ملاکی ۲
۲
کأهینأنَ هوشدأر دٚئن
1 اَی کأهینأن، یهوه صبایوتٚ اَیتأ ایخطأرَ بٚشتأوید:
2 «اگه شٚمٚره عوضَ نوکونید و می نأمَ ایحترأم نٚنید، شٚمٚره سخت موجأزأت کونٚم و اَنٚ عوض کی شٚمٚره برکت بٚدم، شٚمٚره لعن کونٚم. حِئقت اَن ایسٚه کی جٚه هسأ شومأن لعنتٚ جیر ایسأییدی، چونکی می فرمأنأنَ شیمی دیلٚ میأن جأ نٚدیدی.
3 «شیمی زأکأنَ تِنبیه کونٚم و او حیوأنأن کی مِرِه قوربأنی کونیدی پِئنَ پأشأنٚم شیمی دیمٚ رو و شٚمٚره پِئنٚ مأنستَن تأوٚدم بیرون. 4 بأزون فأمیدی هنٚ وأسی اَجور ایخطأر شٚمٚره بوکودم کی شٚمٚره وأگردأنم او دستورأن و قأنونأنٚ ور کی شیمی پیله بابا لأوی‌یَ فأدأ بوم. اَن یهوه صبایوتٚ فرمأیش ایسٚه. 5 قصد جٚه اَ قأنونأن اَن بو کی لاوی نتأجٚ کأهینأنَ زٚندیگی و آرأمی بٚبخشه کی اوشأنٚ انجأم دٚئنٚ اَمرأ نیشأن بٚدد کی می ایحترأم و ترسَ خوشأنٚ دیلٚ دورون دأرٚده. 6 لاوی نتاجٚ کأهینأن رأس‌رأسِی قأنونأنَ قومَ آموج دٚئیدی. نه دورُغ گفتیدی و نه دأغولبأزی کودیدی، بلکی جٚه می رأیأن پیروی کودیدی، اونچی‌یَ کی دوروست بو بٚجأ اَوٚردیدی و خٚیلیأنَ جٚه گونأ وأگردأنِئیدی.
7 «کأهینأن وأستی می قأنونأنَ آموج بٚدد کی مردوم بتأنٚد خودایَ بٚشنأسٚد، چونکی کأهینأن یهوه صبایوتٚ سوخنگو ایسٚد و مردوم وأستی رأنمأیی رِه بأیٚد اوشأنٚ ورجأ؛ 8 ولی شومأن خوداوندٚ رأیأنَ بٚنأیید و بوشؤیید و شیمی رأنمأییأنٚ اَمرأ خٚیلیأنَ جٚه رأستٚ رأ گومرأ بوکودید. شومأن او عهدَ کی لاوی اَمرأ دٚوٚستم، بٚشکنِیید. اَن یهوه صبایوتٚ فرمأیش ایسٚه. 9 هنٚ وأسی، من شٚمٚره مردومٚ چومٚ ورجأ کوچیک و پستَ کونٚم، چونکی می حوکمأنَ ندأریدی و قأنونأنٚ انجأم دٚئنٚ میأن، اینصأفَ ندأریدی.»
خودایَ خیأنت کودن
10 ینی همٚتأ اَمأن جٚه ایتأ پِئر نیئیم؟ ینی همٚتأ اَمأن ایتأ خودا دٚس اَمرأ خلق نوبوستیم؟ پٚس چٚره کس‌کسَ خیأنت کونیمی و او قول و قرأرَ کی خودا اَمی پِئرأنٚ اَمرأ دٚوٚسته‌یَ ایشکنیمی؟ 11 یوهودأ مردوم، اورشلیمٚ میأن و تومأمٚ ایسرأییلٚ سرزیمین میأن خودایَ خیأنت بوکودٚد، ایتأ پیله گونأ بوکودٚد، چونکی یوهودأ مردأکأن بُت‌پرستٚ زنأکأنٚ اَمرأ عروسی بوکودٚد، خوداوندٚ موقدس و قشنگٚ خأنه‌یَ چپلَ کودٚد. 12 خوداوند تومأمٚ اوشأنَ کی اَطؤ بوکودٚد چی کأهین بٚبد، چی کأهین نٚبد، جٚه خو قوم بیرونَ کونِه، هرچن کی یهوه صبایوتٚ رِه قوربأنی پیشکش بوکونٚد.
13 شومأن خوداوندٚ مذبحَ شیمی آرسو اَمرأ پورَ کونیدی، چونکی دِه خوداوند شیمی پیشکشأنَ قوبیل نأرِه و اوشأنَ خوشألی اَمرأ قوبیل نوکونِه. 14 گیدی: «چٚره قوبیل نوکونِه؟» اَنی وأسی ایسٚه کی تی همسرَ کی جوأنی میأن اونٚ اَمرأ وفأ عهدَ دٚوٚسته بی، خیأنت بوکودی و خوداوند کی اَ عهدٚ دوچوکستنٚ شأهید بو، تی خیأنتَ بیدِه. 15 ینی خوداوند تٚرَه تی همسرٚ اَمرأ ایتأ چأنکوده؟ شومأن جأن و روحٚ میأن اونٚ شین ایسید. هسأ، خوداوند جٚه شومأن چی خأیه؟ اون خأیه کی خوداشنأسٚ زأکأن بٚدأرید. پٚس بٚپأیید کی شیمی همسرَ خیأنت نوکونید.
16 یهوه صبایوت فرمأیه: «من جٚه طلأق نیفرت دأرم و هطؤیم جٚه اَنکی اینفر ظولمَ ایتأ رختٚ مأنستَن دوکونه. پٚس شیمی روحأنَ بٚپأیید و جٚه خیأنت دورَ بید» اَن یهوه صبایوتٚ فرمأیش ایسٚه.
دأوری روج
17 شومأن خوداوندَ او حرفأنٚ اَمرأ کی زٚنیدی زلّه کودیدی! وأوٚرسیدی: «کویتأ گبأن؟» اَ گبأنٚ اَمرأ کی گیدی: «او خودا کی اینصأفٚ اَمرأ دأوری کونِه کویَه ایسأ؟ اَنٚ مأنِه کی اون گونأکأرأنَ دوس دأرِه و جٚه اوشأن رأضی ایسٚه!»
सध्या निवडलेले:
ملاکی ۲: GCB
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
The Gilaki Contemporary Bible is a Product of Transform Iran © 2024. All rights reserved. www.kelisayejame.org