Lucas 9

Zezusi hã, aibâ norĩ 12 na ihâiba za'ra te te datẽme isatõrĩ za'ra zé

Mateus 10.5-15; Marcus 6.6-13

1Tawamhã Zezusi hã isiré 're inomro mono 12 na ihâiba za'ra norĩ zô, ma tô sitẽme sô tihârâ za'ra. Tawamhã iwaihu'u pe hã ma tô tãma sõmri za'ra, duré isimiroti pire hã, wa'uburé ma, te te 're rob'ru za'ra mono da, duré dahâzé hã te te dama pari za'ra mono da, isadawa para. 2Taha pari, ma tô datẽme satõrĩ za'ra, 'Re ihâimana u'âsi mono da'ãma 're isib'a'uwẽ mono zé hã te te dama wasu'u za'ra mono da, duré ihâzé ré norĩ hã te te pese za'ra mono da. 3Ãne ma tô tãma roti za'ra:

— Ai'aba'réi wa'aba wamhã, ai'ubana ai'aba'réi wa'aba. Dasiwazusizé hã 'wasari aba tõ, duré romramizé, duré i'u'ẽtẽ wapu hã, duré rob'uiprazé, duré da'uza ihâpa aihâiba na iré i'ai'aba'réi wa'aba siré hã. 4Danhorõwa u da te i'aiwaibui wẽ wa'aba mono zéb ãma si, ai'ubumroi wa'aba mono, ta hawi i'aiwairébé aba mono zéb u. 5'Ri nho'õmo ãma da te aiwaibui wẽ wa'aba mono õ wamhã, ta hawi aiwairébé aba mono. Aiwairébé aba mono wamhã, ma'ãpé aipara zapru hã tata'a za'ra wa'aba mono, iwaihu'uzéb da, dawasété na 're idahâimana za'ra mono norĩ zada, taha 'ri wa'õtõ 'remhã.

6Tawamhã isiré 're inomro mono norĩ hã ma tô oto wairé. 'Ri wa'õtõ mono bâ ma tô oto datẽme ai'aba'ré. Rowasu'uwẽ hã ma tô te te dama wasu'u za'ra daro mono na. Ma tô duré ihâzé ré norĩ hã te te pese za'ra, ropâ.

Apito Erodi hã, Zezusihi ãma isiwawãzé

Mateus 14.1-12; Marcus 6.14-29

7Tawamhã apito Erodi, Galiléia ãma te te 're ida'ab'madâ'â mono hã ma tô rowasu'u hã wapa, uburé marĩ Zezusi te te 're i'ab'manharĩ mono zém na hã. Tahawa, ma tô tihâiba, niha hã te te rosa'rata waihu'u ãna, Zezusi hã Zuwã Batista apâ ihâiwa'utu na, da te dasima 're wasu'u za'ra mono wa. 8Ni'wam norĩ hã ma tô duré te te ãma 're romnomri za'ra, Elias apâ isihâi'ré õ'umnhasite. Duré ni'wam norĩ aimawi norĩ hã ma tô te te ãma 're romnomri za'ra, duréihã 'Re ihâimana u'âsi mono zadawa 'mahârâ'wa apâ 'maihâiwa'utu õ'umnhasite. 9Tane nherẽ, Erodi hã ma tô ãne tinha:

— Wa hã wa ti'ru, Zuwã da te 'rãnhizâri da hã. E 'wa hã merẽ, tawamhã ã hã aibâ, marĩ te te 're i'ab'manharĩ mono zém na te iwapari hã.

Zezusi hã, da'ahâ uptabi na te te ida'asaihurizé

Mateus 14.13-21; Marcus 6.30-44; Zuwã 6.1-14

10Tawamhã Zezusihi siré 're inomro mono norĩ te te datẽme isatõrĩ za'ra hã apâ itẽme sihutu wamhã, ma tô tãma rowasu'u pese za'ra, uburé marĩ te te i'manharĩ za'ra mono zém na hã. Taha pari, ma tô te te siré simro. Hâiba pisutu ma tô ai'aba'ré, Betisaida na 'ri nho'õmo nhisi u. 11Tane nherẽ, da'ahâ uptabi hã ma tô waihu'u za'ra ni. Tahawa ma tô isarina ai'aba'ré ni. Tawamhã Zezusi hã ma tô dawaibui wẽ. 'Re ihâimana u'âsi mono da'ãma 're isib'a'uwẽ mono zém na ma tô dama rowasu'u. Ma tô duré apese, ni'wam norĩ hã te te pese za'ra da, sina sô isimnhasi za'ra hã.

