Lucas 10
10
Zezusi hã, aibâ norĩ isazei'wa norĩ 72 na ihâiba za'ra te te datẽme isatõrĩ za'ra zé
1Taha pari, Wanhib'apito hã ma tô pisutu za'ra, 72 na isazei'wa aibâ norĩ hã. Ta norĩ hã ma tô datẽme satõrĩ za'ra maparane si isõwa si'aba'ré da, 'ri nho'õmo mono u, za datẽme 're imorĩzéb u hã. 2Tawamhã te te satõrĩ za'ra wana ré, ma tô tãma rowasu'u za'ra, ãne:
— Amnho itehâri da hã sa'ẽtẽ uptabi di. Tane nherẽ, romhuri'wa norĩ hã umrore di. Tahawa, ma'ãpé roptehâri'wa tede'wai wi waptẽrẽ za'ra wa'aba, romhuri'wa norĩ hã ahâ na te te we satõrĩ za'ra da, tite roptehâri u hã. 3Mo oto ai'aba'réi wa'aba. Wa oto asatõrĩ za'ra wa'wa datẽme, pone'ẽrebâ i'rare norĩ hã abaze zahi wa'wa u 're isisisi mono ne. 4Ai'aba'réi wa'aba wamhã, romramizé hã 'wasari aba tõ, duré ro'wapézé hã, duré aipara uza zama. Duré bâdâdi na asimizahâri za'ra wa'aba mono tõ, dazawi za'ra wa'aba mono da hã. 5Danhorõwa u asisisi aba mono wamhã, imorĩ'rata na dazawi za'ra wa'aba mono, ãne: “Rowẽ hã ãme 'ri 're, ihâimana da si, iwẽ hã.” 6Tame aibâ rowẽ tãma isawi hã 're sãmra mono wamhã, rowẽ tãma ipisutu za'ra wa'aba zé hã te za tô tãma 're hâimana. Tazahã, rowẽ tãma iwẽ'õ wamhã, apâ ate za'ra wa'wa rowẽ tãma ipisutu za'ra wa'aba zé hã te za atẽme sina siri 'wa. 7Tawamhã tô taha 'ri 'rep si ai'ubumroi wa'aba mono. Nasi asaihuri aba, duré nasi â huri aba, nasi da te aima i'ru za'ra wa'wa hã. E marĩ wa. Romhuri'wa norĩ hã tô sada, tipawa'â te te 're iwaibui mono da hã. Duré asãmrazé 'ri na ãma 're saprĩ haré za'ra wa'aba mono tõ.
8— Nima hã 'ri wa'õtõ u asisisi aba mono wamhã, duré tame da te aiwaibui wẽ wa'aba mono wamhã, tô asaihuri aba mono, da te aima isõmri za'ra wa'aba mono na. 9Tame 'ri wa'õtõ 'remhã, ma'ãpé ihâzé ré norĩ hã pese za'ra wa'aba mono. Duré dama rowasu'u za'ra wa'aba mono, ãne: “'Re ihâimana u'âsi mono da'ãma 're isib'a'uwẽ mono zé hã ma we atẽme tiwisi za'ra wa'wa.” 10Tazahã, nima hã 'ri wa'õtõ u asisisi aba mono wa, da te aiwaibui wasété aba mono wamhã, ma'ãpé 'ri nhi'riti na dama rowasu'u za'ra wa'aba mono, ãne: 11“Ãme 'ri wa'õtõ 're, robzapru wapara na isimnhatã hã, wa asada tata'a za'ra wa'aba ni! Ma'ãpé waihu'u za'ra wa'aba, ã hã: 'Re ihâimana u'âsi mono da'ãma 're isib'a'uwẽ mono zé hã romhutu di oto, iwisizé hã.”
12Tawamhã Zezusi hã ma duré tãma waihu'u za'ra, ãne:
— Tô sena, wa za aima waihu'u za'ra wa'wa, ãne: Bâdâ 'Re ihâimana u'âsi mono, uburé te te da'ãma i'arowairébézéb ãma hã Sodoma ãma 're idahâimana wasété uptabi za'ra mono norĩ ãma, te te irob'manharĩ pipa zém nhipai u, te za ã hã 'ri wa'õtõ 're, asô idatob'uzu za'ra wa'aba õ norĩ ma, rob'manharĩ wasété za'ẽtẽ.
