Mark 12
12
Kakala hulihuli nakama lolosi paupaꞌu
(Mat 21.33-46; Luk 20.9-19)
1Kena Jesus eꞌamaka nokakala aꞌe keonohenua la nakakala hulihuli. “Kela hekama ekoli nahua na{grep} iloko paupaꞌu aia, kena ipui keupena haleha paupaꞌu la. Kama la ekanakana keꞌina iꞌumi nahua la,*f15* kena ihakuu kamahale mouluna ilolosi paupaꞌu aia la. Ia kena kama la eau aꞌe paupaꞌu la nololosi alakama, kena iholau keꞌina emao.
2“Kulana nahua nalaꞌau la uleu, iko kama hamakua paupaꞌu la ehaunalia kama heheaꞌu aia la nomaka nakama lolosi paupaꞌu aia la, ma iko aꞌe kuhana aia la. 3Ia nakama lolosi paupaꞌu la ekaohi ilili kia kama la, kena ihaise kama la ikaha, sehikuhana eau aꞌe.
4“Kena imuli, kama hamakua paupaꞌu la uhaunalia kelaa kama heheaꞌu aia. Kena iko nakama lolosi la ilili kia pohoulu kama la, imea hasaꞌino kama la. 5Kena kama hamakua la uhaunalia kelaa kama heheaꞌu aia hoi. Ia nakama lolosi paupaꞌu la ukaa kama la nomake. Imuli, kama hamakua la ehaunalia alakama hoi. Ia nakama lolosi la elili kia alakama, ia ekaa alakama nomake.
6“Kekama hananiu la eisi kama hokahi ekoe meihaunalia, kaupeala aia elaoi la. Kena kama la ehaunalia kanakama i nakama lolosi paupaꞌu aia la, kena ikakala pela, ‘Nakama la meihamaha kama anau nei.’
7“Ia nakama lolosi paupaꞌu la ekakala solakou penei, ‘Kenei kaupeala kekama hamakua paupaꞌu nei. Omai, kakou ikaa kaupeala nei imake, kena kakou uko paupaꞌu kama nei ma kakou.’ 8Kena iko nakama la ikaa kaupeala la nomake, kena ipesia kinokama kaupeala la ikaha ma paupaꞌu la.
9“Kama hamakua paupaꞌu la meimea pehe? Kama la meihamai nokaa nakama la nomake, kena iko paupaꞌu la iau aꞌe nololosi alakama. 10Okou napau avale nakakala kelauniu kapu nei,
‘Kehaku kela nakama hakuu nahale nihaseseꞌe lia,
Kehaku la emau soia kekaohi savahi kokoꞌa kehale la hakoa.
11Kenei hemea Kealiꞌi epena,
ekaualeꞌa imua namaisu kakou hakoa.’ ”
12Nakama hamakua la emakino pela Jesus ekakala haiauna aꞌe lakou, kena hihai ihapiꞌi Jesus. Ia nakama la emakaꞌu keonohenua la. Kena nakama la ukiaꞌi Jesus, io ikaha.
Kevasili kesui na{Kakisi}
(Mat 22.15-22; Luk 20.20-26)
13Kena nakama haihai manava Jesus la ehaunalia alakama naFarasi ia ma alakama keukulana Herod novasili aꞌe Jesus, pela ikaiꞌi kama la. 14Nakama la uo nome aꞌe Jesus penei, “Rabai, makou eailoa pela aꞌoe hekama hamaoni. Ia niaina hekama hamakua, aꞌoe sehakekele nahakaꞌoko kama la. Ia aꞌoe eaoaꞌo kehamaoni keala Keakua. Ea, ekonu pela kakou isui ke{kakisi} i kekuꞌu i Rome? 15Kakou isui aꞌe, ma seai?”
Ia Jesus emakino pela nakama la ekakala uhiuhi oia. Kena iko Jesus ime aꞌe, “Aiea okou hihai ikaiꞌi anau naea? Ko mai sileni la imaka anau.”
16Kena nakama la uko sileni la noau aꞌe i Jesus, kena iko Jesus ime aꞌe, “Kenei hemaisu ai, ia hemale ai iluna sileni nei?” Kena iko nakama la ime aꞌe, “Kekuꞌu i Rome.”
17Kena Jesus ukakala aꞌe nakama la penei, “Au aꞌe kekuꞌu la namea kela ekau ma kekuꞌu. Kena au aꞌe Keakua namea kela ekau ma Keakua.”
Kena nakama la umasalo haeꞌo i nakakala Jesus. Kena ikiaꞌi Jesus, io ikaha.
Kevasili i keola muli
(Mat 22.23-33; Luk 20.27-40)
18Kena naSatiusi la uo novasili aꞌe Jesus. (Nakama la emea ma nakama emake selavaa keola muli.) Nakama la eme aꞌe, 19“Rabai, Moses ekakaa mai nakuaa nei ma kakou. ‘Poi hekama emake, ia keꞌavana aia la sehikamaliꞌi, kaina aia la meiꞌavana kaukuaha la. Kena kehine la ame hanau nikamaliꞌi iko kesao keꞌavana aia imua la.’ 20Kela koahiku nahaikaina. Kekama makua la uꞌavana nomake, sehikamaliꞌi. 21Kena kama asoaꞌe la uꞌavana kaukuaha la, kena umake hoi, sehikamaliꞌi. Ia kamakane hakoukolu pela hoi. 22Ia kena haikaina koahiku la hakoa uꞌavana kehine la nomake, sehikamaliꞌi esula. Ia kena kehine la umake hoi. 23Kulana nakama hakoa meimasiꞌe ikaha ma kemake, kehine la meiꞌavana ai? Haikaina koahiku la hakoa eꞌavana kehine la.”