12Tawamhã hâiwahâ pesere wa oto, ma tô Zezusihi ma nharĩ za'ra, isiré 're inomro mono 12 na ihâiba za'ra hã, ãne:

— Rowahutu'wa, ma'ãpé oto dazatõrĩ za'ra na, dasi'aba'ré da, 'râwi 're idasi'ubumroi mono norĩ u, duré 'ri wa'õtõ norĩ u zama, dasa hã da te dasima uipra za'ra da, duré danhotõ zara da zama, a'ubuni wi wahâimana za'ra wa.

13Tane nherẽ, Zezusi hã ma tô ãne tãma nharĩ za'ra:

— Mare di. Ma'ãpé a norĩ wa'wa hã dasa dama aza'ra wa'aba.

Tawamhã isiré 're inomro mono norĩ hã ma tô ãne siwi sada'â:

— Imrotõ na si, te i'u'ẽtẽ wapu hã wama tihâimana za'rare, duré maparane sire, tepe norĩ hã. E te asima iwẽ, sô wasi'aba'ré da, dasa hã wa te dama uipra za'ra da, ã hã da'ahâ uptabi ma hã.

14Tamemhã aibâ norĩ si dame ihâimana za'ra hã 5 miu na ihâiba za'ra hã. Tawamhã Zezusi hã ma tô isiré 're inomro mono norĩ ma ti'ru, ãne:

— Ma'ãpé, dama nharĩ za'ra wa'aba, 50 na dahâiba na da'upsãtã mono bâ dasi'ubumroi mono da.

15Tawamhã isiré 're inomro mono norĩ hã ma tô sadawa zamarĩ za'ra. Ma tô dama rob'ru za'ra, da'upsãtã pese na dasi'ubumroi mono da. 16Tawamhã Zezusi hã ma tô i'u'ẽtẽ wapu hã waibu, duré tepe zama. Hâimo ma tô rob'madâ. 'Re ihâimana u'âsi mono ãma te tiwata. Taha pari ma tô i'u'ẽtẽ wapu hã te te wẽ'ẽ, duré tepe zama. Tawamhã isiré 're inomro mono norĩ ma, ma tô te te sõmri, te te dama sõmri za'ra mono da. 17Tawamhã uburé ma tô ãma tasaihuri ni. Ma tô duré da te 'mahâpãrĩ. Tawamhã isiré 're inomro mono norĩ hã, 12 na si'õno hã ma tô ubumro za'ra, iwẽ'ẽ isi'atarẽme ré hã.

Pedru hã, Zezusi te te iwaihu'uzé, Danho'reptui'wa na

Mateus 16.13-28; Marcus 8.27–9.1

18Nimahã bâtâ na hã, Zezusi hã te nhamra danhiti, te te rowaptẽrẽ da. Isiré 're inomro mono norĩ hã te isiré tihâimana za'ra. Tame ma tô sina sadanharĩ za'ra, ãne:

— E 'wa hã, wa hã 're ĩmorĩ na, te da te dasima 're ĩwasu'u za'ra.

19Tawamhã isiré 're inomro mono norĩ hã ma tô siwi sada'â, ãne:

— Ni'wam norĩ ma hã, a hã u, Zuwã Batista. Duré u, a hã Elias. Duré ni'wam norĩ ma hã, a hã u, duréihã nima hã 'Re ihâimana u'âsi mono zadawa 'mahârâ'wa, apâ i'aihâiwa'udu.

20Tawamhã Zezusi hã ma tô duré sina sadanharĩ za'ra, ãne:

— A norĩ wa'wa hã bété, e niha te asima 're ĩwasu'u za'ra wa'aba mo.

Tawamhã Pedru hã ma tô sada'â, ãne:

— A hã Cristu, 'Re ihâimana u'âsi mono we te te i'asatõrĩ, Danho'reptui'wa da.

21Tawamhã Zezusi hã ma tô sina sadawa uwati pese za'ra, te te dama wasu'u za'ra tõ da. 22Taha pari, ma tô tãma siwasu'u za'ra, ãne:

— Tô i'ru zahi, Ti'ai ãma Dasiré Ipodo hã te te irobzépata za'ẽtẽ da hã. Zudeu norĩ ma roti'wa norĩ hã te za siwi wẽ'õ, sasedoti dama ipire norĩ zama, duré 'Re ihâimana u'âsi mono nhimiroti zahi na rob'ui'éré na dama rowahutu'wa norĩ zama. Te za dasiwi wĩrĩ ni. Tane nherẽ, si'ubdatõ bâtâ ãma, te za apâ hâiwa'udu.

