Lucas 11
11
Zezusi hã, rowaptẽrẽzém na isisanhozé
Mateus 6.5-15; 7.7-11
1Nimahã bâtâ na, te Zezusi hã rowaptẽ, nimame. Tawamhã te te rowaptẽrẽ parimhã, misi isiré 're inomro mono norĩ siré 're imorĩ hã ma tô tiwi waptẽ, rowaptẽrẽ na ãma tãma sisanho za'ra da:
— Wanhib'apito, ma'ãpé ãma wama asanho za'ra na rowaptẽrẽzém na, Zuwã hã isiré 're inomro mono norĩ ma, ãma isisanho ne.
2Tahawa Zezusi hã ma tô tãma waihu'u za'ra, ãne:
— 'Re rowaptẽrẽ za'ra wa'aba mono wamhã, ma'ãpé ãne 're rowaptẽrẽ za'ra wa'aba mono:
“Wamama, iwẽ hã asisi iwazé pese na, da te 're iwaihu'u za'ra mono da si.
Da'ãma 're i'asib'a'uwẽ mono zé hã we iwisi da si, iwẽ hã.
3Ma'ãpé awẽ sidâpâsi, wei wama 're anhomri mono, wasa, bâtâ sidâpâ ãma 're wahâimana za'ra mono da, sô 're iwanhimnhasi za'ra mono hã.
4Ma'ãpé, wawasédé hã wa'ãma 're a'madâ'â mono tõ. E marĩ wa. Wa norĩ zama, wa te ãma 're 'madâ'â za'ra mono õ wa, wazada 're iwasété za'ra mono norĩ ãma, iwasédé hã.
Ma'ãpé duré wama 'ru za'ra tõ, wa'uburé nhimipibuzéb 're, 're warere'e mono tõ da hã.”
5Tawamhã te te tãma waihu'u za'ra pari, ma tô Zezusi hã duré romnhimiré'é, isiré 're inomro mono norĩ ma, ãne:
— Ma'ãpé, ãma rosa'rata za'ra wa'aba: Ãté niwamhã asiwaihu'u nhorõwa u te za ai'maimorĩ 'wa, mara wa'wa. Tawamhã te za tãma inharĩ 'wa, ãne: “Ĩsiwaihu, a'â ĩma sõmri, si'ubdatõ i'u'ẽtẽ wapu hã. Apâ iwa'rãmimhã wa za aima tisõ za. 6E marĩ wa. Ĩsiwaihu hã darob amoi hawi ĩtẽme wisi wa. Tane nherẽ, marĩ õ di, te tãma i'a da hã.”
7— Tane nherẽ, niwamhã asiwaihu'u 'wa hã te za ai'mazada'âbâ 'wa, ãne 'ri para hawi: “We ĩwi ro'wa'rutu tõ! 'Ridawa tété di oto. Ĩ'ra norĩ me, wa oto daba'wara ni. Tahawa ĩwahutu waihu'u õ di, we ĩwi iwaptẽrẽ hã te aima isõmri da hã.”
— 8Tô sena wa za aima waihu'u za'ra wa'wa, ãne: Wahutu dai õ nherẽ, i'u'ẽtẽ wapu te te tãma sõmri da hã, isiwaihu'u nherẽ. Tane nherẽ, te za sô wahudu, marĩ zô tiwi irowaptâ hã te te tãma sõmri za'ra da, sadahutu ãna te te tiwi iwaptẽrẽ u'âbâ. 9Tahawa wa za ãne aima waihu'u za'ra wa'wa: Marĩ 're waptẽrẽ za'ra wa'aba mono. Tawamhã 'Re ihâimana u'âsi mono hã te za te te aima 're anhomri 'wa. Sô 're asõpré wa'aba mono. Tawamhã te za 're isõpẽtẽ za'ra wa'aba mo. 'Re 'ridawa ta'a za'ra wa'aba mono. Tawamhã te za te te aima 're a'ridawa 'wa, 'ridawa hã. 10E marĩ wa. Ni'wam norĩ hã marĩ te te 're iwaptẽrẽ za'ra mono hã, te za te te 're waibu. Duré marĩ zô 're irĩtĩ za'ra mono norĩ hã te za te te 're sõpẽtẽ za'ra. Duré 'ridawa hã te za tãma 're si'ridawa za'ra, te te 're i'ridawa ta'a za'ra mono norĩ ma hã. 11Damama na i'ai'maihâimana 'wa hã, e wahi hã ai'ra ma, 'manhomri aba da bâ, pe'a te te aiwi 'maiwaptẽrẽ aba wamhã. 12Duré niwamhã, ai'ra, si'a're te te aiwi 'maiwaptẽrẽ aba wamhã, e apa'apa 'wa nhi'odo tãma 'manhomri aba da bâ. 13A norĩ wa'wa hã 're anomro wasété aba mono nherẽ, marĩ iwẽ ai'ra ma hã, 're sõmri waihu'u pese za'ra wa'aba mono di. Tane Aimama 'wa, hâiwa ãma 're isãmra mono hã, te za Tipẽ'ẽzani hã te te tãma 're anhomri, te te tiwi 're iwaptẽrẽ za'ra mono norĩ ma hã.
