Lucas 8
8
Zezusihi siré, pi'õ norĩ hã 're inomro mono zé
1Tawamhã ãma ronomro parimhã, Zezusi hã ma tô datẽme 're mo, 'ri nho'õmo mono na duré 'ri wa'õtõ mono na. Rowasu'uwẽ na ma tô te te dama 're rob'mahârâ, 'Re ihâimana u'âsi mono da'ãma 're isib'a'uwẽ mono zém na hã. Isiré 're inomro mono 12 na ihâiba za'ra norĩ hã ma tô isiré 're nomro. 2Duré nima norĩ pi'õ norĩ zama ma tô isiré 're nomro, wa'uburé te te tãma isãmra za'ra hã duré hâzé ré 're hâimana za'ra mono nherẽ, te te ipese za'ra norĩ zama. Ta norĩ hã Maria, da te 're isisi mono Madalena na, wa'uburé 7 na te te tãma isãmra, 3duré, Zuãna, Cuzaha mro, apito Erodihi nhorõwa 'madâ'â'wai mro, duré Suzana, duré aimawi pi'õ norĩ zama. Ta norĩ hã tinhimarĩ na ma tô Zezusi norĩ hã te te 're pawaptob za'ra.
Rob're'wai wasu'u
Mateus 13.1-23; Marcus 4.1-20
4Tawamhã Zezusihi u, da'ahâ uptabi na ma tô itẽme ubumro ni, 'ri wa'õno 're isimasa mono hawimhã. Itẽme dasi'rã'õtõ wamhã, ma tô romnhimiré'é na dama rowasu'u, ãne:
5— Rob're'wa hã ma tô mo, te te rob're da. Tawamhã romnhamare te te anhamra mono wamhã, nima norĩ hã ma tô rere'e, bâdâdi zababa. Ta norĩ hã dapara na ma tô nasi wati'i za'ra ni. Duré si norĩ hã ma tô te te huri. 6Nima norĩ hã ẽtẽ nhisiwi, ma duré rere'e, ti'ai baihâire wa. Ta norĩ hã 'wanhipré mono wamhã, ma tô ti'wanhipré 'ré za'ra, ti'a hã satébré õ wa, wa'ro wa. 7Nima norĩ hã ma duré rere'e, wab'ru wa'wa. Ta norĩ hã siré prédub za'ra wamhã, ma tô te te wapre za'ra, rob're hã. 8Tane nherẽ, nima norĩ hã ti'ai wẽ wa, ma tô rere'e. Ta norĩ hã 'wanhipré za'ra wamhã, ma tô tiprédu wẽ za'ra. 'Rã za'ra wamhã, ma tô ti'rã za'ra, 100 na i'rã na.
Tawamhã Zezusi hã ãne na te te dama rowasu'u parimhã, ma tô dama tinha, ãne:
— Asimiparizé aima hâimana za'ra wa'aba wamhã, ma'ãpé wapari za'ra wa'aba!
9Tawamhã isiré 're inomro mono norĩ hã ma tô siwi sadanha, marĩ na te te rowasu'u zô, rowasu'u na romnhimiré'é na hã.
10Tahawa Zezusi hã ma tô tãma waihu'u za'ra, ãne:
— Aima za'ra wa'aba hã 'Re ihâimana u'âsi mono ma tô rowaihu aima sõmri za'ra wa'wa, iwaihu'u'õ da'ãma 're isib'a'uwẽ mono zé hã 're waihu'u za'ra wa'aba mono da. Tanei õ di, ai'upana za'ra wa'aba hã. Rowasu'u na romnhimiré'é na si te te dama 're arowahutu, datõmo na da te 're 'madâ'â za'ra mono nherẽ, da te 're 'madâ'â waihu'u za'ra mono tõ da, duré dapo're na da te 're wapari za'ra mono nherẽ, da te 're sadaihu'u za'ra mono tõ da.
