Márkus 10
10
Yesu tú' moo yúú hı̵́'ɨné kȩ́ȩ́ kan wə̧ə̧lȩ́
(Matío 19:1-12; Lúg 16:18)
1Yesu daa lúú wu̵lı̵́ laa hág Yúúdalı̵́, ziŋ Yu̵ŕdɛn dən. Dúú vu̵ duu sú̵g yaa woolı̵́. Yesu tú'ud vu̵ moo kɔ́ ı̵́ ka baa tú'ud vu̵ tíŋ́ máa wɔgɔ. 2Nán farísa tóó vu̵ yaa woolı̵́ moo bi gu̵ggu̵ ú̵, vu̵ vigi: “Debtere Múúsa woo o̧ nán u̵u̵ hı̵́'ı̵́n kan kȩ́ȩ́ á̧a̧?”
3Yesu hí̧i̧d vu̵, o̧: “Múúsa o̧d ví nɛ́nná?”
4Vu̵ hí̧i̧du̵: “Múúsa ká gbɔd vɔ́ hi̧naa, o̧: ‘Nán ka bi hı̵́'ı̵́n kan kȩ́ȩ́ȩ tée, a pa̧ŋŋɔ kan sa̧a̧m laan#10:4 pa̧ŋŋɔ kan sa̧a̧m laan vu̵ bíńda “a pú̵gu̵ ɗerwəl kȩ́ȩ́ nɛné pȩ́ń a gbɔgɔ” kan ya̧g gɛrɛ́ggɨ. ba' woo woolı̵́.’ ”
5Ma Yesu duu hí̧i̧d vu̵: “Moo tɔ́g ŋgó̧ó̧lȩ́ víí yȩ nɔ pȩ́ń Múúsa ká pú̵ ví dooká yȩ nɔ. 6A̧máa ya dəné woolı̵́ máa, Tayɨɨ dəŋ yɨb hȩn, ‘ká mbɔ́g wayée vu̵ kan wakȩ́ȩ́.’ 7Pig woo máa, o̧: ‘Moo woo nɔ wayée wú̵ń hı̵́'ı̵́n kan ba' woo kan na' woo, vú̵ń má'án kan kȩ́ȩ́, 8ya voo idú á̧ḿ vú̵ń tii fó̧ó̧ dágáɨ.’ Vu̵ duu mbaan fó̧ó̧ idúi né, a̧máa fó̧ó̧ dágáɨ. 9Hȩn Tayɨɨ ka su̵gu̵n máa, nán a hɨ'ɨn sá.”
10Ku̵u̵ laa kíilí máa, waa duulí woo vu̵ duu vigi moo yúú moo yȩlȩ́. 11Yesu o̧d vu̵: “Nán a nɛŋ kȩ́ȩ́ woo gbɔ, a duu éé tóó tée, kɔ́d naa nii woo hȩn ɓı̵́d, kɔ́ ɓáaɨ. 12Wakȩ́ȩ́ ka gbɔ wə̧ə̧, ka éé wə̧ə̧ tóó tée, kɔ́ ɓáaɨ á̧ḿ.”
Yesu bag náásá̧ŋ́ waa vu̵ hȩn
(Matío 19:13-15; Lúg 18:15-17)
13Sey woolı̵́ nán vu̵ pa̧ŋ náásá̧ŋ́ waa vu̵ yaan Yesu woolı̵́, moo a za' vu̵ ú̵, a̧máa waa duulí woo vu̵ sée vu̵.
14Yesu ka ho̧ ná' máa, kɔ́ zó̧ó̧ yȩ́ȩ́, o̧d vu̵: “I gbɔ náásá̧ŋ́ waa u̵u̵ yaa míílí̧ la ú̵, i há' vu̵ sá, moo gbaŋ waalı̵́ Tayɨɨ woo mbaad nán ku̵u̵ man kan vu̵ má nɔ. 15Mí o̧d ví moo yȩ́ńne, náásá̧ŋ́ waa vu̵ fȩȩ moo gbaŋ waalı̵́ Tayɨɨ woo vaŋná, a̧máa ı̵́ nii u̵u̵ fȩȩn ı̵́ yo̧go̧ né tée, vú̵ń dɔ́n wu̵lı̵́ né sá̧ḿ.”