23Taha pari, ma tô uburé dama tinha, ãne:

— Ni'wa hã ĩzarina 're morĩ da, te te sima wẽ wamhã, po're si'âri te te sima 're iwẽ mono zéb zarina 're ihâimana mono zém na hã, bâtâ sidâpâ wedepo'o nhonhi'rãmi te te 're mrami mono, ĩzarina 're morĩ da. 24E marĩ wa. Ni'wa hã sisõ'reptu da wamhã, tihâimanazé hã te za simini. Tanei õ di, ni'wa hã ĩ'u'âbâ, tihâimanazé te te simini wamhã, ta hã te za sisõ'reptu. 25E marĩ da bâ, ni'wai ma uburé marĩ ti'ai 'remhã, te te sima 're awaibui mono nherẽ, sisimini wamhã, duré niwamhã 'râwi tihâimanazé te te uprosi wamhã. 26Ni'wa hã ĩma 're sisé mono wamhã, duré ĩmreme ma 're sisé mono wamhã, Ti'ai ãma Dasiré Ipodo hã te za tãma asé za, ihâiba na rowa'a za'ẽtẽ ré duré Timama te rowa'a za'ẽtẽ ré, duré hâiwa hawi tãma iromhuri'wa norĩ siré, niwa apâ wei morĩ wamhã. 27Tô sena wa za aima waihu'u za'ra wa'wa, ãne: Ni'wam norĩ hã te ãme tihâimana za'ra, 'Re ihâimana u'âsi mono da'ãma 're isib'a'uwẽ mono zé za wei wisi wa, dâ'â za'ra õ ré, za te te i'madâ'â za'ra hã.

Zezusihi hâiba, ẽtẽ 'rãihâ ãma isisaprĩzé

Mateus 17.1-13; Marcus 9.2-13

28Tawamhã Zezusi hã ãne na te te tãma iwaihu'u za'ra zém na misi romhuri ãma si'utõrĩ parimhã, ma tô te te siré simro, Pedru, duré Zuwã duré Tiaguhu zama. Ẽtẽ 'rãihâ u ma tô sai'u, te te rowaptẽrẽ da hã. 29Te te rowaptẽrẽ ré, Zezusihi ubu hã ma tô sisaprĩ. I'uza hã hâirã uptabi di. Duré waipo uptabi di. 30Tawamhã maparane aibâ norĩ hã ma tô itẽme sihâi'ré zahuré, Zezusihi u. Robzanhamri na ma tô sãna'rata zahuré. Ta norĩ hã Mozési, duré Elias. 31'Re ihâimana u'âsi mono te rowa'a, imana wawib zahuré hã. Zezusi za idâ'âzém na ma tô tãma robzanhamri zahuré, oto ro'rutu wa, te te sina i'uwaimrami da hã, Zeruzalẽ ãma. 32Tawamhã Pedru norĩ hã tisiré norĩ me, te tinhotõ pese za'ra. Oto utu za'ra wamhã, ma tô 'madâ'â za'ra, Zezusihi hâiba na rowa'a za'ẽne hã, duré maparane aibâ norĩ isiré isima'wara zahuré zama. 33Tawamhã aibâ norĩ, Zezusihi nhiti oto sina si'ré zahuré mono wamhã, Pedru hã ma tô Zezusihi ma tinha, ãne:

— Rowahutu'wa, irowẽ, ãme wahâimana za'ra wa. Si'ubdatõ, wa te 'ri nhoré wa'aba, romhâ 'manharĩ na. Misi za ate da hã, duré misi za Mozésihi te da hã, duré misi Eliasihi te da hã. — Ãne ma tô Pedru hã tãma tinha, te te sina rosa'rata waihu'u ãna. 34Tawamhã zahadu te te tãma nharĩ ré, ma tô hâiwa nhirõno hã upsibi za'ra. Tahawa Zezusihi siré 're inomro mono norĩ hã ma tô tipahi pese za'ra, hâiwa nhirõno te te upsibi za'ra wamhã. 35Tawamhã hâiwa nhirõtõ hawi, ma tô damreme hã we tinha, ãne:

— Ã hã Ĩ'ra, te ipisudu. Ma'ãpé 're wapari pese za'ra wa'aba mono!

36Tawamhã damreme hã timreme te te sazâri parimhã, Zezusi hã siwaprosi te oto za. Tawamhã isiré 're inomro mono norĩ hã, taha bâtâ na te te i'madâ'â za'ra zém na, si'rep si ma tô iré tihâimana za'ra, ni'wai ma, te te rowasu'u za'ra ãna.

