Matius 11
11
1Tòna ladu‑mo mupasakiꞌ ti Yesu mao i sampulo: idua pasikolaNa, Yesu pang pasikolaNa sarungilaꞌ mao mupaturo: pang mampakareba Kareba Belo: i lipu:-lipuna tu Yahudi i pangalanna Galilea.
Yesu musua: mampatu: Yohanes Pumpudoiꞌ
(Luk. 7:18-35)
2Tempo to, Yohanes ung i laling putarungkuꞌang massàding kamaꞌangna Datu: Pipasalamaꞌ. Jadiꞌ, mampantuyu pira-pira pasikolana mao i Yesu 3mingkutiki teꞌ, “Kinta:‑mo naꞌ ti ung bùruꞌa siulaꞌ ung na àluꞌ Puang? dea‑raka parallu ki mangahong tau sintàna:.”
4Na sùmui Yesu teꞌ, “Sumule:‑mo: se mao i Yohanes pang padeaꞌ‑ingko se aka ti ung nu sàding pang ung nu ita‑mo se, 5mènena tau ung buta miluhali paita, ung na kosu mammulao, ung balala pàda:, ung pidaꞌ pasàding, ung mate tuho: pole, pang Kareba Belo: nipakareba mao i tau ung mase-mase.*#11:5 Nabi Yesaya mampupihuyang‑mo moa teꞌ nasang te na pukauꞌa Datu: Pipasalamaꞌ. Hele i Yes. 35:5-6, 61:1. Ìna bùruꞌ‑mo ti sùmunna Yesu, Yohanes Pumpudoiꞌ mangkalehaia aka ti ung na pupihuyang nabi Yesaya to. Hele ho i Luk. 4:16-21. 6Maupaꞌ ti tau ung dang bata-bata mao i Koi:.”
7Tòna lumao‑mo ti pasikolana Yohanes, musua:‑mo ti Yesu mao i tau boso: mampatu: Yohanes teꞌ, “Aka ti ung nu hele se mao i padang ung tunini? U àna: se naꞌ ti tau to mène: làmaka ung na saui? 8I dang mène:‑i to, aka ti ung nu hele se mao? Manghele naꞌ tau ung mipakeang malumu? Baꞌ tau ung mipake mène: to, one:‑da i tamming kadatuang. 9Jadiꞌ, aka pu u mao se i padang ung tunini? Mao naꞌ manghele nabi? Baꞌ tongang‑da ti to, mala làbi parodo‑da nai nabi. 10Sàbaꞌ Yohanes dea‑mo to ti ung nipatu: i Suraꞌna Puang teꞌ,
‘Hele, Ku mampantuyu suroKu mampidolung‑ingKo,
ung mampumasilosoing‑Ko dalang i heleꞌMu.’*#11:10 Mal. 3:1, Kel. 23:20.
11Matantu te ung Ku pusua: matung e teꞌ I lino tee hari:‑da tau ung làbi iaho nai Yohanes Pumpudoiꞌ. Hampoꞌ moi mène: to, na rara to u mupatongang se mao i Koi:, tau ung si i hoiꞌ i àlaꞌna taunna Puang, làbi iaho‑da ti pasakkena nai Yohanes.*#11:11 Handei: palleona moa teꞌ ara i kalaena pasikolana Yesu ung iaho nai Yohanes Pumpudoiꞌ. Sangadinna, kadatuang suruga‑da ung na patèdeꞌ Puang Yesu i laling pangàluꞌ baru ti ung iaho nai ung dolung, dea‑mo alukùna tu Yahudi. Hari:‑da pasakke ung na ola: Yohanes ung sibali ti ung na pirasai pasikolana Puang Yesu. 12Songka: Yohanes mingèneꞌ mampakareba kadatuang suruga deaꞌ i latenna, kadatuang suruga na eba tau ung mangokaꞌ dalang marrampaꞌi kuasa i kadatuang to.*#11:12 na eba tau ung mangokaꞌ dalang marrampaꞌi kuasa i kadatuang to. tau i laling tassereꞌ to mampatu: ponina Puang, mènena tu Parisi. Ara ho tassereꞌ sintàna: na pintamai tau ung harani mangeba poni:. tau i laling tassereꞌ te mampatu: tau ung mukaenang mampukauꞌ pampuinahanna Puang, mènena Yohanes Pumpudoiꞌ. Mahulona i sua: Yunani dea‑mo, nipilabui: nikatamai, na ala tau ung harani. 13Sàbaꞌ Suraꞌ Musa pang nasang Suraꞌ Nabi-nabi deaꞌ kabùruꞌangna Yohanes, mampupihuyang aka ti ung bùruꞌa. 14Pang ìna u mio: se mampatongang, Yohanes dea‑mo to ti ung nikonai: Elia, ung bùruꞌa to ha bùruꞌ‑mi ti Datu: Pipasalamaꞌ.*#11:14 Nabi Maleaki (4:5) mampupihuyang‑mo moa teꞌ hang bùruꞌ‑mi ti Datu: Pipasalamaꞌ, nabi Elia nipantuyua mao i lino. Handei: palleona moa teꞌ kàle: Elia ti ung bùruꞌa, sangadinna besa nabi ung mène: Elia. Na pumakàso: Yesu i ante moa teꞌ Yohanes Pumpudoiꞌ‑mo ti nabi to. 15Isai ti ung kitalinga, na pisàdìngi‑i!
