Mbombo sa Vasungʼhua 17
17
Amabaatu amavaha kʉ Tesalonike
1ɄPaulo nʉ Siila vakakila mʉ lɨkaaja ɨlya Amfipoli nɨ lya Apolonia, vakafika mʉ lɨkaaja ɨlya Tesalonike, pano pwejɨlyale ɨsinagogi ɨja Vayahudi. 2ɄPaulo akava ikwingila mʉ sinagogi ndavʉle lwale ʉlwiho lwake. Alingiile ifighono fitatu ifya Sabati, na kujova na vaanhu vano vakavisagha mula. Akajovagha navo vwɨmɨla aMalembe aMɨmɨke, 3ɨkʉvavʉʉla na kʉkʉvahʉfia kuuti, ʉKɨlɨsite akanoghiile kupumusivua na kusyʉka kuhʉma kʉ vafue. Kange, akavavʉlagha akatisagha, “ɄYesu ʉjuo jʉno nɨkʉmpʉlɨsia kʉlyʉmue ghwe Kɨlɨsite.” 4Vamo mʉ Vayahudi vakɨtɨka amasio aghuo na kuuva palɨkɨmo nʉ Paulo nʉ Siila. Voope aVayunaani vinga vano valyale vivɨngɨlɨla ʉlwɨtɨko ʉlwa Kɨyahudi, na vakɨjʉʉva vinga avoghopua vakɨtɨka na kuuva palɨkɨmo na veene.
5Neke aVayahudi avange vano navakɨtiike vakava nɨ giila, vakalʉta mʉ mapuulo, vakaghongola avaanhu avaviivi, vakakongʼhaana, vakatengʉla amabaatu mʉ lɨkaaja lyoni. Vakingila kɨngʉfu mʉ nyumba ɨja Yasoni kʉkʉmʉlonda ʉPaulo nʉ Siila, kuuti vavatwale pa lɨpʉgha ɨlya vaanhu ava lɨkaaja lɨla. 6Ye navavavwene, vakamʉlulunja ʉYasoni palɨkɨmo na vɨtɨki vamonga, vakavatwala kʉ vavaha va lɨkaaja, kʉmo vikwova viiti, “Avaanhu ava ve vano vapelile amabaatu mʉ ɨɨsi isingi sooni, lɨno visile mwope mʉ lɨkaaja liitu, 7ghwope ʉYasoni avʉpiile kʉ kaaja jaake! Avaanhu vooni ava, navivɨngɨlɨla indaghɨlo sa Kaisali,#17:7 Kaisali, alyale ghwe ntwa ʉmʼbaha ʉghwa Valooma. Ɨmba kʉ Vʉghanʉle vwa Masio aMahesia. asi viiti kwale ʉntwa ʉjʉnge jʉno itambʉlua ghwe Yesu.” 8Avavaha va lɨkaaja palɨkɨmo nɨ lɨpʉgha lya vaanhu, ye vapʉliike amasio aghuo, vakava nɨ lyojo. 9Pe avavaha vala vakamʼbʉʉla ʉYasoni na vajaake kuuti, vakomekele indalama,#17:9 Vakomekele indalama: Ʉlʉ lʉkavombeka kuvonia ʉlʉfingo lwa Yasoni na vajaake kuuti navilikʉvʉpɨla kange ʉPaulo na vajaake. pe vakavaleka valʉtaghe.
ɄPaulo nʉ Siila mʉ lɨkaaja ɨlya Beloya
10Ɨkɨghono kɨkio pakɨlo, avɨtɨki vakamhɨngɨlɨsia ngʼhaningʼhaani ʉPaulo nʉ Siila kuuti valʉtaghe kʉ Beloya. ɄPaulo nʉ Siila ye vafikile kʉla, vakingila mʉ sinagogi ɨja Vayahudi. 11AVayahudi avuo ava kʉ Beloya valyale vapʉlɨki kukila ava kʉ Tesalonike, vakʉpɨlagha ɨmhola ɨja Mʉtwa ʉYesu nʉ mwojo ghwoni. Ifighono fyoni vakɨmbagha aMalembe aMɨmɨke, kuuti valole sino ijova ʉPaulo nʉ Siila nave sa kyangʼhaani. 12Pe vinga mʉ veene vakamwɨtɨka ʉYesu, palɨkɨmo na Vayunaani avakɨnhaata na vakɨjʉʉva avoghopua.