11— Ã hã rowasu'u na romnhimiré hã te wasu'u, ãne: Romnhamare hã, 'Re ihâimana u'âsi mono mreme, te wasu'u. 12Romnhamare bâdâdi zababa irere'e mono hã, ni'wam norĩ 'Re ihâimana u'âsi mono nhimiroti te te 're iwapari za'ra mono, te wasu'u. Tane nherẽ, Wa'uburé hã sô wisi za'ra wamhã, te za tiwi sani za'ra, ipẽ'ẽ hawi, te te 're saze za'ra mono tõ da, duré tinho'reptuzé hã te te sina 're uwaimrami za'ra mono tõ da. 13Romnhamare ẽtẽ nhisiwi ti'ai baihâire wa, irere'e mono hã ni'wam norĩ 'Re ihâimana u'âsi mono nhimiroti te te 're iwapari za'ra mono, to sina te te sima 're iwaibui mono, te wasu'u. Tane nherẽ, sari õ wa, te te 're sazei hutu za'ra mono di za. Ipibuzé tãma 're hâimana za'ra mono wamhã, te za te te 're sazei utõrĩ za'ra. 14Duré romnhamare wab'ru wazari irere'e mono hã, ni'wam norĩ 'Re ihâimana u'âsi mono nhimiroti te te 're iwapari za'ra mono. Tane nherẽ, marĩ na 're ihâtâ'â za'ra mono zé hã, duré tinhimarĩ zô te te 're irob'ruiwapari za'ra mono zé hã, duré ti'ai ãma marĩ te te sima 're iwẽ za'ra mono zéb zô si, sima 're isõpré mono zé hã te za te te 're sõ'reti za'ra. Tahawa 're i'rã za'ra mono zé hã, niwa ipré za'ra da hã, mare di. 15Tanei õ di, romnhamare ti'ai wẽ wa irere'e mono hã: Ta norĩ hã, ni'wam norĩ 'Re ihâimana u'âsi mono nhimiroti te te 're wapari za'ra mono wamhã, tipẽ'ẽ wẽ 're, te te sima 're itété za'ra mono, te wasu'u, duré te te 're i'madâ'â pese za'ra mono. Tahawa tô sena na ãma 're hâimana za'ra mono wa, te 're 'rãi wẽ za'ra.
Rob'uiwẽzé
Marcus 4.21-25
16Tawamhã Zezusi hã ma duré ãma uzusi, ãne:
— Ni'wa hã rob'uiwẽzé te te ro'o parimhã, te te sãrĩ waihu'u õ di, piza zé'a 'manharĩ 'rowimhã, niwamhã duré waptâ 'rowimhã. Tazahã, sõ'awi isabzéb ãma si, te za da te 're sõré, 'ripara u 're idanhisisi mono hã rowa'a, da te 're 'madâ'â za'ra mono da. 17E marĩ wa. Uburé marĩ simi'uri na 're ihâimana za'ra mono hã te za upsibi me za'ra ni. Duré uburé marĩ pi'uriwi 're ihâimana za'ra mono hã sõ'awi te za oto 're hâimana za'ra.
18— Tahawa, ma'ãpé ãma 're pibui pese za'ra wa'aba mono, ĩmreme 're iwapari za'ra wa'aba mono zém na hã. E marĩ wa. Ni'wa te, marĩ iré wamhã, te za duré ãma tãma sisiwi ni. Oto ni'wa te, marĩ baba wamhã, tãma ihâimana na te te sina rosa'rata nherẽ, te za tô tiwi wazere ni, ta hã.
Zezusihi na, duré ino norĩ
Mateus 12.46-50; Marcus 3.31-35
19Tawamhã Zezusihi u ma tô ina duré isisãnawã norĩ zama ai'aba'ré. Tane nherẽ, da'ahâ uptabi wamhã, itẽme te te sina rotété waihu'u za'ra õ di. 20Tawamhã Zezusihi ma, ma tô ni'wa hã rowasu'u, ãne:
— Ana duré ano norĩ hã te rowi aimasa. Te sima wẽ za'ra, te te siwi ai'madâ'â da.