Zezusihi wẽ'õ'wa norĩ po're pu'uzé
Mateus 11.20-27
13Tawamhã Zezusi hã ma duré ãma uzusi, ãne:
— 'Ri nho'u Corazĩ ãma 're i'ai'ubumroi wa'aba mono norĩ, aima 're ropipa uptabi za'ra wa'aba mono di za! Duré 'ri nho'u Betisaida ãma 're i'ai'ubumroi wa'aba mono norĩ, aima 're ropipa uptabi za'ra wa'aba mono di za. E marĩ wa. Marĩ dama i'manharĩ waihu'u'õ, ai'reb za'ra wa'aba te 're i'ab'manharĩ mono hã, 'ri wa'õtõ norĩ Tiru duré Sidõ ãma 'wa'âhã, tame 're isi'ubumroi mono norĩ hã ma tô aré tiwasété wi aipizari za'ra, duréi pese. Tawamhã tiwasété na isi'ruiwapari za'ra zém na sihâi'ré za'ra da hã, ti'ai wa, te aré asimro. Zazahâ ihâiro na da'uza na te aré si'uza za'ra. Te aré duré 'ru'a hã sima ahiri za'ra, ti'rã nhisiwi. 14Tahawa, 'Re ihâimana u'âsi mono, za Da'ãma Rowairébézé ihâimana ãma hã Tiru duré Sidõ ãma 're isi'ubumroi mono norĩ ãma te za tipẽ'ẽzé za, asipai u za'ra wa'aba, Corazĩ duré Betisaida ãma 're i'ai'ubumroi wa'aba mono norĩ nhipai u. 15Tawamhã duré a hã, 'ri wa'õno Cafarnau. E te asina irosa'ra, hâiwa u za i'aiwisi na hã. Aiwisi õ di za. 'Re ihâimana u'âsi mono hã te za aime, adâ 're ihâimana za'ra mono zé, Hades na rowamri u.
16Tawamhã isiré 're inomro mono norĩ ma, te tinha, ãne:
— Ni'wa hã ĩnhimiroti na te te 're aiwapari za'ra wa'aba mono wamhã, ta hã te tô te te 're ĩwapari. Tazahã, ni'wa hã ĩnhimiroti te te wẽ'õ wamhã, ta hã te za ĩwẽ'õ. Duré ni'wa hã te te ĩwẽ'õ wamhã, we ĩzatõrĩ'wa zama te tô wẽ'õ duré, ta hã.
Isazei'wa norĩ 72 na ihâiba za'ra hã, apâ isihutuzé
17Tawamhã 72 na ihâiba za'ra norĩ hã apâ ma tô sina siri za'ra, to sina. Ãne ma tô Zezusihi ma siwasu'u za'ra:
— Apito, wa'uburé norĩ zama ma tô te te wawapari za'ra, asisi waihu'u pese na, wa te tãma rob'ru za'ra mono wamhã, dahawi wairébé mono da hã.
18Tawamhã Zezusi hã ma tô tãma waihu'u za'ra, ãne:
— Tane tô. Satanasi hã tãiwapsa'a ne waptu na hâiwa hawi waptã'ã wamhã#10.18 Satanasi hã hâiwa hawi waptã'ã wamhã, isiptetezé hã ma tô tiwi ab'uwa., wa tô 'madâ. 19Ma'ãpé ĩwapari pese za'ra wa'aba. Asimiroti pire hã wa aima sõmri za'ra wa'wa, wahi norĩ hã aipara na 're wati'i za'ra wa'aba mono da, duré apa'apa 'wa nhi'oto zama. Wa tô duré asimiroti pire hã aima sõmri za'ra wa'wa, wa'uburé norĩ nhiptetezém nhipai u 're ihâimana mono hã. Tahawa niha hã te te 're ai'manharĩ wasété za'ra wa'aba mono õ di za. 20Tane nherẽ, asima 're rowẽ za'ra wa'aba mono tõ, wa'uburé norĩ hã te te 're aiwapari za'ra wa'aba mono wamhã. Tazahã, asima 're rowẽ za'ra wa'aba mono, hâiwa ãma danhisi na rob'ui'érézém na, asisi za'ra wa'wa hã 're hâimana za'ra mono wa.