13Neke aVayahudi ava kʉ Tesalonike, ye vapʉliike kuuti, ʉPaulo ipʉlɨsia ɨlɨsio ɨlya Ngʉlʉve kwope kʉ Beloya, vakalʉta kwope ʉkuo, vakahovelesia amapʉgha gha vaanhu na kutengʉla amabaatu. 14Pe avɨtɨki ava kʉ Beloya vakamhɨngɨlɨsia ngʼhaningʼhaani ʉPaulo alʉtaghe kʉ mwani, looli ʉSiila nʉ Timoti vakajigha mʉ Beloya. 15Avɨtɨki vano vakamhɨngɨlɨsyagha ʉPaulo vakamfikisie mʉ lɨkaaja ɨlya Atene. Ye vigomoka, ʉPaulo akavalaghɨla vamʼbʉlaghe ʉTimoti nʉ Siila kuuti navangadɨlaghe, vamʼbɨngɨlɨlaghe ngʼhaningʼhaani.
ɄPaulo mʉ lɨkaaja ɨlya Atene
16ɄPaulo ye ɨkʉvaghulila ʉTimoti nʉ Siila kʉ Atene, akavona ɨlɨkaaja lɨla lyoni lɨmemile ifihwani ifya mangʉlʉve, pe akava ipumuka kyongo mʉ mwojo ghwake. 17Apuo akatengʉla kujova na kukwamʉlana na Vayahudi palɨkɨmo na Vayunaani vano vakavɨngɨlɨlagha ʉlwɨtɨko ʉlwa Kɨyahudi. Akavombagha ʉluo mʉ sinagogi ɨja Vayahudi. Kange ifighono fyoni, akajovagha na kukwamʉlana na vaanhu vano alyale itangʼhana navo mʉ mapuulo.
18Mʉ mapuulo ʉmuo mwe vakava avɨmbi vamonga vano vakatambʉlwagha Vaepikuleo#17:18 Vaepikuleo, valyale viiti ɨkɨɨnu ɨkɨnono mʉ vwʉmi vwa muunhu kwe kuuva nʉ lʉkeelo ʉlwa fiinu ifya pa ɨɨsi, kange navakalondagha ʉlʉpumuko. Navalyale vikwɨtɨka ifipango ifya mangʉlʉve agha Kɨyunaani. na Vasitoiki.#17:18 Vasitoiki, vakagadɨlɨlagha kyongo fino vakasaghagha. Valyale vikaana imbʉlanɨsio isa kuhovosia ni sa mʉ ɨɨsi, ʉlwene vakalondagha ʉmuunhu aleke kuvɨngɨlɨla ʉvughane vwa mʼbɨlɨ, looli amaghendele amanofu. Avaanhu avuo vakatengʉla kukanɨngʼhana nʉ Paulo. Vamo vakati, “Jʉno idabʉka ʉjʉ ilonda piiti kɨki?” Avange vakati, “Luvoneka kuuti ipʉlɨsia imhola isa mangʉlʉve amagheesi.” Vakajovagha ʉluo, ʉlwakʉva ʉPaulo alyale ipʉlɨsia ɨmhola ɨja Yesu, na kusyʉka kwa mwene. 19Pe vakantoola ʉPaulo, vakantwala pa Aleopago,#17:19 Aleopago: Apa pepano aVayunaani avɨmbi vakakongʼhanagha kupʉlɨkɨsia na kujova injovo na kʉkʉsighela nave sa kyangʼhaani. vakamʼbʉʉla vakati, “Asi, imbʉlanɨsio imhia isi sino ghuvʉlanɨsia, ndepoonu ghʉkʉtʉvʉʉla ʉmʉlʉvo ghwake? 20Tʉpʉliike imhola ingeesi sino ghujova, lɨno tulonda kukagʉla ʉmʉlʉvo ghwake.” 21Valyajovile ʉluo, ʉlwakʉva avaanhu ava kʉ Atene palɨkɨmo na vagheesi vooni vano vakikalagha ʉkuo, valyale nʉ lwiho ʉlwa kʉlonda fiijo kujova na kupʉlɨkɨsia imhola imhia.