Zezusi hã tiwaihu'u pese na, wa'uburé ma, te te 're irob'rui mono zé
Mateus 12.22-32; Marcus 3.20-30
14Tawamhã Zezusi hã ma tô time wa'uburé hã aibâ hawi, iwa 're hâimana mono wa, mreme ãna 're ihâimana mono hã. Wa'uburé hã aibâ hawi watobro wamhã, aibâ hã ma oto mreme watobro. Tahawa da'ahâ uptabi hã ma tô ãma tatob'uzu za'ra ni. 15Tane nherẽ, ni'wam norĩ hã ma tô ãne nharĩ za'ra:
— Beuzebu, wa'uburé norĩ nhib'ihâ'a zadawa para, te wa'uburé hã te te dama 're anhamra.
16Tawamhã duré ni'wam norĩ hã ma tô sima wẽ za'ra, te te siwi pibu da, te te ãma upa zô. Ma tô tiwi waptẽrẽ za'ra, marĩ dama i'manharĩ waihu'u õ hã te te 'manharĩ da, ãma iwaihu'uzéb da, hâiwa hawim na hã.
17Tane nherẽ, Zezusi hã isimirosa'rata za'ra te te tiwi waihu'u pese za'ra wa, ma tô ãne tãma nharĩ za'ra:
— Ti'ai wa'õtõ nho'u hã sisada sipo'o wa, 'râwi si'wapé za'ra wamhã, 'râwi te za tô 're si'uprosi. Tane duré, dasiwapru nherẽ, dasisada 're dasipo'o mono wa, 're dasi'wapé za'ra mono wamhã, te za 're dasi'uprosi. 18Tane duré Satanasihi nhimi'madâ'â 're, 're ihâimana za'ra mono hã sisada 're simasa mono wamhã, e niha tawamhã 're hâimana u'âsi za'ra mono da bâ. Te ĩma inharĩ za'ra wa'wa, Beuzebu hã ĩwaihu'u pe, te te ĩma isõmrizéb zarina, wa'uburé ma, te 're irob'rui mono na hã. 19Tane nherẽ, ãne wamhã, e 'wa hã ma tô asiré wa'aba 're inomro mono norĩ ma, iwaihu'u pe hã te te 're anhomri, wa'uburé hã te te dama 're sãmra za'ra mono da hã. Ãne wamhã, asiré 're inomro wa'aba mono norĩ hã te za aiwasédé hã ai'ãma sa'ra za'ra wa'wa, i'upa na 're aihâimana za'ra wa'aba mono wa. 20Tazahã, 'Re ihâimana u'âsi mono waihu'u pese na si, wa tô wa'uburé hã te dama 're anhamra. Taha zarina ma tô iwaihu'u za'ra wa'wa, 'Re ihâimana u'âsi mono da'ãma 're isib'a'uwẽ mono zé hã, we oto atẽme iwisi za'ra wa'aba na hã.
21— Aibâ isiptede duré isimnhi'ãsi ahâ ré hã tinhorõwa te te 'madâ'â wamhã, uburé isibro tãma ihâimana za'ra hã, ni'wa te te tiwi rési waihu'u za'ra õ di za. 22Tane nherẽ, aibâ isipai u isiptede, sô wisi wa, te te 'wapéi wamhã, te za ãma ai'uté. Tawamhã uburé isimnhi'ã te te 're i'a'umnhasi mono hã te za tiwi tidu. Taha parimhã te za te te dama po'o.
