Markus 4
4
Porapa nangkambelai hadua to pohawu
(Mat. 13:1-23; Luk. 8:4-15)
1Hangkani tempo, nopamula muimi Yesus nopatudu i wiwi Rano Galilea. Nadea mpuu tauna nahiromu i humpii-Na, hampena Yesus rau noncuna i rara duanga, na'awa hodi lako talinti, pade todea nokangkore i wiwi rano nangepe-'I nopatudu.
2Nadea ngaa to ipatuduka-Nara hante porapa. Iulika-Nara, 3“Epe komi lolita ei: Naria hadua to pohawu rau nohawu. 4Tempona nohawu, habagia hawuana nanawu i wiwi dala pade naratami tonci nantilo hawua ee duu kaapuna. 5Naria mui hawuana to nanawu i tana to nawatua to moma nadea tanana. Hawua ee mai nahomi potumena apa nanipi moto tanana. 6Naupawee neinopi eo, nalaumi tinuda ee pade nabangi, apa moma nandala polarina. 7Habagiana mui nanawu i lentongo dunumpu rui. Dunumpu rui ee mai neumba nampabungu'i duuna namate, hampena moma'i nowua. 8Habagia mui hawuana nanawu i tana to narudu. Narudu katuwuna pade nadea powuana. Kadea wuana, naria to tolu mpulu ngkani, ono mpulu ngkani, hampena hatu ngkani.” 9Nahudupi notutura porapa ee mai, Yesus nanguli, “Hema to natalingaa, epe belo to iuli-Ku lauria.”
10Bula Yesus nopatani hadudua-Na, narataramo to pantuku-Na hante hampulu rodua ana guru-Na nampekune-'I, napa batua porapa to lako ituturaka-Nara. 11Nehono Yesus, “Komi laiwaika noto mangincani napa to ipopalerui nangkambelai bewa Alatala noparenta halaku Magau. Naupawee hira to i hawaliku poparentaa-Na, laikewoka hante porapa, 12#Yes. 6:9-10bona,
‘Naupa rahilora, moma'i rapahara napa to ihilora,
naupa raepera, moma muira mengkao napa to iepera,
bona nemora megoli hi Alatala pade Na'ampuni dohara.’ ”
13Napu ee, iulika-Nara, “Moma ipahami batua porapa ei? Ane wetu, bewa komi mampaha porapa to ntanina? 14To pohawu ee mai nahibali hante tauna to noparata lolita Alatala. 15Hawua to nanawu i wiwi dala, batuana, tau-tauna to nangepe lolita Alatala, pade Magau Heta narata nangala lolita ee mai bona momami rapairarara. 16Hawua to nanawu i tana to nawatua, batuana, tau-tauna to nangepe lolita Alatala pade dungku nantarima lolita ee hante goe rarara, 17naupawee momara nolari hampena hangonira aga nantaha. Hangka laipakaheha pade laiduahira habana lolita Alatala ee, dungku laihapuakarami peparahayara. 18Hawua to nanawu i dunumpu rui, batuana, tauna to nangepe lolita Alatala, 19naupawee kamere rara nangkambelai katuwua i rara dunia ei pade pebagiu kahugia hante dota ntanina nampaupi lolita Alatala hampena moma naria bununa i rara katuwuara. 20Hawua to nanawu i tana to narudu, batuana, tauna to nangepe pade nantarima lolita Alatala ee, hampena nadea mpuu wuana to nabelo i rara katuwuara. Kadea wuana, naria to tolu mpulu ngkani, ono mpulu ngkani, pade hatu ngkani.”
Porapa nangkambelai poindo hante pohuka
(Luk. 8:16-18)
21Napu ee Yesus nangulikara, “Moma naria haduaa tauna to notutuni poindo pade laibolina i une loya ba i une poturua. Kana naboli i lolo poboliana. 22Moma naria to laitabuhini to moma rahungke, pade moma naria to laipopalerui to moma rapakakewa. 23Hema to natalingaa, epe belo to iuli-Ku lauria.”
24Napu ee iuli-Na mui Yesus iwei, “Pairara mpuu napa to iepemi! Pohuka to laipakemi nohuka, ee moto mui rapopohukaka komi pade moma wuwu ee, Natambaiki muipi Alatala. 25Habana hema-hema to mantarima pade manturuhi lolita Alatala, Alatala mampatambaiki napa to incanira. Naupawee hema-hema to moma madota mantarima pade manturuhi lolita Alatala, ane maria nau hodi aga to incanira kana ra'ala lako hi hira.”#4:25 Rara baha Yunani laitulihi iwei: Habana hema-hema to nakariaa, rawaikaki. Pade hema-hema to moma nakariaa, nau napa to naria hi hia ra'alai nculi.
Porapa nangkambelai hawua to natuwu
26Laipadola-Na mui Yesus nanguli, “Poparentaa Alatala ee mai mamala rarapaika ewa hadua tauna to nohawu hawua i tana. 27Bengina'i noturu, eona'i nemata, bo hawua ee mai notume pade natuwu duuna nalangko. Bewa katuwuna moma incanina tauna ee. 28Tana moto nampakatuwu hawua ee mai. Pamulana'i notume, napu ee natuwu, duuna nehuwu wuana. 29Natahapi wuana, naratami tauna ee nohome, apa temponami rasangki.”
Porapa nangkambelai beha sesawi
(Mat. 13:31-35; Luk. 13:18-19)
30Napu ee iuli-Na mui Yesus iwei, “Hante napa'i tapahibali poparentaa Alatala ee mai? Pade hante porapa to bewa'i mamala tapahibali?” 31Poparentaa Alatala ewa beha sesawi to neliu kanetena lako humawee beha ntanina to naria i dunia ei. 32Naupawee ane rahawudimi, katuwuna meliupi kabohena lako uta ntanina, hampena tonci-tonci namala nobabei dumura i pengana to nabohe.
33Nadea ngaa porapa to ewa lauria laipake Yesus noparata lolita Alatala, nantuku pampakuleara nampaha. 34Nampake porapa moto oa-'I Yesus nangkewokara nangkambelai poparentaa Alatala, naupawee ane wuwu ana guru-Nadimi dohe-Na, laibatuanika-Naramo humawee porapa to iuli-Na.
Yesus nampakaora ngolu bohe
(Mat. 8:23-27; Luk. 8:22-25)
35Eo ee moto mui, ngkinuwia mparopi, Yesus nangulikara ana guru-Na, “Maitamo rau medipo Rano Galilea.” 36Apa noncuna rara duanga amimi Yesus, neongkoramo nampalahi tauna to nadea ee mai. Naria mui duanga-duanga ntanina to nantukura. 37Bulara noduanga, ngkali naratami ngolu bohe hante balumba namparumpa duangara hampena duangara laipehua ue. 38Tempo ee mai Yesus bula-Na naleta nampake luna i hoki duanga mali talikuana. Lauparia, ana-ana guru-Na nampalike-'I, iulira, “Guru, napa pade moma-Ko natepe? Mamatetamo ei!”
39Lauparia nematami Yesus nangkamaro ngolu pade balumba ee mai, iuli-Na, “Kalino pade karodomo!” Hampiniri mata nentuumi ngolu pade balumba ee, pade nanone mpuumi rano ee mai. 40Napu ee Yesus nangulikara ana guru-Na, “Napa pade naeka komi? Napa pade moma komi neparahaya?”
41Nawali naeka purara pade nojarita hore hira, iulira, “Hemadi Tauna ei, hampena wungka ngolu pade rano nanturuhi parenta-Na?”
सध्या निवडलेले:
Markus 4: MYL
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
