Luka 8
8
Yihi nɛ kɛ Yesu nyɛɛ
1Enɛ ɔ se ɔ, Yesu ya kpa mahi, kɛ kɔpehi a mi, nɛ e fiɛ sane kpakpa a nɛ kɔɔ Mawu matsɛ yemi ɔ he ngɔ tsɔɔ nihi. Ni nyɔngma kɛ enyɔ ɔmɛ piɛ e he, 2#Mat 27.55-56; Mar 15.40-41; Luk 23.49 kɛ yi komɛ hu nɛ e hia mumi yayamihi ngɛ a mi, nɛ e tsa a hiɔhi ha mɛ. Mɛ ji Maria (nɛ a tsɛɛ lɛ Magdalena), nɔ nɛ a hia mumi yayami kpaago ngɛ e mi ɔ, 3kɛ Yohana, Herode tsɔlɔ nɔkɔtɔma Kuza yo ɔ, kɛ Susana, kɛ yi kpahi fuu nɛ a kɛ mɛ nitsɛmɛ a níhi hyɛ Yesu, kɛ e kaseli ɔmɛ a nɔ ɔ.
Ní dulɔ ɔ he abɛ ɔ
(Mateo 13.1-9; Marko 4.1-9)
4Nihi ngɛ Yesu ngɔ bae kpamisa kɛ je ma slɔɔtohi a mi; nɛ benɛ nihi babauu ba bua a he nya a, Yesu sɛɛ mɛ ní nɛ ɔ ngɛ abɛ gbi mi ke,
5“Ligbi ko ɔ, nyumu ko pue nɔ kɛ ho e ngmɔ mi ya nɛ́ e ya fĩa ní. Benɛ e ngɛ wu ɔ fĩae ɔ, ekomɛ ya pue blɔ mi, nɛ nihi naa nɔ, nɛ lohwe pɛlitsɛmɛ ba ye. 6Ekomɛ ya pue tɛ zugba mi, nɛ benɛ a puɛ ɔ, a ngla amlɔ ɔ nɔuu, ejakaa a nɛ zugba jɔjɔɛ. 7Ekomɛ hu ya pue mio mi, nɛ mio ɔ, kɛ wu ɔmɛ puɛ fiee, nɛ a gbe wu ɔmɛ. 8Se ekomɛ hu ya pue zugba kpakpa mi, nɛ a puɛ, nɛ a wo yiblii totoe lafa.”
Benɛ Yesu de enɛ ɔ gbe nya a, e de ke, “Nɔ nɛ ngɛ tue nɛ nuɔ nɔ ɔ, e nu nɔ́ nɛ i ngɛ dee ɔ!”
Nɔ́ nɛ he je nɛ Yesu bu abɛhi
(Mateo 13.10-17; Marko 4.10-12)
9Benɛ Yesu kaseli ɔmɛ bi lɛ ke e tsɔɔ mɛ abɛ nɛ ɔ sisi ɔ, 10#Yes 6.9-10 e de mɛ ke, “Nyɛɛ lɛɛ a ha nyɛ he blɔ kaa nyɛɛ le laami sanehi nɛ ngɛ Mawu matsɛ yemi ɔ mi. Se ni kpa amɛ lɛɛ abɛ gbi mi nɛ a deɔ mɛ laami sane ɔmɛ ngɛ. Lɔ ɔ he ɔ, a maa hyɛ, se a be nae; a maa nu se a be sisi nue.”
Yesu tsɔɔ ní dulɔ ɔ he abɛ ɔ sisi
(Mateo 13.18-23; Marko 4.13-20)
11“Abɛ ɔ sisi ji nɛ ɔ nɛ: Wu ɔ ji Mawu munyu ɔ nɛ. 12Wuhi nɛ ya pue blɔ mi ɔ daa si ha nihi nɛ nuɔ munyu ɔ. Se Abosiami baa nɛ e ba jeɔ munyu ɔ ngɛ a tsui mi, konɛ a ko he ye, nɛ a ko he a yi wami. 13Wuhi nɛ ya pue tɛ zugba mi ɔ daa si ha nihi nɛ ke a nu munyu ɔ, a heɔ kɛ bua jɔmi, se e he we si ngɛ a tsui mi. A heɔ yeɔ be kuku kɛkɛ, se ke haomi ba a nɔ kɛkɛ a hemi kɛ yemi ta. 14Wuhi nɛ ya pue mio mi ɔ daa si ha nihi nɛ nuɔ munyu ɔ, nɛ a heɔ yeɔ hulɔ. Se pee se ɔ, je nɛ ɔ mi haomi, kɛ ní nami, kɛ níhi nɛ ngɔɔ nɔ nya haa nɛ a hemi kɛ yemi gboɔ. Kɛkɛ ɔ, ní tsumi nɛ sa kaa a tsu kɛ gu hemi kɛ yemi nɔ ɔ, a nyɛ we nɛ a tsuɔ. 15Wuhi nɛ ya pue zugba kpakpa mi ɔ daa si ha nihi nɛ a tsui mi hi, nɛ a yeɔ anɔkuale. Mɛɛ lɛɛ ke a nu Mawu munyu ɔ, a tsuɔ he ní hluu kɛ ya siɔ e woɔ yiblii.
