Lucas 6
6
Zezusi hã, sabadu nhipai u simiroti pire uptabi di
Mateus 12.1-8; Marcus 2.23-28
1Zezusi hã nimahã bâtâ na sabadu na ma tô ro'razâ, buru na amnho trigu 're wa'waibaba. Tawamhã isiré 're inomro mono norĩ hã ma tô te te sima sinarĩ za'ra. Taha pari ma tô duré te te sima hâiwazu za'ra, te te huri mono da. 2Tawamhã nima norĩ farizeu norĩ hã ma tô sadanharĩ za'ra, ãne:
— E marĩ da, te i'manharĩ za'ra wa'wa, sabadu na wa te 're 'manharĩ za'ra mono da, wama i'ru zahi õ hã.
3Tawamhã Zezusi hã ma ãma sada'âbâ za'ra:
— Apito Davihi wasu'u te te i'manharĩzé, tisiré norĩ me mra te te simroi wamhã, e sõré za'ra wa'aba ã bâ. 4Ta hã ma tô ãzé, 'Re ihâimana u'âsi mono nhorõwa u hã. I'u'ẽtẽ wapu hã ma tô 'mai'rẽ, sasedoti norĩ si te te 're huri mono da, tãma i'ru zahi za'ra hã. Taha pari ma tô duré tisiré norĩ ma a za'ra.
5Tawamhã Zezusi hã ma tô duré tãma nharĩ za'ra, ãne:
— Ti'ai ãma Dasiré Ipodo hã simiroti pire uptabi di, sabadu na roti zahi ihâimana nhipai u hã.
Zezusi hã aibâ isib'rata tede, sabadu na te te ipesezé
Mateus 12.9-14; Marcus 3.1-6
6Tawamhã nima hã sabadu na, Zezusi hã ma tô duré ãzé, Zudeu norĩ te, rowahutuzéb u. Tame ma tô duré rowahutu na dama sãna'rata. Tamemhã te aibâ hã dame nhamra, isib'rata nhimire niwĩ, isib'rata tede hã. 7Tawamhã nima norĩ 'Re ihâimana u'âsi mono nhimiroti zahi na rob'ui'éré na dama rowahutu'wa norĩ hã duré farizeu norĩ me, ma tô Zezusi hã siwi pibui pese, simiza'rese. Te sada tihâimana za'ra, sabadu na te te da'maipese zô. Te tinhopré, roti zahi hã te te 'madâ'â õ wamhã, iwasédé te te ãma hiri za'ra da. 8Tane nherẽ, Zezusi hã isimirosa'rata za'ra hã te te waihu'u pese wa, ma tô tinha, aibâ isib'rata tete ma, ãne:
— Aiwahutu! We aimorĩ ãwa, dawa'wa u.
Tawamhã aibâ hã ma tô wahudu. Hâiwi ma za. 9Tawamhã Zezusi hã ma tô tãma nharĩ za'ra, ãne:
— Wa za asadanharĩ za'ra wa'wa, ãne: E niha te wate roti zahi ti'ru, sabadu na wa te 're i'manharĩ za'ra mono da hã. E iwẽ na, e niwamhã iwasété na. E wa za wa te 're danho'reptu za'ra. E wa za duré wa te 're da'uprosi.
10Tawamhã Zezusi hã ma tô uburé da'ab'madâ, imana wawi idasi'ubumro hã. Taha pari te ãne aibâ ma tinha:
— Ma'ãpé, asib'rada hã wẽ na.
Tawamhã aibâ hã ma tô wẽ, tinhib'rada hã. Ma tô oto tipese. 11Tawamhã 'Re ihâimana u'âsi mono nhimiroti zahi na rob'ui'éré na dama rowahutu'wa norĩ hã duré farizeu norĩ zama ma tô tizahi pese za'ra. Tahawa ma tô ãma sima rosa'rata za'ra, marĩ te te siwi 'manharĩ da, Zezusihi ãma hã.
