Márkus 11
11
Yesu dɔ́ kaa Yerúsalemmé
(Matío 21:1-11; Lúg 19:28-40; Yoohá̧na 12:12-19)
1Sey Yesu kan waa duulí woo ku̵u̵ ya̧ ya bə́' dáŋ́ Yerúsalemmé, ku̵u̵ dɨ lá kaa Bɛdfáázelı̵́ kan Bɛtaníilí̧, dáŋ́ gu̵u̵ la' kúḿmí máa, Yesu ba' waa duulí woo vu̵ idú, 2o̧d vu̵: “I laa kaa tíŋ́ víílí yȩlȩ́. Kíí dɨ dɔ́lı̵́ la wu̵lı̵́ tée, víń há̧á̧ nuŋ wamnde waa, tay mbaa du̵u̵lı̵́, nán tóó ɗáanɔ lá see né. I buuwu̵ pa̧n ya ú̵. 3Nán tóó ka vi ví: ‘Ví kɔ́ ȩn yȩlá?’ Tée i hí̧i̧du̵: ‘Ɨ́ 'yɛ́lı̵́ hí̧í̧wo̧ ó̧, tée wú̵ń duu vȩ"o̧ pa̧n ví ya dɨlı̵́ vaŋná.’ ”
4Vu̵ lúú, vu̵ la nuŋ wamnde waa pee tay mbaa dɨ dáŋ́ ya̧g dɔ́mmé, dáŋ́ hi̧naalȩ́. Vu̵ buuwu̵.
5Nán tóó ku̵u̵ mbaa wu̵lı̵́ máa, vu̵ vi vu̵: “Kɔ́ née ví buu wamnde waa yȩlá?”
6Vu̵ hí̧í̧ kɔ́ ı̵́ Yesu ba o̧d vu̵ pee wɔgɔ, ma vu̵ gbɔd vu̵ la. 7Vu̵ pa̧ŋ wamnde waa laan Yesu woolı̵́, vu̵ wáádu̵ sa̧a̧m kúsúgumí. Yesu ɗáá mbaa wu̵lı̵́.
8Nán ɓu̵u̵lı̵́ na'a vu̵ hú̵ú̵ sa̧a̧m voo vu̵ hi̧naalȩ́, tóó vu̵ ha̧ ha'ad vu̵ hó̧gó̧, vu̵ hú̵ú̵ hi̧naalȩ́ á̧ḿ.#11:8 vu̵ ha̧ ha'ad...vu̵ hú̵ú̵ hi̧naalȩ́ á̧ḿ nán Yúúda vu̵ hú̵ú̵d gbanaa gbo̧o̧ tíŋ́ vu̵ ha'ad hi̧naalȩ́; vu̵ na' vu̵ ı̵́ yo̧go̧. 9Nán ı̵́ ku̵u̵ ɓə́ə́ tíŋ́, kan ı̵́ ku̵u̵ duu pigim máa, vu̵ lɛ́g, vu̵ o̧:
“Tayɨɨ a gbɔm nánne!
Ɨ́ 'yɛ́lı̵́ Tayɨɨ a bagam hȩnne, ı̵́ káḿ yaa kan yɛ́g woo yȩ nɔ.
10Tayɨɨ a bag gbaŋ waalı̵́ a ba ví yée Daavíd woo ka dɨ yaalı̵́ yȩ nɔ!
Ba na' ví Tayɨɨ ı̵́ be"ı̵́ zu á̧ḿ!”
11Yesu ka dɔ́ kaa Yerúsalemmé máa, laa lig hȩn ha"ı̵́lı̵́, tə́gə nɔ́ɔ́ ho̧ hȩn 'waapád. Ya̧g mɛnné máa, duu daa vȩ́' laa kaa Bɛtaníilí̧, kan waa duulí woo wa̧nɓó' zu̵u̵ idú pee vu̵ á̧ḿ.
Yesu fáá la' zɔgɔb tóó
(Matío 21:18-19)
12Ya̧g ka̧'a̧mé, ku̵u̵ vúd kaa Bɛtaníilí̧ maa, go̧o̧m ya̧ Yesu. 13Ho̧ la' zɔgɔb tóó ɗiilí na'a, kan kpag, séé la, tóó tée ba bíń nuŋ hȩn tóó wu̵lı̵́ ú̵.
A̧máa, ka séé la do̧o̧ woolı̵́ máa, ho̧ də́ń ha'ad kpag vu̵ mɛ́ń, moo sey hȩn líid ya̧a̧ sú̵'ú̵. 14Ma Yesu fáá la' pee, o̧: “Nán tóó wú̵ń duu lán sı̵́ líid móó né, há̧á̧ káákáá.”
Waa duulí woo vu̵ ki moo yȩ á̧ḿ.
Yesu nɛ́ŋ́ nán hȩn gílí vu̵ lig hȩn ha"ı̵́lı̵́
(Matío 21:12-17; Lúg 19:45-48; Yoohá̧na 2:13-22)
15Vu̵ ya̧ la Yerúsalemmé. Yesu dɔ́ la na'am gbo̧o̧ lig hȩn ha"ı̵́lı̵́, nɛ́ŋ́ nán hȩn gílí vu̵ vud wu̵lı̵́ kan nán hȩn hɨlı̵́ vu̵ á̧ḿ. Ndaa táabələ ı̵́ nán sɨɨde pílí voo vu̵ yɛd, kan ká̧á̧m nán gbɔkii gílí voo vu̵ á̧ḿ. 16Gbɔn nán tóó gaŋ hȩn ya̧a̧n daa na'am gbo̧o̧ lig hȩn ha"ı̵́lı̵́ né sá̧ḿ. 17Tú'ud vu̵ moo, o̧: “Tayɨɨ o̧ debtere woolı̵́:
‘Vú̵ń bee lig míí yɛ lig zig nán voo 'waapád u̵u̵ o̧d Tayɨɨ moo wu̵lı̵́.’ Ɨ́ yo̧go̧ pɛ́láa?