23— Ni'wa hã ĩniwĩb õ wamhã, ta hã te ĩzada 're hâimana. Duré ni'wa hã te te ĩma da'ubumro da, ĩ'ãma simei õ wamhã, ta hã te za ĩwi da'ãma ropé.
Wa'uburé hã apâ za iwisizé
24— Wa'uburé hã ni'wai hawi watobro wamhã, a'ubuni wi te za 're mo, ro â ãna 're iromnhimi'wara mono na. Tiwa'utuzéb zô te za 're rĩtĩ. Tane nherẽ, te te 'manhopẽtẽ õ wa, te za ãne sima tinha: “Apâ wa za ĩsina siri ĩnhorõwa u, ĩwatobrozéb u.” 25Tawamhã apâ wisi wamhã, te za sõpẽtẽ 'ri hã, wamroi pese na duré robza'ra pese na. 26Taha parimhã, tisiré wa'uburé norĩ zô te za mo. Siré te za ãwisi za'ra, 7 na ihâiba za'ra hã isipai u iwasété uptabi za'ra hã. Tawamhã tame te za siré 're si'ubumro. Ãne wamhã, ni'wai ma hã ropire uptabi di za oto, iwana ré nhipai u.
27Tawamhã ãne na Zezusi hã te te dama rowasu'u ré, ma tô pi'õ hã dawa'wa hawi 'mahâ, hârâ 'rãihâ na, ãne:
— Asépata'wa pi'õi ma hã 're rowẽ uptabi mono di, ihawi i'apoto ma hã, duré te te 're i'aiwapsõmri mono ma hã.
28Tawamhã Zezusi hã ma tô ãne ãma sada'â:
— Tane nherẽ, isipai u ni'wam norĩ ma, 're rowẽ uptabi za'ra mono di za, 'Re ihâimana u'âsi mono nhimiroti tipo're na te te 're wapari za'ra mono wa, te te 're i'madâ'â pese za'ra mono norĩ hã.
Zezusihi wi, da te iwaptẽrẽ za'ra zé, marĩ dama i'manharĩ waihu'u'õ te te 'manharĩ da
Mateus 12.38-42; 16.1-4; Marcus 8.11-13
29Tawamhã Zezusihi u dasina dahâ'â wa, ma tô rowasu'u na dama sãna'rata, ãne:
— Ãhã na dapodo hã, dawasété uptabi na si te 're danomro. Ta norĩ hã ma tô waptẽrẽ za'ra, marĩ dama i'manharĩ waihu'u õ hã te dama 'manharĩ da, te te ĩwaihu'u za'ra da, 'Re ihâimana u'âsi mono we te te ĩzatõrĩ na hã. Tane nherẽ, te tãma i'manharĩ za'ra da hã, mare di. Zonahã te, ihâimana si te za tãma tihâimana za'ra, marĩ dama i'manharĩ waihu'u õ hã. 30Zona hã Ninive ãma 're isi'ubumroi mono norĩ ma ihâimana ne, te te ãma iwaihu'u za'ra zéb da hã, tane te za duré ã bâtâ na hã tiromhâiba, ãhã na dapoto norĩ ma hã, Ti'ai ãma Dasiré Ipodo hã te te ãma iwaihu'u za'ra zéb da hã. 31Da'ãma Rowairébézé za ihâimana ãma hã, Saba te danhib'apito sipi'õ hã te za wahudu, aiwasédé hã te te ai'ãma sa'ra za'ra wa'aba da. Ta hã romhâ na ma tô mo, Salomahã nhimirowaihu'u wẽ te te wapari da hã. Tô sena wa za ãne aima waihu'u za'ra wa'wa: Ãhã na ãme ihâimana hã, Salomahã nhipai u pire uptabi di. 32Da'ãma Rowairébézé za ihâimana ãma hã, Ninive ãma 're isi'ubumroi mono norĩ hã te za tiwahutu za'ra, aiwasédé hã te te ai'ãma sa'ra za'ra wa'aba da. E marĩ wa. Ta norĩ hã Zonahã nhimirowasu'u te te wapari za'ra wamhã, tiwasété na sisãmri za'ra wa, ma tô 'Re ihâimana u'âsi mono u aipizari za'ra, tiwasété wi. Tô sena wa za ãne aima waihu'u za'ra wa'wa: Ãhã na ãme ihâimana hã pire uptabi di, Zonahã nhipai u.