21Tawamhã Zezusi hã ma sada'â, ãne:
— Ĩna hã duré ĩsisãnawã norĩ hã, ni'wam norĩ 'Re ihâimana u'âsi mono nhimiroti tipo're na te te 're iwapari za'ra mono, duré taha zarina ãma 're ihâimana za'ra mono.
Zezusi hã rowa'u'u za'ẽne te te iwa'u'utuzé
Mateus 8.23-27; Marcus 4.35-41
22Nimahã bâtâ na, Zezusi norĩ hã ma tô uba're wa asisi, isiré 're inomro mono norĩ me. Ãne ma tô Zezusi hã tãma nharĩ za'ra:
— Oto isõ'u zara u, wa te saprĩ za'ra na.
Tahawa â zara u ma tô oto wairé. 23Tawamhã sisa'rei mono ré, ma tô Zezusi hã nhono. Taha ré, ma tô rowa'u'u za'ẽne hã rowapõ. Â sisasisi za'ẽtẽ wa, ma tô uba're wa ti'â 'masisi. Tahawa romnhimimnhasi di, iré sébré za'ra õ'umnhasite. 24Tahawa, Zezusihi siré 're inomro mono norĩ hã ma tô itẽme sina rotété za'ra. Ma tô siwi utu. Ãne te siwi 'mahâ:
— Rowahutu'wa, Rowahutu'wa, wa za ai'utõrĩ ni!
Tawamhã Zezusi hã ma tô wahudu. Taha pari, mreme tete na ma tô tinha, rowa'u'u ma, duré â sisasisi ma zama. Tahawa ma tô oto uburé tiromreme'õ. Ma tô duré tirobrési'õ. 25Taha pari, Zezusi hã ma tô isiré 're inomro mono norĩ ma tinha, ãne:
— E mahãta 'Re ihâimana u'âsi mono asina 're i'umnhasi za'ra wa'aba mono zé hã.
Tane nherẽ, ãma tob'uzu za'ra wa, duré pahi za'ra wab zama, ma tô ãne sima nharĩ za'ra:
— E 'wa hã ã hã aibâ. Rowa'u'u ma, duré â sisasisi ma zama te te rob'rui wamhã, ma tô wapari zahuré.
Zezusi hã, aibâ hawi wa'uburé ma, te te irob'ruzé
Mateus 8.28-34; Marcus 5.1-20
26Tawamhã Zezusi hã duré isiré 're inomro mono norĩ zama ma tô sisa're uba're na, Zeraza na ti'a nhisi u, Galiléia na isõ'u nhisi nho're u. 27Tamomo sihutu wamhã, Zezusi hã uba're hawi te te si'rai wi, ma tô aibâ hã wa'uburé ré 're imorĩ hã sina uzusi, tame 'ri wa'õtõ hawimhã. Ta hã aibâ hã duréi 're si'uza mono õ di oto. Duré 'ri 'remhã 're sãmra mono õ di. Adâ'â 'ru ãma si, te 're sãmra. 28Tawamhã aibâ hã, Zezusi te te 'madâ'â wamhã, ma tô 'mahâ, hârâ 'rãihâ na. Ti'ai u ma tô waptãrã isõ're. Ãne te tãma tinha, mreme 'rãihâ na:
— Zezusi, 'Re ihâimana u'âsi mono, danhipai u 're Isãmra mono 'ra, e marĩ te ĩ'ãma hã asima iwẽ. Wa za aiwi waptẽ. Ma'ãpé ĩ'azâri tõ.
29Ãne hã ma tô aibâ tãma tinha, Zezusi hã wa'uburé ma, te te rob'rui wa, ihawi watobro da. Wa'uburé hã bâtâ ahâ na ma tô te te 're wabzuri. Tahawa isi'uwazi nhorõ rutu na ma tô aré da te dasiwi 're pawasisi, duré ipara zama. Tane nherẽ, ma tô te te sina 're anhinarĩ. Duré wa'uburé hã ma tô aibâ te te 're saprõni, a'ubuni u.
30Tawamhã Zezusi hã ma tô sadanha, ãne:
— E niha asisi hã.