Zezusi hã aibâ norĩ 12 na te te ipisutu za'ra zé, tizadawa wasu'u'wa da
Mateus 10.1-4; Marcus 3.13-19
12Tawamhã nimahã bâtâ na ronomro prãi wi, ma tô Zezusi hã sai'u ẽtẽ 'rãihâ u, te te rowaptẽrẽ da. Tawamhã mara bâre ma tô rowaptẽ, 'Re ihâimana u'âsi mono wi. 13Awẽ wamhã, da'ahâ na isiré 're idanomro mono norĩ zô, ma tô sô tihârâ za'ra. Tawamhã ma tô oto pisutu za'ra 12 na aibâ norĩ hã, dawazari ihâimana za'ra hã. Ta norĩ hã ma tô duré oto sisi za'ra, tizadawa wasu'u'wa na. 14Simau, ta hã ma tô sisi, Pedru na. Duré isisãnawã Ãdré. Duré Tiagu, Zuwãhã me tisisãnawã zahuré. Filipi duré Bartolomeu. 15Mateus, duré Tome. Duré Tiagu, Afeuhu 'ra. Duré Simau, zeloti norĩ niwĩ 're ihâimana mono. 16Duré Zudasi, Tiaguhu 'ra. Duré Zudasi Iscarioti, Zezusihi hâiba nhomri'wa da hã.
Zezusi hã te te dama irowahutuzé, duré te te ida'apesezé
Mateus 4.23-25
17Tawamhã Zezusi hã ma tô oto iré si'ra za'ra, sa'a hawi. Romharé ãma ma tô mazahâri za'ra. Tamemhã te isazei'wa norĩ hã ahâ uptabi na tihâimana za'ra, Zudéa na danhipti'a nho'õmo nhisi hawimhã, duré Zeruzalẽ hawimhã, duré 'ri nho'u Tiru hawimhã, duré Sidõ hawib zama, â zaihâ na 'ri nho'õmo hawimhã. 18Ta norĩ hã, Zezusihi nhimirowasu'u te te wapari za'ra da, duré ihâzé ãma 're ihâimana za'ra mono hã te te tãma apari da, ma tô itẽme aihutu. Duré wa'uburé te te 're wasutu za'ra mono wa, te te 're irobzépata za'ra mono norĩ zama ma tô dame aihutu. Ta norĩ ma zama ma tô wa'uburé hã anhamra. 19Uburé te sô tasi'wapé za'ra ni, da te i'upi za'ra da hã, iwaihu'u pe hã ihawi 're pusi mono wa, te te ãma 're ida'apese mono da hã.
Robze na 're idasi'ubumroi mono zé, duré robzei ãna
Mateus 5.1-12
20Tawamhã Zezusi hã ma tô isiré 're inomro mono norĩ hã 'madâ'â za'ra. Ãne te tãma nharĩ za'ra:
— Asibrob ãna 're i'aihâimana za'ra wa'aba mono norĩ, aima 're rowẽ uptabi za'ra wa'aba mono di. E marĩ wa. 'Re ihâimana u'âsi mono da'ãma 're isib'a'uwẽ mono zé hã ate za'ra wa'aba wa.
21— Ãhã na mram na 're i'aihâimana za'ra wa'aba mono norĩ, aima 're rowẽ uptabi za'ra wa'aba mono di E marĩ wa. Asa hã za 're 'mahâpãrĩ za'ra wa'aba mono wa.
— Ãhã na 're i'ai'ru'ru wa'aba mono norĩ, aima 're rowẽ uptabi za'ra wa'aba mono di. E marĩ wa. Rowẽ te, za 're aihâ za'ra wa'aba mono wa.
