Lucas 7
7
Zezusi hã, romanu na dawamri ma romhuri'wa te te ipesezé
Mateus 8.5-13
1Tawamhã Zezusi hã ãne na te te dama rowahutu parimhã, ma tô oto mo, Cafarnau u. 2Tame te aibâ hã 're hâimana, romanu na dawamri na dasi'wapéi 'manharĩ'wa norĩ wada'uri'wa hã. Tãma iromhuri'wa te te 're isawi pese mono hã. Ta hã ma tô tiwi tihâzé pire, dâ'âzéb u oto ihâimana hã. 3Tawamhã dasi'wapéi 'manharĩ'wa norĩ wada'uri'wa hã, Zezusihi wasu'u te te wapari wamhã, ma tô satõrĩ za'ra, nima norĩ Zudeu norĩ ma roti'wa hã, te te tiwi iwaptẽrẽ na morĩ da itẽme, te te tãma rowasu'u za'ra da, tãma romhuri'wa hã te te tãma pese da. 4Tahawa ma tô itẽme ai'aba'ré. Zezusihi u sihutu wamhã, sadahutu ãna ma tô tãma nharĩ za'ra, itẽme morĩ da, ãne:
— Aibâ hã iwẽ. Tahawa i'uwaibaba tô ipawaptob da hã. 5Ta hã wasiré õ nherẽ, te te 're wa'azawi pese. Tahawa, ma tô rowahutuzé hã wama 'ri za'ra.
6Tahawa Zezusi hã ma tô isiré timorĩ za'ra. Tawamhã 'ri tẽme te te oto sina rob'umhutu za'ra wamhã, dasi'wapéi 'manharĩ'wa norĩ wada'uri'wa hã ma tô nima norĩ tisiwaihu'u norĩ hã satõrĩ za'ra, Zezusihi u, ãne te te tãma rowasu'u za'ra da:
— Apito, te aiwi iro'wa'rutu da hã te ĩsima wẽ õ di. Wa hã ĩwasétére di, ĩnhorõwa u i'asébré da hã. 7Ĩwasétére wa, duré ãma ĩmorĩ õ di, te asõpẽtẽ da hã. Tahawa ma'ãpé, aimreme na si 'ru na. Tawamhã ĩma romhuri'wa hã te za tipese. 8Ĩzama wa 're ĩhâimana, ĩnhipai u ĩma ipire norĩ zahâpâ. Duré ĩzama wa 're ĩhâimana, dasi'wapéi 'manharĩ'wa norĩ wada'uri'wa na. Ãne nimahã ma, te nharĩ wamhã: “Aimorĩ, õwa”, ãne wamhã, te za mo, ĩzadawa zarina. Duré ãne nimahã ma, te nharĩ wamhã: “We aimorĩ”, ãne wamhã, te za tô wei mo. Ĩte romhuri'wai ma, te duré nharĩ wamhã, ãne: “'Manharĩ ãhã”, ãne wamhã, te za duré 'manha.
9Tawamhã Zezusi ãne hã te te wapari wamhã, ma tô ãma titob'uzu. Tahawa ma tô datẽme aipi'ra. Ãne te tinha, da'ahâ uptabi na isarina idasi'aba'ré norĩ ma:
— Tô sena, wa za aima waihu'u za'ra wa'wa, ãne: Niwa te i'madâ'â õ, ãne hã isi'umnhasi za'ẽtẽ uptabi hã, Izaraéu nhihudu 'remhã!
10Tawamhã aibâ siwaihu'u norĩ apâ si'aba'réi wamhã, tãma iromhuri'wa hã ma tô siwi sõpẽtẽ tãma rowẽ na, hâzé ãna.
Zezusi hã, pi'õi mrotõ ma, i'ra te te ihâiwa'utuzé
11Tawamhã ãma ronomro õ ré, Zezusi hã ma tô mo, Naĩ na 'ri wa'õtõ nhisi u. Isiré 're inomro mono norĩ hã ma tô isiré ai'aba'ré. Duré da'ahâ uptabi zama ma tô isarina tapra ni. 12Tawamhã Zezusi hã 'ridawa isa'ẽne 'ri nho'õmo u dazasizéb u, te te sina rotété wamhã, iwab'rere ma adâ hã dasiwi wazere ni, pi'õi mrotõ 'ra si'aibâ hã 'ri nho'õmo nhiti, da te ãma dasiwi ti'a da. Da'ahâ uptabi na te isarina dasi'ré, 'ri nho'õmo 're, 're idasi'ubumroi mono hã. 13Tawamhã Wanhib'apito hã pi'õi mrotõ te te 'madâ'â wamhã, ma tô ãma tipẽ'ẽzé pese. Tahawa ma tô ãne tãma tinha:
— Aiwa'õ tõ.