21Tawamhã tô taha bâtâ na hã, 'Re ihâimana u'âsi mono Pẽ'ẽzani nhiptetezém na, ma tô Zezusi hã 're to. Tahawa ma tô ãne tinha Timama ma:
— Ĩmama, Uburé Danhib'apito, hâiwa ãma duré ti'ai ãma zama, wa ai'ãma ĩwata, ai'uté ne dama wapu na 're ihâimana za'ra mono norĩ ma, 're ahâi'ré mono wa, rowaihu'u pese 'wa norĩ ma, marĩ 're i'ahâi'ré mono õ hã. Tane tô, Ĩmama. Ãma aima 're rowẽ uptabi mono di, ãne hã 're i'ab'manharĩ mono zém na hã.
22— Ĩmama uburé marĩ hã ma tô ĩma sõmri za'ra. Ni'wa hã te te waihu'u õ di, I'ra hã. Imama si te te waihu'u pese di. Duré ni'wa hã, Imama hã te te waihu'u õ di. I'ra si te te waihu'u pese di. Duré I'ra hã ni'wam norĩ te te sima 're i'awẽ mono zéb uwaibaba, te te tãma 're i'ahâi'ré mono norĩ ma si, waihu'u pese di, Imama hã.
23Tawamhã ãne na te te tãma waihu'u za'ra pari, Zezusi hã ma tô aipi'ra, isiré 're inomro mono norĩ u. Hâiba pisutu ma tô ãne tãma nharĩ za'ra:
— Ni'wam norĩ ma 're rowẽ uptabi za'ra mono di, ãhã na atõmo na i'madâ'â za'ra wa'wa hã te te i'madâ'â za'ra norĩ ma hã. 24Tô sena wa za aima waihu'u za'ra wa'wa, ãne: Ahâ uptabi na 'Re ihâimana u'âsi mono zadawa 'mahârâ'wa norĩ hã duré apito norĩ zama ma tô aré te te sima 're wẽ za'ra, ã hã atõmo na i'madâ'â za'ra wa'wa hã te te 'madâ'â za'ra da. Tane nherẽ, te te 'madâ'â za'ra õ di. Ma tô aré duré te te sima 're wẽ za'ra, ã hã iwapari za'ra wa'wa hã tipo're na te te 're wapari za'ra mono da. Tane nherẽ, te te wapari za'ra õ di.
Samaritanu, 're imorĩ wẽ wasu'u
25Tawamhã nimahã bâtâ na, 'Re ihâimana u'âsi mono nhimiroti zahi na dama rowahutu'wa hã, Zezusi te te ãma upa zô, te te pibu da, te te sima wẽ wa, ma tô sadanha, ãne:
— Rowahutu'wa, e marĩ, wa za 'manha, dahâimanazé isi'utõrĩ'õ te ĩsina uwaimrami da wamhã.
26Tawamhã Zezusi hã ma ãma sada'â, ãne:
— E niha Ibaihâ Iwazé pese na rob'ui'éré hã te tinha. E niha ma tô isadaihu, ãma irob'ui'éré hã.
27Tawamhã aibâ hã ma ãma sada'â, ãne:
— Uburé Danhib'apito ate 'Re ihâimana u'âsi mono hã 're sawi pese mono, duré uburé aipẽ'ẽ na, duré uburé aihâimanazé i'rowi uptabi na, duré uburé asiptede aima 're ihâimana mono na duré uburé asimirosa'rata na zama. Duré ai'rata 're ihâimana za'ra mono hã 're azawi pese mono, 're i'asisawi pese mono ne.
28Tawamhã Zezusi hã ma tô ãne tãma tinha:
— Tane tô. I'uwaibaba ma ãma ĩzada'â. Ma'ãpé ta hã 're 'manharĩ mono. Tawamhã te za dahâimanazé isi'utõrĩ'õ hã asina i'uwaimra.
29Tane nherẽ, aibâ hã si'u'ra zé, ma tô Zezusi hã sadanha, ãne:
— E 'wa hã 'râwi ĩ'rata 're ihâimana mono.
