Tobit 2
2
CAB. 2
1Nish tra va mee er jeet thie reesht, as Anna my ven er ny coyrt dou ass-y-noa, marish Tobias my vac, ayns feailley ny kingeesh, ta shen feailley casherick ny shiaght shiaghtinyn, va jinnair vie aarloo my chour, jeh’n chooid cheddin hoie mee sheese dy ee.
2As tra honnick mee laanid dy veaghey, dooyrt mee rish my vac, Immee as cur lhiat dooinney boght erbee dy vow jeh nyn mraaraghyn, ta aignagh er y Chiarn, as cur-my-ner, fuirryms rhyt.
3Agh haink eh reesht, as dooyrt eh, Ayr, ta fer jeh’n ashoon ain er ny choyrt gy baase, as t’eh tilgit magh ayns grunt-y-vargee.
4Eisht roish my vlaysht mee er veg jeh’n beaghey, dirree mee seose, as ghow mee eh seose ayns shamyr derrey goll-sheese ny greiney.
5Eisht haink mee reesht, as ren mee mee-hene y niee, as ghow mee my vee ayns trommys,
6Cooinaghtyn er y phadeyrys shen ren Amos, tra dooyrt eh, Ny feaillaghyn eu vees chyndait gys dobberan, as y reaid eu gys coe.
7Shen-y-fa cheayn mee: as lurg lhie-ghreiney hie mee as ren mee oaie, as doanluck mee eh.
8Agh ren my naboonyn faghid jeem, as dooyrt ad, Cha vel foast aggle er y dooinney shoh dy bee eh er ny choyrt gy baase son yn obbyr shoh; hea eh ersooyl; as cur-my-ner, t’eh goanluckey ny merriu reesht.
9Yn oie cheddin, haink mee veih’n oanluckey, as chaddil mee liorish cleiy garey my chooyrt, son dy row mee neu-ghlen, as va m’eddin rooisht:
10As cha bione dou dy row sperriu ’sy chleiy, as myr va my hooillyn foshlit, skuit ny sperriu eoylley heh ayns my hooillyn, as haink bolg er my hooillyn; as hie mee gys ny fir-lhee, agh cha choon ad lhiam: ny smoo na shen ren Archiacharus my yannoo-magh, derrey hie mee gys Elymais.
11As ghow Anna my ven obbraghyn mraane dy yannoo.
12As tra v’ee er choyrt thie ad gys ny oaneryn, deeck ad e faill j’ee, as hug ad mannan j’ee myrgeddin.
13As tra v’eh ayns my hie, as er ghoaill toshiaght dy eamagh, dooyrt mish ree, Cre voish ta’n mannan shoh? nagh re geidit t’eh? cur reesht da ny oaneryn eh; son te noi’n leigh dy ee red erbee ta geidit.
14Agh dreggyr ish, V’eh currit son gioot marish my aill; ny-yeih cha chreid mish ee, agh dooyrt mee ree dy choyrt eh reesht da ny oaneryn: as va dowin-nearey orrym j’ee. Agh hyndaa ee orrym gra, C’raad ta dty yiastyllys as dty obbraghyn crauee? cur-my-ner, ta fys rhyts as ooilley dt’obbraghyn.
လက္ရွိေရြးခ်ယ္ထားမွု
Tobit 2: YNAPBR
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© Yn Cheshaght Ghailckagh 1979, 2017
© Manx Gaelic Society 1979, 2017