युहन्ना 15
15
का चाइबमा अङ्गुरमि डाङ
1 “चाइबमा अङ्गुरमि डाङ का ले़ङे, मोबा के़ए़ पाबा चाहिँ मो अङ्गुरमि डाङ खाङ्घुबा किसान ले़ये। 2काबेॽ टुघुबा चोप चा मे़ङ्किङ्घुबा हक्काम्बा खोसे़ॽ चेन्नुङ राप्पेन्डुए, तर चा किङ्घुबा हक्काम्बाबेॽ हागोसो बेॽलो चा किङ्रो लुनुङ सेबोक्इन्डुए। 3डाङ खाङ्घुबा किसानडे़ॽ हक्काम्बा सेनुङ नुरोॽ सेडिडोक्नोॽ के़ॽ लुबॽआ इघा बचनडे़ॽ हे़निङ चोखो टोङ्बेटे़। 4हे़निङ काबेॽ पेनानिङे मोबा हे़निङ्बेॽ का पेङ्इङे। हक्काम्बा डाङ्बाङ हाघे़ॽहोङ चा किङ्निबा मोडोक्नोॽ हे़निङ्सो काबाङ हाघडानिङ्होङ हे़निङ्बेॽ चा किङ्निबा।
5 “अङ्गुरमि डाङ कानोॽ ले़ङे, हे़निङ चाहिँ के़हा हक्काम्बा ले़न्डानिङे। मोडोगे़ॽ हक्काम्बा कानुङ्नोॽ टुहोङ मोबा कासो खोबेॽ टुङाहोङ्रेॽ मो हक्काम्बाबेॽ बेॽलो चा किङ्इहा, तर का मे़ॽनिङ हे़निङे़ॽ इमाङ्सो ले़ःॽहेसानुम्नि। 6कोहि याॽमि काबेॽ माॽआहोङ, मो याॽमि चेम्बेबॽआ हक्काम्बाडोॽ पाखे़ॽयु राप्खे़येनुङ हेघे़ये। मोबा मो सुम्नुङ मिबेॽ राप्खे़येनुङ हिक्खे़ये। 7हे़निङ काबेॽ टुसानिङ्होङ मोबा के़हा बचन हे़निङे़ॽ पालना ले़टानुमहोङ, हे़निङ इमाङ पाप्मिहा ङागानुमे, माहा हे़निङे़ॽ चुप्मिन्डानुमे। 8हे़निङे़ॽ बेॽलो चा किङ्मेॽनुङ के़हा चोङ्सा लुनुङ चिनारि पिसानुमहोङ इगो खाबेॽनोॽ के़ए़ पाबामि महिमा लिये।
9 “पाबाडे़ॽ का नम्नम ले़टिडोॽ, के़ॽसो हे़निङ नम्नम ले़ए़टुङे। हागो हे़निङ काङ्मि नम्नमबेॽ सानिङ टुसानिङे। 10के़ॽ काङ्मि पाबामि आग्या पालना ले़ःॽनुङ खोमि नम्नमबेॽ टुडिडोक्नोॽ हे़निङे़ॽसो के़ए़ आग्या पालना ले़टानुमहोङ के़ए़ नम्नमबेॽ सानिङ पेङ्इन्डानिङे। 11काङ्मि हाङ्हाङ हे़निङ्बेॽ टुडुङ्घे़ॽरो मोबा हे़निङ्मि हाङ्हाङ पुरा लिरो लुनुङ्नोॽ के़ॽ इघा खा हे़निङ लुबॽआ।
12 “काङ्मि आग्या इगोनोॽ ले़ये, के़ॽ हे़निङ नम्नम ले़टिडोक्नोॽ हे़निङ्टाङ्बासो इक्कोसे़ॽ हाइको नम्नम ले़चासानिङे। 13लङ्गाममि लागि टाङ्बामि हिङ्मवा पिहेमानोॽ बेॽए नम्नम ले़ये। इगोबाङ बेॽए नम्नम हाइको माॽआये। 14के़ॽ हे़निङ पिबॽआ के़हा आग्या हे़निङे़ॽ पालना ले़टानुमहोङ हे़निङ के़हा लङ्गाम ले़न्डानिङे। 15हागोएम्बाङ के़ॽ हे़निङ सेउतेजि लुनिम्नानि, इन्ढोङ्होङ मोमि मायोङ्बाडे़ॽ इमाङ ले़न्डुए मो सेउतेडे़ॽ लेसुनि, तर के़ॽ हे़निङ लङ्गाम लुनिम्ने़, इन्ढोङ्होङ काङ्मि पाबाबाङ खेम्बॽआ चोप खा हे़निङ्सो इःबेनिम्ने़। 