Markus 3
3
Yesus nampakauri tauna tempo eo Pentuua to Yahudi
(Mat. 12:9-14; Luk. 6:6-11)
1Hangkani tempo, i eo Pentuua to Yahudi, rau muimi Yesus i hou pepueara to Yahudi. Tempo ee mai naria hadua tauna to namate hamika palena. 2Bahangkua dua tauna to naria i hee nangkamata bongo-'I, baka Napakauri tauna tempo eo Pentuua, bona ane Nababei'i, mariami dalara mampahalai-'I. 3Yesus nangulika tauna to namate hamika palena ee, “Maimoko, mokangkore i lentongo hei.” 4Napu ee Yesus nampekunera tauna to naria i hee, “Napa to mamala rababei tempo eo Pentuua, to nabelodi, ba to nadaadi? Mampatulungi taunadi ba mampatehi taunadi?” Naupawee momara hema nehono.
5Yesus nampanaara hante hodo-Na, naupawee najuu rara-Na apa neliu gaga kakoo rarara. Napu ee, Yesus nangulika tauna to namate hamika palena ee, “Ulumi palemu.” Laiuluna mpuumi tauna ee palena, pade ngkali naurimi hakina. 6Napu ee nehuwuramo to Farisi ee lako hou pepuea pade rau nolibu hante tauna to nopahamika hi Magau Herodes, mampali dala bewa mampatehi Yesus.
Yesus nampakauri nadea tauna
7Naliu ee, Yesus hante ana-ana guru-Na rau nopatani i wiwi rano, pade nadea mpuu tauna lako tana Galilea nantuku-'I. Nadea moto muira to lako tana Yudea, 8lako ngata bohe Yerusalem, lako tana Idumea, lako dipo Ue Yordan pade lako humpii ngata bohe Tirus pade Sidon. Humawee tauna ee mai narata hi Yesus, apa ieperami humawee baraka to laibabei-Na. 9Yesus nantudura ana guru-Na mampahadiaka-'I hangu duanga bona tauna to nadea ee momara mampatuhuni-'I. 10Apa nadea mpuumi tauna to laipakauri-Na, etu pade humawee tauna to naria hakira nonegompa-gompa mampadama-'I bona maurira. 11Pade butu ngkanina anudaa nampanaa-'I, notingkodura i tingoo-Na pade nongare, “Iko Ana Alatala.” 12Naupawee laitagi-Na mpuura anudaa ee bona nemo rakewora hi tauna, hema-'I kakonona.
Yesus nangkio hampulu rodua rasul
(Mat. 10:1-4; Luk. 6:12-16)
13Napu ee Yesus nanake i hangu bulu pade nangkiora tauna to ipodota-Na Napakawali ana-ana guru-Na, pade narataramo hi Yesus. 14Laipelihi-Naramo hampulu rodua tauna to ikahangai-Na rasul#3:14 Rasul batuana: huro Alatala. mampodohe-'I pade Nahuro mangkarebai Kareba Belo hi tau ntanina, 15pade laiwaika-Nara baraka mampopalai anudaa.
16Hangara to hampulu rodua to ipelihi-Na ee mai, Simon to laikahangai-Na Petrus. 17Yakobus hante Yohanes ana Zebedeus. Ana Zebedeus eira laikahangai-Na Boanerges, batuana: Ana Berehe. 18Andreas, Filipus, Bartolomeus, Matius, Tomas, Yakobus ana Alfeus, Tadeus, Simon lako kahiromua Zelot,#3:18 Zelot ei hanga kahiromua to Yahudi to nampaewa to poparenta Roma. 19pade kahuduana, Yudas Iskariot to mampobalu Yesus mei.
Yesus pade Beelzebul
(Mat. 12:22-32; Luk. 11:14-23)
20Napu ee Yesus nehua i rara hou. Nadea tauna nahiromu, alaana Yesus hante ana-ana guru-Na momami naria logara mangkoni. 21Tau-tauna nanguli ane Yesus ee momami nanoto. Pangepera ompi-ompi-Na to iulira tauna lauria, naratara nangala-'I.
22To nataualu buku Taurat to narata lako Yerusalem nangulika tau-tauna, “Hia etu laipehua Beelzebul#3:22 Beelzebul hanga ntani Magau Heta.. Etu pade namala-'I nampopalai anudaa, apa Beelzebul magau humawee heta nampawai-'I baraka.”
23Yesus nangkiora pade nangulikara hante porapa, “Bewa pade Magau Heta mampopalai Magau Heta? 24Ane hangu kamagaua moma'i mahintuwu, natantu amimi kamagaua ee mai kana magaro. 25Ane hira to pohancou momara mahintuwu, moma'i mantaha pohancoura. 26Wee moto mui ane Magau Heta mampaewa wotona moto, ane kamagauana moma mahintuwu, natantu amimi kamagauana ee mai magaro. 27Moma hema mamala mehua i rara hou tauna to naroho mamparampaki gaguna ane moma'i nahilu ncala tauna to naroho ee. Napu ee pade mamaladi mangala humawee ihi houna. 28Etumo, Ku'ulika komi, humawee doha pade pepopore hi manuhia namala ra'ampuni. 29Naupawee, hema to nampopore Inoha to Nagaha momami ra'ampuni duu kahae-haena, apa hia nobabei doha to moma naria kahuduana.” 30Yesus nanguli iwee apa hira nanguli ane Hia laipehua anudaa.
Yesus pade ompi-ompi-Na
(Mat. 12:46-50; Luk. 18:19-21)
31Naliu ee, tina Yesus pade ompi-ompi Yesus narata nokangkore i hawaliku hou. Laitudura tauna nampakio Yesus, 32apa nadea tauna noncuna nahiromu i humpii-Na. Laiulikara-'I, “Hilo! Tina-Mu pade ompi-ompi-Mu hawalikuna eera ria, mingki mampotomuka-Ko.”
33Nehono Yesus hi hira, “Hema kakonona tina-Ku bo ompi-ompi-Ku?” 34Yesus nampanaara tauna to noncuna nahiromu i humpii-Na pade iuli-Na, “Eiramole tina-Ku pade ompi-ompi-Ku. 35Hema-hema to mampoingkuka to laipodota Alatala, hiami ompi-Ku balailo, hiami ompi-Ku bangkele pade hiami tina-Ku.”
सध्या निवडलेले:
Markus 3: MYL
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