30Tawamhã Zezusi hã ma tô ãma sada'â, romnhimiré'é na, ãne:
— Aibâ hã te si'ra Zeruzalẽ hawi, Zerico u. Tane nherẽ, bâdâdi na morĩ ré, ma tô isimisaihuri norĩ hã sô wairé. Ta norĩ hã ma tô i'uza tiwi sani za'ra. Ma duré siwi azâ. Taha pari ma tô oto ai'aba'ré. Dâ'â prã na ma tô siwi tirẽ. 31Tawamhã sasedoti hã taha bâdâdi na te duré siwa'ru na si'ra. Tawamhã aibâ inomro te te 'madâ'â wamhã, ma tô saprĩ, bâdâdi zada'ré hâiba amo niwĩ. 32Tawamhã levita hã ma duré ro'razâ, taha bâdâdi na hã. Ta hã duré, aibâ nomro ré te te 'madâ'â wamhã, ma tô duré saprĩ, bâdâdi zada'ré amo niwĩ. Ma tô timorĩ waré. 33Tane nherẽ, samaritanu na iwamri, darob amoi u romhâ na imorĩ hã ma tô duré oto ro'razâ, taha bâdâdi na. Aibâ inomrozéb u ma tô wi. Te te 'madâ'â wamhã, ma tô ãma tipẽ'ẽzé. 34Tahawa ma tô itẽme sina rotété. Tawamhã i'wa're hã ma tô tãma u'ré za'ra, rob'rãi wa'u na, duré azeite 'rãi wa'ui wam na. Taha pari ma tô tãma ubu za'ra. Tinhimizama ba nhisi ma tô tihi. Ma tô ãwisi, daza'warizéb u. Tame ma tô a'â 'madâ. 35Tawamhã awẽm na hã, daza'warizé tede'wai ma, ma tô tisõ, maparane rob'uiprazé isapotore ẽtẽ waipo prã prata 'manharĩ hã. Ãne te tãma tinha: “Ma'ãpé 'madâ'â pese. Apâ we ĩwisi wap si, wa za aima wa'âbâ 'rãsutu, ãma irob'uprosizé hã.”
36Tawamhã Zezusi hã ma tô oto ãma sadanha, aibâ hã, ãne:
— Aima hã si'ubdatõ te te iro'rahâri za'ra hã, e ma hã ma tô aibâ zawi na tihâiba 'râwi i'ratamhã, isimisaihuri te te siwi i'azâri 'ratamhã.
37Tawamhã aibâ hã ma tô ãma sada'â, ãne:
— Aibâ ãma isime!
Tawamhã Zezusi hã ma tô ãne tãma tinha:
— Tane tô. Mo oto aimorĩ. Isine 're 'manharĩ mono!
Zezusi hã, Marta norĩ Mariaha me, te te isabu zahuré zé
38Tawamhã Zezusi hã duré isiré 're inomro mono norĩ me, timorĩ na te te uzusi za'ra wamhã, ma tô aihutu, 'ri wa'õtõ u. Tame pi'õ Marta na isisi hã ma tô Zezusi 'mazé, tinhorõwa u. 39Tawamhã isisãnawã Maria hã ma tô nhamra, Wanhib'apito Zezusihi para ãma. Isimirowasu'u hã te wapa. 40Tanei õ di, Marta hã. Ta hã 'ri 're romhuri na si ma tô ti'rãza'õtõ. Tahawa, ma tô Zezusihi u sina rotété. Ãne te sadanha:
— Apito, e ãma rosa'rata õ di, ĩno hã ĩsiwaprosi te romhuri da, te te irẽme na hã, uburé romhuri, te a'manharĩ da hã. Ma'ãpé, tãma nharĩ, te te ĩpawaptob da.
41Tahawa Wanhib'apito hã ma tô sada'â ãne:
— Marta, Marta, airési ãna asãmra õ di. Duré marĩ i'ahâ na si te aihâtâ. 42Tane nherẽ, misire i'ru zahi hã! Ta hã Maria hã ma tô sima pisutu, uburé marĩ nhipai u iwẽ uptabi hã. Ta hã ni'wa hã te te tiwi wazere waihu'u õ di za.
सध्या निवडलेले:
Lucas 10: xavBP
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2011, Wycliffe Bible Translators, Inc.
