युहन्ना 19
19
1मोबा पिलातसडे़ॽ येसु चिॽखे़ॽनुङ कोरराडे़ॽ मोःक्मामि हुकुम पिसुजि। 2मोबा ए़क्साङ तिरिङ्गाजिडे़ॽ चिजिङ्मि मुकुट टोङ्नुङ येसुमि निन्डवाँबेॽ ओप्टिबेॽनुङ हाङ्बे़ॽ चाङ्मेडोॽमा बैजनि रङ्मा चेॽ चाङ्डिबेॽटुजि, 3मोबा येसुमि के़क्पेॽ येःप्नुङ “यहुदिजिमि हाङ्बामि ओहाङ!” लुसाङ सिःक्चासाङ खो फे़ःगुजि।
4फेरि इक्खेॽ पिलातस पाखे़ॽयु आप्नुङ माहाजि लुसुजि, “खाक्सानुमे, के़ॽ इगो याॽमिबेॽ सेॽनेमारोमा आप्टिक इमाङ्सो मे़न्चुप्टुङ। इगो खा लेसानुमे लुनुङ इगो याॽमि हे़निङ्मि पोम्बेॽ चिॽअप्मे़ॽनिङ्सिनुङे।” 5मोबा येसु निन्डवाँबेॽ चिजिङ्मि मुकुटनुङ बैजनि रङ्मा चेॽ चाङ्मानुङ पाखे़ॽयु आबा। मोबा पिलातसडे़ॽ माहाजि लुसुजि, “लो, इगो याॽमि खाक्सानुमे!”
6मोबा एप्पा याडाङ्बाजिनुङ मन्दिर हुङ्घुबाजिडे़ॽ येसु खाङ्मासोरोॽ इडोॽ लुसुजि, “आक्को याॽमि काप्सिङ्बेॽ किङ्नेसे, आक्को याॽमि काप्सिङ्बेॽ किङ्नेसे!” कासाङ वोसामि।
मोबा पिलातसडे़ॽ माहाजि लुसुजि, “हे़निङे़ॽनोॽ काप्सिङ्बेॽ किङ्नेसानुमे, इन्ढोङ्होङ के़ॽ चाहिँ इगो सेॽनेमारोमा आप्टिक इमाङ्सो मे़न्चुप्टुङ।”
7यहुदिजिडे़ॽ पिलातस लुसुजि, “कानिङ्मि यहुदि नियम टुये, मो नियमडे़ॽ लुबॽआडोॽ इगो सिमानोॽ खे़ये, इन्ढोङ्होङ इगोसे़ॽ खोनोॽ निवाहाङ्मि पसा ले़ङे लुटुए।”
8इगो खा खेम्नुङ पिलातस छना किस्सिडा। 9पिलातस फेरि हाङ्खिम होङ्सिॽयु पे़खे़ॽनुङ येसु सिप्सु, “हे़न हाम्बाङ लेङ्इटे़ ?” तर येसुडे़ॽ इमाङ्सो मे़लुसु। 10मोडोगे़ॽ पिलातसडे़ॽ येसु लुसु, “हे़न कानुङ इन्ढोङ यामुनिबा ? हे़न लेॽपेमे अथबा काप्सिङ्बेॽ किङ्नेमे अधिकार काङ्मि हुकपेॽ टुये लुमे खा हे़ने़ॽ लेसुनिबा ?”