Kane nɛ a kɛ ma sowe sisi
(Marko 4.21-25)
16 #
Mat 5.15; Luk 11.33 “Nɔ ko su we kane nɛ e kɛ sowe bu nɔ, aloo e kɛ ma sa tso sisi. Mohu ɔ, e kɛ maa kane tso nɔ, konɛ nihi nɛ ma a, a na la a.
17 #
Mat 10.26; Luk 12.2 “Nɔ́ ko be nɛ a kɛ laa nɛ a be kpo jee; jehanɛ ɔ hu, nɔ́ ko be nɛ a bu nɔ, nɛ a be nae, nɛ a be kpo jee.
18 #
Mat 25.29; Luk 19.26 “Lɔ ɔ he ɔ, nyɛɛ bu tue saminya; ejakaa nɔ tsuaa nɔ nɛ nɔ́ ko ngɛ e dɛ ɔ, a ma ha lɛ fuu kɛ piɛ he. Se nɔ nɛ be nɔ́ ko ɔ, bɔɔ nɛ e susu kaa e ngɛ ɔ tete po a ma he ngɛ e dɛ.”
Yesu nyɛ kɛ e nyɛmimɛ
(Mateo 12.46-50; Marko 3.31-35)
19Yesu nyɛ kɛ e nyɛmimɛ ɔmɛ ba e ngɔ, se a nɛ e he blɔ, ejakaa nimli babauu ngɛ lejɛ ɔ. 20Kɛkɛ nɛ nɔ ko de lɛ ke, “O nyɛ, kɛ o nyɛmimɛ ɔmɛ daa si ngɛ kpo ɔ nɔ, nɛ a ngɛ hlae nɛ a na mo.”
21Yesu de ni ɔmɛ tsuo ke, “Maa, kɛ ye nyɛmimɛ ji nihi nɛ nuɔ Mawu munyu ɔ, nɛ a yeɔ nɔ.”
Yesu jɔɔ wo nɔ kɔɔhiɔ nɛ nya wa he
(Mateo 8.23-27; Marko 4.35-41)
22Ligbi ko ɔ, Yesu kɛ e kaseli ɔmɛ ya sɛ lɛ mi, nɛ e de mɛ ke, “Nyɛ ha nɛ waa po mi kɛ ya Genesaret taku ɔ se je.” Kɛkɛ nɛ a pue nɔ. 23Benɛ a ngɛ hluie kɛ yaa a, Yesu hwɔ mahe. Tlukaa a, kɔɔhiɔ nɛ nya wa hia ngɛ taku ɔ nɔ; nyu bɔni lɛ ɔ mi sɛmi, nɛ lɛ ɔ miɔ nɛ e ma mu. 24Yesu kaseli ɔmɛ ya tsɛ̃ɛ̃ lɛ, nɛ a de ke, “Nyɔmtsɛ, Nyɔmtsɛ! Wa gbo oo!”
Kɛkɛ nɛ Yesu te si, nɛ e nga kɔɔhiɔ kɛ wo nɛ gli ɔ yi. Kɔɔhiɔ ɔ kpa fiami, nɛ wo ɔ ngmɛ dii, nɛ lejɛ ɔ jɔ. 25Kɛkɛ nɛ Yesu bi e kaseli ɔmɛ ke, “Jije nyɛ hemi kɛ yemi ɔ ngɛ?”
Se kaseli ɔmɛ a he mi po, nɛ a ye gbeye, nɛ a de a sibi ke, “Mɛni nɔmlɔ po ji nɛ ɔ? E ngaa kɔɔhiɔ, kɛ nyu tete po yi, nɛ a buɔ lɛ tue!”