Dahâiba ma rob'uiwẽzé
Mateus 5.15; 6.22-23
33Tawamhã Zezusi hã ma duré ãma uzusi romnhimiré'é na, ãne:
— Ni'wa hã rob'uiwẽzé te te ro'o pari, simi'uri na sab da, te te sãrĩ õ di, duré niwamhã piza'a 'rowimhã. Tazahã, sõ'awi isabzéb ãma te za da te 're sõré, ni'wam norĩ hã iwa 're isisisi mono hã rowa'a te te 're 'madâ'â za'ra mono da. 34Dato hã rob'uiwẽzé, dahâiba ma hã. Atõmo za'ra wa'wa hã wẽ wamhã, aihâiba za'ra wa'aba na, te za uburé rowa'a hã ãma tihâiba. Tazahã, atõmo za'ra wa'wa hã wasété wamhã, te za uburé robra hã ãma 're hâimana za'ra, aihâiba za'ra wa'aba na hã. 35Tahawa, ma'ãpé ãma 're pibui pese za'ra wa'aba mono, rowa'a aiwa 're hâimana za'ra wa'aba mono da nherẽ, robra hã aiwa 're hâimana za'ra wa'aba mono tõ da, i'upana. 36Tahawa, aihâiba hã uburé rowa'a na si hâimana wamhã, duré nima hã robra na 'maihâimana õ wamhã, tawap si te za uburé rowa'a na aihâiba hã tihâiba, rob'uiwẽzé hã uburé aihâiba te te uiwẽ wa, za ihâimana ne.
37Tawamhã Zezusi hã ãne na te te rowasu'u parimhã, farizeu hã tinhorõwa u ma tô sô hâ, isiré sa da. Tahawa Zezusi hã ma tô mo. Meza na ma tô nhamra. 38Tawamhã farizeu hã ma tô ãma titob'uzu Zezusihi ãma, sai wana ré, sisib'rata upsõi õ wa. 39Tahawa Wanhib'apito hã ma tô tãma tinha, ãne:
— A norĩ wa'wa farizeu norĩ hã, hâsizé imana wawip si te 're i'upsõ za'ra wa'aba mo, duré pratu imana wawib zama. Tane nherẽ, aipẽ'ẽ 'remhã, i'asimi'rui uptabi za'ra wa'wa, duré i'aiwasété uptabi za'ra wa'wa. 40Aihâimana nhimiza'rese ãna 're i'aihâimana za'ra wa'aba mono! Damana wawi da'manharĩ'wa hã, e ta hã duré te te 'manharĩ ã bâ, i'remhã. 41Tahawa, ma'ãpé isibrob'õ norĩ ma, sõmri za'ra wa'aba, ate hâsizéb 're, duré pratu 'reb zama aima ihâimana za'ra wa'wa hã. Tawap si te za uburé marĩ hã rã na aima tihâimana za'ra wa'wa za.
42— Farizeu norĩ, aima 're ropipa uptabi za'ra wa'aba mono di za! E marĩ da, te 'Re ihâimana u'âsi mono ma 're ipo'o za'ra wa'aba mono, hortelã na wesuirã nhisi hã, isui uzé pire hã, duré uburé rob'rã norĩ hã. Tane nherẽ, i'uwaibaba na dama 're aihâimana za'ra wa'aba mono õ di. Duré 'Re ihâimana u'âsi mono hã 're sawi za'ra wa'aba mono õ di. Tahawa ã hã i'uwaibaba na 're i'manharĩ za'ra wa'aba mono da si iwẽ hã, isiré norĩ hã 'mairẽme za'ra wa'aba ãna.
43— Farizeu norĩ, aima 're ropipa uptabi za'ra wa'aba mono di za! Danhamrazé dapire na 're idasi'ubumroi mono zé hã aima wẽ za'ra wa'aba wa, zudeu norĩ te, rowahutuzéb ãma hã. Duré aima iwẽ za'ra wa'wa hã da te dasina 're i'ubumroi mono zéb ãma aiwazép si na da te 're i'asawi za'ra wa'aba mono zé hã.
44— Aima 're ropipa uptabi za'ra wa'aba mono di za, adâ'â 'ru, 'madâ'â waihu'u ãna 're ihâimana za'ra mono ne, 're aihâimana za'ra wa'aba mono wa, isisiwi, sa'rese ãna da te 're iro'rahâri za'ra mono ne.