11येसुडे़ॽ पिलातस लुसु, “हे़न निवाहाङ्डे़ॽ मे़म्पिबॽआ ले़टाहोङ हे़ने़ॽ काबेॽ इमाङ्सो अधिकार माॽआडे़। मोडोगे़ॽ का हे़ने़ए़ हुकपेॽ पिघुबाजि छना बेॽलो पापमि आप्टिकनुङ्मा ले़म्मे।”
12मोबा ए़क्साङ पिलातसडे़ॽ येसु लेप्पेमामि बेॽलो बोल ले़टु। तर यहुदिजि इडोॽ कासाङ वोसामि, “हे़ने़ॽ इगो याॽमि लेडुहोङ, हे़न हाङ्बा कैसरमि लङ्गाम लिनिबा। खोमटाङ्बानोॽ हाङ्बा काघुबाजि हाङ्बा कैसरमि बिरोधि लिये।”
13पिलातसडे़ॽ इगो खा खेम्नुङ येसु पाखे़ॽयु चिॽआप्टु मोबा खो “रुङ्गोॽवामि पाटि” लुमे ठाउँबेॽ (हिब्रु खाप्लाबेॽ गब्बथा लुन्डुजे) न्याय ले़ःॽसिॽ पेना। 14मो याक चाहिँ छुट्कारा चाडमि याक्लोए याक ले़टे़। मोडोक्पेॽ लेन्डामि बारो काबॽआ ले़टा। पिलातसडे़ॽ माहा यहुदिजि लुसुजि, “खाक्सानुमे, हे़निङ्मि हाङ्बा।”
15तर माहाजि इडोॽ कासाङ वोसामि, “लाघे़ॽटे लाघे़ॽटे, लाघे़ॽनुङ आक्को काप्सिङ्बेॽ किङ्नेमा खे़ये!”
पिलातसडे़ॽ माहाजि सिप्सुजि, “इमा हे़निङ्मि हाङ्बा काप्सिङ्बेॽ किङ्नेमे ?”
एप्पा याडाङ्बाजि कासामि, “कैसरबाङ हाइखा कानिङ्मि हाङ्बा असासो माॽआये।”
16इगो खा खेम्नुङ ए़क्साङ पिलातसडे़ॽ येसु काप्सिङ्बेॽ किङ्नेमामि माहाजिमि हुकपेॽ पिहाक्सुजि। मोबा तिरिङ्गाजिडे़ॽ येसु जिम्मा लासुजि।
येसु काप्सिङ्बेॽ
(मत्ति २७:३२-४४; मरकुस १५:२१-३२; लुका २३:२६-४३)
17माहाजिडे़ॽ येसु खप्परे लुमे ठाउँबेॽ चिॽखे़ॽटुजि, येसु खोमटाङ्बा काप्सिङ खोमदाङ्बे़ॽ खिमानुङ मो ठाउँ रुक्टु। (हिब्रु खाप्लाबेॽ मो ठाउँ गलगथा लुन्डुजे।) 18मो ठाउँबेॽ माहाजिडे़ॽ काप्सिङ्बेॽ येसुमि हुक सराङ्बेॽ खिल ठाक्नुङ खिङ्डिसुजि। मोबेॽ हाइखा निप्पाङ याॽमिजिसो टुसामे, इक्को येसुमि चुप्थिङ्लाम, हाइको ए़ङ्सिङ्लाम किङ्डिसुजि। मोजिमि रुम्बेॽ येसु टुसा। 19पिलातसडे़ॽ इक्को आप्टिक पत्रासो सबु, मोबा येसुमि काप्सिङ्मि मिन्डु रेप्टिबेॽटुजि। मोबेॽ इडोॽ साप्पॽआ ले़टा, “नासरतबेॽए येसु, यहुदिजिमि हाङ्बा।”
