युहन्‍ना 20

होप्‍रे़क्‍मा येःॽमा

(मत्‍ति २८:१-८; मरकुस १६:१-८; लुका २४:१-१२)

1सातामि याक्‍लोए याक माक्‍मिॽ सेल्‍लाम मरियम मग्‍दलिनि येसुमि येःॽमाबेॽ खडा। मोबेॽ रुक्‍माबेॽको येःॽमामि याबुकपेॽ युङ्‌बॽआ ओब्‍रे़क सेम्‍बेबॽआ चुप्‍टु। 2इगो खाङ्‌डोक्‍नुङ ए़क्‍साङ खो पिङ्‌खे़ॽनुङ सिमोन पत्‍रुसनुङ येसुडे़ॽ नम्‍नम ले़ःॽपॽआ चोङ्‌सा इडोॽ लुसुजि, “माहाजिडे़ॽ परभुगो येःॽमाबाङ लाघे़ॽटुजि, तर हाम्‍बेॽ लाघे़ॽनुङ युङ्‌इटुजे कानिङे़ॽ लेसुङ्‌मानि।” 3मोबा पत्‍रुसनुङ हाइको चोङ्‌सा येःॽमालाम खडाजि। 4माहा निप्‍पाङ चोङ्‌सा सोरि पिङ्‌खडाजि तर हाइको चोङ्‌सा चाहिँ पत्‍रुसबाङ पोम्‍बेॽ यङ्‌घे़ॽनुङ खो याक्‍लो येःॽमाबेॽ रुक्‍टु। 5खोसे़ॽ उःक्‍मानुङ येःॽमा होङ्‌सिॽयु खाङ्‌माबेॽ येसुमि सिगुयाक यिप्‍पॽआ सिचेॽरेॽनोॽ खाङ्‌डोक्‍टु, तर खो येःॽमा होङ्‌सिॽयु मे़ङ्‌खडा। 6ए़क्‍साङ लेङ्‌खुबा सिमोन पत्‍रुस चाहिँ येःॽमाहोङ्‌सिॽयुनोॽ खडा। खोसे़ॽसो येसुमि सिगुयाक यिप्‍पॽआ सिचेॽरेॽनोॽ खाङ्‌डोक्‍टु। 7येसुमि निन्‍डवाँबेॽ हिःक्‍पॽआ चेॽ चाहिँ ए़डे़ॽ मेॽयोङ ने़ःॽनुङ युङ्‌बॽआ ले़टा। 8मोडोक्‍पेॽ चाहिँ सिमोनबाङ याक्‍लो येःॽमाबेॽ लेङ्‌घुबा चोङ्‌सासो येःॽमा होङ्‌सिॽयु खे़ॽनुङ खाक्‍सु, माहा चोप खा खाङ्‌नुङ येसु हिङ्‌बोक्‍इटे़ लुनुङ खोसे़ॽ बिस्‍वास ले़टु। 9इन्‍ढोङ्‌होङ माहाजिडे़ॽ मोडोक्‍रोसो धारमिक नेॽचिराबेॽ येसु सिबॽआबाङ हिङ्‌बोक्‍मा खे़ये लुनुङ साप्‍पॽआ खा मे़लेबॽआ ले़टा। 10मोबा ए़क्‍साङ मो चोङ्‌साजि खिम टेघडाजि।

येसुनुङ मरियम चुप्‍पॽआ

(मत्‍ति २८:९-१०; मरकुस १६:९-११)

11मरियम चाहिँ येःॽमाबाङ पाखे़ॽयुनोॽ हाःप्‍साङ येबा, मोबा हाःप्‍साङ उःक्‍नुङ येःॽमा होङ्‌सिॽयु वाबु। 12मोडोक्‍पेॽ येःॽमा होङ्‌सिॽयु उथ्‍रिॽहा चेॽ चाङ्‌खुबा निप्‍पाङ थाङ्‌सिरिदुतजि येसुमि सिगुयाक युङ्‌बॽआ ठाउँमि निन्‍डवाँलामनुङ सराङ्‌लाम पेम्‍बॽआ खाङ्‌डोक्‍टु। 13माहाजिडे़ॽ सिप्‍साजु, “नानि, इन्‍ढोङ हे़न हाःप्‍मिये ?”