— Ahâ na, ĩnhisi hã. — Ãne ma tô aibâ hã tãma sisisi, wa'uburé hã ahâ na iwa sisisi wa.
31Tawamhã wa'uburé norĩ hã sadahutu ãna, ma tô Zezusihi wi rowaptẽrẽ za'ra, te te satõrĩ za'ra tõ da, ab're u hã.
32Tamemhã 'râwi te uhâbâ zari hã tisa te te 're huri. Tahawa wa'uburé norĩ hã sadahutu ãna ma tô Zezusihi wi waptẽrẽ za'ra, te te tãma rob'ru za'ra da, uhâbâi wa sisisi da. Tahawa Zezusi hã ma tô tãma waprosi za'ra. 33Tawamhã wa'uburé norĩ hã ma tô wairé, aibâ hawi. Uhâbâi wa, ma tô asisi. Tahawa uhâbâ hã sa'a hawi ma tô sa'ẽtẽ sisa're, i'rãsipra u. Âi ba ma tô rere. Tame ma tô ai'utõ, â 'rowi.
34Tawamhã aibâ norĩ, uhâbâ te te i'madâ'â za'ra hã, iromhâimanazé te te 'madâ'â za'ra wamhã, ma tô sisa're. Ta norĩ hã ma tô rowasu'u na ropé za'ra 'ri nho'õmo 'remhã, duré isababa daro 're isimasa mono na zama. 35Tahawa da'ahâ na ma tô tawairébé ni, iromhâimanazé hã da te 'madâ'â za'ra da. 'Râwi Zezusihi u da te dasina rotété za'ra wamhã, aibâ hã ma tô dasiwi 'madâ'â ni, wa'uburé ihawi iwairébé hã. Tawamhã ma tô tãma tapahi za'ra ni, Zezusi papara sãmra wa, uza ré duré tãma rowẽ na oto. 36Tawamhã te te i'madâ'â za'ra norĩ hã ma tô dama rowasu'u za'ra, aibâ wa'uburé ré 're imorĩ hã ipesezém na hã. 37Tawamhã Zeraza ti'ai 'remhã uburé ma tô tapahi pese za'ra ni. Tahawa, Zezusi wi ma tô waptẽrẽ za'ra, isipti'a za'ra hawi morĩ da. Tahawa Zezusi hã uba're wa, ma tô ãzé. Dahawi ma tô oto mo. 38Tawamhã aibâ, wa'uburé ihawi iwairébé hã sadahutu ãna ma tô Zezusihi wi waptẽ, isiré morĩ da.
Tane nherẽ, Zezusi hã ma tô tãma tinha, apâ morĩ da, ãne:
39— Mo oto aimorĩ apâ asõrõwa u, 'Re ihâimana u'âsi mono te te aima i'manharĩzé hã dama wasu'u mono da.
Tahawa aibâ hã ma tô mo, 'ri nho'õmo u. Tame ma tô te te dama rowasu'u, Zezusi te te tãma i'manharĩzém na hã.
Zezusi hã, pi'õ te te ipesezé, duré Zairuhu 'ra
Mateus 9.18-26; Marcus 5.21-43
40Tawamhã Zezusi hã isõ'u zara u apâ te te saprĩ wamhã, da'ahâ uptabi hã ma tô dato sina dasiwi âri ni, sô danhimipari siromo za'ra wa. 41Tame ma tô aibâ hã itẽme wi, Zairu na isisi hã. Ta hã Zudeu norĩ te, rowahutuzé 'madâ'â'wa. Itẽme wisi wamhã, ipapara ma tô aime. Zezusihi wi, ma tô sadahutu ãna waptẽ, isõrõwa u morĩ da, 42i'ra sipi'õ pisi, 12 na ãma iwahu, idâ'âzéb u oto hâimana wa.