20मो आप्टिक पत्रा बेॽलो यहुदिजिडे़ॽ नेडुजि, इन्ढोङ्होङ येसु किङ्एम्बॽआ ठाउँ सहरमि के़क्पेॽनोॽ सिॽटे़। मोबेॽ हिब्रु, ल्याटिननुङ गिरिक खाप्लाबेॽ साप्पॽआ ले़टे़। 21यहुदिजिमि एप्पा याडाङ्बाजिडे़ॽ पिलातस इडोॽ बिरोध ले़ःॽसाङ लुसुजि, “‘यहुदिजिमि हाङ्बा’ लुनुङ ने़ॽनि, तर ‘इगोसे़ॽ का यहुदिजिमि हाङ्बा ले़ङे लुबॽआ ले़टे’ लुनुङ साप्टिबेॽमे लुनुङ लुसुजि।”
22पिलातसडे़ॽ माहाजि इडोॽ लुसुजि, “के़ॽ इमाङ साप्टिसुङ, हागो साप्पेटुङे।”
23माहा तिरिङ्गाजिडे़ॽ येसु काप्सिङ्बेॽ किङ्सेॽनुङ खोमि चेॽ रिउम फे़क नाःक्नुङ खोजिडे़ॽ हासुजि। येसुमि बेॽए कोट चाहिँ सिउनि मे़ॽनिङ्मा मिन्डुबाङ मिम्मुठोक आबॽआ सग्लोमा ले़टे। 24मोडोगे़ॽ माहाजि कासामि, “इगो चाहिँ ए़नाःक्मा, चिटठा एन्नुङ लाघे़ॽमा।” धारमिक नेॽचिराबेॽ इडोॽ साप्पॽआ खा पुरा लिजासा, “माहाजिडे़ॽ के़ए़ चेॽ हासुजि मोबा के़ए़ बेॽए कोटमि लागि चाहिँ चिटठा एन्डुजि।”
25येसुमि काप्सिङ के़क्पेॽ खोमि मामा, मामामि निसानुङ खो सोरि क्लोपासमि बनिमा मरियम, मोबा मरियम मग्दलिनि येःप्मे़ॽनिङ्सिडामि। 26येसुडे़ॽ खोमि मामानुङ खोसे़ॽ नम्नम ले़ःॽपॽआ चोङ्सा के़क्पेॽ येःप्पॽआ खाङ्नुङ मामा लुसु, “मामा खाक्से, हे़ने़ए़ पसा।” 27मोबा खोमि चोङ्सा लुसु, “खाक्से हे़ने़ए़ मामा” मो याकबाङ मो चोङ्साडे़ॽ येसुमि मामा खोमि खिमबेॽ चिक्खे़ॽटु।
येसु सिबॽआ
(मत्ति २७:४५-५६; मरकुस १५:३३-४१; लुका २३:४४-४९)
28मोबा ए़क्साङ येसुडे़ॽ चोप योम्बोक पुरा लिबेटहा मिॽनुङ धारमिक नेॽचिराबेॽ साप्पॽआ खा पुरा लिरो लुनुङ इडोॽ लुसु, “का वाइॽमे़ॽ सिसिङ कासा।” 29मोबेॽ इक्को अङ्गुरमि सिडुवा खे़वाडे़ॽ#१९:२९ सिरक लुबॽआ अङ्गुरमि सिडुवा खे़वा, मो सिडे़नुङ चाॽइडे़ टिप्पॽआ खोङ टुये, मोबेॽ इक्को सोॽमोक्या सोक्नुङ हिसपमि हक्काम्बामि टुप्पाबेॽ युङ्नुङ येसुमि याबुकपेॽ टिबेॽटुजि। 30मोबा येसुडे़ॽ मो खे़वा उङ्नुङ लुसु, “हागो के़ए़ योम्बोक रुक्खडा” मोबा खोमि निन्डवाँ उःक्मानुङ सोःक्मा खडा।
येसुमि हेप्सोक्माबेॽ भालाडे़ॽ खाक्पॽआ
