayɛn ti,) 11Ya gɔkjɛ i ti: Jɔŋɛ nyalɔ, aŋgen luldɛ, ɔgdɛ otɛ ban ji. 12Aŋkɛ minɛ jɔŋɛn, aŋgen lulɛn nɛ penyɛn, kacɛn burɛ. Ɔci ma punɛn wakɛnda, ɔci muortɛ Juɔŋ a Tolɛn ti nɛ tolɛn, gɔkjɛn: Juɛl a nɛnɛ yowɛrnɔn ɔn tɛbatɛ bɛ.
13Tɛ ɣoŋ a parɛ Yecu atɛ thul dwɔŋɛ ti; ɔci makɛ ɔcɛn Eke ti a coŋɛn, ɔci ma laltɛn Eke wakɛnda. 14Yecu atɛn gutɛ (ban ji), Eke gɔrcɛn Lebay, kacɛ Alpayo, cocɛn non a tulba; ɔci gɔkjɛn Eke ti: Bɛdɛ, botɛ Yɛ ti. Aŋkɛ eke jɔŋɛ nyalɔ, atɛn botɛn Yecu ti. 15Yecu atɛ ɣon Lebay, cocɛn omɛn am. Wontɛ makɛ limmɛ tulba yakɛn makɛ nɔdkɛ cocɛn Yecu ti yakɛn makɛ botɛn. Ma a botɛ Eke a coŋɛn. 16Ɔci ma a kijɛ wɛragɛ ma a Paraci gɔrcɛn Yecu ballɛ omɛn am ɔci motɛn wakɛ matɛn ma yakɛn makɛ limmɛ tulba, yakɛn makɛ nɔdkɛ. Ma gɔkjɛn makɛ botɛn ti: Yecu omɛ wakɛ ɔci mocɛ wakɛ yakɛn makɛ limmɛ tulba yakɛn makɛ nɔdkɛ, cocɛn a ciɛlɔ. 17Wontɛ Yecu tiŋɛn ɔci gɔkjɛn: Makɛ wakɛn pwɔnɛn bwɔgɛ akim bɛ, makɛ a bwɔgɛn akim a makɛ wakɛn yɛyɛn. Ya bɛnɛ borcɛ makɛ yumgɛn bɔwɛn bɛ; Ya borcɛ makɛ nɔdkɛ.
18Makɛ botɛn Jɔn yakɛn ma Paraci ballɛ gwutɛ konyɛ: ɔci eken bɛnɛ Yecu ti, gɔkjɛn: Ma Jɔn ɔci ma Paraci gwutɛ konyɛ, ɔci makɛ botɛ I ti gwutɛ bɛ, ɣogɛ? 19Yecu gɔkjɛn eken ti: Kan minɛ ballɛ dɛnyɛ eŋ, ma ekta gwutɛ konyɛ, bokɛ? Kan minɛ dɛnyɛ eŋ ballɛ, ma yakɛn ti tɛ gwutɛ bɛ. 20Ɔci ɣoŋkɛ ballɛ bɛyɛn, aŋkɛ minɛ dɛnyɛ enyɛn ɔntɔ, eke dulɛ ma, wontɛ tɛ ɣoŋ aŋɛ nɛnɛ ma gwutɛ konyɛ. 21Minɛ turtɛ buruŋ adan yakɛn buruŋ a wonɛ bawɛ: buruŋ a wonɛ mwuŋnɛ buruŋ adan ti wontɛ buruŋ jɛtɛ jidɛn, yayɛn dokɛ. 22Minɛ luɔyɛ wain a wonɛ tɛ kwucɛn a dunkɛ bawɛ: kwucɛ a dunkɛ muriŋɛ ɔci wain daktɛn budan. Wain a wonɛ ma luɔyɛ tɛ kwucɛn a wonkɛ.
23Wontɛ tɛ ɣoŋ a wuwɛn Yecu atɛ pɔy edɛ bal gidɛn; makɛ botɛn lɛwɛn puk tɛ yum. 24Wontɛ ma Paraci gɔkjɛn Yecu ti: Gwɔlɛ, ma noŋdɛ ɔŋ tɛ ɣoŋ a wuwɛn ɣogɛ? 25Ma na noŋɛ ɔŋ bɛ. Ɔci Eke gɔkjɛ ma ti: Tɛ ɣoŋ Dabid amɛ konyɛ yakɛn ma ekta, aginɛ naŋɛ eke yowɛrnɛn ɣɛke bɛ? 26Eke kacɛn ɣora ɣon Juɔŋ a Tolɛn tɛ ɣoŋkɛ Abayata ballɛ, minɛ gɔrcɛ wakɛ Juɔŋ a Tolɛn ti. Ɔci Dabid omɛn am ɣonnɛn ma tɛ Juɔŋ a Tolɛn; am a nɛnɛ ma budan omkɛ bɛ, amtɛ ma gɔrcɛ wakɛ Juɔŋ a Tolɛn ti; wontɛ Dabid omɛn ɔci wɛnnɛ ma eke. 27Yecu gɔkjɛn eken ti: Ɣoŋ a wuwɛn naŋɛn tɛ maban. Maban cɔnɛ aŋkɛ noŋɛ ɣoŋ a wuwɛn bɛ. 28Aŋkɛ Minɛ Tɔl Maban a Ciagɔn ɣoŋ a wuwɛn daakɛn.
လက္ရွိေရြးခ်ယ္ထားမွု
Juɛl a pwɔdɛn tɛ Mak 2: MFZ1947
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
First published by British and Foreign Bible Society in 1947.