युहन्ना 21
21
एच्चि जना चोङ्सजिमि पोम्बेॽ येसु खाङ्मुबॽआ
1मोबा ए़क्साङ फेरि तिबेरियस माहोङ्मामि के़क्पेॽ येसु खोमि चोङ्साजिनुङ खाङ्मुसा। 2सिमोन पत्रुस, दिदुमस लुमे थोमा, गालिलबेॽए काना सहरबेॽ पेङ्घुबा नथानेल, जब्दियामि निप्पाङ वडाङ्पसाजि, येसुमि हाइखा निप्पाङ चोङ्साजि मोबेॽ सुम्बॽआ ले़टामि। 3मोबा सिमोन पत्रुसडे़ॽ लङ्गामजि लुसुजि, “का ङा सेॽसिॽ खे़ॽमे़ॽनिङ्सिङे।”
माहाजिडे़ॽसो खो लुसुजि, “कानिङ्सो हे़न्नुङ खे़ॽए़न्डिङ्मे।” माहाजि खे़ॽनुङ नाउबेॽ साक्सामि, तर मो सेन्डा खोजिडे़ॽ इक्को ङासो मे़सेॽहेसुजि।
4माक्मि लिसिॽपोरोक्माबेॽ येसु माहोङ्माजि के़क्पेॽ येप्मे़ॽनिङ्सिडा, तर चोङ्साजिडे़ॽ येसुनोॽ लुनुङ मे़लेसुजि। 5मोडोक्पेॽ येसुडे़ॽ माहाजि लुसुजि, “होउ निसाजि, हे़निङे़ॽ इक्को निच्चि ङा सेॽएटानुमे ?”
माहाजिडे़ॽ लुसुजि, “इक्कोसो मे़सेॽटिॽ।”
6खोसे़ॽ माहाजि लुसुजि, “हे़निङ्मि याङ्घामा नाउमि चुप्थिङ्लाम राप्एन्डानुमे, मोबा हे़निङे़ॽ ङा चुप्मिन्डानुमे।” मोबा माहाजिडे़ॽ मो ठाउँबेॽनोॽ याङ्घामा ठाम्एन्डुजि। चइबानोॽ मोबेॽ मोढे़ॽलो ङा सिॽटामि याङ्घामानोॽ मे़सेॽहेसुजि।
7इडोॽ लिबॽआ खाङ्नुङ, येसुमि बेॽलो नम्नम ले़ःॽपॽआ चोङ्साडे़ॽ पत्रुस लुसु, “खोगो परभुरे ले़ए़” इगो खा खेम्मासोरोॽ सिमोन पत्रुस खोसे़ॽ हेन्नुङ युङ्बॽआ चेॽ सुमरिकपेॽ हिःगु मोबा योङाबेॽ आमयुनुङ वाफाक्साङ के़क्पेॽ खडा। 8हाइखा चोङ्साजि चाहिँ नाउबेॽनोॽ पेन्नुङ ङाडे़ॽ टिप्पॽआ याङ्घामा से़ॽमानुङ माहोङ्मामि के़क्पेॽ आबामि, इन्ढोङ्होङ माहाजि पाखाबाङ इक सये मिटरडोक ओः टुसामे।
9खोजि पाखाबेॽ लेम्माबेॽको चरेपानुङ ङा थाउरुमसोक्पेॽ खाङ्डोक्टुजि। 10येसुडे़ॽ माहाजि लुसुजि, “हे़निङे़ॽ सेॽपॽआ ङाबाङ इक्को निच्चि ङा लाप्टानुमे।” 11मोबा सिमोन पत्रुस नाउबेॽ साङ्नुङ ङा से़ङ्से़ङ्मा याङ्घामा पाखे़ॽयु से़ॽआप्टु। मोबेॽ इक सये तिरपन्ना गोटा बेॽहा बेॽहा ङा टुसामि, तर इढे़ॽलो इॽठुप ङा टुमाबेॽसो याङ्घामा मे़नाःक्खडा।
12मोबा येसुडे़ॽ माहाजि “चासिॽ आबानिङे” लुनुङ के़डुजि। मोडोक्पेॽ माहा चोङ्साजिबेॽ असे़ॽसो “हे़न असाडे ?” लुनुङ मे़सिम्हेसुजि। इन्ढोङ्होङ खोजिडे़ॽ खो परभुनोॽ ले़ये लुनुङ लेबेबॽआ ले़टे़। 13मोबा येसुडे़ॽ चरेपा कुःप्नुङ माहाजि हाबेॽटुजि, मोडोक्नोॽ ङासो हाबेॽटुजि।
14येसु सिबॽआबाङ हिङ्बोक्नुङ चोङ्साजिनुङ खाङ्मुबॽआ इगो सुम्घेॽमा ले़टे़।
येसुनुङ पत्रुस
15माहाजिडे़ॽ चोसेॽनुङ ए़क्साङ, येसुडे़ॽ सिमोन पत्रुस सिप्सु, “होउ युहन्नामि पसा सिमोन, इमा हे़ने़ॽ का हाइखाजिबाङ्सो बेॽलो नम्नम ले़ङे ?”
