Matius 10
10
Yesu mangkobu: sampulo: idua pasikolaNa
(Mrk. 3:13-19, Luk. 6:12-16)
1Nai anto, Yesu manghàngo sampulo: idua pasikolaNa mukobu:. Na panghenginna‑ming kuasa mampasahu dihata bulituku pang mampumatalete: tau nai nasang sai pang ung si sala-salaang. 2Kona:-konana sampulo: idua pasikolaNa to ung miluhali ung Na tonnoꞌ dea‑mo, ung parrara, Simon ung nikonai: ho teng Petrus pang Andreas mantàdina, anakàna Sebedeus dea‑mo Yakobus pang Yohanes, 3Pilipus, Bartolomeus, Tomas, Matius tupassima, Yakobus anakàna Alpeus, Tadeus, 4Simon nai kalompoꞌ Patriot, pang Yudas tu Kariot ung mambalòka Yesu.
Yesu mampantuyu sampulo: idua pasikolaNa
(Mrk. 6:6b-13, Luk. 9:1-6)
5Sampulo: idua tau to, na pantuyu Yesu pang Na pasakiꞌ teꞌ, “Hau mao‑kang se i kaoneangna ung dang dea tu Yahudi. Hau mintama‑kang se ho i lipuna tu Samaria. 6Sangadinna, nao: se teng i domba-domba ung hùling, dea‑mo tu Israel. 7Pakareba‑ko se mao i dei: se moa teꞌ na rara‑mo Puang ti muparenta. 8Pumatalete:‑ko se ti tau ung mipanaꞌ, patuho: ti tau ung mate, papàda: ti tau ung balala pang pasahu ti dihata bulituku. Nasang to u tarima mahulo: se. Jadiꞌ, pehea mahulo:‑ko dosse: ho.
9Hau mambaha se seeng bulahang, seeng peraꞌ, dea‑raka seeng tembaga i salipiꞌmu se.*#10:9 Salipiꞌna‑i se miluhali ho pangànaang seengna‑i se. 10Hau mambaha pangànaang aka-aka i laling pammulaoangmu se, pipasònoꞌ, sapatu dea‑raka doke:, sàbaꞌ tau ung mingkamaꞌ sipatu:‑da nituhoi:.
11Ìna u mallapiꞌ se lipu:, okaꞌ ti tau ung masannang mantarima‑ko se. Leta:‑ko se one: deaꞌ u mampalii: se lipu: to. 12Tempo u mintama se i besa rasang, konai:‑ko se teꞌ, ‘Na Puang‑rangmo mampasakke‑ko se.’ 13Ìna tau i rasang to mantarima‑ko se, eloꞌna‑mo pasakke to leta: i tanandapoꞌ to. Hampoꞌ ìna ha na tarima‑ko se, baꞌ eloꞌna‑mo pasakke to sumule: mao i dio se. 14Pang ìna ara tanandapoꞌ dea‑raka lipu: ung dang mantarima pang mampisàdìngi‑ko se, tupai: ti ahu nai kokoꞌmu se pang palii: ti kaoneang to. 15Matantu te ung Ku pusua: matung e teꞌ Tempona nasang tau niparessaa, tu Sodom pang Gomorra làbi marìngànga‑da ti hukungangna‑i se nai none: tau i lipu: to!”
Kamasussaang ung bùruꞌa
(Mrk. 13:9-13, Luk. 21:12-17)
16“Pisàdìngi‑ko se! U Ku pantuyu se mène: domba mao i àlaꞌ-àlaꞌna serigala. Deanna‑mo to, belo: u paìsang se mène: talubammaꞌ hampoꞌ mapangae: mène: kudaꞌ merpati. 17Tokana‑ko se, sàbaꞌ u nitingkànga se pang nibaha mao i heleꞌna ung si nipiama: pang nisasa: i tamming-tamming kapinombaang. 18U nibahaa se ho mao i heleꞌna ampu parenta pang datu:-datu: sàbaꞌ u pasikolaKu se. Pang dea‑mo to ti kanàha: mao i dio se mampatidolu passabiimmu se mao i dei: se pang mao i tau sintàna: ung dang dea tu Yahudi. 19Hampoꞌ tempona u nibaha se mao niparessa, hau mariaꞌ se aka ti ung parallu u konai: dea‑raka mangaka ti sùmummu. Sàbaꞌ aka ti ung parallu u konai: se to, u nipaìsàngia se tempo to ho teng, 20sàbaꞌ sua: ung nu pusua: se to, handei:‑da suamu se pòteng, sangadinna ung bùruꞌ‑da nai Pinanahanna Ama: i suruga mangola: dio se.
21Araa tempona tau ung dang mupatongang mampehea pulengkeꞌna ung mupatongang nipatei. Mène: ho ama: mao i anakàna, pang anaka mao i tudolunna. 22Pang boso: tau mampukàràngo: se sàbaꞌ konaKu. Hampoꞌ tau ung mantokaꞌ pàraꞌ kapatongangangna deaꞌ i katampàkangna, nipasalamaꞌa. 23Ìna u nisolàngi se i besa lipu:, malai‑ko se mao i lipu: sintàna:. Sàbaꞌ matantu te ung Ku pusua: matung e teꞌ Tempona u mallelei se nasang lipu:-lipu: i Israel mampukauꞌ kamaꞌangmu se, ha lòsoꞌ‑mi mupatongang, Anaka Tulino bùruꞌa‑moda.
