Matius 9
9
1Nai anto, Yesu millanto i lemmang màli: na heteꞌ tasiki sumule: mao i pangkaoneiNa, i Kapernaung.
Yesu mampumatalete: besa tau ung na kosu
(Mrk. 2:1-12, Luk. 5:17-26)
2Ara pimbesa, tau i Kapernaung mambaha mao i Yesu besa tau ung na kosu niloling i ale:. To na ita‑mo Yesu ti kapatongangangna‑i se, musuaNa‑mi mao i tau ung na kosu to moa teꞌ, “O anàKu, pumasannang ti pinanahammu, sàbaꞌ nipantengkai:‑ming ti kasalaangmu.”
3Aranna‑mi pira-pira ung si manarangna i aluku tu Yahudi i anto mingkutiki i laling pinanahanna‑i se moa teꞌ, “Tau tee mampaihoiꞌ Puang!”
4Hampoꞌ na ìsang Yesu ti tangaꞌna‑i se, jadiꞌ Na konai: teꞌ, “Aka pu u mantangaꞌ kadetu se i laling pinanahammu se? 5Umma ti ung madàli, mampusua: teꞌ, ‘Kasalaangmu nipantengkai:‑ming’? dea‑raka, ‘Tèdeꞌ‑mo:, pang mammulao‑mo:!’ 6Hampoꞌ mangking u ìsang se moa teꞌ i laling lino tee makuasa ti Anaka Tulino mampantengkai:‑ing dosa” — musuaNa‑mi mao i tau ung na kosu to teꞌ — “Tèdeꞌ‑mo:! Lolong‑mi ti alemu pang sumule:‑mo:.”
7Tèdeꞌna‑mi ti tau to pang malai mao i rasangna. 8To na ita‑mi se tau boso: ti aka to, mariaꞌ‑i se pang mampaiaho Puang, sàbaꞌ Puang manghengi‑ming kuasa ung mène: to mao i tulino.
Matius mangulaꞌ Yesu
(Mrk. 2:13-17, Luk. 5:27-32)
9Tòna malai‑mo nai kaoneang to ti Yesu, mangita besa tupassima ung nikonai: Matius, mesong i kantoroꞌ sima.*#9:9 Kamaꞌangna tupassima dea‑mo mangkobu: pira-pira laoangna sima mao i ung muparenta tu Roma. Tu Yahudi mampukàrang tu Roma, sàbaꞌ makuasa i lipuna‑i se, pang tupassima, moi tu Yahudi, niàna: solana tu Roma. Deaa‑mo kang tiꞌ, boso: tupassima ha mahulo:‑i, sàbaꞌ na alaꞌi ti sima ung na kobu:. Manuruꞌ aluku, tupassima niàna: ho tau ung burere, sàbaꞌ àlo-àlo missola: i tau ung dang dea tu Yahudi i rasangna‑i se. Musuana‑mi ti Yesu teꞌ, “Hàmo:, ulaꞌ‑Kaꞌ.” Tèdeꞌna‑mi pang mangulaꞌ‑I.
10Nai anto, tòna tarrang maturu manne:*#9:10 maturu manne:. Kabiasaangna tu Yahudi manne: i pampukauꞌ dea‑mo maturu osoko murisiu. Tempona Yesu manne: Paska sola: pasikolaNa, manne:‑i se ho mène: te. Hele i Yoh. 13:25. ti Yesu pang pasikolaNa i tammingna Matius, boso: ti tupassima bùruꞌ pang tau sintàna: ung niàna: si madosa, pola: manne:. 11Aranna‑mi tu Parisi ung mangita aka to pang mingkutiki mao i pasikolaNa teꞌ, “Oꞌ, aka pùna manne:‑da sola: tau ung si madosa, dea‑mo tupassima pang tau sintàna: ti tunggurummu se?”
12Na sàding Yesu ti pingkutìkangna‑i se to, pang Na sùmui teꞌ, “Handei:‑da tau ung matalete: ti ung mamparallui pumpakuli:, sangadinna tau ung mipanaꞌ‑da. 13Tie:‑mo e, nàmo: se pang pikurui ti sua: i Suraꞌna Puang ung moa teꞌ, ‘Ung Ku kapelai:, lammoroꞌ besa dea‑mo sipulemu, handei:‑Ko teng pimmalaꞌ.’*#9:13 Hos. 6:6. Sàbaꞌ hang bùruꞌ‑Kaꞌko mai manghàngo tau ung mangàna: kalaena tongang, sangadinna tau ung mangakui kalaena madosa.”
Yesu mampipaturo:‑ing mangaka ti mapuasa
(Mrk. 2:18-22, Luk. 5:33-39)
14Nai anto, bùruꞌ ti pasikolana Yohanes Pumpudoiꞌ mao i Yesu pang mingkutiki teꞌ, “Aka pu ki mapuasa‑ka sola: tu Parisi, pambàtiꞌ pasikolaTa hari:?”
15Na sùmui Yesu teꞌ, “Tempona pampukauꞌ kasilopàkang, masussa naꞌ ti tau ung si nihàngo? Manassa hari:! Hampoꞌ araa tempona to lopaka muane niala makarraꞌ nai àlaꞌna‑i se. Onea‑rang i anto, na mapuasa‑i se.