24Kena iko Jesus ime aꞌe nakama la penei, “Okou esala. Maikinimea okou semakino kelauniu ekapu, ia ma kipukipu namahi Keakua. 25Keualoko nakama umake la meimasiꞌe ikaha ma kemake, nakama la meiseꞌavana, ia meikipu poi na{enselo} i kevaelani. 26Okou evasili mai anau kipukipu i kemasiꞌe muli ikaha ma kemake. Ea, okou epau nakakala kepupu eula, kela Moses nikakaa mai i kelauniu aia? Keakua nime aꞌe Moses ma, ‘Anau Keakua kela Abraham, Keakua kela Isaac ia Keakua kela Jacob.’ 27Semea pela kama la Keakua nakama umake. Kama la Keakua nakama eola kahi. Hakaꞌoko okou na esala.”
Kevasili kekuaa hamakua
(Mat 22.34-40; Luk 10.25-28)
28Kela hekama epolopolo nakuaa ehaele nolono naSatiusi la ehakauoki ma Jesus. Ia kama la eailoa pela Jesus esui hakaualeꞌa nakakala naSatiusi la, kena ivasili aꞌe Jesus ma, “Kuaa hee ehamakua i nakuaa Moses la hakoa?”
29Kena iko Jesus ime aꞌe kama la, “Kuaa hamakua la eme penei, ‘Halono, okou nakama Israel. Kealiꞌi kakou Akua, Healiꞌi hokahi. 30Laoi Kealiꞌi koAkua ma nahakumanava okou, ma naola okou, ma nahakaꞌoko okou, ia ma namahi okou.’ 31Kuaa hasiaoa la eme penei, ‘Laoi alakama ihau poi aꞌoe elaoi soꞌoe.’ Sehikuaa ehamakua iluna sakuaa nei.”
32Kena iko kekama epolopolo nakuaa la ime aꞌe Jesus, “Ekonu Rabai. Aꞌoe ekakala hamaoni pela Kealiꞌi Keakua soia, sehiAkua pela hoi. Keakua soia ia. 33Kakou ikau kehaikamana laoi Keakua ma nahakumanava kakou, ma nahakaꞌoko kakou, ia ma namahi kakou. Ia hoi, kakou ikau kelaoi alakama poi kakou elaoi sokakou. Kipukipu sakuaa nei ehamakua iluna kipukipu*f16* keau aꞌe Keakua nahoꞌi.”
34Kulana Jesus nilono pela nakakala kama la emakonu, kena Jesus eme aꞌe kama la, “Aꞌoe semao ikaha ma kenoholana Keakua.” Kena imuli, nakama la umakaꞌu kevasili aꞌe Jesus hoi.
Kevasili keMesaea
(Mat 22.41-46; Luk 20.41-44)
35Kulana Jesus eaoaꞌo keonohenua iloko kehale kapu, kama la eme aꞌe nakama la penei, “Aiea nakama polopolo nakuaa la emea ma keMesaea hemopuna kekuꞌu David laea? 36David ekakala i namahi Keanana Kapu penei,
‘Keakua eme aꞌe kauAliꞌi,
Noho i kevahi laua anau,
Nokali anau meikuꞌu nakama eliloko aꞌoe la
Ilalo namahi aꞌoe.’
37“Kena David ekapa keMesaea la ma ‘KauAliꞌi.’ Kama la o Kealiꞌi David, kena keMesaea la elavaa kehanau mai mo mopuna David pehe?” Ia keonohenua la ehihia lo keualoko lakou elono nakakala Jesus.
Lolosi hamakonu nakama epolopolo nakuaa
(Mat 23.1-36; Luk 20.45-47)
38Jesus eaoaꞌo keonohenua la ma, “Okou ilolosi hamakonu nakama epolopolo nakuaa. Nakama la hihai hahao naheheaꞌu kaualeꞌa, ihamaha lia lakou keonohenua la valoko kemakaꞌina. 39Nakama la ehihai inoho ma nakama hamakua iloko nahale loku ia ma naꞌailana. 40Nakama la eko naloku loloa ihamaha lia lakou keonohenua la. Ia nakama la ehailavaꞌa noko naheheaꞌu nakaukuaha hine la. Ia kena nahalono lihu nakama la meilahi haeꞌo.”
Kehoꞌi kekaukuaha hine haaloha
(Luk 21.1-4)
41Kena Jesus enoho kapili keꞌina kepapa ponopono namoni iloko hale kapu noꞌike keonohenua la epono namoni lakou la. Nakama haimoni epono komaꞌi namoni. 42Ia kaukuaha hine haaloha la uhaele aꞌe nopono sasileni soliꞌi aia la, sekae pela he{peni} hokahi.
43Kena Jesus eanaa aꞌe nakama kaukali aia la, kena ikakala aꞌe nakama la penei, “Anau eme aku kehamaoni. Nakama la hakoa ehoꞌi aꞌe hale kapu la. Ia kehoꞌi kehine haaloha la elaꞌa iluna ma nahoꞌi nakama la hakoa. 44Maikinimea nakama la eau aꞌe namoni lakou ekoe. Ia kehine haaloha la epono namoni haoki aia, sehimoni ekaꞌoko mai ikonaꞌi aia iola.”
Terpilih Sekarang Ini:
Mark 12: ojv
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 1999, Wycliffe Bible Translators, Inc. All rights reserved.