14Tawamhã ma tô itẽme sina rotété. Wedehâ're hã ma tô upi. Tahawa wedehâ're te te siwi i'âri hã ma tô mazahâri za'ra. Tawamhã Zezusi hã ma tô tãma tinha, ãne:
— Ai'repudu, wa aima ti'ru. Ma'ãpé aiwahutu!
15Tahawa ai'repudu aré idâ hã ma tô sahâ na nhamra. Zezusihi ma, robzanhamri na ma oto sãna'rata. Taha pari, Zezusi hã ma tô ina ma tisõ. 16Tawamhã uburé ma tô tapahi pese za'ra ni. Te duré 'Re ihâimana u'âsi mono ãma tawata za'ra ni, ãne:
— 'Re ihâimana u'âsi mono zadawa 'mahârâ'wa dama isa'ẽne hã ma tô wei mo, wawazarib za'ra 're hâimana mono da! 'Re ihâimana u'âsi mono hã ma tô wei mo, tinhib'a'uwẽ norĩ hã te te 're apawapto mono da!
17Tawamhã ãhã na Zezusi te te i'manharĩzém na iwasu'u hã ma tô ropé, Zudéa ti'ai 'remhã duré isababa ti'ai wa'õtõ 're, daro isimasa mono na hã.
Zuwã Batista hã Zezusihi u, romreme 'wapéi'wa norĩ te te isatõrĩ zahuré zé
Mateus 11.2-19
18Tawamhã Zuwã Batistaha siré 're inomro mono norĩ hã ma tô uburé ãne na iromhâimanazém na tãma rowasu'u pese za'ra. Tahawa Zuwã hã ma tô hâ, maparane isiré 're ineb zô, isiré 're inomro mono norĩ siré hã. 19Taha pari ma tô satõrĩ zahuré Wanhib'apito u, te te sadanharĩ zahuré da, ãne: “E a hã, tô õ hã za we iwisi da hã. E niwamhã aimawi zô wa za a'â mapari za'ra ni.” 20Tawamhã Zezusihi u ma tô tineb zahuré, isãmrazéb u. Itẽme simasisi zahuré wamhã, ãne ma tô sadanharĩ zahuré:
— Zuwã Batista hã ma tô wei wazatõ, ãne wa te asadanharĩ da: E a hã tô õ hã za we iwisi da hã. E niwamhã wa za a'â mapari za'ra ni, aimawi zô.
21Tawamhã tô taha bâtâ na, Zezusi hã da'ahâ na ma tô da'apese, dahâzé da'ãma 're ihâimana za'ra mono hã duré dahâzé ipire, da te 're isépata za'ra mono norĩ hã. Wa'uburé da'ãma 're ihâimana za'ra mono zama ma tô duré dama anhamra. Duré itob'a norĩ hã ahâ na ma tô ato pese. 22Taha parip si ma tô Zuwãhã te romreme 'wapéi'wa norĩ hã sada'âbâ zahuré, ãne:
— Mo oto apâ ane wa'aba, Zuwãhã ma wasu'u wa'aba da, i'madâ'â aba zé hã duré iwapari aba zéb zama. Tãma wasu'u wa'aba, itob'a norĩ hã ito pese za'ra na, duré imorĩ'õ norĩ hã oto imorĩ ré na, duré i'wa're ré norĩ ipese za'ra na hã, ipo'reptõ norĩ ipo're pese za'ra na hã, duré idâ'â norĩ apâ ihâiwa'utu za'ra na hã, duré isibrob'õ norĩ hã Rowasu'u wẽ ité te te iwapari za'ra na hã. 23Ni'wam norĩ ma 're rowẽ uptabi za'ra mono di, ĩ'ãma 're isiwawã za'ra mono õ norĩ ma hã.
24Tawamhã Zuwãhã siré 're ine hã apâ oto ne parimhã, Zezusi hã ma tô dama sãna'rata Zuwãhã wasu'u na, ãne:
— E marĩ 'madâ'â za'ra wa'aba da, ma tô ai'aba'réi wa'wa, rop si 're irosa'wari mono u hã. E du teihi po, rowa'u te te 're irési mono. 25E marĩ 'madâ'â za'ra wa'aba da bâ. E aibâ, uza hâi wẽ uptabi na 're isi'uza mono. Tazahã, uza hâi wẽ na 're isi'uza za'ra mono hã duré marĩ iwẽ na si 're ihâimana za'ra mono norĩ hã, te apito norĩ te, 'ri iwẽ uptabi wap si 're si'ubumro. 26Tahawa, ma'ãpé ĩma waihu'u za'ra wa'aba: E marĩ 'madâ'â za'ra wa'aba da, ma tô ai'aba'réi wa'wa. E 'Re ihâimana u'âsi mono zadawa 'mahârâ'wa. Ĩhe, ta hã tô. Tô sena wa za ãne aima waihu'u za'ra. 'Re ihâimana u'âsi mono zadawa 'mahârâ'wa norĩ nhipai u ipire uptabi hã ma tô i'madâ'â za'ra wa'wa. 27E marĩ wa. Zuwãhã ãma te Ibaihâ Iwazé pese na rob'ui'éré hã tinha, ãne: “Ĩmreme 'wapéi'wa hã wa za satõ, aiwana. Ta hã te za ate bâdâdi hã aiwana asô ropese.”