16Hari:‑da tau ung mampatapei: kayaꞌ ung manno: mampake pantariꞌang ung hola: ung dang niase:‑kang, sàbaꞌ tikùròka‑da i da niase:‑kàngi, mambùruꞌ‑ing sa: baluaꞌ-luaꞌna ti maseuna. 17Mène: ho ti anggoroꞌ ung màle. Hari:‑da tau ung mangàna: mao i kantong kuliꞌ ung manno:‑mo, sàbaꞌ sàpaa ìna sumangkaꞌ, mambùruꞌ‑ing nai iduanna maruki. Jadiꞌ, anggoroꞌ ung baru parallu‑da ho niàna: i kantong kuliꞌ ung baru. Ìna mène:‑mo to, nai iduanna salamaꞌ.”*#9:16-17 Dang sileona ung na rampe Puang Yesu i laling idua sua: tee manturo: sisalana i àlaꞌna pipaturoNa pang atorang aluku tu Yahudi ung nai dolung, ung na toroꞌi maang pasikolana Yohanes Pumpudoiꞌ. Belo:‑da sule: Puang Yesu mampatèdeꞌ aluku ung màle, nai none: mambàli: pòteng alukùna tu Yahudi.
Anakàna ketua jamaa pang Bahine ung mangerong kayaꞌna Yesu
(Mrk. 5:21-43, Luk. 8:40-56)
18Tòna tarrang musua: ti Yesu mao i pasikolana Yohanes, bùruꞌ ti besa tau, dea‑mo ketua jamaa i anto. Mukalimuntuꞌ tumunnuku i heleꞌna Yesu pang musua: teꞌ, “Anakàku bahine màli: mate. Hampoꞌ mai‑ingnaꞌko manghele mangking tuho: pole.”
19Tèdeꞌna‑mi ti Yesu pang lumao sola: tau to. Pola: ho ti pasikolaNa.
20Tempo to, i lummu: dalang ara besa bahine ung sampulo:‑mo idua heaꞌna masainna na leo: miraa: morai tùrung-tùrung. Nai keboꞌ mao mandùkuꞌi Yesu pang mangerong ammerona kayaꞌNa. 21Sàbaꞌ na tangaꞌ teꞌ, “Asalang ku erong teng ti kayaꞌNa, ku mataletea‑moko.”
22Tempo to, misaile: ti Yesu pang mangita bahine to. MusuaNa‑mi teꞌ, “Matana‑ko anàKu! Kapatongangangmu mampasalamaꞌ‑mo:.” Tempo dea ho teng to, bahine to matalete:.
23Deaꞌna‑mi ti Yesu i tammingna ung nipiama: to. Tòna mangita‑mo tau ung mutulali pang tau boso: ung mitaru, 24musua:‑mo mao i dei: se teꞌ, “Missòhong‑ko se, sàbaꞌ anaka tee ha mate‑ida, sangadinna letona‑da teng.”
Hampoꞌ na patahai‑i se. 25Tòna missòhong‑mi se, mintama ti Yesu i kamaraꞌ pang mantokaꞌ kangkangna anaka to. Na patèdeꞌna‑mi. 26Kareba to dumallaꞌ i nasang lipu:-lipu: pai anto.
Yesu mampumatalete: idua tau ung buta
27Tòna malai‑mo nai anto ti Yesu, i lummu: dalang ara idua tau ung buta ung mangulaꞌ‑I. Mikakoang‑i se teꞌ, “O Tuang, Hatiꞌna Daud, pulemu‑kangka!”
28Tòna mintama‑mo ti Yesu i rasang ung Na patui:, idua tau ung buta to mandùkuꞌi‑I. Na kutikìna‑mi Yesu teꞌ, “U Mi patongang se naꞌ teꞌ Ku hela mampukauꞌ ti?”
Na sùmui‑i se teꞌ, “Ayyo Tuang, ki patongang.”
29Na tokaꞌna‑mi Yesu ti matanna‑i se Na pasianu musua: teꞌ, “Nipukauꞌ‑rangmi siulaꞌ kapatongangangmu se.” 30Paitanna‑mi se. Na apuꞌna‑mi tungka Yesu moa teꞌ, “Hau pusua:-sua: se mao i isai-sai pòteng.”
31Hampoꞌ tòna missòhong‑mi se, mai: se sule: mampadumallaꞌ kareba to i nasang lipu:-lipu: pai anto.
Yesu mampumatalete: tau ung bebe
32Tòna malai‑mo ti idua tau ung buta to, ara besa tau ung na pabebe dihata bulituku nibaha mao i Yesu. 33Na pasahunna‑mi Yesu ti dihata bulituku to, pang tempo dea ho teng to, tau to musua:‑mo pole. Tau boso: mimàha pang musua: moa teꞌ, “Hara‑mangka mangita te ung mène: tee i Israel!”
34Hampoꞌ tu Parisi mangkonai: teꞌ, “Ah! Datuna‑da dihata bulituku ti ung mampanghengi‑ing kuasa mampasahu dihata bulituku.”
Yesu malemu manghele tau boso:
35Mène:‑mo to ti Yesu mingkuliling i nasang lipu:-lipu: mupaturo: i tamming-tamming kapinombaang, mampakareba Kareba Belo: mampatu: kadatuang suruga. Mampumatalete: tau ung si mipanaꞌ nai nasang sai pang ung si sala-salaang. 36Tòna manghele tau boso: to, Na pulemu sàbaꞌ masussa‑mi se pang maranaka mène: domba ung dang ara pikuyaꞌna. 37Musuana‑mi ti Yesu mao i tau ung mangulaꞌ‑Mi teꞌ, “Linamung ung kanikìtiꞌangna‑mo*#9:37 Linamung ung kanikìtiꞌangna‑mo, palleona, tau ung tuhangka‑mo pinanahanna mupatongang. maranga‑da ìnang hampoꞌ sangkìdoꞌ‑i ti ung mangkìtiꞌ. 38Deanna‑mo to, palau‑ko se mao i Ampunna kinete: mangking mampantuyu ho tau sintàna: mao mangkìtiꞌ i kineteNa.”
सध्या निवडलेले:
Matius 9: skx
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