16हे़निङे़ॽ का से़म्बॽआ ने़ॽनि, तर के़ॽ हे़निङ से़नुङ। इन्ढोङ्होङ हागो सानिङ टुडुङ्घे़हा चा किङ्मेॽटानुमे लुनुङ के़ॽ हे़निङ पाङ्मे़ॽनिङ्सिनिम्ने़। मोबा काङ्मि निङ्बेॽ पाबानुङ इमाङ ङागानुमहोङ्सो खोसे़ॽ हे़निङ पिये। 17के़ॽ हे़निङ इगो आग्या पिनिम्ने़, हे़निङ इक्कोसे़ॽ हाइको नम्नम ले़ःॽखुसे़ॽचुमे़।
मक्खाम्डेमबेॽहा याॽमिजिडे़ॽ येसु सिॽचाबॽआ
18 “इगो मक्खाम्डेमबेॽहा याॽमिजिडे़ॽ हे़निङ सिॽचामिहोङ, हे़निङ्बाङ याक्लो का सिॽचाम्मे लुनुङ लेसानुमे। 19हे़निङ इगो मक्खाम्डेमबेॽहाजि ले़टानिङ्होङ खोजिडे़ॽ टाङ्बाङ मिॽनुङ हेनिङ नम्नम ले़टामि होला। तर हे़निङ इगो मक्खाम्डेमबेॽहाजि ले़टानिङ्नि, इन्ढोङ्होङ के़ॽ हे़निङ इगो मक्खाम्डेमबाङ से़म्बॽआसे़ॽ मक्खाम्डेमबेॽहाजिडे़ॽ हे़निङ सिॽचाम्मे। 20के़ॽ हे़निङ लुबॽआ बचन नुरोॽ मिॽयुक्सानुमे ‘सेउते खोम मायोङ्बाबाङ एप्पा लिहेनिबा।’ खोजिडे़ॽ का चुङ्जामिहोङ हे़निङ्सो चुङ्जाम्मे, खोजिडे़ॽ के़हा बचन पालना ले़टुजिहोङ हे़निङ्मि बचनसो पालना ले़न्डुजे। 21इडोॽ खोजिडे़ॽ हे़निङ के़ॽ ले़ःॽमे़ चुङ्जाम्मे, इन्ढोङ्होङ खोजिडे़ॽ का पाङ्घुबा लेसुजिने।
22 “का लेन्नुङ मे़लुबेॽपॽआ ले़टाहोङ खोजि पापमि आप्टिकनुङ्मा मे़लिसामि, तर हागोगो खोजिडे़ॽ पाप ले़ःॽमामि इमाङ्सो बहाना ले़ःॽटोक्टुजिने। 23असे़ॽ का सिॽचाम्मे, मोसे़ॽ के़ए़ पाबासो सिॽचोन्डुए। 24के़ॽ हाइखा असे़ॽसो मे़ले़ःॽहेबॽआ खरिहा योम्बोक माहाजिमि रुम्बेॽ मे़ले़ःॽपॽआ ले़टाहोङ खोजि पापमि आप्टिकनुङ्मा मे़लिसामे। तर हागो के़ॽ ले़ःॽपॽआ खरिहा योम्बोक अक्खाजिडे़ॽ खाङ्नुङ्सो कानुङ काङ्मि पाबा सिॽचाटामे। 25तर यहुदि धारमिक नियमबेॽ साप्पॽआ बचन पुरा लिमामि लागिनोॽ इडोॽ लिबॽआ ले़ये- ‘अक्खाजिडे़ॽ काङ्मि बिरोङ मे़ॽनिङ का सिॽचासामि।’ #भजनसङ्ग्रह ३५:१९; ६९:४
26 “हागो के़ॽ निवाहाङ पाबाबाङ हे़निङ सहायता ले़ःॽखुबा पबित्रा होङ्निवा पाङ्बेनिम्ने़, मोबा खोसे़ॽ चाइबमा राम्बेॽ राम्मराप्मिये, खोसे़ॽनोॽ के़ए़ टुम्बेॽ साक्छि पिन्डुए। 27हे़निङ याक्लोएबाङ्नोॽ कानुङ टुबॽआसे़ॽ हे़निङ्सो काङ्मि साक्छि ले़न्डानिङे।”
सध्या निवडलेले:
युहन्ना 15: YAMP
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2023, Wycliffe Bible Translators, Inc. and Nepal Bible Society
