ملاکی ۱
۱
1 اَن خوداوندٚ پیغأم ایسٚه کی ایسرأییلٚ رِه ملاکی‌یٚ پیغمبرٚ اَمرأ فأدأ بوبوسته.
خوداوندٚ محبت ایسرأییل رِه
2 خوداوند فرمأیه: «من شٚمٚره همیشٚک دوست بٚدأشتم!»
ولی شومأن گیدی: «تو چوطؤ اَمٚرَه دوس دأشتی؟»
خوداوند فرمأیه: «من شیمی پیله بابا یعقوبَ محبت بوکودم و اَطؤیی نیشأن بٚدأم کی شٚمٚره دوس دأرم، 3 ولی عیسویَ کی اونٚ برأر بو رٚدَ کودم و اونٚ سرزیمینَ کی کوهأنٚ میأن نٚهأ بویَ ویرأنَ کودم و او جیگأیَ بیأبأنٚ شئألأنٚ جأجیگأ چأکودم.»
4 بلکی ادومیأن کی عیسو زأکأن ایسٚد بٚگد: «اَمأن وأگردیم و اَمی ویرأنٚ سرزیمینَ جٚه سٚرنو چأکونیمی.» ولی یهوه صبایوت گه: «اگه اونَ آبأدَ کونٚد من دووأره اونَ ویرأنَ کونٚم. اوشأنٚ سرزیمین "شرورگیری سرزیمین" دؤخأده بِه و اونٚ مردومأن "او قوم کی خوداوند تأ اَبد اَشأنٚ رو غیظ اوسأده"، اَمرأ معروف بٚده.»
5 اَی ایسرأییلٚ قوم، او وخت کی شیمی چومأنٚ اَمرأ اونچی‌یَ کی خوداوند انجأم دِهه بیدینید، گیدی: «رأس‌رأسِی کی خوداوندٚ پیله قودرت اَمی مرزأنٚ اوطرفم بیدِه بِه.»
نأجورٚ قوربأنیأن
6 یهوه صبایوت کأهینأنَ فرمأیه: «پٚسر، خو پِئرَ و غولأم خو اربأبَ ایحترأم کونِه. پٚس اگه من شیمی پِئر ایسٚم می ایحترأم کو؟ و اگه من شیمی اربأب ایسٚم، می حورمت کو؟ شومأن می نأمَ حورمت نٚنأییدی. گیدی: "اَمأن چوطؤ تی نأمَ بی‌حورمت بوکودیم؟" 7 شومأن او زمأت می نأمَ بی حورمت کونیدی کی نأپأکٚ قوربأنیأن، می مذبح رو نیهیدی. هطؤیه، شیمی اَ کأرٚ اَمرأ مٚرَه کوچیکَ کونیدی. 8 شل، کور و نأخوشٚ حیوأنأنَ مِرِه قوربأنی کونیدی. ینی اَن عأیب نییٚه؟ اگه اونَ شیمی حأکیمَ پیشکش بوکودِبید ینی اونَ خوش اَمؤیی و جٚه شومأن رأضی بوستی؟ یهوه صبایوت اَنَ گه.
9 «دوعأ کونیدی و گیدی: "خودایأ، تی دیل اَمِرِه بوسوجٚه! اَی خوداوند، تی لوطف اَمی رو بٚمأنه!" ولی او وخت کی اَجور پیشکشأن اَوٚریدی، چوطؤ رأفأ ایسأیید کی شیمی دوعأیَ ایجأبت بوکونٚم؟» اَن یهوه صبایوتٚ فرمأیش ایسٚه.
10 یهوه صبایوت فرمأیه: «کأشکی ایتأ جٚه شومأ کأهینأن، درأنَ دٚوٚسته‌بی کی اَجور پیشکشأنَ نٚند می مذبح رو. جٚه شومأن رأضی نییٚم و شیمی قوربأنیأنَ قوبیل نوکونٚم.
11 «می نأم دونیأ دورون جٚه اَسٚر تأ اوسٚر اوشأنی کی یوهودی نییٚدٚ اَمرأ ایحترأم بٚنأ بِه و اوشأن می نأمٚ ایحترأمٚ رِه خوش عطرٚ بوخور سوجأنٚده و پأکٚ قوربأنیأن پیشکش کونٚده. هطؤیه، اوشأن می نأمَ فرأوأنٚ ایحترأمٚ اَمرأ خأطر اَوٚرٚده. اَن یهوه صبایوتٚ فرمأیش ایسٚه. 12 ولی شومأن می نأمَ بی‌حورمت چأکونیدی و می مذبحَ نجسَ کونیدی، چونکی نجسٚ غذأ اونٚ رو نیهیدی. 13 یهوه صبایوت فرمأیه: شومأن گیدی: "خوداوندَ خیدمت کودن سختٚ کأر ایسٚه و آدمَ بٚتنگ اَوٚره" و جٚه می دستورأن تٚمرود کونیدی. بودوزأنه بوبوسته، شل و نأخوشٚ حیوأنأن مِرِه قوربأنی کونیدی. ینی فیکر کونیدی من اوشأنَ جٚه شیمی دٚس قوبیل کونٚم؟ 14 اونی کی بٚخأیه مٚرَه گول بٚزنه رو لعنت بأیٚه و هطؤیم نذر بوکوده کی ایتأ سأقٚ سألیمٚ قوچ جٚه خو گله پیشکش بوکونه، ایتأ نأخوشٚ حیوأن مِرِه قوربأنی بوکونه. چونکی یهوه صبایوت فرمأیه: من پیله پأدیشأ ایسٚم و دونیأ مردوم وأستی می ایسمَ ترس و ایحترأمٚ اَمرأ خأطر بأوٚرد.»
सध्या निवडलेले:
ملاکی ۱: GCB
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
The Gilaki Contemporary Bible is a Product of Transform Iran © 2024. All rights reserved. www.kelisayejame.org