Luka 9
9
Yesu tsɔ kaseli nyɔngma kɛ enyɔ ɔmɛ
(Mateo 10.5-15; Marko 6.7-13)
1Yesu tsɛ ni nyɔngma kɛ enyɔ ɔmɛ kɛ kpe, nɛ e ha mɛ he wami nɛ a kɛ hia mumi yayamihi tsuo, nɛ a kɛ tsa hiɔhi hulɔ. 2Kɛkɛ nɛ e tsɔ mɛ ke a ho nɛ a ya fiɛ Mawu matsɛ yemi ɔ he munyu ɔ, nɛ a tsa hiɔtsɛmɛ. 3#Luk 10.4-11; Nits 13.51 Loko a ho ɔ, Yesu de mɛ ke, “Nɛ nyɛ yaa nɛ ɔ, nyɛ ko hɛɛ nɔ́ ko nɔ́ ko kɛ to dɛ. Nyɛ ko hɛɛ dɛma tso, aloo blɔ hialɔ kotoku, aloo niye ní, aloo sika; tade enyɔne tete po nyɛ ko hɛɛ. 4We tsuaa we mi nɛ nyɛ maa ya a, nyɛɛ hi lejɛ ɔ kɛ yaa si nyɛ maa je ma a mi. 5Ke nyɛ ya he ko nɛ a he we nyɛ atuu ɔ, loko nyɛ maa je ma a mi ɔ, nyɛ blɛ nyɛ nane sisi zu kɛ pue si kɛ to mɛ okadi kaa a maa gbla a tue.”
6Kaseli ɔmɛ pue nɔ kɛ ho, nɛ a ya fiɛ manye munyu ɔ kɛ kpa kɔpe ɔmɛ tsuo, nɛ a tsa hiɔtsɛmɛ ngɛ he tsuaa he.
Herode jija
(Mateo 14.1-12; Marko 6.14-29)
7 #
Mat 16.14; Mar 8.28; Luk 9.19 Benɛ Herode, amlaalo nɔkɔtɔma nɛ hyɛɛ Galilea nɔ ɔ nu níhi nɛ ngɛ nɔ yae ɔ a he ɔ, e jija; ejakaa ni komɛ ngɛ dee ke Yohane nɔ sɔlelɔ ɔ nɛ a tle si kɛ je gbeje. 8Ni komɛ hu ngɛ dee ke Eliya lɛ ba; nɛ ni komɛ hu ke blema gbali ɔmɛ eko lɛ kpale ba wami mi ekohu. 9Se Herode ke, “Yohane ɔ, i po e yi. Se i ngɛ nyakpɛ níhi nue ngɛ nyumu nɛ ɔ lɛɛ e he. Mɛnɔ ji lɛ?” Nɛ e hla kaa e maa na Yesu.
Yesu ha nyumuhi akpe enuɔ niye ní
(Mateo 14.13-21; Marko 6.30-44; Yohane 6.1-14)
10Bɔfo ɔmɛ kpale a se kɛ ba, nɛ a ba sɛɛ níhi tsuo nɛ a ya pee ɔ ngɔ ha Yesu. Jehanɛ ɔ, e kɛ mɛ pɛ pue nɔ kɛ ho ma ko nɛ a tsɛɛ Betsaida a ya. 11Benɛ nimli kpekpemi ɔ nu he ɔ, a bu kɛ nyɛɛ e se. E he mɛ hɛmuɔ, nɛ e kɛ mɛ tu Mawu matsɛ yemi ɔ he munyu; nɛ e tsa nihi nɛ tsami he hia mɛ.
12Gbɔkuɛ nya si haa a, kaseli nyɔngma kɛ enyɔ ɔmɛ ba e ngɔ, nɛ a ba de lɛ ke, “Hyɛ, ngapa lɛ wa ngɛ nɛ ɔ nɛ! Wo ni ɔmɛ blɔ kɛ ya kɔpehi, kɛ ma amɛ nɛ bɔle wɔ nɛ ɔ a mi, konɛ a ya hla niye ní kɛ hwɔ he.”
13Se Yesu de mɛ ke, “Nyɛ nitsɛmɛ nyɛ ha mɛ nɔ́ ko nɛ a ye.”
A he nɔ ke, “Abolo enuɔ, kɛ lo enyɔ pɛ wa ngɛ. Wa tsa be nyɛe ma ya he niye ní ba ha ma kpekpemi nɛ ɔ tsuo!” 14Nyumuhi kɛkɛ maa su akpe enuɔ ngɛ lejɛ ɔ.
Yesu de e kaseli ɔmɛ ke, “Nyɛ ha nɛ ni ɔmɛ nɛ a hi si ngɛ kuuhi a mi, nihi maa pee nyingmi enuɔ ngɛ kuu tsuaa kuu mi.”