22— A norĩ wa'wa hã aima 're rowẽ uptabi za'ra wa'aba mono di, da te 're ai'ruiwapari za'ra wa'aba mono wamhã, duré dasisiti da te 're asa'ré za'ra wa'aba mono wamhã, duré da te ai'ãma 're wasété za'ra wa'aba mono wamhã, duré sena newa da te 're asisi wasété za'ra wa'aba mono wamhã, Ti'ai ãma Dasiré Ipoto zazei'wa 're anomro aba mono wa. 23Ãne hã aima 're romhâimana za'ra wa'aba mono wamhã, ma'ãpé asima 're rowẽ za'ra wa'aba mono. E marĩ wa. Aipawa'â sa'ẽtẽ na asô hâimana za'ra wa'aba wa, hâiwa ãma hã. Ãne dama rob'manharĩ wasété 'wa norĩ hi'rata norĩ hã, tô ãne ma tô te te 're rob'manharĩ za'ra, 'Re ihâimana u'âsi mono zadawa 'mahârâ'wa norĩ ma hã duréihã.
24— Tanei õ di, ãhã na asibro pese na 're i'aihâimana za'ra wa'aba mono hã. Aima 're ropipa uptabi za'ra wa'aba mono di za. E marĩ wa. Aiprédu ma 're i'aihâimana za'ra wa'aba mono zé hã, aima 're hâimana pari za'ra wa'aba mono wa.
25— Aima 're ropipa uptabi za'ra wa'aba mono di za, uburé marĩ ãhã na aima 're ihâimana za'ra wa'aba mono hã. E marĩ wa. Mra hã za oto 're sépata za'ra wa'aba mono wa.
— Ãhã na rowẽ te, 're i'aihâ za'ra wa'aba mono norĩ, aima 're ropipa uptabi za'ra wa'aba mono di za. E marĩ wa. Robzei õ pese na 're aihâimana za'ra wa'aba mono wa, za oto 're ai'ru'ru aba mono wa.
26— Aima 're ropipa uptabi za'ra wa'aba mono di za, uburé ai'ãma 're dawata za'ra wa'aba mono wamhã. E marĩ wa. Ta norĩ hi'rada hã te duré ãma 're wata za'ra, senai'õ na 'Re ihâimana u'âsi mono zadawa 'mahârâ'wa norĩ ãma hã.
Da'ruiwapari norĩ, da te 're isawi za'ra mono zém na, Zezusihi nhimiroti
Mateus 5.38-48
27— Tane nherẽ, wa za ãne aima roti za'ra wa'wa, asiwi ĩwapari aba norĩ hã: Ma'ãpé asitob'ru norĩ hã 're sawi pese za'ra wa'aba mono. Duré ai'ruiwapari'wa norĩ ma, marĩ iwẽ si 're 'manharĩ za'ra wa'aba mono. 28Marĩ iwẽ hã tãma 're pisutu za'ra wa'aba mono, marĩ iwasédé te te aima 're ipisutu za'ra wa'aba mono norĩ ma hã. Duré ãma 're rowaptẽrẽ za'ra wa'aba mono, te te aima 're irob'manharĩ wasété za'ra wa'aba mono norĩ ãma hã. 29Ni'wa hã ai'ubu wi te te ai'azâri wamhã, tãma aipi'ra na, ihâiba amoi niwĩ te te duré ai'azâri da. Duré ni'wa ai'uza ihâpa asi'ubuzé hã te te aiwi âri wamhã, tiwi sawi tõ. Te te duré âri, ai'uza ihâpa i'rowibzéb zama. 30Siwa'ru marĩ hã da te aiwi 're waptẽrẽ za'ra wa'aba mono wamhã, tô dama 're sõmri za'ra wa'aba mono. Duré marĩ ate nherẽ, da te aiwi âri wamhã, apâ hã dawi waptẽrẽ tõ. 31Marĩ hã da te aima 're 'manharĩ wẽ za'ra wa'aba mono da, asima 're iwẽ za'ra wa'aba mono zéb zarina, te za tô taha zarina dama 're i'manharĩ wẽ za'ra wa'aba mo.
