Matai 16
16
1Vakahegelela kumwene navapalisai navasatukai vakata tungele pwu vakata: Utuvonyage ikinge ikipelwa kya kukyańa ikya kukumańilamwo uve. 2Umwepe akanda akata: Kumihe pwu mwita jikye mańa kuduṅupye kukyańa. 3mwi-vuja pavusiku mwita: Nzasi vuvule ilelo iji mańa kukyańa kutye nukuduṅupala kutye nukusuluka. Ńi vanwasi uńe mukuliṅanitse umwu kuvelye kukyańa, mańa isimańilo isya kumańilamwo imyaka imivaha syu nansimańili. 4Avanu va lino avavivi ava avaligu vilonda akange ka kudega. Navikukivona lweli ikinge ikipelwa, kilya kyene kyavetsaga nu-Jona uńamalago, kyu vikukivona kyene. Pwu akavaleka baho akaluta. 5Avakongi vwu vatsisike kumwambo gulya pwu vasamilwe ukugega isinu. 6Umwene UJesu akatsova navo akata: Mulole sitso, mbandikage unsabe gwa vapalisai navasatukai. 7Pwu avene vakisagila mwitumbu vakata: Ulwakuva natugegili isinu pange. 8Umwene UJesu vwu avavwene pwu akata: Tsu mukisagila tsiki itsu namugegili isinu? Vwu vwebepe vuki ulwidiko uńe! 9Nda mukanale nalino, uluhala musigye? Nda musamilwe nisivanda sihano silya valitsage avanu vaelipu vahano– (5000) nisiswiswi isyu mulundamanihitsage utwu vasigitse ukuta syale situnga? 10Nda musamilwe nisivanda lekelakupamato silya valitsage avanu vaelipu vani (4000) nisiswiswi isyu mulundamanihitsage utwu vasigitse ukuta syale situnga? 11Namukutsivona kiki ukuta nanditsova si sivanda vuvule upwu ndita: Mbandikage unsabe gwa vapalisai navasatukai? 12Pwu vakatsivona ukuta nitsova gwu nsabe gwa sivanda, itsova lu lumańiso ulwu vimańisa avapalisai navasatukai.
13Umwene UJesu vwu atsisike nkilunga kya mu-Kesalija Pilipi, pwu akavavutsa avakongi va mwene akata: Avanu upwu vikuntsova Uńamunu pwu vita ńa veni? 14Avene vakata: Avange vita vi Johani umwotsi, avange vita vi Elija, avange vita vi Jelemija, avange vita ńage pange vi ńamalago ujyunge vuvule. 15Umwene akata: Uńe mwita ńa veni? 16Pwu akamwanda USimoni Petele akata: Veve Kilisiti vi nswambe va Nguluve uvi alikwo. 17Pwu UJesu akanda akata: Uli vandugataluko vi Simoni vi ńa-Jona, mańa tsitsitsi tsu nagukuvulili ummana nunkisa. Bako akuvulile vi dada va kukyańa. 18Nune ndikukuvula ndita: Nuve vi Petele, vi Lunalavwe, une palunalavwe ulu pwu ndilatsenga umpelela gwango nagyene nimilyango gya kuvutsuka nagilaguleme. 19Ndikukupetsaga nisidindulilo sya kudindulila kuludeva lwa kukyańa. Voni uvwu ungave vukuvakunga pasi apa, vwu vivetsaga vakungwa nakukyańa. Navene uvwu ungave vukuvavopola pasi apa, vwu vivetsaga vavopolwa nakukyańa. 20Pwu akabetsa sitso avakongi va mwene akata: Ndambulaga nujyunge umunu ukuta vi Kilisiti une.
21Pwu akatengula baho UJesu akavavulila ṅani avakongi va mwene akata: Upita ndibihage mu-Jelulsalemu, mwu valaṅinila sitso avańivaha avenekivumbuko navateketsi avavaha navamańakalata, mwu ndilatsibudwa, mańa palitsuva lya datu pwu ndilatsuka. 22Pwu UPetele akigava nave pwu akatana nave akata: Unguluve akutange vi nkuludeva tsu tsilakuvonaga! 23Umwene akankilivukila UPetele akata: Luta kumbele vi Setano vulonda vuvule ukuńambutsa. Mańa navukisagila itsa Nguluve, vukisagila itsa vanu vuvule. 24Pwu UJesu akavavula avakongi va mwene akata; angave ujyunge ita ndinkonge mumbele une vi upita idulusage vuvule atetsage nikidamiṅanye kya mwene itwikage pwu aṅongage une. 25Mańa uvi ita ndiponye uvwumi vwango vi ambwitse. Mańa uvi uvwumi ambuhitse mumwane, vi aponehitse vuvule. 26Nupwu angave umunu akikavile kyoni ikilunga pwu kyambumbulilaga kiki avwambuhitse mumwa uvwumi vwa mwene? Nitsa kuvuvangila atsivonage ndaku itsa kuvuvangila uvwumi vwa mwene? 27Ulwakuva Uńamunu iva pakwitsa navasuṅwa va mwene mbuvaha vwa dadaje, pwu alavahombela upwu tsivye imbombo tsa vene avanu uju itsa mwene uju itsa mwene. 28Jilweli-lweli ndikuvavula ndita: Ńi mwimile apa avange nandatsivone ukuswa vwu namumbweni tango Uńamunu ukwitsila ndudeva lwa mwene.
Terpilih Sekarang Ini:
Matai 16: Kinga
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
New Testament in Kikinga © British and Foreign Bible Society, 1961.
