Jɔnn 15
15
Yisa le ye busub bamɔm a nyagil
1Min le ye busub bamɔm, le n Baa le ye ukpadaan. 2U gaar ibon yan biɛn be nni wee kaa lo iloon nin le ki jaar, le ki mann gbar ibon yan biɛn lo iloon nin wee yin mann lo iloon. 3Nim pii be le chasi, nan bu-n maah nan bei ni imɔbon yan nin bu. 4Ni li be nin ma, wee n mu li be nin ni. Nbon kaa li fir lo iloon mitɔɔli; ni kpaan le mi li tɔ busub a nyagil bu. Ni mu kaa li fir lo iloon ni see ke ni be nin min.
5“Min le ye linyagil; le ni ye ibon. Ni ye ke uninfosaal be nin min wee n be nin u ke, u li lo iloon takpem; naa ye n bu ke naa li fir ŋa niba. 6Ni ye wan biɛn kaa lagin be nin min ke, u nann nbon man bi gaa jaa wee mi koor le; ibon nmɔn a bosu le bi pii, ki jaar nŋmi-n le yin gaa boor. 7Ni ye ke ni be nin min wee n mɔleen be nin ni ke, ni baan naah ban nan biɛn bu ke, ni li kan ni. 8Ni nan li ye n Baa a pag, ke ni lo iloon takpem, ki wɔɔn ni ba ke ni ye n bɔɔnɔɔb le.
9“Ke Baa-n kaah nan jiɛm man nin, man le n mu jiɛ ni. Daandaan nan li be nin n jiɛmin yaan na. 10Ni ye ke ni chee sei n siimin ke, ni li be nin n jiɛmin yaan, ke maah chee sei n Baa a siimin man wee ki be u jiɛmin yaan man nin. 11N bei ni ni nan le ke n mɔm li be ni ban wee ni mɔm ngbeen. 12N mɔsiinl ye nan le: Ni li jiɛ tab ke maah jiɛ ni man nin. 13Njiɛm takpem kaa be ki jon nin uninfosaal nta u miɛfol ki kpenn u jɔtiibi. 14Ni ye ni ŋa n siimin kaah len man ke ni ye n jɔtiib le. 15Maa ji yin yi ni bitoontumi, nan bu-n utoontunn kaa nyi u daau a toon yi. Amaa, n yi ni n jɔtiib le, nan bu-n maah biɛ nan n Baa ban nin n che ni mu biɛ na. 16Nim li kaa nan gann mi, amaa min li nan gann ni ke ni lo iloon yan kaa jɔɔ diɛmi. Wee Baa-n li sei ni niwann nan biɛn wee ni baan u n yinl bu. 17N siim sɔ: Ni li jiɛ taba.
Dulinya nan a ninaŋ
18“Ni ye dulinya nan yaab nan ni ke, ni li nyi ke bi nan chinn nan min le. 19Ni ye ke ni ye dulinya nan yaab ke, ki li jiɛ ni ke ki yaabin. Naah ye man nin, naa ye dulinya nan yaabi, amaa n nan gann ni ki nyan ni dulinya nan yaan na. Mambu le dulinya nan nan ni. 20Ni li tiɛr imɔbon yan wee n nan pag ki sei nin na: ‘Utoontunn kaa yab jon u daau wi.’ Ni ye bi nan mugirim ke, bi li mugir ni mu. Ni ye bi chee sei n wɔɔm ke, bi li chee sei ni mu a wɔɔm. 21Bi yin ŋaa ni nan le n yinl bu, nan bu-n baa nyi Wan nan tunimi. 22Maa nan bi dan ki nan pag sei bi ke, baa bi li jɔɔ tibir a galin yi, amaa, daandaan nan, baa ji li fir ke baa nyi bi bir bu. 23Wan nam ke u nan n Baa baantɔɔl le. 24Ni ye ke maa nan bi ŋa niwann nan wee uba kaa fir ŋa bi sisiigin ke, baa bi jɔɔ tibir a galin yi. Amaa daandaan nan bi nan kan ligaril a siɛrama, le ni biɛn yɔli bi nan min nin n Baa biɛn le. 25Amaa ni nan li ye nin gbeen nsiimin kaah nan sɔb man nin: ‘Bi nam le laa jɔɔ bu.’
26“Utiter, wan wee n yin tun u wee un nyann Baa-n ban nin, ki ye ibamɔn a naaŋ kan nyann Baa-n ban nin dan ke, u li ji n siɛra. 27Ni ye ni mu nji n siɛra le, nan bu-n ni be n ban le npiinimin na.
Terpilih Sekarang Ini:
Jɔnn 15: KUGL
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Komba New Testament © Bible Society of Ghana, 2014.