16Aka ti ung Ku pasikantereànging te tau i latenna e? Mène:‑i se anaka ung one: pai pangàloang*#11:16 pangàloang. Sua: Yunani pasaꞌ. I laling lipu: tempo to, anaka biasa lumao i pasaꞌ mutumma: pang missola:. ung na kakoàngi sola:-solana 17teꞌ,
‘U ki putulali‑ing se,
hampoꞌ hang mio:‑ko se minariꞌ.
U ki puhonta:‑ing se honta: kamasussaang,
hampoꞌ hang pola:‑ko se mauhai mata.’
18Na puhùla‑i se. Sàbaꞌ Yohanes bùruꞌ hang manne:‑ida pang hang menung‑i mène: ung biasa nipukauꞌ, pang na konai:‑i se teꞌ, ‘Na katama‑da dihata bulituku.’ 19Ladu nai anto, Anaka Tulino bùruꞌ. Na puhùla‑i se ho, sàbaꞌ tùrung‑Da teng manne: pang menung. Musuana‑mi se ho teꞌ, ‘Hele‑ko se ti Tau too. Salli anne:, lallilìngang, solana tupassima pang tau sintàna: ung si madosa.’ Hampoꞌ na moi mène: to, tangaꞌ ung belo: nai Puang nipupiita nai pingkuheoꞌ-heoꞌna.”
Lipu:-lipu: ung dang mupatongang
(Luk. 10:13-15)
20Nai anto na rara‑mo Yesu ti marràho lipu:-lipu: ung kàle: pimboso: Na kaonei: mampukauꞌ kalle-kalleang, sàbaꞌ hang mingkatobaꞌ‑i se. 21Na konai: teꞌ, “Tu Korasim, u masolang dosse:! Pang tu Betsaida, u masolang dosse: ho! Àla: ung nipukauꞌ‑ida i Tirus pang i Sidon ti kalle-kalleang ung nipukauꞌ‑mo i àlaꞌ-àlaꞌmu se, manassa tau i anto masai‑moda mingkatobaꞌ nai dosa-dosanna‑i se pang mipake pakeang kamasussaang na pasianu mamparrauꞌi ahu dapoꞌ bakàna‑i se. 22Ku pusua: matung teꞌ, Tempo Àlona Puang, na moi ha mingkatobaꞌ‑i ti tu Tirus pang tu Sidon, làbi marìngànga‑da ti hukungangna‑i se nai dio se.
23Pang dio se tu Kapernaung, u konai: se naꞌ u nilantoing se deaꞌ i suruga? Hari:‑da! U niuluꞌa dosse: sule: mao i naraka! Sàbaꞌ àla: nipukauꞌ‑mi i lipu: Sodom ti kalle-kalleang ung nipukauꞌ‑mo i àlaꞌ-àlaꞌmu se, àla: leta:‑da maang deaꞌ i latenna ti Sodom. 24Ku pusua: matung teꞌ, Tempo Àlona Puang, na moi ha mingkatobaꞌ‑i ti tu Sodom, làbi marìngànga‑da ti hukungangna‑i se nai dio se.”
Hàmo: se
(Luk. 10:21-22)
25Tempo to, musumbayang ti Yesu teꞌ, “O Ama:, Ampunna langiꞌ pang lino, Ku mukurusumangaꞌ matung sàbaꞌ pipaturo: mampatu: kadatuangMu U huni‑ing mao i tau ung mangàna: kalaena kitangaꞌ belo: pang manarang, hampoꞌ U pupiita mao i tau ung i hoiꞌ pinanaha. 26Dea‑moda to ti ung tongang Ama:, sàbaꞌ mène:‑mo to ti ung mampumasannang pinanahamMu.”
27Ladu to, musua: ti Yesu moa teꞌ, “Nasang angkanna Ku na patongang‑ming AmangKu. Hari:‑da moi besa tau ung mangìsang Anaka sangadi Ama:. Pang hari: ho ung mangìsang Ama: sangadi Anaka pang tau ung Na pirarai:. Anaka‑da teng ti ung mampupiìsang Ama: mao i dei: se.
28Hàmo: se nasang ti ung àsaꞌ pang ung massàding matìmi kohaangna, Ku hengi‑ingko se kapillìheang. 29Ulaꞌ‑ko se ti parentangKu*#11:29 Ulaꞌ‑ko se ti parentangKu. Sua: Yunani Ala‑ko se pang pasang ti pasangangKu i kalaemu. Pasangang dea‑mo parewa oloꞌ-oloꞌ, mènena sapiꞌ, ung nilanto‑ing i kalokina nipake marriuꞌ ung matìmi. Palleona ho, manuruꞌ mao i aka ti ung nipakohai:‑ing. Nai dolung, sua: “mambaha pasangang” miluhali besa sua: pampasulepaꞌangna tu Yahudi ung manturo: mantoroꞌi atorang-atorang Musa. pang mikuru‑ko se nai Koi:, sàbaꞌ Koi: tee Tau ung malumu pang ung i hoiꞌ pinanaha. Pang nai anto u mangkoraia se kabeloang. 30Sàbaꞌ parentangKu mi pumasannang, pang kohaang ung Ku pakohai:‑ingko se marìngang.”
सध्या निवडलेले:
Matius 11: skx
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