Zezusi hã, wa'uburé ma te te irob'ruzé, ai'reputu hawi

Mateus 17.14-20; Marcus 9.14-29

37Tawamhã awẽm na hã, Zezusi norĩ, ẽtẽ 'rãihâ hawi te te si'ra za'ra wamhã, da'ahâ uptabi hã ma tô dasina uzusi za'ra ni. 38Tame aibâ dame ihâimana hã ma tô dawa'wa hawi 'mahâ, hârâ 'rãihâ na, ãne:

— Rowahutu'wa, wa aiwi rowaptẽ, ĩ'ra ãma marĩ hã ĩma 'manharĩ da, misire wa, ĩ'ra ta hã. 39Wa'uburé hã te te 're upi. Te te upi wamhã, waptu na te za 're sadari. Te za duré 're sisazari. Taha parimhã te za sadaiproi watobro. Wa'uburé hã te te tãma 're rob'manharĩ wasété. Duré te te rẽme waihu'u õ di. 40Wa tô aré waptẽ, asiré 're inomro mono norĩ hã, wa'uburé te te siwi samarĩ da. Tane nherẽ, te te siwi mei waihu'u õ di.

41Tawamhã Zezusi hã ma tô uburé dama tinha, ãne:

— I'aiwasété za'ra wa'wa, duré 'Re ihâimana u'âsi mono asina 're i'umnhasi za'ra wa'aba mono õ! E mahã bâtâ u ai'rata 're ĩnhamra u'âsi aba mono da bâ. E mahã bâtâ u te duré 're asapari ze za'ra wa'aba mono da bâ.

Tawamhã aibâ ma, te tinha, ãne:

— Ma'ãpé, ai'ra hã we saprõni.

42Tawamhã ai'repudu hã te te itẽme sina rotété wamhã, wa'uburé hã ma tô 'morõwĩ. Tahawa, ma tô 're sisazari. Tane nherẽ, Zezusi hã ma tô timreme tãma 'morõwĩ, wa'uburé ma. Tahawa wa'uburé hã ma tô watobro ai'reputu hawi. Ma tô oto tipese. Taha pari ma tô imama ma tisõ. 43Tahawa uburé ma tô ãma tatob'uzu za'ra ni, 'Re ihâimana u'âsi mono iwaihu'u pese uptabi na.

Uburé marĩ, Zezusi te te i'ab'manharĩzém na, uburé ãma datob'uzu za'ra wamhã, ma tô tinha, isiré 're inomro mono norĩ ma, ãne:

44— Ma'ãpé ĩwapari pese za'ra wa'aba, ãhã na za, te aima iwaihu'u siromo za'ra wa'aba zém na hã. Ti'ai ãma Dasiré Ipodo hã te za ti'ai ãma a'uwẽ norĩ ma hâiba nhomri ni.

45Tane nherẽ, te te siwi sadaihu'u õ di, te te sina tãma inharĩ za'ra zém na hã. E marĩ wa. Te te sina tãma inharĩ za'ra zé hã, simi'uri na tiwi hâimana za'ra wa, te te sadaihu'u za'ra tõ da. Tawamhã duré tãma pahi za'ra di, Zezusi te te ãma siwi isadanharĩ da hã, te te inharĩzém na.

E 'wa hã dama pire na te za 're hâimana

Mateus 18.1-5; Marcus 9.33-37

46Tawamhã isiré 're inomro mono norĩ hã ma tô sisada'âbâ na sãna'rata za'ra, ni'wa isiré za'ra hã tisiré norĩ nhipai u pire na 're hâimana mono zô. 47Tane nherẽ, Zezusi hã isimirosa'rata za'ra hã te te waihu'u pese wa, ma tô 'maza'ra, ai'uté hã. Hâiwi ma tô tisã, sisababa. 48Tawamhã ma tô tãma nharĩ za'ra, ãne:

— Ni'wa hã ĩnhisi na, ã hã ai'uté te te âri wẽ wamhã, ta hã te za ĩ'âri wẽ, i'u'âbâ. Duré ni'wa hã te te ĩ'âri wẽ wamhã, we ĩzatõrĩ'wa zama te za âri wẽ. E marĩ wa. Ai'reb za'ra wa'aba ni'wa hã asipai u za'ra wa'aba dama wapu na 're ihâimana mono na te te sina 're irosa'rata mono hã, ta hã te za dama pire na 're hâimana.

