Mark 13
13
Keseu hale kapu
(Mat 24.1-2; Luk 21.5-6)
1Kulana Jesus ehaele ikaha ma hale kapu la, hekama kaukali aia eme aꞌe, “Rabai! Ila aꞌe. Nahale kela hale kapu nei ekaualeꞌa, epena ma nahaku elahi haeꞌo.” 2Kena iko Jesus ime aꞌe kama la, “Aꞌoe eꞌike nahaku nahale elahi nei? Nahaku la hakoa meimaoha ilalo. Selavaa hehaku emau iluna alahaku.”
Nahalono lihu meikae mai
(Mat 24.3-14; Luk 21.7-19)
3Jesus enoho iluna kemouna esomo na{Oliv} noꞌike hale kapu. Kemouna la ekapili aꞌe kemouna hale kapu la ekuu. Kena Peter, James, John, ia ma Andrew enoho solakou ma Jesus, kena ime aꞌe, 4“Me mai makou. Name nei hakoa meiapihi mai vahohee?*f17* Makou meiꞌike nahaꞌaku pehe imakino makou pela name nei meihuli mai?”
5Ko Jesus ime aꞌe, “Lolosi hamakonu, iselavaa hekama kehailavaꞌa okou. 6Komaꞌi nakama meio aku i kemale anau, kena ime aku pela lakou niMesaea, kena mehailavaꞌa komaꞌi nakama. 7Ia okou meilono nakaua, ia ma nakakala kaua meihamai. Namena meiapihi aku. Ia okou isemakaꞌu. Name na sehuli aku kehaoki kemaalama nei. 8Naonohenua meivuhu ma alaonohenua. Kenoholana meivuhu ma kelaa noholana. Ia komaꞌi naꞌina meilulu hia kelulu henua. Ia keone la mekae aꞌe nahenua la, kena komaꞌi nakama meimake kehiꞌai. Ia kenei keꞌamaka nahalono lihu. Ehau poi kehine eisu imua aia emamaoha kamaliꞌi aia.
9“Okou ilolosi hamakonu. Nakama la meihakaꞌi okou i nahale hakonukonu. Ia nakama la meilili kia okou iloko nahale loku. Ia nakama la mehakaꞌi okou imua namaisu nakama hamakua, ia ma nakuꞌu hoi, pela ikakala aꞌe nakama la kelono kaualeꞌa. Namenei meiapihi aku, maikinimea okou ekaukali mai anau. 10Ia kena imua kehaoki kemaalama nei, nakama kaukali anau la meikaukaꞌu aꞌe kelono kaualeꞌa Keakua i naonohenua hakoa. 11Ia kena kulana nakama la meikaohi okou nohakonukonu, okou isehakekele hea okou meime aꞌe. Okou ime aꞌe nakama la nakakala kela Keakua meau aku i okou. Ia seme pela okou mekakala soꞌokou. Emeia Keanana Kapu mekakala iloko okou.
12“Ia kekama meau aꞌe kaina aia la, ikaa kama la imake. Ia kamana meau aꞌe kamaliꞌi aia la ikaa kama la imake hoi. Ia nakamaliꞌi la meihakaukau ma namakua lakou, ia kena iau aꞌe namakua lakou la ikaia imake. 13Ia kena nakama hakoa meililoko okou, maikinimea okou ekapa kemale anau. Ia poi hekama meihakina i anau hanokae kehaoki, kena Keakua meikonaꞌi kama na.