28— Ãne wa za aima waihu'u za'ra wa'wa. Uburé dapoto mono bâ idapoto za'ra hã, Zuwãhã ne ipire hã da'maihâimana õ di. Tane nherẽ, ni'wa hã 'Re ihâimana u'âsi mono da'ãma 're isib'a'uwẽ mono zéb ãma, dama isuru uptabi na 're ihâimana mono hã, ta hã pire di za, Zuwãhã nhipai u.
29Tawamhã danhib'apito ma, rob'uiprazé arĩ ubumroi'wa norĩ hã duré uburé idahâimana za'ra zama ma tô ãne hã wapari za'ra ni. Ta norĩ hã 'Re ihâimana u'âsi mono nhimiroti i'uwaibaba hã te te 're i'madâ'â pese za'ra mono, duré Zuwã hã â dawabzuri te te tãma 're i'ab'manharĩ mono. 30Tanei õ di, farizeu norĩ hã duré 'Re ihâimana u'âsi mono nhimiroti zahi na rob'ui'éré na dama rowahutu'wa norĩ hã, ta norĩ hã te te sima wẽ za'ra õ di, Zuwã hã â dawabzuri te te tãma i'manharĩ za'ra da hã. Ãne wa, ma tô siwi wẽ'õ za'ra, 'Re ihâimana u'âsi mono iwẽ na isõwa te te tãma irowa'õtõ za'ra zé hã.
31Tawamhã Zezusi ma duré ãma uzusi, ãne:
— E marĩ na, wa za da'ãma romnhimiré'é, ãhã na 're idahâimana za'ra mono norĩ ãma hã. 32Aiwa ai'uté norĩ ne hã da te dasina 're i'ubumroi mono zéb ãma, nasi isi'mahârâ za'ra ne hã, ãne:
“Wa rowamreme za'ra ni, dasina damro wa, ropta'azém na. Tane nherẽ, ãma aipese za'ra wa'aba õ di!
Da te da'ãma 're ti'a za'ra mono wa, 're idazadawa'a'a mono zém na, wa wanho're za'ra ni. Tane nherẽ, ai'ru'ru wa'aba õ di!”
33Zuwã Batista hã sai ãna te te 're rowaptẽrẽ. Duré uva 'rãi wa'u isé hã te te 're hâsi mono õ di. Tahawa te 're inharĩ za'ra wa'aba mo, ãne: “Õ hã te wa'uburé ré 're mo.” 34Ti'ai ãma Dasiré Ipodo hã ma tô wei mo. Ta hã te to sina dasiré 're sa. Uva 'rãi wa'u isé hã te duré te te 're hâsi dame. Tahawa, te 're inharĩ wasété za'ra wa'aba mo, ãne: “Ma'ãpé 'madâ'â za'ra wa'aba! Õ hã aibâ hã isai wawẽ. Duré uva 'rãi wa'u isé hã te te 're hâsi za'ẽtẽ! Rob'uiprazé arĩ ubumroi'wa norĩ siwaihu, duré siwa'ru 're idanomro mono norĩ siwaihu.” 35Tazahã, 'Re ihâimana u'âsi mono te, rowaihu iwẽ hã te za da te 're 'madâ'â waihu'u za'ra, isimiroti zarina si 're inomro mono, ãma 're ihâimana za'ra mono zéb zarina, ta hã sena na 're ihâimana mono na.