45Tawamhã nima hã 'Re ihâimana u'âsi mono nhimiroti zahi na rob'ui'éré na dama rowahutu'wa hã ma tô Zezusihi ma tinha, ãne:
— Rowahutu'wa, tane nharĩ wamhã, te duré wa norĩ zama wa'ãma iwasété za'ra.
46Tawamhã Zezusi hã ma tô ãma sada'â, ãne:
— 'Re ihâimana u'âsi mono nhimiroti zahi na dama rowahutu'wa norĩ, a norĩ wa'aba ma zama, aima 're ropipa uptabi za'ra wa'aba mono di za. E marĩ wa. Danhisada ipire hã te danhoihi na dama 're isa'ra za'ra wa'aba mo, da te 're 'wasari waihu'u mono õ nherẽ, pire wa. Tane nherẽ, a norĩ wa'wa hã, da'ãma 're ana wa'aba mono õ di. Asiptõmohi hã 're rési waihu'u za'ra wa'aba mono õ di, da'ãma 're ana wa'aba mono da hã, danhisada, da te 're 'wasari mono da.
47— Aima 're ropipa uptabi za'ra wa'aba mono di za! E marĩ wa. Adâ'â 'ru hã 'madâ'â ze da, wẽ uptabi na 're 'manharĩ za'ra wa'aba mono wa, 'Re ihâimana u'âsi mono zadawa 'mahârâ'wa norĩ ma hã, tô ta norĩ, aihi'rata norĩ te te 're isimroi mono norĩ ma hã. 48Ãne zarina te 're asihâi'ré za'ra wa'aba mo, aihi'rata norĩ te te 're i'manharĩ za'ra mono zém na ãma 're i'uze za'ra wa'aba mono na hã. E marĩ wa. Aihi'rata norĩ hã ma tô te te 're simro, 'Re ihâimana u'âsi mono zadawa 'mahârâ'wa norĩ hã. Tawamhã a norĩ wa'wa hã i'ru ma tô 're i'manharĩ za'ra wa'aba mo. 49Ãne wa, 'Re ihâimana u'âsi mono hã ma tô tinha tinhimirowaihu'u wẽ na, ãne: “Ĩzadawa 'mahârâ'wa norĩ hã wa za itẽme satõrĩ za'ra, duré ĩmreme wasu'u'wa norĩ zama. Tawamhã nima norĩ hã te za simro za'ra. Nima norĩ ma hã te za duré tãma rob'manharĩ wasété za'ra.” 50Ãne u'âbâ, ãhã na dapodo hã te za wa'âbâ za'ra za, uburé 'Re ihâimana u'âsi mono zadawa 'mahârâ'wa norĩ, da te i'uprosizé hã, 'Re ihâimana u'âsi mono te te i'aropoto mono zém hawi, ãwa bâtâ u hã. 51Abéu idâ'âzém hawi te za tinhana'rata za, Zacaria, da te iwĩrĩzéb u, danhoprubzé, da te 're isa'ra za'ra mono zé wa'wa, 'Re ihâimana u'âsi mono nhorõwa 'ri 'rãihâ me. Tane tô. Tô sena wa za ãne hã aima waihu'u za'ra wa'wa: Ãhã na dapodo hã te za wa'âbâ za'ra za, ã norĩ, da te isimrozé hã.
52— Rowahutu'wa norĩ, aima 're ropipa uptabi za'ra wa'aba mono di za! Rowaihu'u u 're idanhisisi mono zé hã te dawi 're isitob za'ra wa'aba mo. Ãne wa, a norĩ wa'wa hã 're asisisi aba mono õ di. Te duré dawi 're irosawi za'ra wa'aba mo, 're danhisisi mono tõ da hã.
53Tawamhã Zezusi hã ta hawi rob u watobro wamhã, 'Re ihâimana u'âsi mono nhimiroti zahi na rob'ui'éré na dama rowahutu'wa norĩ hã duré farizeu norĩ me, ma tô ãma siwi sãna'rata, isada'rãmi na hã sahi sina. Ma tô siwi sadanha, ahâ na marĩ mono na. 54Ma tô aré sima wẽ za'ra, te te ãma upai wa, taha na iwasédé hã te te ãma hiri za'ra da.
सध्या निवडलेले:
Lucas 11: xavBP
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2011, Wycliffe Bible Translators, Inc.