पत्रुसडे़ॽ खो लुसु, “इँहिॽ परभु, के़ॽ हे़न नम्नम ले़न्ने लुमे खा हे़ने़ॽ लेन्डुए।”
मोबा येसुडे़ॽ खो लुसु, “के़हा पाठाजि नुरोॽ हिक्साजे।”
16मोबा येसुडे़ॽ हाइके खेॽ सिप्सु, “होउ युहन्नामि पसा सिमोन, इमा हे़ने़ॽ का नम्नम ले़ङे ?”
पत्रुसडे़ॽ लुसु, “इँहिॽ परभु, के़ॽ हे़न नम्नम ले़न्ने” लुमे खा हे़ने़ॽ लेन्डुए,
मोबा येसुडे़ॽ खो लुसु, “के़हा सामुजि नुरोॽ कुसो।”
17मोबा येसुडे़ॽ सिमोन फेरि हाइके खेॽ सिप्सु, “युहन्नामि पसा सिमोन, इमा हे़ने़ॽ का नम्नम ले़ङे ?” मोडोक्नोॽ सुम्खेप्डोॽ येसुडे़ॽ पत्रुस इडोॽ लुबॽआसे़ॽ, पत्रुस दुःखि लिसा। मोबा सिमोन पत्रुसडे़ॽ येसु लुसु, “परभु, हे़ने़ॽ चोप खा लेन्डुहा, के़ॽ हे़न नम्नम ले़न्ने लुमे खासो हे़ने़ॽ लेन्डुए।”
येसुडे़ॽ सिमोन लुसु, “मोडोक्होङ के़हा सामुजि नुरोॽ हिक्साजे। 18चइबानोॽ के़ॽ हे़न लुन्ने़, हे़न वेन्जा टुमाबेॽ आम्टाङ्बा हे़ने़ए़ थोङ्माइ हिःक्नुङ हाम्बेॽ खे़ॽमा मिना मोबेॽनोॽ खडे़। तर हे़न ठाॽपा पिक्खे़येबाङ मोडोक्पेॽ आम्मि हुक खिङ्इन्डुए हाइखाजिडे़ॽ हे़ने़ए़ थोङ्माइ हिःक्पेम्मेनुङ हे़न खे़ॽमा मे़मिम्बॽआ ठाउँबेॽ हे़न चिॽखे़म्मे।” 19(इगो खा येसुडे़ॽ लुमाबेॽ पत्रुसडे़ॽ निवाहाङ्मि आदरनुङ महिमा ले़ःॽमामि इन्डोक सिमा खे़ये लुमे खा इःमे़ॽनिङ्डुए) मोबा ए़क्साङ येसुडे़ॽ पत्रुस लुसु, “कानुङ राप्से।”
येसुडे़ॽ नम्नम ले़ःॽपॽआ चोङ्सा
20पत्रुसडे़ॽ ए़ङ्गुवालाम हिङ्घे़ॽनुङ खाङ्माबेॽ येसुडे़ॽ बेॽलो नम्नम ले़ःॽपॽआ चोङ्सा ए़ङ्गुवाबेॽ आप्मे़ॽनिङ्सिबॽआ ले़टा। इगो चोङ्से़ॽनोॽ युडा चामा चामे बेलाबेॽ येसुमि हेप्सोक्पेॽ नेन्नुङ सिप्सु, “परभु, हे़न राःप्मेॽखुबा असाडे ?” 21मो चोङ्सा खाङ्नुङ पत्रुसडे़ॽ येसु सिप्सु, “परभु, इगोमि टुम्बेॽ चाहिँ इमाङ्डे लुन्डुए ?”
22येसुडे़ॽ पत्रुस लुसु, “का मे़लेङ्लोरो खो हिङ्डुघे़ॽलो लुनुङ के़ॽ मिडुङ्होङ्सो हे़न इमाङ खाँचोडे ?” हे़न चाहिँ कानुङ राप्से।
23येसुडे़ॽ इडोक्मा खाडे़ॽ मो चोङ्सा इन्डोक्पेॽसो सिघे़ॽनिबा लुमे खा येसुमि हाइखा चोङ्साजिडे़ॽ मिडुजि। तर येसुडे़ॽ चाहिँ खो सिनिबा लुबॽआ मे़ले़टा। तर खोसे़ॽको “का मे़लेङ्रो खो हिङ्डुङ्घे़ॽलो लुनुङ मिडुङ्होङ्सो हे़न इमाङ खाँचो सिॽटे़ ?” लुनुङ लुबॽआ ले़टे़।
24इगो चोङ्साडे़ॽनोॽ इघा चोप खा खाङ्नुङ इगोबेॽ गबाहि पिमे़ॽनिङ्सिन्डुए। खोसे़ॽनोॽ इघा खा साप्मिटुहा, मोबा खोमि गबाहि चाइबमा ले़ये लुनुङ कानिङे़ॽ लेन्डुङ्मा।
ए़क्साङ्मा खा
25इडोॽ येसुडे़ॽ हाइखासो बेॽलो योम्बोक ले़टु। माहा चोप इक्को इक्को साप्नुङ युङ्माहोङ्गो माहा नेॽचिरा इगो मक्खाम्डेमबेॽ मे़वाक्सु होला।
सध्या निवडलेले:
युहन्ना 21: YAMP
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2023, Wycliffe Bible Translators, Inc. and Nepal Bible Society
