Tobit 3
3
CAB. 3
1Eisht va mee ayns seaghyn as cheayn mee, as ayns my heaghyn ghow mee padjer, gra,
2O Hiarn t’ou uss cairagh, as ta ooilley dt’obbraghyn, as dty raaidyn, myghin as firrinys, as t’ou briwnys dy firrinagh as cairagh son dy bragh.
3Cooinee orrym, as jeeagh orrym, nagh kerree mee son my pheccaghyn as meehushtey, ny son peccaghyn my ayraghyn, t’er n’yannoo olk kiongoyrt rhyt:
4Son cha dug ad biallys da dt’annaghyn: shen-y-fa t’ou er livrey shin son spooilley, as gys cappeeys, as gys baase, as dy ve son raa oltoonagh da ooilley ny ashoonyn ny mast’ oc ta shin er nyn skeayley.
5As nish ta dty vriwnyssyn ymmodee as cairagh, dy ghellal rhym cordail rish ny peccaghyn aym-pene as my ayraghyn: er-y-fa nagh vel shin er reayll dt’annaghyn, chamoo er hooyl ayns firrinys kiongoyrt rhyt.
6Nish er-y-fa shen dell rhym myr s’cooie lhiat, as cur sarey my spyrryd dy ve er ny ghoaill voym, dy voddym lheie er-sooyl, as chyndaa gys yn ooir: son te vondeishagh dou dy ve marroo myr reih er ve bio, er-yn-oyr as dy vel mee er chlashtyn oltooanyn foalsey, as ta lane seaghyn aym: shen-y-fa cur sarey dy voddym nish ve livreit ass y chennid shoh, as goll er-sooyl gys yn ynnyd dy bragh farraghtyn: nagh chyndaa dt’eddin ersooyl voym.
7As haink eh gy-kione yn laa cheddin, ayns Ecbatane ard-valley ayns Media dy row Sara inneen Reguel oltooanit myrgeddin liorish mraane aegey e jishig;
8Son dy row ee er ny ve poost rish shiaght deiney, quoi va’n drogh spyrryd Asmodeus er varroo, roish my lhie ad maree. Vel oo er jarrood, dooyrt adsyn, dy varr oo dty gheiney? ta hannah shiaght deiney er ve ayd, foast cha row uss enmysit er veg jeu.
9Cre’n-fa t’ou geealley shinyn son oc? my t’ad marroo, immee uss royd geiyrt orroo, narra noain dooin dy bragh ’akin jeed edyr mac ny inneen.
10Tra cheayll ee ny reddyn shoh, v’ee feer trimshagh, myr shen dy row ee treeil ee-hene y hoghtey; agh dooyrt ee, Mish yn ynrican inneen t’ec my ayr, as my nee’m shoh, vees eh scammylt da, as ver-ym eh ayns e henn eash lesh seaghyn gys yn oaie.
11Eisht ghow ee padjer, jeeaghyn lesh yn uinnag, as dooyrt ee, Bannit t’ou uss, O Hiarn my Yee, as ta dt’ennym casherick as gloyroil bannit as ooasle er-son dy bragh: lhig da ooilley dty obbraghyn oo y voylley son dy bragh.
12As nish, O Hiarn, ta mish soiagh my hooillyn as m’eddin ort,
13As gra, Gow jeh’n ooir mee, nagh glin-ym arragh yn oltooan.
14Shione dhyts, O Hiarn, dy vel mish glen voish dy chooilley pheccah marish dooinney,
15As nagh hayrn mee rieau scammylt er my ennym, ny ennym my ayrey, ayns cheer my chappeeys: ta mish yn ynrican inneen t’ec my ayr, chamoo ta paitchey erbee echey dy ve e eirey, ny dooinney mooinjerey faggys erbee, ny mac lesh er-mayrn da oddyms mee-hene y reayll son ben: my hiaght deiney-poost t’ad hannah marroo; as cre sheeu dooys ve bio? agh mannagh nailt’s dy no’in baase, cur sarey soiagh ennagh dy ve jeant jee’m, as chymmey ’ve goit orrym, nagh glin-ym arragh dy oltooan.
16Myr shen hooar ny padjeryn oc ny-neesht clashtyn kiongoyrt rish ard-ooashley yn Jee mooar.
17As va Raphael er ny choyrt dy lheihys ad ny-neesht, ta shen, dy ghoaill ersooyl yn bolg eh sooillyn Hobit as dy chur Sara inneen Reguel son ben da Tobias mac Hobit; as dy chiangley yn drogh spyrryd Asmodeus; er-yn-oyr as dy row ee bentyn da Tobias liorish cairys eiraght. Ec yn eer traa cheddin haink Tobit thie, as hie eh stiagh ayns e hie, as haink Sara inneen Reguel neose jeh’n lout.
လက္ရွိေရြးခ်ယ္ထားမွု
Tobit 3: YNAPBR
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© Yn Cheshaght Ghailckagh 1979, 2017
© Manx Gaelic Society 1979, 2017