Yesu tsa nyumu ko nɛ mumi yayamihi ngɛ e mi
(Mateo 8.28-34; Marko 5.1-20)
26Jehanɛ ɔ, Yesu kɛ e kaseli ɔmɛ ba su Gerasa bi ɔmɛ a zugba a nɔ, ngɛ Galilea hanɔ. 27Benɛ Yesu ba kple ɔ, nyumu ko nɛ mumi yayamihi ngɛ e mi je ma a mi, nɛ e kɛ lɛ ba kpe. Daa nɛ ɔ, nyumu nɛ ɔ hɛɛ e he gu; e hí we mi, se mohu yɔkɔhi a mi nɛ e hii. 28Benɛ e na Yesu ɔ, e hia ngmlaa nɛ e ho ya kpla si ngɛ e nane nya, nɛ e kɛ ngmlaa de ke, “Yesu, Hiɔwe Mawu No ɔ Bi! Mɛni sane i kɛ mo ngɛ? I kpa mo pɛɛ, koo hao mi!” 29Nyumu ɔ de ja, ejakaa Yesu nga mumi yayami ɔ yi ke e je e mi. Behi fuu ke mumi yayami ɔ nu lɛ fɔ si kikɛ nɛ ɔ, a maa tsi e nya, nɛ a maa wo lɛ kɔsɔkɔsɔ. Se kɛ̃, e ma tsɔ kɔsɔkɔsɔ ɔ, nɛ mumi yayami ɔ maa wo lɛ fo kɛ ya nga a nɔ.
30Jehanɛ ɔ, Yesu bi nyumu ɔ ke, “Kɛ a tsɛɛ mo kɛɛ?”
E he nɔ ke, “Asafo”, ejakaa mumi yayamihi fuu lɛ ngɛ e mi. 31Kɛkɛ nɛ mumi yayami ɔmɛ de Yesu ke, “Wa kpa mo pɛɛ, ko ha nɛ wa ya sɛ muɔ voo ɔ nɛ ngɛ zugba a sisi ɔ mi.”
32Jamɛ a be ɔ, kpotoo kuu kpekpemi ko ngɛ ní yee ngɛ yoku ɔ nɔ ngɛ lejɛ ɔ. Lɔ ɔ he ɔ, mumi yayami ɔmɛ de Yesu ke, “Wa kpa mo pɛɛ, ha nɛ wa ya sɛ kpotoo ɔmɛ a mi.” Nɛ e kplɛɛ. 33Kɛkɛ nɛ mumi yayami ɔmɛ je nyumu ɔ mi, nɛ a ya sɛ kpotoo ɔmɛ a mi, nɛ kpotoo kpekpemi ɔ tsuo wo fo gidigidi kɛ kple yoku ɔ kɛ ya pue taku ɔ mi, nɛ a gbo.
34Benɛ nihi nɛ ngɛ kpotoo ɔmɛ hyɛe ɔ na nɔ́ nɛ ba a, a tu fo nɛ a ya sɛɛ ngɛ ma a mi, kɛ kɔpe ɔmɛ a mi, 35nɛ nihi je kpo kɛ ba, konɛ a ba hyɛ. Benɛ a ba su Yesu ngɔ ɔ, a na nyumu ɔ nɛ mumi yayami ɔmɛ je e mi ɔ nɛ e hii si ngɛ Yesu nane nya. E wo tade, nɛ e hɛ mi tsɔ lɛ. Nɛ mɛ tsuo a ye gbeye. 36Nihi nɛ na bɔ nɛ a plɛ kɛ tsa nyumu ɔ nɛ mumi yayami ɔmɛ ngɛ e mi ɔ, sɛɛ nɔ́ nɛ ɔ ha ni nɛmɛ nɛ ba nɔ́ hyɛmi ɔ. 37Kɛkɛ nɛ ni ɔmɛ tsuo nɛ je jamɛ a zugba a nɔ ɔ, ba kpa Yesu pɛɛ ke e je a ngɔ nɛ e ho, ejakaa a ye gbeye wawɛɛ. Nɛ e ya sɛ lɛ ɔ mi, nɛ e kpale e se. 38Nyumu ɔ nɛ mumi yayami ɔmɛ je e mi ɔ, kpa Yesu pɛɛ ke e ha nɛ e kɛ lɛ nɛ ya.
Se Yesu wo lɛ blɔ, nɛ e de lɛ ke, 39“Kpale o se kɛ ho we mi ya, nɛ o ya sɛɛ nɔ́ nɛ Mawu pee ha mo ɔ.”
Kɛkɛ nɛ nyumu ɔ ya kpa ma a mi tsuo, nɛ e ngɛ nɔ́ nɛ Yesu pee ha lɛ ɔ fiɛe.