खोसे़ॽ खोजि लुसुजि, “माहाजिडे़ॽ काङ्‌मि परभु लाघे़ॽटुजे मोबा हाम्‍बेॽ युङ्‌इटुजे, के़ॽ लेसुङ्‌नि।”

14इघा खा इःसेॽनुङ खो ए़ङ्‌गुवालाम हिङ्‌घे़ॽमाबेॽ येसु येःप्‍टिङ्‌बॽआ खाङ्‌डोक्‍टु, तर मो येसुनोॽ लुनुङ खोसे़ॽ मे़लेसु।

15येसुडे़ॽ मरियम लुसु, “होउ नानि, हे़न इन्‍ढोङ हाःप्‍मिये ? हे़ने़ॽ असा योक्‍मे़ॽनिङ्‌सिन्‍डुए ?”

मरियमडे़ॽ खो बगैचाबेॽ योम्‍बोक ले़ःॽखुबा याॽमि मिॽनुङ लुसु, “हजुर, हे़ने़ॽ येसु लाघे़ॽनुङ हाम्‍बेॽ युङ्‌इटुए ? का लुमाना, खो के़ॽ लाघे़नुङे।”

16येसुडे़ॽ मरियम लुसु, “मरियम!”

मोबा खोसे़ॽ हिङ्‌घे़ॽनुङ हिब्‍रु खाप्‍लाबाङ लुसु, “रब्‍बोनि!” (इगो लुबॽआ “हे गुरुज्‍यु!”)

17येसुडे़ॽ मरियम लुसु, “का ए़ॽसुःप्‍मायो, का हागोरोसो पाबामि खिमबेॽ मे़ङ्‌खे़ॽटिॽङा। तर के़हा निसाजिबेॽ खे़ॽनुङ इगो खा लुबेॽटाजे, ‘के़ए़ पाबानुङ हे़निङ्‌मि पाबा, के़ए़ निवाहाङ्‌नुङ हे़निङ्‌मि निवाहाङ्‌बेॽ का खे़ॽमे़ॽनिङ्‌सिङे’।”

18मोबा मरियम मग्‍दलिनि पिङ्‌खे़ॽनुङ टाङ्‌बे़ॽ येसु चुप्‍पॽआ खानुङ खोसे़ॽ चोङ्‌साजि हाङ्‌बॽआ लम्‍बवाँसो लुबेॽटुजि।

येसु हिङ्‌बोक्‍नुङ ए़क्‍साङ चोङ्‌साजिनुङ

(मत्‍ति २८:१६-२०; मरकुस १६:१४-१८; लुका २४:३६-४९)

19सातामि याक्‍लोमा याक युडा, यहुदि डायोङ्‌बाजिमि किस्‍सिमवाडे़ॽ चोङ्‌साजि राम्‍डेम से़क्‍नुङ खिमहोङ्‌सिॽयु पेन्‍सिडामि। मोडोक्‍पेॽनोॽ हजोक्‍टोॽ येसु लेन्‍नुङ माहाजिमि रुम्‍बेॽ येःप्‍नुङ लुसुजि, “हे़निङ्‌बेॽ सान्‍ति लिरो।” 20मोबा येसुडे़ॽ खोमि हुकनुङ भालाडे़ॽ खाक्‍पॽआ हेप्‍सोक्‍मा खाङ्‌मे़ॽटुजि। परभु खाङ्‌डोक्‍नुङ खोमि चोङ्‌साजि सारोनोॽ साप्‍थाक्‍सामि। 21येसुडे़ॽ फेरि लुसुजि, “हे़निङ सान्‍ति लिरो, का काङ्‌मि पाबाडे़ॽ मक्‍खाम्‍डेमबेॽ पाङ्‌बॽआडोक्‍नोॽ के़ॽसो हे़निङ पाङ्‌मे़ॽनिङ्‌सिनिम्‍ने़।” 22मोबा इडोॽ लुनुङ येसुडे़ॽ माहाजिसोक्‍पेॽ सोःक्‍मा मिॽनुङ लुसुजि, “पबित्‍रा होङ्‌निवा लासानुमे। 23हे़निङे़ॽ असामि पाप आम्‍लाङ पिन्‍डानुमे, माहाजिमि पाप आम्‍लाङ लिहा, हे़निङे़ॽ असामि पाप आम्‍लाङ पिसानुम्‍ने मोसे़ॽ आम्‍लाङ चुप्‍टुनिबा।”

