Matai 17
17
1Vwu vagonile kahano pwu UJesu akatola va-Petele nu-Jakobu nu-Johani ununa va Jakobu akatoga navo pakidugala ikitale pwu akatsikijekela navo. 2Pwu akanduka vwu vilola, nakumiho akalengalenga uta litsuva, nimisabwa gya mwene gikaṅala uta lumuli. 3Pwu vakakeńemuka vivoneka nava-Mose nu-Elija vitsova nave. 4Pwu UPetele akaṅaga ngati akata: Nkuludeva pannonu ukuva baha uvwe. Ungave vunogwa pwu tutsengage ihema idatu apa, mamato jive jyako, ijyinge jive jya Mose, ijyinge jive jya Elija. 5Vwu ali pakutsova tsitsitsi pwu vakakeńemuka ilivingo ilivalasu sitso likuvilikila, vakavona ilimeńu likahuma mwivingo mumwa lita: Uju vi vi nswambango ungane kwane uvi aṅelye une, vi mumpulikage jujwa. 6Vwu vapulike lilili avakongi pwu vakagundama vakadwada sitso. 7Pwu UJesu akabiha upwu vale akavabasa akata: Sisimuki ndadwadaga. 8Vwu vikwinamuka vwu vilolesa pwu vakavona nakuli ujyunge, pwale ju Jesu mwene. 9Vwu vikwika pakidugala pwu akavatanila UJesu akata: Ndambulaga numunu ujyunge tango uluvoneko ulwu muluvwene, mukasikage lulwa nditsukaga kuvaswe pwu mutsovage. 10Pwu vakambutsa avakongi va mwene vakata: Kyu kinu kiki ikyu vitsova avamańakalata upwu vita ilongolaga ju Elija ukwitsa? 11Umwene akanda akata: Kwu jilweli, Elija vi va kulongola ukwitsa, vi va kunotsehetsa syoni. 12Lola ndikuvavula ndita: Kwu itsile, mańa avene navammańili, Bako avene vakankinila vuvule nduvwu vanogilwe avene. Tsu nu-Ńamunu viva pakumpelela ukukuvilwa tsitso namwene. 13Pwu avakongi vakatsivona vakata ikuntsova ju Johani umwotsi.
14Vwu vikwaganila nikipuga kya vanu, pwu akańilila m-umana umunu akasugama pasi akata: 15Nkuludeva undililage ikisa unswambango mańa guntovile umwetsi, akuvilwe sitso. Ikitaga mmwoto na mmagasi kavili-kavili. 16Nditye ndingege kuvakongi vako pwu ndivwene valemilwe ukumponya. 17Pwu UJesu akata: E kwu kutsilakwidika kuki avanu va lino ava, kwu kulotsa kuki! Ndipele ndaku nuńe, ndipele ndaku ukuta lya image sikutsoni? Mungege kunu. 18Pwu UJesu akatana najyo imepo imbivi pwu jikahuma. Pwu undume akaponela pakavalilo kako vuvule. 19Pwu vakahegelela kwa Jesu avakongi vwu vijekye nave, vakambutsa vakata: Uvwe tulemilwe kiki ukujihumya? 20Umwene akata: Ulwakuva ulwidiko lwińo lwebepe. Mańa ndikuvavula ndita: Jilweli-lweli ngave ndi nalwo ulwidiko, lungave luli ndakaseke ka nkisina uvudebe, pwu kilutaga vuvule ikidugala iki ngave mukukivula mwita: Hamaga kunu, uvuke uku, pwu nasikuvalema isinge uńe, 21Avene ava lweli vwu navihuma vuvule, pene ungave utye nukwisaja utye nukusileka isinu pwu vihuma.
22Vwu vitsungutila mu-Galilai pwu UJesu akavavula akata Uńamunu iva pakuhilikwa mmavoko ga vanu. 23Vwu vikumbu daga, mańa palitsuva lya datu pwu alatsukaga. Pwu avene vakasu suvala sitso.
24Vwu vatsisike mu-Kapelinaumu pwu vakatsitsova nu-Petele avilundamanya isya kusangula isya mwa Tempeli, vakambutsa vakata: Ndeti, umańisi vińo nda nihomba isya kusangula isya mwa Tempeli? 25Umwene akata: Ihomba. Vwu ikwingila nńumba vwu akanale nukutsova ilinge, pwu UJesu akatengulila ṅani akata: Ndeti vi Simoni, avakuludeva va nkilunga umwu vitola kwani amasango aga pampaka naga ńumba? Nda visangula avana va vene pange avanu vuvule avange? 26Umwene akata: visangula avanu vuvule avange. Pwu UJesu akanda akata: pwu humbe avana navi sangula amasango. 27Mańa uvwe, ulwakuva ndita tulavapelelaga itsinge itsa kuvambutsa, pwu bihaga pańanza palya ukalahe akasipuli lo kako. Lola isomba indongotsi ijyu uvwene usipwe jyu ukajilolaga mundomo, mwu ulavona jili nulutalama lupamato lwa sitateli, lwu ukavapetsage luve lwa kutuhombela twi vavili nune nuve.
Terpilih Sekarang Ini:
Matai 17: Kinga
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
New Testament in Kikinga © British and Foreign Bible Society, 1961.