32— Te te 're i'asawi pese za'ra wa'aba mono norĩ si, 're sawi pese za'ra wa'aba mono wamhã, e iwa'rãmi ai'ãma 're dawata za'ra wa'aba mono da bâ. Wasété na 're inomro mono norĩ zama, te duré tizawi'wa norĩ si te te 're sawi za'ra. 33Duré marĩ iwẽ te te aima 're i'manharĩ za'ra wa'aba mono norĩ ma si, marĩ iwẽ, 're 'manharĩ za'ra wa'aba mono wamhã, ãne wamhã, e iwa'rãmi ai'ãma 're dawata za'ra wa'aba mono da bâ. Wasété na 're inomro mono norĩ zama te ãne hã te te 're 'manharĩ za'ra. 34Duré, iwa'rãmib zô rob'uiprazé, za iwa'rãmimhã te te aima 're isõmri za'ra wa'aba mono na, ãma 're irosa'rata za'ra wa'aba mono norĩ ma si, 're sõmri za'ra wa'aba mono wamhã, ãne wamhã, e iwa'rãmi ai'ãma 're dawata za'ra wa'aba mono da bâ. Wasété na 're inomro mono norĩ zama te marĩ hã wasété na 're inomro mono norĩ ma, te te 're sõmri za'ra, iwa'rãmib zô, sô 're simipari za'ra mono da. 35Tane nherẽ, a norĩ wa'wa hã, ma'ãpé dawa'rãmi 're 'manharĩ za'ra wa'aba mono. Asitob'ru norĩ hã 're sawi pese za'ra wa'aba mono. Marĩ iwẽ hã tãma 're 'manharĩ za'ra wa'aba mono. Duré rob'uiprazé tãma 're sõmri za'ra wa'aba mono, iwa'rãmib zô 're asimipari za'ra wa'aba mono ãna. Tawamhã aipawa'â za iwaibui wa'wa hã, sa'ẽtẽ uptabi di za. Uburé Danhipai u 're Ihâimana mono 'ra na te za duré 're aihâimana za'ra wa'aba mo. E marĩ wa. Ta hã simizawi pese uptabi wa, da'ãma 're isina waihu'u mono õ norĩ ma hã, duré wasété na 're ihâimana za'ra mono norĩ ma zama. 36Da'ãma 're aiwamri za'ra wa'aba mono, Aimama 'wa hã ai'ãma 're isiwamri za'ra wa'aba mono ne.
37— Dawasédé hã da'ãma 're sa'ra wa'aba mono tõ. Tawamhã 'Re ihâimana u'âsi mono hã aiwasédé te te ai'ãma 're sa'ra wa'aba mono õ di za. Duré 're dapisutu za'ra wa'aba mono tõ, da te 're i'upa za'ra mono na. Tawamhã 'Re ihâimana u'âsi mono, ãne hã te te duré 're aipisutu za'ra wa'aba mono õ di za. Duré dawasédé hã da'ãma 're 'madâ'â za'ra wa'aba mono tõ. Tawamhã 'Re ihâimana u'âsi mono hã aiwasédé te te ai'ãma 're 'madâ'â za'ra wa'aba mono õ di za. 38Marĩ hã dama 're sõmri za'ra wa'aba mono. Tawamhã 'Re ihâimana u'âsi mono hã te za marĩ te te aima 're anhomri 'wa. Sõprub uptabi na te za aima 're hâimana za'ra wa'wa. Duré marĩ iwẽ te te aima 're i'apisutu aba mono hã ahâ uptabi di za. Tawamhã asib'ratamhã 're 'wasari waihu'u aba mono õ di za. Aihâimana wẽ na duré asõprum na dama 're i'aihâimana za'ra wa'aba mono zéb zarina, te za taha zarina aima 're hâimana za'ra wa'wa, 'Re ihâimana u'âsi mono hã.