16Pig woolı̵́ máa, Yesu ka waa vu̵, pi̧i̧ vu̵ ya zó̧ó̧lȩ́, ha'ad vu̵ nag yúlí, bag vu̵ hȩn.
Nán naa tóó nɔ
(Matío 19:16-30; Lúg 18:18-30)
17Yesu ka ɓɛ hi̧naa bi lúú sú̵'ú̵ máa, nán tóó kɛ ɗug ya sə̧"o̧ tíŋ́, gu doo núug tíŋ́ woolı̵́, vigi: “Akaw to̧o̧, míń kɔ́ née pȩ́ń míń nuŋ vágád ı̵́ káákáálá?”
18Ma Yesu hí̧i̧du̵: “Moo ȩn mɔ́ been nán to̧o̧lá? Nán to̧o̧ tóó pɛ́lı̵́, séý wu̵ Tayɨɨɨ dágá 'nɛ́ŋ́. 19Mɔ́ gaa dooká Tayɨɨ woo vu̵ ú̵: ‘A̧m nɔɔ nɔm sá. A̧m kɔ́ ɓáa sá. A̧m kɔ́ líw sá. A̧m gəd dam vu̵ moo sá. A̧m sóó dam vu̵ sá. A̧m na' ba' móó kan na' móó ó̧.’ ”
20Nán pee duu o̧: “Akaw, mí duu hȩn yȩ vu̵ 'waapád diga káń dəŋ saa kɔ́lı̵́ máalȩ́.”
21Yesu ka tə́ggu̵ máa, hí̧í̧wo̧ ó̧, duu o̧ddu̵: “Kéem hȩn tóó dɨlı̵́; a̧m la gí hȩn móó 'waapád, mɔ́ yȩ'ȩ nán gíḿ vu̵, tée mɔ́ń nuŋ hȩn naa tóó Tayɨɨ woolı̵́, pig woo tée mɔ́ ya duun.”
22Sey ka ki la moo yȩ ná' máa, sáa túń, daa lúú kan zó̧ó̧ ví̧i̧ní, moo ká nán naaɨ.
23Yesu tə́gə nɔ́ɔ́ daa kan, o̧d waa duulí woo vu̵: “Təə ú̵, nán naa u̵u̵ dɔ́ gbaŋ waalı̵́ Tayɨɨ woolı̵́ tɛ́ nɔ.”
24 Waa duulí woo vu̵ mbaa ɗii yúú moo ka o̧ yȩlȩ́. Yesu duu ka moo, o̧d vu̵: “Waa míí vu̵, dɔ́lı̵́ gbaŋ waalı̵́ Tayɨɨ woolı̵́ máa, təə ú̵. 25Hȩn təəlı̵́ tóó dɨlı̵́ á̧ḿ; wu̵ bal#10:25 bal vu̵ bíńda “ŋgeloba” kan ya̧g gɛrɛ́ggɨ. a pu̧u̧ nɔ́ɔ́ ba'taalı̵́ má nɔ. A̧máa hȩn ka təə mba máa dɨlı̵́; wu̵ nán naa a hí̧í̧ bi dɔ́ gbaŋ waalı̵́ Tayɨɨ woolı̵́ tɛ́ nɔ.”
26Moo yȩ la' waa duulí woo vu̵ kɛb, vu̵ víń ya voolı̵́: “A ı̵́ yo̧go̧ tée, nóo wú̵ń sə́ddá?”
27Yesu tə́g vu̵, o̧: “Hȩn yȩ mba woo nánán vu̵ yu̵ kɛb, a̧máa mban woo Tayɨɨ né, moo hȩn tóó mban woo Tayɨɨ né.”
28Piɛ́r dəŋ ka moo, o̧ddu̵: “Ɨ́ vóó, vɔ́ gbɔ hȩn 'waapád, vɔ́ duum sú̵'ú̵.”