Keualoko kehalono lihu
(Mat 24.15-28; Luk 21.20-24)
14“Okou meiꞌike hakipua saꞌino haeꞌo kela meseu komaꞌi namea. Kemela mehakuu i keꞌina ekapu la, ia sekau kekuu ilaa. (Okou hakoa ikau kemakino laoi kehakaꞌoko nakakala nei.) Keualoko la, nakama Judea mehulo i namouna iloko nomuni. 15Nakama kela enoho iluna kauhu la mehulo ikaha ma nahale lakou, ia meseo iloko nahale la noko namea lakou la. 16Nakama kela enoho iloko paupaꞌu lakou isevaꞌai muli nahale lakou noko niauꞌahu ma lakou. 17Nahine haikama, ia ma nahine eisi nakamaliꞌi sasapai la mehalono lihu. 18Ainoa aꞌe Keakua pela namea la mesekae aku keualoko kelaꞌi maili. 19Keualoko la, nakama hakoa meihalono lihu haeꞌo. Kehalono lihu la elaꞌa iluna nahalono lihu hakoa i kemaalama nei imua.*f18* Ia naonohenua imuli mesehalono lihu pela hoi. 20Pena Kealiꞌi sekuu keualoko saꞌino la nopopoko, selavaa hekama eola. Ia Kealiꞌi ealoha nokuu keualoko la nopopoko, maikinimea kama la ehilihili alakama iola.
21“Poi hekama eme aku, ‘Ila aꞌe, kela keMesaea! Kama la ukae mai!’ Ia okou isehakina kama na. 22Alakama meinuku laoi ma lakou niMesaea, ia alakama meinuku laoi ma lakou ehakae nakakala Keakua. Nakama la meihuli aꞌe namahi hananiu, ia ma nahaꞌaku lakou, pela ihailavaꞌa nakama kela Keakua ehilihili la. 23Lolosi soꞌokou! Anau namea aku avale pela namenei hakoa meapihi aku.
{Kama ekipu kama} meihamai
(Mat 24.29-35; Luk 21.25-33)
24“Imuli nahalono lihu la, kelaa la meipouli, kena kemaalama la mesekii. 25Keakua meilulu kevaelani iseo konu namela naala lakou, kena nahekuu kevaelani meimaoha ilalo. 26Kena naonohenua meiꞌike {kama ekipu kama} ehamai iluna napuleulehu eꞌiva la, ma namahi hananiu Keakua. 27Kama la mehaunalia na{enselo} aia la i nahenua hakoa kemaalama nei,*f19* nohaꞌuku nakama aia nihilihili la.
28“Okou ihakaꞌoko kipukipu ke{fig} imakino kehakaꞌoko nakakala hulihuli nei. Kulana nalala kelaꞌau la meisomo nalaumea, okou umakino pela keualoko haaua ukapili. 29Kulana okou eꞌike namea nei hakoa ehuli mai, okou umakino pela {kama ekipu kama} ukapili ihamai, ehau poi hekama kela ekuu kokoꞌa. 30Anau eme aku okou kehamaoni. Kulana namenei hakoa meapihi aku, alakama kaukama nei meoiola. 31Ia kena kevaelani ialuna ma kemaalama nei meio nooki, ia nakakala anau selavaa keoki.
Sehikama emakino
(Mat 24.36-44)
32“Sehikama emakino keaho hee, ia ma keualoko hee namea nei hakoa meiapihi mai, niaina na{enselo} i kevaelani, ia ma {kama ekipu kama}. Kamana soia emakino. 33Lolosi. Okou iala kahi. Maikinimea okou semakino keualoko hee {kama ekipu kama} meivaꞌai mai. 34Kama la ehau poi hekama hamakua kela ehaele ikaha ma kehale aia la. Kama la meme aꞌe nakama heheaꞌu aia la ilolosi kehale aia la. Kama ma kekama memakino hea aia mepena la. Ia kena kama hamakua la meme aꞌe kelaa kama ilolosi laoi kokoꞌa kehale la.
35“Ia kena okou ilolosi hapulu. Maikinimea okou semakino kulana hee {kama ekipu kama} la meivaꞌai mai muli; ame kulana keiahi, kulana kuapo, keualoko namoa ekani, ma kulana keaka. 36Ame kama la ehamai vave, kama la meikili okou sekanakana, ia emoe oia. 37Hea anau eme aku, anau eme aꞌe nakama hakoa, ‘Lolosi hapulu.’ ”
Terpilih Sekarang Ini:
Mark 13: ojv
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 1999, Wycliffe Bible Translators, Inc. All rights reserved.