Ni'wa hã wazada ihâimana õ hã, ta hã waniwĩmhã

Marcus 9.38-41

49Tawamhã Zuwã hã ma tô rowasu'u Zezusihi ma, ãne:

— Rowahutu'wa, wa tô wasiwi 'madâ'â ni, aibâ hã asisi waihu'u pese na, wa'uburé te te dama i'anhamra hã. Tane nherẽ, wa tô tiwi sawi za'ra ni, õne hã te te 'manharĩ tõ da, wasiré 're morĩ õ wa.

50Tane nherẽ, Zezusi hã ma tô tãma nharĩ za'ra, ãne:

— Tiwi sawi za'ra wa'aba tõ. E marĩ wa. Ni'wa hã asada 're hâimana za'ra wa'aba mono õ wamhã, ta hã aniwĩ wa'aba hã.

Samaritanu norĩ hã, Zezusi te te siwi i'âri õ zé

51Tawamhã Zezusi hã apâ hâiwa u imorĩzéb da hã ro'rutu wa oto, ma tô sima rowairébé, morĩ da, Zeruzalẽ u. 52Tahawa, ma tô sisõwa satõrĩ za'ra, romreme 'wapéi'wa norĩ hã. Si'aba'réi wamhã, ma tô asisi, 'ri wa'õno Samaritanu na dawamri 're idasi'ubumroi mono u, te te robza'ra pese za'ra da. 53Tane nherẽ, tame 're idasi'ubumroi mono hã da te dasima wẽ za'ra õ di, Zezusi da te dasiwi i'âri wẽ da hã, Zeruzalẽ u imorĩ na, da te dasiwi waihu'u wa. 54Tawamhã isiré 're ine, Tiagu norĩ Zuwãhã me, ãne hã te te wapari zahuré wamhã, ma tô Zezusihi ma nharĩ zahuré, ãne:

— Rowahutu'wa, e asima wẽ õ di, uzâ hâiwa hawib zô wahârâ da hã, te te da'uprosi da.

55Tane nherẽ, Zezusi hã taré ma tô sô aipi'ra zahuré. Timreme ma tô tãma pẽtẽ zahuré. 56Taha pari, ma tô ai'aba'ré, 'ri wa'õtõ hâiba amoi u.

E niha te za 're danomro, Zezusihi nhirã zarina hã

Mateus 8.18-22

57Tawamhã Zezusi hã duré isiré 're inomro mono norĩ me, bâdâdi na si'aba'réi ré, ma tô aibâ hã Zezusihi ma tinha, ãne:

— Asarina wa za 're mo, nimomo 're i'ane mono zéb u.

58Tawamhã Zezusi hã ma tô sada'â, ãne:

— Wapsã wawẽre norĩ hã ab're 're, isõrõwa hã. Duré si norĩ hã izasi ré hã. Tanei õ di, Ti'ai ãma Dasiré Ipodo hã. Tãma hâimana õ di, nimame 're i'rãi wa'utu mono zéb da hã.

59Taha pari Zezusi hã ma tô aibâ aimawi ma tinha, ãne:

— Ĩzarina we aimorĩ.

Tane nherẽ, aibâ hã ma tô sada'â, ãne:

— Apito, a'â apâ ĩmorĩ, imorĩ'rata na ĩmama ãma te a'â ti'a da.

60Tane nherẽ, Zezusi hã ma tô tinha aibâ ma, ãne:

— A'â idâ'â norĩ si te te 're ti'a za'ra mono, tiwi 're idâ'â za'ra mono norĩ ãma hã. Tazahã, a hã 're aimorĩ, 'Re ihâimana u'âsi mono da'ãma 're isib'a'uwẽ mono zé hã dama 're wasu'u mono da.

61Tawamhã aibâ aimawi hã ma tô duré tinha, Zezusihi ma, ãne:

— Apito, asarina wa za 're mo. Tane nherẽ, a'â ĩmorĩ, ĩsiwapru norĩ hã ĩsisa'u te sawi za'ra da.

62Tawamhã Zezusi hã ma ãma sada'â, ãne:

— Ni'wa hã te te ti'ai wa'i nherẽ, apâ siwa'rãmi nasi 'rã sipizari wamhã, ta hã sadai õ di, 'Re ihâimana u'âsi mono da'ãma 're isib'a'uwẽ mono zéb ãma te te 're iromhuri mono da hã.

सध्या निवडलेले:

Lucas 9: xavBP

ठळक

सामायिक करा

कॉपी करा