39Tawamhã Zezusi hã ma tô duré ãne tãma romnhimiré'é za'ra:
— E itob'a hã, tisiré itob'a hã te te saprõni waihu'u pese bâ. Te te saprõni wamhã, e za ab're 're, waptã'ã zahuré ã bâ. 40Romnhoré'wa hã pire na hâimana waihu'u õ di, ite tãma iromnhoré'wa nhipai u hã. Tane nherẽ, romnhoré te te 'rãsutu wamhã, romnhoré'wa hã te za oto tihâiba, tãma iromnhoré'wa ne.
41— E marĩ da, te wede zapru hã asisãnawã tõmo 're ihâimana hã tiwi 're i'madâ'â mo. E 'madâ'â ã bâ, wede wa'õno atõmo 're ihâimana hã. 42E niha te za tane nherẽ inha, asisãnawãi ma, ãne: “Atõmo 'remhã wede zapru te aima wazere da”, wede wa'õno atõmo 're inomro hã asima 'madâ'â waihu'u õ nherẽ. Aihâimana si'amoi pese na 're i'aihâimana mono! Ma'ãpé wazere imorĩ'rata na, wede wa'õno atõmo 'remhã. Taha parip si te za i'madâ'â wẽ, wede zapru hã asisãnawã tõmo hawi iwazere da hã.
43— Rowede hã wede wẽ wamhã, 'rãi wasété na 'rãi waihu'u õ di. Tane duré rowede wede wasété wamhã, 'rãi wẽ na hã 'rãi waihu'u õ di. 44Uburé rowede norĩ hã te za i'rã na da te 're waihu'u za'ra. Ni'wa hã wab'ru na, rob'rã figu te te tari waihu'u õ di. Tane duré uva hã ni'wa te te tari waihu'u õ di, 'wabzéré na hã. 45Ni'wa hâimana wẽ wamhã, marĩ iwẽ te za te te 're azani tipẽ'ẽ hawi, marĩ iwẽ si te te 're i'a'ubumroi mono zém hawi. Tane duré ni'wa wasété na hâimana wamhã, marĩ iwasédé te za te te 're azani tipẽ'ẽ hawi, marĩ iwasété si te te 're i'a'ubumroi mono zém hawi. E marĩ wa. Dapẽ'ẽ 're, 'masisi na dama 're ihâimana za'ra mono zéb zarina si, 're damreme zusi mono wa.
Maparane 'ri na'rata nhana'rata wasu'u
Mateus 7.24-27
46— E marĩ da, te ãne asiwi 're ĩ'mahârâ aba mo: “Wanhib'apito, Wanhib'apito”. E ĩnhimiroti hã 're 'manharĩ za'ra wa'aba mono bâ. 47Wa za aima hâi'ré za'ra wa'wa, ãma isimiré'é na, ni'wa we ĩtẽme imorĩ hã ĩnhimiroti te te iwapari hã, duré te te 're i'ab'madâ'â pese mono hã. 48Ta hã, aiwa aibâ te te 'ri wa, te te sada i'ab're hâ ne, duré 'ri na'rata nhana'rata da, ẽtẽ wa, te te i'ab're ne. Tawamhã â pré wamhã, â hã ma tô nasi ahâ, 'ri hã. Tane nherẽ, te te 'morõwĩrĩ õ di 'ri hã, 'manharĩ wẽ wa. 49Tanei õ di, ni'wa ĩnhimiroti tipo're na te te wapari nherẽ, te te 're a'madâ'â pese mono õ wamhã. Ta hã aiwa aibâ, ti'ai wa te te i'ri ne, 'ri na'rata nhana'rada hã te te sada 'manharĩ ãna. Tawamhã â, 'ri te te azâri wamhã, ma tô apâre waptãrã. Tawamhã uburé ma tô 'ri hã aipru pese.
सध्या निवडलेले:
Lucas 6: xavBP
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2011, Wycliffe Bible Translators, Inc.