15Kaseli ɔmɛ pee ja, nɛ a ha nɛ ni ɔmɛ tsuo hi si. 16Kɛkɛ nɛ Yesu kukuɔ abolo enuɔ, kɛ lo enyɔ ɔ, nɛ e hyɛ hiɔwe, nɛ e gbaa nɔ, nɛ e ku mi, nɛ e kɛ ha e kaseli ɔmɛ, konɛ mɛ hu a dla ngɔ ha ma kpekpemi ɔ. 17Mɛ tsuo a ye, nɛ a tɔ, nɛ kaseli ɔmɛ bua bibliwi nɛ piɛ ɔ nya ngɔ wo kusii nyɔngma kɛ enyɔ mi.
Petro ye odase ke Yesu ji Kristo ɔ nɛ
(Mateo 16.13-19; Marko 8.27-29)
18Ligbi ko benɛ Yesu nɔ kake too ngɛ sɔlee ɔ, kaseli ɔmɛ ba e ngɔ. E bi mɛ ke, “Ni ɔmɛ deɔ ke mɛnɔ ji mi?”
19 #
Mat 14.1-2; Mar 6.14-15; Luk 9.7-8 A he nɔ ke, “Ni komɛ ke Yohane nɔ sɔlelɔ ɔ ji mo; ni komɛ ke Eliya, nɛ ni komɛ hu ke blema gbali ɔmɛ eko lɛ a tle si.”
20 #
Yoh 6.68-69
E bi mɛ ke, “Se nyɛɛ lɛɛ kɛ nyɛ deɔ kɛɛ?” Petro he nɔ ke, “Mo ji Mawu we Kristo ɔ nɛ.”
Yesu tu e amanehlu kɛ e gbenɔ he munyu
(Mateo 16.20-28; Marko 8.30—9.1)
21Kɛkɛ nɛ Yesu bɔ mɛ kɔkɔ ke a ko ya de nɔ ko nɔ ko. 22E de mɛ hulɔ ke, “Ja Nɔmlɔ Bi ɔ na amanehlu babauu, nɛ ma nimeli ɔmɛ, kɛ osɔfo nikɔtɔma amɛ, kɛ mlaa tsɔɔli ɔmɛ kua lɛ. A maa gbe lɛ, se ligbi etɛ se ɔ, Mawu ma tle lɛ si ekohu.”
23 #
Mat 10.38; Luk 14.27 Jehanɛ ɔ, e de ni ɔmɛ tsuo ke, “Ke nɔ ko suɔ kaa e maa nyɛɛ ye se ɔ, e kua e he, nɛ e hɛɛ e sɛumi tso ɔ daa ligbi kɛ nyɛɛ ye se. 24#Mat 10.39; Luk 17.33; Yoh 12.25 Ejakaa nɔ tsuaa nɔ nɛ suɔ kaa e baa e klaa yi ɔ, e maa laa lɛ; se nɔ tsuaa nɔ nɛ laa e klaa ngɛ ye he ɔ, e maa na lɛ ekohu. 25Mɛni se nɔmlɔ ma na, ke e nine su je ɔ tsuo nɔ, nɛ lɛ nitsɛ e hɛ mi kpata a? 26Nɔ tsuaa nɔ nɛ imi, kɛ ye munyu ɔ, wa he peeɔ lɛ zo ɔ, lɛ hu e he maa pee Nɔmlɔ Bi ɔ zo benɛ e maa ba ngɛ lɛ nitsɛ e hɛ mi nyami ɔ mi, kɛ e Tsɛ nɔ́ ɔ, kɛ bɔfo klɔuklɔu ɔmɛ a nɔ́ ɔ mi. 27I ngɛ nyɛ dee anɔkuale mi ke, ni komɛ ngɛ nihi nɛ daa si ngɛ hiɛ ɔ a kpɛti nɛ a be gboe, kɛ yaa su be nɛ Mawu matsɛ yemi ɔ maa ba.”
Yesu nɔmlɔ tso su tsake
(Mateo 17.1-8; Marko 9.2-8)
28 #
Pet II, 1.17-18
Benɛ Yesu tu munyu nɛ ɔmɛ maa pee ligbi kpaanyɔ se ɔ, e ngɔ Petro, Yohane, kɛ Yakobo kɛ ho yoku ko nɔ ya nɛ e ya sɔle. 29Benɛ e ngɛ sɔlee ɔ, e hɛ mi tsake, nɛ e tade ɔ hiɛ futaa, nɛ e ngɛ kpɛe klãiklãi. 30Tlukaa a, nyumuhi enyɔ ba lejɛ ɔ, nɛ a kɛ lɛ ba tu munyu. Mɛ ji Mose kɛ Eliya. 31A ba kɛ hɛ mi nyami, nɛ a kɛ Yesu ba tu munyu nɛ kɔɔ gbenɔ nɛ e yaa gbo ngɛ Yerusalem ɔ he. 32Be nɛ ɔ mi tsuo ɔ, mahe gbe Petro kɛ e huɛmɛ ɔmɛ. Se benɛ a hɛ tsɛ̃ ɔ, a na Yesu hɛ mi nyami ɔ, kɛ nyumuhi enyɔ ɔmɛ nɛ daa si ngɛ e kasa nya a. 33Benɛ nyumu ɔmɛ ngɛ Yesu sie ɔ, Petro de lɛ ke, “Nyɔmtsɛ, e hi kaa wa ngɛ hiɛ ɔ! Wa maa ma bo tsu etɛ, o nɔ́ kake, Mose nɔ́ kake, kɛ Eliya hu nɔ́ kake.” (Se e li nɔ́ nɛ e ngɛ dee tete).