29Yesu hí̧i̧du̵: “Mí o̧d ví moo yȩ́ńne, kóó nɔ́nná a gbɔ kíi woo, kan daa nii kan daa sá̧ŋ́ vu̵, tóó tée daa kȩ́ȩ́ vu̵, kan na' woo kan ba' woo, tóó tée waa woo vu̵ kan bab, moo míílí̧ kan yúú moo to̧o̧ 'maŋŋı̵́ tée, 30wú̵ń duu nuŋ vu̵ hágá yɛlı̵́ do' tȩmɛre, wú̵ń nuŋ kíi kan dag nii kan dag sá̧ŋ́, kan dag kȩ́ȩ́ kan na'á, kan waa vu̵, kan bab 'waapád. Nán vú̵ń duunɔ kan hȩn ɓı̵́d á̧ḿ. Tée wú̵ń duu nuŋ vágád káákáá gbaŋ waalı̵́ Tayɨɨ woolı̵́ ú̵ á̧ḿ. 31A̧máa nán ɓu̵u̵lı̵́ na'a sa̧a̧m nán ku̵u̵ mbaa nán gbo̧o̧ vu̵ hágá yɛlı̵́ máa, vú̵ń tii hȩn lee; ı̵́ ku̵u̵ ho̧ vu̵ hȩn leená hágá yɛlı̵́ máa, tóó vú̵ń tii nán gbo̧o̧ vu̵.”
Yesu tú' moo nɔm woo, kan moo nímní nɔmmé woo do' ta̧a̧nɔ́ woo wu̵ yɛ nɔ
(Matío 20:17-19; Lúg 18:31-34)
32Ka vu̵ dɨ lá hi̧naalȩ́ moo ɗáálı̵́ dɔg Yerúsalemmé máa, Yesu ɓə́əd vu̵ tíŋ́. Dú̵ú̵ zá waa duulí woo vu̵, dú̵ú̵ kɔ́ nán ku̵u̵ dugu máa vu̵ á̧ḿ. Yesu duu bee waa duulí woo vu̵ wa̧nɓó' zu̵u̵ idú yaan woolı̵́, bé'ed vu̵ hȩn a kɔ́gɔ máa tú"í, o̧: 33“I ki sı̵́ɨ! Ba dɨ ví sı̵́ dɔggı̵́ Yerúsalemmé yɔ. Ɨ́ míí Tayɨɨ ka ba'an ya yɛ, vú̵ń dɔn nag gbanaa hȩn ha"ı̵́ voolı̵́, kan nán moo Tayɨɨ tú"í voolı̵́ á̧ḿ. Vú̵ń sə̧' moo, moo nɔɔné míí nu. Vú̵ń dɔn nag nán gaa Tayɨɨ sá voolı̵́. 34Vú̵ń kɔ́n ba̧a̧m, vú̵ń tú̵'u̵n su̵d fó̧lȩ́, vú̵ń gbɔ́n kan loo, vú̵ń nɔɔn á̧ḿ. A̧máa bá' idú, ta̧a̧nɔ́ woo tée, míń níḿ nɔmmé.”
Yaakúbu vu̵ kan Yoohá̧na vu̵ ɓá' ya mbaalı̵́ Yesu woolı̵́
(Matío 20:20-28)
35Zebedée waa vu̵, Yaakúbu vu̵ kan Yoohá̧na, vu̵ yaa Yesu woolı̵́, vu̵ vigi: “Akaw, hȩn kóó dɨm ɓá"ı̵́ yɛ tée, vɔ́ hí̧í̧ a̧m pú̵ vɔ́ ú̵.”
36Yesu vi vu̵: “Ví hí̧í̧ ȩná?”
37Vu̵ hí̧i̧du̵: “Vɔ́ dȩm naggɨ, vɔ́ hí̧í̧ sey gbaŋ waalı̵́ móólȩ́ tée, a̧m 'yɛ́ vɔ́, dágá a mbaa nag nán móólȩ́, tóó a mbaa nag kpáag móólȩ́.”
38Yesu hí̧i̧d vu̵: “Ví gaan hȩn kíí ɓá'an yȩ né. Víń ma' zó̧ó̧ kan hȩn ndɔ́gɔné#10:38 Víń ma' zó̧ó̧ kan hȩn ndɔ́gɔné vu̵ bíńda “víń zɔ hȩn ɗag waa a̧n dɨ zɔlı̵́ yɛlı̵́ áa?” kan ya̧g gɛrɛ́ggɨ. kɔ́ ı̵́ káń dɨ nuní yɛ wɔgɔ áa? Kan nɔm káń dɨ nuní yɛ áa?”