थोमाडे़ॽ येसु सङ्‌क ले़ःॽपॽआ

24येसु मोबेॽ लेम्‍माबेॽ बारो जना चोङ्‌साजिबेॽ इक्‍को दिदुमस लुमे थोमा चाहिँ माहाजिनुङ माडा। 25मोडोगे़ॽ हाइखा चोङ्‌साजिडे़ॽ खो लुसुजि, “कानिङे़ॽ परभु खाङ्‌डोक्‍टुङ्‌मा!”

तर मोसे़ॽ लुसु, “किला ठाक्‍पॽआ हुक के़ए़ मिगे़ॽ मे़खाङ्‌डोक्‍लोनुङ मोबा खोमि हेप्‍सोक्‍माबेॽ के़ए़ हुक मे़ए़न्‍लो के़ॽ बिस्‍वास ले़टुङ्‌नि।”

26इक्‍को साता ए़क्‍साङ फेरि चोङ्‌साजि खिमहोङ्‌सिॽयुनोॽ पेम्‍मे़ॽनिङ्‌सिडामे। मो याक चाहिँ थोमासो मोबेॽ टुसा। राम्‍डेम होङ्‌सिॽयुराम से़क्‍पॽआ ले़टा, तरसो येसु खोजिमि रुम्‍बेॽ लेन्‍नुङ लुसुजि, “हे़निङ सान्‍ति लिरो।” 27मोबा खोसे़ॽ थोमा लुसु, “हे़ने़ए़ हुक्‍खे़ॽवासि के़ए़ हुकपेॽ युङ्‌नुङ के़हा हुक खाक्‍से। हे़ने़ए़ हुक के़ए़ हेप्‍सोक्‍माबेॽ एन्‍डे। सङ्‌क ए़ले़टे तर बिस्‍वास ले़टे।”

28थोमाडे़ॽ लुसु, “के़ए़ परभु, के़ए़ निवाहाङ!”

29येसुडे़ॽ थोमा लुसु, “हे़ने़ॽको का खाङ्‌डोक्‍नुङ बिस्‍वास ले़टिङा, तर असे़ॽ का मे़ङ्‌खाङ्‌डोक्‍नुङ्‌सो बिस्‍वास ले़म्‍मे, माहाजि बेॽलो आसिसित ले़म्‍मे।”

इगो नेॽचिराडे़ॽ लुमायोक्‍पॽआ खा

30इडोक्‍हा बेॽलो सक्‍तिनुङ्‌मा चिङ्‌गानुङ बेॽलो खरिहा योम्‍बोक येसुडे़ॽ ले़टु। माहा चोप इगो नेॽचिराबेॽ मे़न्‍साप्‍टिॽ। 31तर निवाहाङ्‌मि पसा मुक्‍ति पिघुबा येसु खिरिस्‍टबेॽ हे़निङे़ॽ बिस्‍वास ले़टानुमे लुनुङ इगो नेॽचिरा साप्‍पॽआ ले़ये। मो बिस्‍वासबाङ खोमि निङ्‌बेॽ हे़निङे़ॽ ए़स्‍सिमे हिङ्‌मवा चुप्‍टानुमे।

सध्या निवडलेले:

युहन्‍ना 20: YAMP

ठळक

सामायिक करा

कॉपी करा

तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन

याम्फुबद्दल अधिक जाणून घ्या