22Pe ʉPaulo akɨɨma pakate pa Aleopago akajova akati, “Ʉmue mwe Vaatene! Nɨkagwile kuuti mʉlɨ nʉ lwɨtɨko ʉlʉkome kʉ mangʉlʉve. 23Ye nikila mʉ lɨkaaja ɨlɨ, nɨfyaghile ifiinu finga fino mʉkʉfyɨmɨka. Mʉ ifio nɨkyaghile ɨkɨtekelelo kɨno kɨlembilue amasio ghano ghiiti, KWA NGɄLɄVE JɄNO NAAKAGɄLIIKE. Lɨno, ʉNgʉlʉve ʉjuo jʉno mʉkʉmwɨmɨka kɨsila kʉnkagʉla, ghwe jʉno ʉne nɨkʉmpʉlɨsia kʉlyʉmue.
24“ɄNgʉlʉve ʉjuo ghwe jʉno apelile ɨɨsi ni fiinu fyoni fino mwefili. Kange, ʉlwakʉva ghwe Mʉtwa ghwa kʉkyanya na paasi apa, naikukala mʉ nyumba inyɨmɨke isa kufunyila sino sijengilue na vaanhu. 25Kange, naivombelua na vaanhu hwene nsila nafyo, ʉlwakʉva ʉmwene ghwe jʉno ɨkʉvapeela avaanhu vooni ʉvwʉmi, palɨkɨmo ni fiinu fyoni. 26Ʉmwene alyapelile avaanhu ava fisina fyoni kuhʉma kwa muunhu jʉmo, kuuti vikalaghe mʉ ɨɨsi jooni. Kuhʉma mʼbʉkʉʉlʉ ʉmwene alyataviike ifisina ni fisina kuuti vilikukala amasiki ghalɨku, kange vilikukala kʉʉghi. 27ɄNgʉlʉve alyavombile isio sooni kuuti, avaanhu vamʉlondaghe nambe mʉlwa kwabasia, neke vamwaghe napano ʉmwene naalɨ kʉtali nʉ muunhu ghweni. 28Ndavʉle alyajovile ʉmuunhu jʉmonga kuuti,
‘Ʉmwene ghwe jʉno atʉvɨkile tʉlɨ vʉʉmi,
tughenda na kuvomba sino tuvomba!’
“Kange amasio agha, ghalɨ ndavʉle valyajovile avɨmba nyɨmbo vamonga ava kʉlyʉmue kuuti,
‘Ʉlwakʉva ʉsue tʉlɨ vaana vaake.’ ”
29ɄPaulo akafijovagha akatisagha, “Lɨno, pano ʉsue tʉlɨ vaana va Ngʉlʉve, natʉnoghiile kusaagha kuuti, ʉNgʉlʉve alɨ ndavʉle ifihwani fino vatendile nɨ sahabu, nɨ kyʉma nambe nɨ lɨvue, fino fihongolilue vʉnono na vaanhu. 30Pamwande pala avaanhu ye vivomba kɨsila kʉlʉtangʼhania, ʉNgʉlʉve alivɨkile hwene nailola. Neke lɨno ɨkʉvavʉʉla avaanhu vooni, imbale sooni kuuti, valaate inyɨvi saave na kʉkʉmwɨmɨka ʉmwene, 31ʉlwakʉva avɨkile ɨkɨghono kɨno ilikʉvahɨgha avaanhu vooni mʉ vwakyangʼhaani. Ilikʉvahɨgha kukilila ʉmuunhu jʉmo jʉno alyansalwile. Mwa muunhu ʉjuo ʉNgʉlʉve ahʉfisie isio kʉ vaanhu vooni mʉlwa kʉnsyʉsia kuhʉma kʉ vafue.” 32Avaanhu vano valyale pa Aleopago, ye vapʉliike ʉPaulo ijova ɨmhola ɨja kʉsyʉka avafue, vamo vakava vikʉmʼbenapʉla, looli avange vakati, “Tulonda kʉkʉkʉpʉlɨkɨsia kange, vwɨmɨla ɨmhola ɨjɨ.” 33Pe ʉPaulo akavʉʉka pa Aleopago, akavaleka. 34Neke avaanhu vamonga mʉ veene vakamwɨtɨka ʉMʉtwa ʉYesu, vakatengʉla kʉkʉmʼbɨngɨlɨla ʉPaulo. Mʉ avuo mwealyale ʉDionisio ʉmo ʉghwa pa Aleopago, nʉ mʉkɨjʉʉva jʉmonga jʉno akatambʉlwagha Damali, na vaanhu avange.
လက္ရွိေရြးခ်ယ္ထားမွု
Mbombo sa Vasungʼhua 17: wbi
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© (Active), Wycliffe Bible Translators, Inc. All rights reserved.