Zezusi hã isazé, Simau farizeu na iwamri nhorõwa ãma
36Tawamhã aibâ farizeu hã ma tô Zezusihi zô hâ, isiré sa da. Tahawa Zezusi hã ma tô isõrõwa u mo. Tame ma tô nhamra, sa da. 37Tame 'ri wa'õtõ 'remhã, te 're sãmra, pi'õ wasété na 're imorĩ na, da te dasiwi 're i'madâ'â mono hã. Ta hã ma tô Zezusihi wasu'u wapa, farizeu nhorõwa ãma ĩsa na hã. Tahawa simhi ẽtẽ 'manharĩ hã ma tô ti'â, wedewa'u zadazei ré hã. 38Tawamhã Zezusihi babarã na ma tô za, ipara 'rata. Ma tô aiwa'õ. Tawamhã titõmo u na ma tô Zezusi hã para waihi. Taha pari ma tô tizéré na para u'õ. Datob'rata hârâ na dazawizém na, ma tô duré sawi, ipara ãma. Wedewa'u zadaze hã ma tô duré sa'wa, ipara nhisiwi. 39Tawamhã farizeu ãne hã te te 'madâ'â wamhã, ma tô sima tinha, ãne:
— Ã hã aibâ hã, tô sena 'Re ihâimana u'âsi mono zadawa 'mahârâ'wai 'wa'âhã, te aré waihu'u, ni'wa te te i'upi na hã, duré iwasété na 're imorĩ na hã.
40Tahawa Zezusi hã ma tô farizeu ma tinha, ãne:
— Simau, marĩ, te aima waihu'u da, wa ĩsima wẽ.
Tawamhã Simau hã ma sada'â, ãne:
— Rowahutu'wa, ma'ãpé ĩma waihu'u!
41Tahawa, Zezusi hã ma tô tãma rowasu'u, ãne:
— Aibâ norĩ hã te 're hâimana zahuré, ni'wai ma, rob'uiprazé isõwa're're te te isõmri zahuré õ hã apâ, rob'uiprazé iwa'rãmib zô te te dama 're i'anhomri mono ma. Ihâiba amo hã te te tãma sõmri õ di, 500 na rob'uiprazé isapotore ẽtẽ waipo prã prata 'manharĩ hã. Duré ihâiba amo hã 50 na. 42Tane nherẽ, te te tãma wa'âbâ waihu'u zahuré õ di. Tahawa te te ãma 'madâ'â zahuré õ di, isõwa're're te te tãma iwa'âbâ waihu'u zahuré õ zé hã. Tawamhã e ma hã te za asa sawi pese, tihâiba amo nhipai u.
43Tawamhã Simau hã ma ãma sada'â, ãne:
— Ĩma hã ãté, sa'ẽtẽ nherẽ, iwa'rãmimhã te te tãma isõmri da hã, te te ãma i'madâ'â õ.
Tawamhã Zezusi hã ma sada'â, ãne:
— Tane tô. I'uwaibaba ma iwaihu!
44Tawamhã Zezusi hã pi'õi u ma tô aipi'ra. Taha pari te Simahã ma tinha, ãne:
— Ma'ãpé 'madâ'â, ã hã pi'õ hã. Asõrõwa u we ĩzébré wamhã, â hã ĩma 'manhomri õ di, ãma ĩsipara upsõ da hã. Tanei õ di, ã hã pi'õ hã. Ti'upĩni na ma tô ĩpara waihi. Duré tizéré na ma tô ĩpara u'õ. 45Duré datob'rata hârâ na dasisawizém na ĩzawi õ di. Tanei õ di, ã hã pi'õ hã. Ta hã te te ĩzawi zazâri õ di, datob'rata hârâ na dasisawizém na, ĩpara wimhã. 46Azeitona 'rãi wa'ui wa hã, ĩ'rã nhisiwimhã sa'wari õ di. Tanei õ di, ã hã pi'õ hã. Wede wa'u zadaze na ma tô ĩpara zadaze. 47Tahawa tô sena wa za ãne aima waihu'u. Tinhimizawi za'ẽtẽ zé te te ihâi'rézém na, taha zarina iwasédé hã ahâ uptabi nherẽ, 'Re ihâimana u'âsi mono hã te te oto ãma 're a'madâ'â mono õ di za. Tazahã, ni'wa hã tiwasédé suru na te te 're i'ab'manharĩ mono zém na, da te ãma 're 'madâ'â mono õ wamhã, taha zarina te za suru pese na te te 're da'azawi, ta hã.
48Tawamhã Zezusi hã ma tô pi'õi ma oto tinha, ãne:
— Aiwasédé 're i'ab'manharĩ mono zé hã 'Re ihâimana u'âsi mono, te te oto ai'ãma 're a'madâ'â mono õ di za.
49Tawamhã meza na isiré saihuri da, isi'ubumro norĩ hã ma tô ãne tipẽ'ẽ na te te inharĩ za'ra na sãna'rata za'ra:
— E 'wa hã bâ, ã hã aibâ, dawasédé te te da'ãma 're i'ab'madâ'â mono õ da hã.
50Tawamhã Zezusi hã ma tô pi'õi ma tinha, ãne:
— 'Re ihâimana u'âsi mono asina i'umnhasizé hã ma asõ'reptu. Mo oto rowẽ sina aimorĩ.
सध्या निवडलेले:
Lucas 7: xavBP
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2011, Wycliffe Bible Translators, Inc.