Tawamhã Zezusi hã isiré morĩ wamhã, da'ahâ uptabi wa, ma tô dasiwi hõti pese ni. 43Tamemhã da'ahâ uptabi wazarimhã, pi'õ hã te dame tihâiba, 12 na ãma iwahu hã pi'õi hâzé ãma 're hâimana mono ré hã. Ta hã ma tô uburé tinhibro hã uprosi, dawede'wa norĩ na. Tane nherẽ, ni'wa hã te te pese waihu'u õ di. 44Tawamhã pi'õ hã Zezusihi babarãi hawi ma tô itẽme sina rotété. Ma tô upi, i'uza ihâpa hânhisudu hã. Tahawa awa'awi pesere ma tô ihâzé hã tãma mazazâ. 45Tahawa Zezusi hã ma tô anha, ãne:
— E 'wa hã ma ĩ'upi.
Tane nherẽ, te tãma amrami za'ra ni. Tawamhã Pedru hã ma tô tãma tinha, ãne:
— Rowahutu'wa, da'ahâ uptabi hã ma tô dasiwi ai'uirĩ ni. Ma duré dasiwi aihõti pese ni.
46Tane nherẽ, Zezusi hã ma tô ãne tãma tinha:
— Ni'wa hã ma ĩ'upi. Wa waihu'u, ĩhawi ĩwaihu'u pe iwatobro na.
47Tawamhã pi'õ hã pi'uriwi za ihâimana u'âsi õ na te te waihu'u wamhã, ma tô mo Zezusihi u. Ipapara ma tô aime, rẽrẽ'ẽ sina. Tahawa uburé danho'a ma tô siwasu'u Zezusihi ma, te te i'upizém na duré tô awa'awi ipesezém na hã. 48Tawamhã Zezusi hã ma tô tãma tinha, ãne:
— Ĩ'ra, asina ĩ'umnhasizé hã ma tô aipese! Mo oto rowẽ sina aimorĩ.
49Tawamhã Zezusi hã zahadu pi'õi ma, te te nharĩ ré, ma tô 'maiwi, Zairuhu u, tãma iromhuri'wa hã. Ãne ma tô tãma rowasu'u, Zairuhu ma:
— Ai'ra azarudu hã ma tô ai'utõ. Ma'ãpé, Rowahutu'wai wi hã ro'wa'rutu zahu tõ.
50Tawamhã Zezusi ãne hã te te wapari wamhã, ma tô Zairuhu ma tinha, ãne:
— Aipahi tõ. Ma'ãpé ĩ'umnhasi. Tawamhã rowẽ na te za aima 're sãmra.
51Tawamhã Zezusi hã Zairuhu nhorõwa u oto wisi wamhã, ma tô Pedru norĩ si pisutu za'ra, Zuwã duré Tiagu norĩ me isiré sisisi da, duré azarutu mama, ina zama. Ta norĩ nhipai u hã, ni'wa isiré isébré za'ra da hã te te rowairébé õ di.
52Tawamhã tame da'ahâ na idahâimana za'ra hã te azarutu zô ta'ru'ru ni, robzé te. Tahawa Zezusi hã ma tô dama tinha, ãne:
— Azarutu zô ai'ru'ru wa'aba tõ. Dâ'â õ di. Taré te nhono.
53Tawamhã ma tô ãma tato za'ra ni, da te waihu'u pese za'ra wa, isi'utõrĩ na hã. 54Tane nherẽ, Zezusi hã ma tô pa'â. Mreme 'rãihâ na ma tô tãma tinha, ãne:
— Azaruture, aiwahutu!
55Tawamhã ipẽ'ẽzani hã apâ ma tô iwab ãzé. Tahawa awa'awi pesere ma tô wahudu. Taha pari Zezusi hã ma tô ti'ru, ina norĩ te te tãma a zahuré da. 56Tawamhã imama norĩ hã ma tô ãma titob'uzu zahuré. Tane nherẽ, Zezusi hã ma tô tiwi sawi zahi zahuré, ni'wai ma, te te rowasu'u zahuré tõ da, iromhâimanazém na hã.
सध्या निवडलेले:
Lucas 8: xavBP
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2011, Wycliffe Bible Translators, Inc.