39Vu̵ hí̧i̧du̵: “Vɔ́ń ma' zó̧ó̧ ó̧.”
Yesu ka ki ná' máa, duu o̧d vu̵: “Víń nuŋ hȩn ndɔ́gɔné ú̵ gínú, kan nɔm á̧ḿ. 40A̧máa moo mbaalı̵́ nag nán míílí̧ kan nag kpáagı̵́ máa, míńnɔ pú̵n né. Séý nán ı̵́ Tayɨɨ ka 'yɛ́d vu̵ máa, vú̵ńnɔ nuŋ.”
41Sey waa duulí ı̵́ wa̧nɓó' ku̵u̵ ki moo yȩ máa, vu̵ kɔ́d Yaakúbu kan Yoohá̧na zó̧ó̧ yȩ́ȩ́. 42Ma Yesu bee vu̵ ya, o̧d vu̵: “Ví gaa gbanii nán gaa Tayɨɨ sá voo, vu̵ na' yúú nán voo vu̵lı̵́. Gbanaa voo vu̵ yú vu̵ kɔɔgná. 43A̧máa ı̵́ víílí máa, ví kɔ́n hȩn ı̵́ yo̧go̧ né. Nán tóó víílí sa̧a̧mé a hí̧í̧ bi mbaa nán gbo̧o̧ȩ tée, a mbaa nán ba'ad víí nu. 44Nán tóó víílí sa̧a̧mé a hí̧í̧ bi mba daga vu̵ 'waapáddú̵ tée, a mbaa gba'a nán voo 'waapád, 45moo ı̵́ míí Tayɨɨ ka ba'an ya yɛ á̧ḿ, mí yaan moo nán u̵u̵ kɔ́n mí ba'adɨ né, a̧máa moo ba'ad kɔ́lı̵́ɨ. Míń pú̵ fó̧ó̧ míí, moo nán ɓu̵u̵lı̵́ na'a u̵u̵ sə́ddú̵.”
Yesu za̧a̧ Baatimɛ́ɛ, nán yə̧m tóó
(Matío 20:29-34; Lúg 18:35-43)
46Vu̵ ya̧ kaa Yeríkolı̵́.
Sey Yesu ka vúd la kaalı̵́ kan waa duulí woo vu̵, kan dúú gbo̧o̧ ba'a vu̵ máa, nán yə̧m tóó du̵u̵lı̵́, ká baa mbaa ɓá'a hȩn ya̧g hi̧naalȩ́. Yéé woo Baatimɛ́ɛ, waa Timɛ́ɛ woo nɔ.
47Ka ki Yesu nán Naazaréd ba wu̵ dɨ ya̧a̧lȩ́ máa, dəŋ moo dɔg moo yúba, o̧: “Yesu, Daavíd waa, i ho̧ gíḿ gaanɔ́!”
48Nán vu̵ séewu̵, vu̵ o̧ddu̵ ba a mbaa simná. A̧máa duu moo moo gbo̧o̧ mɛ́ń: “Daavíd waa, i ho̧ gíḿ gaanɔ́!”
49Yesu dii, o̧d vu̵: “I beewu̵ ya ú̵.”
Vu̵ bee nán yə̧m pee, vu̵ o̧ddu̵: “A̧m ndag zó̧ó̧ la ú̵, lúú dɔggú̵, Yesu beemɔ́!”
50Nán yə̧m pee ta̧a̧ sa̧a̧m woo gbɔ, wa̧ŋ dɔg laa Yesu woolı̵́. 51Yesu vigi: “Mɔ́ hí̧í̧ a̧n kɔ́d bi ȩná?”
Nán yə̧m pee hí̧i̧du̵: “Akaw, ka míń ho̧ nɔ́ɔ́e.”
52Yesu o̧ddu̵: “A̧m laa la ú̵. Zó̧ó̧ 'yɛ́lı̵́ móó səm sú̵'ú̵.”
Vaŋná daa ho̧ nɔ́ɔ́ há̧ná, kpay duu Yesu hi̧naalȩ́ wu̵lı̵́.
လက္ရွိေရြးခ်ယ္ထားမွု
Márkus 10: DIINT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Nouveau Testament en Dii © Bible Society of Cameroon, 2001.