A̧máa ı̵́ víí ví tiiwu̵ víí lig líw voo nɔ!”
18Gbanaa hȩn ha"ı̵́ vu̵ kan nán moo Tayɨɨ tú"í vu̵ ki moo yȩ, ma vu̵ soo hi̧naa moo bi nɔɔwo̧ ó̧. A̧máa vu̵ ndɔggu̵, moo moo tú"í woo yȩ to̧o̧d dúú vu̵ ya voo 'waapád.
19Mɛn ka kɔ́ máa, Yesu vúd kaalı̵́ kan waa duulí woo vu̵.
Yesu kan la' zɔgɔb 'wɔ́ggɨ
(Matío 21:20-22)
20Yesu kan waa duulí woo ku̵u̵ dɨ daa ya̧a̧lȩ́ ya̧g ka̧'a̧m hí̧m máa, waa duulí woo vu̵ ho̧ la' zɔgɔb pee 'wɔ́ 'waapád, kan zágád woo á̧ḿ. 21Piɛ́r duu ta'ad moo woo o̧d Yesu: “Akaw, a̧m ho̧ la' zɔgɔb káḿ fááwu̵ pee 'wɔ́ sú̵'ú̵.”
22Yesu hí̧i̧d vu̵ o̧: “I 'yɛ́ zó̧ó̧ víí 'waapád Tayɨɨ woolı̵́. 23Mí o̧d ví moo yȩ́ńne, nán a faan moo zó̧ó̧lȩ́ né, a 'yɛ́ zó̧ó̧ hȩn woo ban kɔ́yyú̵ tée, kóó a o̧d gu̵u̵ yɛ: ‘A̧m lúú yɛlı̵́, mɔ́ la wá̧á̧ mammé’ si̧', hȩn woo wú̵ń kɔ́yyú̵. 24Moo woo nɔ mí o̧d ví, hȩn 'waapád kíí ɓá' Tayɨɨ, kíí 'yɛ́ zó̧ó̧ ba bíń nuŋŋɔ́ tée, víń nuŋŋɔ́. 25Sey kíí dɨ Tayɨɨ hȩn ɓá"ı̵́ pȩ́ń, kíí taa moo víí kan nán tóó tée, i kéé moo woo gbɔ la ú̵, moo Ba' víí ı̵́ be"ı̵́ a kéé hȩn kɔ́lı̵́ sɔnné víí vu̵ gbɔ á̧ḿ. [ 26A̧máa i kéé hȩn kɔ́lı̵́ sɔnné dey voo gbɔn né tée, Ba' víí ı̵́ be"ı̵́ wú̵ń kéé ı̵́ víí gbɔn né á̧ḿ.]”
Néélȩ́ Yesu woo yaa tɛ́lá?
(Matío 21:23-27; Lúg 20:1-8)
27Yesu vu̵ kan waa duulí woo vu̵ duu vȩ́' la Yerúsalemmé. Yesu daa 'yȩ́ḿ na'am gbo̧o̧ lig hȩn ha"ı̵́lı̵́. Gbanaa hȩn ha"ı̵́ vu̵ kan nán moo Tayɨɨ tú"í vu̵ kan ı̵́ nii Yúúda vu̵ yaa woolı̵́, 28vu̵ vigi: “Mɔ́ kɔ́ hȩn yȩ vu̵ kan néélȩ́ woo ȩná? Mɔ́ nuŋŋɔ nóo woolı̵́, káḿ kɔ́ hȩn yȩ vu̵lá?”
29Yesu hí̧i̧d vu̵: “Mí hí̧í̧ bi vi ví moo tóó pȩ́ń. I hí̧i̧n tée, néélȩ́ káń kɔ́ń hȩn wu̵lı̵́ yɛ, míń tú'ud ví nán woo. 30Yoohá̧na nuŋ néélȩ́ mam Tayɨɨ wooné tɛ́lá? Tayɨɨ wooláa? Tóó tée nánán tóó vooláa? I hí̧i̧n sı̵́nná!”
31Ku̵u̵ ki moo woo máa, vu̵ fan moo ya voolı̵́, vu̵ o̧: “Aa hí̧í̧ ví: ‘Tayɨɨ wu̵ pú̵gu̵’ tée, wú̵ń vi ba ví: ‘Moo ȩn ví fȩȩn moo Yoohá̧na woo nélá?’ 32A̧máa aa hí̧í̧ ví: ‘Nánán vu̵u̵ pú̵gu̵’ tée, báń sə́n ví ní.”
(Vu̵ ndɔg dúú vu̵, moo dúú 'waapád vu̵ taa Yoohá̧na ba anábiɨ.)
33Ma vu̵ hí̧i̧d Yesu o̧: “Vɔ́ gaa né.”
Yesu duu o̧d vu̵: “Ȩȩhȩ́ȩ, mí á̧ḿ, mí tú'un ví nán káń nugun néélȩ́ woolı̵́ yɛ né.”
လက္ရွိေရြးခ်ယ္ထားမွု
Márkus 11: DIINT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Nouveau Testament en Dii © Bible Society of Cameroon, 2001.