Yairo biyo ɔ, kɛ yo ɔ nɛ ta Yesu tade ɔ he ɔ
(Mateo 9.18-26; Marko 5.21-43)
40Benɛ Yesu kpale e se kɛ ba taku ɔ se je ɔ, ni ɔmɛ nya e he, ejakaa mɛ tsuo a ngɛ lɛ blɔ hyɛe. 41Tlukaa a, nyumu ko nɛ a tsɛɛ lɛ Yairo ɔ ba lejɛ ɔ; lɛ ji kpe he ɔ nɔkɔtɔma. E ba kpla si ngɛ Yesu nane nya, nɛ e kpa lɛ pɛɛ ke e ba e we ɔ mi, 42ejakaa e biyo kake too nɛ ye maa pee jeha nyɔngma kɛ enyɔ ɔ miɔ nɛ e ma gbo.
Benɛ Yesu yaa a, ni ɔmɛ tɔtɔ lɛ. 43Yo ko ngɛ ni ɔmɛ a kpɛti nɛ muɔ ngɛ dɛe ngɛ e he jeha nyɔngma kɛ enyɔ sɔuu.#8.43 Ngmami komɛ kɛ piɛ he ke “E puɛ e ní tsuo ngɛ tsopa peemi mi.” Se nɔ ko nɔ ko nyɛ we nɛ e tsa lɛ. 44Yo nɛ ɔ ba je Yesu se je, nɛ e ta Yesu tade ɔ nya fiami ɔ he; nɛ amlɔ ɔ, muɔ nɛ ngɛ dɛe ngɛ e he ɔ se po. 45Kɛkɛ nɛ Yesu bi ke, “Mɛnɔ lɛ ta ye he ɔ?”
Ni ɔmɛ tsuo ke, “Kpaoo!” Kɛkɛ nɛ Petro de ke, “Nyɔmtsɛ, ma kpekpemi nitsɛnitsɛ lɛ bɔle mo kɛ kpe nɛ a tɔtɔ nihi babauu mo ɔ nɛ!”
46Se Yesu de ke, “Nɔ ko ta ye he, ejakaa i nu he kaa he wami je ye mi.” 47Jehanɛ ɔ, benɛ yo ɔ na kaa e hí lɛ laami hu ɔ, e kɛ he domi blibliibli ba kpla si ngɛ Yesu nane nya. Ngɛ ni ɔmɛ tsuo a hɛ mi ɔ, e de lɛ nɔ́ he je nɛ e ta e he ɔ, kɛ bɔ nɛ a tsa lɛ amlɔ nɔuu ɔ. 48Yesu de lɛ ke, “Biyo, o hemi kɛ yemi tsa mo; yaa ngɛ he jɔmi mi.”
49Benɛ Yesu ngɛ munyu ɔ tue kɛ mwɔɔ ɔ, tsɔlɔ ko je kpe he ɔ nɔkɔtɔma a we ɔ mi ba de Yairo ke, “O biyo ɔ gbo; koo doo Tsɔɔlɔ ɔ nya hu.”
50Se Yesu nu, nɛ e de Yairo ke, “Koo ye gbeye; moo lɛɛ he ye kɛkɛ, nɛ e yi ma na wami ekohu.”
51Benɛ Yesu ba we ɔ mi ɔ, e ngmɛ́ nɔ ko nɔ ko blɔ nɛ e sɛ tsu ɔ mi kɛ piɛ e he, ja Petro, Yohane, Yakobo, kɛ jokuɛ ɔ tsɛ kɛ e nyɛ pɛ. 52Ni ɔmɛ tsuo wo yana, nɛ a ngɛ jokuɛ ɔ he awe nyae. Se Yesu de mɛ ke, “Nyɛ ko fo ya; jokuɛ ɔ gbo we, mahe kɛkɛ nɛ e ngɛ hwɔe!”
53Benɛ e de enɛ ɔ, mɛ tsuo a muɔ lɛ, ejakaa mɛɛ a le kaa jokuɛ ɔ gbo. 54Se Yesu nu e nine si, nɛ e kpa ngmlaa ke, “Jokuɛ yo, tee si!” 55Kɛkɛ nɛ jokuɛ ɔ mumi kpale ba e mi ekohu, nɛ e te si amlɔ nɔuu. Nɛ Yesu fa ke, “Nyɛ ha lɛ nɔ́ ko nɛ e ye!” 56Jokuɛ ɔ fɔli ɔmɛ a he mi po, se Yesu fa mɛ ke a ko ya de nɔ ko nɔ́ nɛ ba a.
လက္ရွိေရြးခ်ယ္ထားမွု
Luka 8: Dangme
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Bible in Dangme © Bible Society of Ghana, 2018.