31मो याक चाहिँ नाजामे याकमि याक्लोए याक ले़टे़। मोडोक्पेॽ छुट्कारामि चाड सिॽपॽआसे़ॽ मो नाजामे याक चाहिँ महान याक ले़टा। मोडोगे़ॽ “इगो महान नाजामे याकपेॽ काप्सिङ्बेॽ सिगुयाक याःॽयामा फे़न्निबा” मिॽनुङ “काप्सिङ्बेॽ किङ्नेबॽआजि चान्डो सिमिरो लुनुङ सराङ एॽमामि” यहुदि डायोङ्बाजिडे़ॽ पिलातसनुङ आग्या ङाःगुजि। 32मोबा तिरिङ्गाजिडे़ॽ येसुमि किॽयु मिॽयु काप्सिङ्बेॽ किङ्एम्बॽआ निप्पाङ्मि सराङ एप्पेबेॽटुजि। 33मोबा ए़क्साङ माहाजि येसुबेॽ लेम्माबेॽको खोमि सोःक्मा खे़ॽपेबॽआ ले़टा। मोडोगे़ॽ माहाजिडे़ॽ खोमि सराङ मे़ॽएडुजि। 34मोडोक्रोसो इक्को तिरिङ्गाडे़ॽ येसुमि हेप्सोक्माबेॽ भालाडे़ॽ खागु, खक्माबेॽको हरिनुङ योङा आबा। 35(इघा खा खाङ्घुबा याॽमिडे़ॽ खोमि टाङ्बामि मिगे़ॽ इमा खाक्सु मोनोॽ लुटुए। मोडोगे़ॽ हे़निङे़ॽसो बिस्वास ले़टानुमे लुनुङ खोसे़ॽ चाइबमा खा लुबॽआ ले़ये।) 36“खोमि इक्कोसो से़ॽकोॽवा एॽखे़ॽनिबा”#परस्थान १२:४६; गन्ति ९:१२; भजनसङ्ग्रह ३४:२० लुनुङ धारमिक नेॽचिराबेॽ खोमि टुम्बेॽ साप्पॽआ खा पुरा लिमामि इडोॽ लिसा। 37मोबा फेरि धारमिक नेॽचिराडे़ॽ हाइको ठाउँबेॽ “खोजिटाङ्बे़ॽ खाक्पॽआ याॽमि, खोजिडे़ॽ खो खाङ्इन्डुजे।”#जकरिया १२:१०
येसु येःॽमाबेॽ युङ्बॽआ
(मत्ति २७:५७-६१; मरकुस १५:४२-४७; लुका २३:५०-५६)
38हागो अरिमाथिया सहरबेॽए योसेफ निङ्मा इक्को याॽमि टुसे़। खो यहुदिजिमि किस्सिमावे़ॽ हाइखाजिडे़ॽ मे़लेरेॽ येसु बिस्वास ले़ःॽपॽआ चोङ्सा टुसे, खोसे़ॽ पिलातसबेॽ खे़ॽनुङ बिन्ति ले़ःॽनुङ येसुमि सिगुयाक ङागु। पिलातसडे़ॽसो “नुउ, लाघे़ॽटे” लुसु। मोबा खो खे़ॽनुङ येसुमि सिगुयाक लाघे़ॽटु। 39याक्लोए सेन्डा येसु चुप्सिॽ खे़ॽखुबा निकोदेमससो योसेफनुङ सोरि टुसा। निकोदेमसडे़ॽ तेत्तिस किलो मुररानुङ एलवा ठुबॽआ नाम्जानुये केवा याङ्मानुङ मोबेॽ लेस्सा। 40मोजि निप्पाङे़ॽ यहुदि चलनबेॽ ले़टिडोॽ येसुमि सिगुयाकपेॽ नाम्जानुये केवा टिनुङ सिचेॽडे़ॽ यिप्नुङ येःॽमाबेॽ युङ्मामि पोरोगाजु। 41येसु काप्सिङ्बेॽ किङ्नेबॽआ ठाउँमि के़क्पेॽ इक्को बगैँचा टुसे़। मो बगैँचाबेॽ मोडोक्लो असामिसो सिगुयाक मे़युङ्बॽआ इक्को चोङ येःॽमा टुसा। 42यहुदिजिमि नाजामे याकमि याक्लोए याक ले़टेन्से़ॽ माहाजिडे़ॽ येसुमि सिगुयाक मो के़क्पेॽए येःॽमाबेॽनोॽ युक्सुजि।
सध्या निवडलेले:
युहन्ना 19: YAMP
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2023, Wycliffe Bible Translators, Inc. and Nepal Bible Society