34Benɛ e ngɛ munyu ɔ tue kɛ mwɔɔ ɔ, bɔku ko ba ha a nɔ, nɛ kaseli ɔmɛ ye gbeye. 35#Yes 42.1; Mat 3.17; 12.18; Mar 1.11; Luk 3.22 Kɛkɛ nɛ Mawu tu munyu kɛ je bɔku ɔ mi ke, “Ye Bi nɛ i hla ji nɛ ɔ nɛ; nyɛɛ bu lɛ tue!”
36Benɛ munyu ɔ se po ɔ, Yesu nɔ kake too lɛ daa si ngɛ lejɛ ɔ. Kaseli ɔmɛ ma a nya ngɔ to nɔ́ nɛ a na nɛ ɔ nɔ, nɛ a kɛ nɔ ko nɔ ko sɛɛ we he ní jamɛ a be ɔ mi.
Yesu hia mumi yayami ngɛ jokuɛ nyumuyo ko mi
(Mateo 17.14-18; Marko 9.14-27)
37E nɔ jena a, Yesu kɛ e kaseli etɛ ɔmɛ kple yoku ɔ, nɛ nihi fuu kɛ lɛ ba kpe. 38Kɛkɛ nɛ nyumu ko kpa ngmlaa kɛ je ni ɔmɛ a kpɛti, nɛ e de ke, “Tsɔɔlɔ! I kpa mo pɛɛ, hyɛ ye binyumu ɔ, ye bi kake too ɔ! 39Ke pee ɔ, mumi yayami maa ba e nɔ, nɛ e ma kpa ngmlaa si kake too. Kɛkɛ mumi ɔ ma ha nɛ e ma lua gaganii, nɛ e nya maa fia hwɔli. Mumi ɔ maa hi jokuɛ nɛ ɔ nɔ́ yeyee pee hluu nɛ he jɔmi be mi. 40I kpa o kaseli ɔmɛ pɛɛ ke a hia mumi yayami ɔ, se a nyɛ we.”
41Yesu he nɔ nɛ e de ke, “Oo yi nɔ bi nɛ be hemi kɛ yemi nɛ a kplɛɛ we tsakemi, mɛni be i kɛ nyɛ maa hi si kɛ yaa si?” Kɛkɛ nɛ e de nyumu ɔ ke, “O kɛ o bi ɔ nɛ ba hiɛ ɔ!”
42Benɛ jokuɛ ɔ ma a, mumi yayami ɔ po lɛ fɔ si, nɛ e ha e lua gaganii. Se Yesu nga mumi ɔ yi, nɛ e tsa jokuɛ ɔ, nɛ e ngɔ lɛ ngɔ ha e tsɛ ɔ ekohu. 43Mawu he wami kpetekpleenyɛ nɛ je kpo nɛ ɔ ha nɛ ni ɔmɛ tsuo a he mi po.
Yesu tu e gbenɔ he munyu ekohu
(Mateo 17.22-23; Marko 9.30-32)
Benɛ ni ɔmɛ a hɛ mi pee mɛ yaa ngɛ níhi tsuo nɛ Yesu ngɛ pee ɔ a he ɔ, e de e kaseli ɔmɛ ke, 44“Nɔ́ nɛ ma de nyɛ nɛ ɔ, nyɛɛ bu tue saminya! A maa ngɔ Nɔmlɔ Bi ɔ kɛ wo nihi nɛ he wa a dɛ mi.” 45Se kaseli ɔmɛ nui nɔ́ nɛ e de ɔ sisi. A ngɔ kɛ laa mɛ, konɛ a ko nu sisi; nɛ mɛ hu a ngɛ gbeye yee kaa a ma bi lɛ munyu ɔ he nɔ́ ko.
Mɛnɔ ji nɔmlɔ nguaa pe kulaa?