24Hari:‑da pasikola ung milàbi nai tunggurunna, pang hari:‑da kaunang ung milàbi nai tuangna. 25Kànaꞌ‑mo ìna pasikola nipasibali tunggurunna, pang kaunang nipasibali tuangna. Ìna Koi: ung miluhali ama: i tanandapoꞌ nipusua: kadetu moa teꞌ, ‘Beelsebul,’*#10:25 Beelsebul, kona: sintàna: mampatu: Datuna dihata bulituku. Hele ho i Kamus. deaa‑mo kang dio se.”
Kariaꞌ ti Puang
(Luk. 12:2-7)
26“Moi mène: to, hau mariaꞌ mao i tau to‑i se. Sàbaꞌ hari:‑da ung titanaꞌ ung dang nipupiitaa, pang hari:‑da ung nihuni‑ing ung dang niìsànga. 27Aka ti ung Ku pusua: matung i tunininna, parallu u toleng se i heleꞌna tau boso:.*#10:27 i tunininna. Sua: Yunani i makarinningna, pang i heleꞌna tau boso:, sua: Yunani i masilaona. Pang aka ti ung ninenik‑ingko se, pikakoang‑rànging nai iaho atuꞌna rasang. 28Hau mariaꞌ se mao i tulino ung hela mampatei kalae: hampoꞌ ha hela‑i mampatei pinanaha. Sangadinna, kariaꞌ ti Puang ung hela massolàngi kalae: pang pinanaha i naraka.
29Idua kakalong hela teng nibalaꞌ besa‑i seeng ung kàle: i hoiꞌ. Na moi mène: to, hari:‑da moi besa ung hela mate i dang dei: pampuinahanna Ama: i suruga. 30Dukanna bahulaka i bakàmu se pang, Na ìsang‑da nasang ti bosona. 31Deanna‑mo to, hau mariaꞌ se! U làbi kianggaꞌna dosse: nai kakalong ung boso:.”
Miampu mao i Yesu i heleꞌna tau boso:
(Luk. 12:8-9)
32“Isai-sai ti ung mangakui‑Kaꞌ i heleꞌna tulino, Ku akuia‑ko ho i heleꞌna AmangKu i suruga. 33Hampoꞌ isai-sai ti ung mampissangkaꞌ‑ingNaꞌ i heleꞌna tulino, Ku pissangkaꞌing‑ko ho i heleꞌna AmangKu i suruga.”
Yesu mampabùruꞌ kasisaràkang i àlaꞌna tulino
(Luk. 12:51-53, 14:26-27)
34“Hau moa se teꞌ Ku bùruꞌ i lino tee mambaha kadameang. Ha mai‑Kaꞌko mambaha kadameang, sangadinna mampabùruꞌ kasiponiang, 35na urungang
‘anaka muane mangeba amanna,
anaka bahine mangeba inanna,
pang anaka muaneang bahine mangeba siranna bahine.’
36Jadiꞌ,
‘ung miluhalia ponina tau dea‑mo nai tanandapoꞌna teng.’*#10:35-36 Mi. 7:6.
37Tau ung làbi mampulemu amanna dea‑raka inanna nai Koi:, ha sipatu:‑i miluhali taungKu. Mène: ho ti tau ung làbi mampulemu anakàna muane dea‑raka bahine nai Koi:. 38Pang tau ung dang mangkoha: oròngangna pang mangulaꞌ‑Kaꞌ, ha sipatu:‑i miluhali taungKu. 39Tau ung mantokaꞌ pàraꞌ katuhoangna i lino tee, kahùlìngànga katuhoangna. Hampoꞌ tau ung marìngang kahùlìngang katuhoangna sàbaꞌ Koi:, mangkoraia katuhoang ung tongang.”
Kamaupaꞌang nai mampukauꞌ ung belo:
(Mrk. 9:41)
40“Tau ung mantarima‑ko se, sibali mantarima‑Maꞌ. Pang tau ung mantarima‑Kaꞌ, baꞌ mantarima‑da ho Dea ung mampantuyu‑Maꞌ. 41Tau ung mantarima besa nabi sàbaꞌ ìnang nabi‑da, mantarimaa‑da ho upaꞌna nabi. Pang tau ung mantarima besa tau ung belo: sàbaꞌ ìnang belo:‑da, mantarimaa‑da ho upaꞌna tau ung belo:. 42Pang isai-sai ti ung mampulemu besa tau ung i hoiꞌ tee sàbaꞌ mangulaꞌ‑Kaꞌ, moi mampaenung pòteng sangenùngang uhai kehiꞌ mahulo:, matantu te ung Ku pusua: matung e teꞌ Ìnang mangkoraia‑da ho kamaupaꞌang.”
सध्या निवडलेले:
Matius 10: skx
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