(Mateo 18.1-5; Marko 9.33-37)
46 #
Luk 22.24
Jehanɛ ɔ, kaseli ɔmɛ ba bɔni nya sami kaa a kpɛti mɛnɔ ji nɔmlɔ nguaa pe kulaa. 47Benɛ Yesu na a juɛmi ɔ, e ngɔ jokuɛ nyafii ko ba da e kasa nya, 48#Mat 10.40; Luk 10.16; Yoh 13.20 nɛ e de mɛ ke, “Nɔ tsuaa nɔ nɛ ma he jokuɛ nyafii nɛ ɔ atuu ngɛ ye biɛ mi ɔ, imi e he atuu ɔ nɛ; nɔ tsuaa nɔ nɛ heɔ mi atuu ɔ, nɔ nɛ tsɔ mi ɔ lɛ e he atuu ɔ nɛ. Ejakaa nɔ nyafii pe kulaa ngɛ nyɛ tsuo nyɛ kpɛti ɔ, lɛ ji nɔmlɔ nguaa pe kulaa.”
Nɔ nɛ ti si wui nyɛ ɔ, e piɛ nyɛ he
(Marko 9.38-40)
49Yohane de ke, “Nyɔmtsɛ, wa na nyumu ko nɛ ngɔ o biɛ kɛ ngɛ mumi yayami hiae, nɛ wa de lɛ ke e kpa, ejakaa pi e kɛ wɔ nɛ ngɛ nyɛɛe.”
50Se Yesu de lɛ ke, “Nyɛ ko tsi lɛ blɔ; ejakaa nɔ nɛ ti si wui nyɛ ɔ, e piɛ nyɛ he.”
Samaria kɔpe ko he we Yesu
51Benɛ be ɔ nɛ a maa ngɔ Yesu kɛ je je nɛ ɔ mi kɛ ya hiɔwe ɔ su ta a, e muɔ e yi mi kpɔ kaa e maa ya Yerusalem. 52E tsɔ nihi kɛ sɛ e hlami kɛ ya Samaria kɔpe ko mi, konɛ a ya dla he ko ngɔ to lɛ. 53Se ni ɔmɛ he we lɛ, ejakaa a na kaa Yesu pee e yi mi kaa e yaa Yerusalem. 54#Mats II, 1.9-16 Benɛ e kaseli Yakobo, kɛ Yohane nu he ɔ, a bi lɛ ke, “Nyɔmtsɛ, o suɔ kaa wa de nɛ la nɛ je hiɔwe ba sã mɛ#9.54 Ngmami komɛ kɛ piɛ he ke “…kaa bɔ nɛ Eliya peeɔ lo?” lo?”
55Se Yesu plɛ e he, nɛ e ka a hɛ mi#9.55 Ngmami komɛ tsa nɔ ke “Nɛ e de ke, ‘Nyɛ li mumi nɛ ngɛ nyɛ mi ɔ, ejakaa Nɔmlɔ Bi ɔ ba nɛ e ba he nihi a yi wami, se pi nɛ e kpata a hɛ mi.’ ”. 56Kɛkɛ nɛ e kɛ e kaseli ɔmɛ tsuo pue nɔ kɛ ho kɔpe kpa mi ya.
Ni komɛ nɛ hla kaa a maa nyɛɛ Yesu se
(Mateo 8.19-22)
57Benɛ a yaa ngɛ blɔ ɔ nɔ ɔ, nyumu ko ba de Yesu ke, “Nyɔmtsɛ, ma nyɛɛ o se kɛ ya he tsuaa he nɛ o yaa.”
58Se Yesu de lɛ ke, “Kɔkɔbohi ngɛ muɔhi, nɛ lohwe pɛlitsɛmɛ hu ngɛ tsuhi; se Nɔmlɔ Bi ɔ lɛɛ e be he ko nɛ e kɛ e yi fɔɔ.”
59E de nɔ kpa ke, “Ba nyɛɛ ye se!”
Se lɛɛ e de ke, “Nyɔmtsɛ, ha mi blɔ nɛ ma ya pu tsaatsɛ lolo.”
60Yesu de lɛ ke, “Ha nɛ ni gbogboehi nɛ a pu mɛ nitsɛmɛ a ni gbogboehi. Se moo lɛɛ yaa nɛ o ya fiɛ Mawu matsɛ yemi ɔ he sane ɔ.”
61 #
Mats I, 19.20
Nyumu kpa ko hu de ke, “Nyɔmtsɛ, ma nyɛɛ o se. Se ha mi blɔ nɛ i kɛ ye we ku hi ya ye sɛ lolo.”
62Se Yesu de lɛ ke, “Nɔ nɛ kɛ e nine pɛtɛɛ na kpakplaa he, nɛ e plɛɛ hyɛɛ e se ɔ, e sɛ Mawu matsɛ yemi ɔ.”
လက္ရွိေရြးခ်ယ္ထားမွု
Luka 9: Dangme
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Bible in Dangme © Bible Society of Ghana, 2018.