युहन्ना 16
16
1 “हे़निङे़ॽ बिस्वास ले़ःॽमा ए़लेडानुमे लुनुङ्नोॽ, के़ॽ इघा खा हे़निङ लुबॽआ। 2हे़निङ यहुदिजि सुम्ढाम खिमबाङ यिॽइम्मे। बेला लेङ्इये, हे़निङ सेॽखुबाडे़ॽ खोमि निवाबेॽ मिॽइन्डुए ‘के़ॽ निवाहाङ्मि योम्बोक ले़ःॽमे़ॽनिङ्सिनुङे’। 3माहाजिडे़ॽ पाबानुङ का मे़लेबॽआसे़ॽनोॽ खोजिडे़ॽ हे़निङ इडोॽ ले़म्मे। 4इघा चोप खा लिमाबेॽ हे़निङ इडोॽ लुसाङ मिॽइन्डानुमे ‘इघा खागो याक्लोनोॽ खोसे़ॽ कानिङ लुबॽआ ले़टे़’। मोडोगे़ॽनोॽ के़ॽ हे़निङ इघा खा लुमे़ॽनिङ्सिनिम्ने़। का हागोरो हे़निङ्नुङ्नोॽ टुबॽआसे़ॽ आयुरो हे़निङ्नुङ इघा खा के़ॽ मे़इःसुङ।”
पबित्रा होङ्निवामि योम्बोक
5 “हागो चाहिँ का पाङ्घुबाबेॽ टेघे़ॽमे़ॽनिङ्सिङे, तर ‘हे़न हाम्बेॽ खे़ॽमे़ॽनिङ्सिये ?’ लुनुङ हे़निङ असे़ॽसो का सिप्सानुम्ने। 6तर के़ॽ इघा चोप खा लुबेॽपॽआसे़ॽ हे़निङ्मि निवा सोकडे़ॽ टिप्मिटुए। 7चाइबमा खा चाहिँ, का खे़ॽमाबेॽनोॽ हे़निङ्मि लागि नुबा लिये। इन्ढोङ्होङ का मे़ङ्खे़ॽङाहोङ हे़निङ सहायता ले़ःॽखुबा पबित्रा होङ्निवा लेन्निबा। तर का खे़ॽङाहोङ चाहिँ के़ॽ खो हे़निङ्बेॽ पाङ्इनुङे। 8मोबा खो लेन्नुङ, मक्खाम्डेमबेॽहा याॽमिजि पापमि टुम्बेॽ, धारमिक खामि टुम्बेॽनुङ निवाहाङ्मि न्यायमि टुम्बेॽ लुबेन्डुजे। 9काबेॽ बिस्वास ए़ले़ःॽमानोॽ पाप ले़ये लुमे खा खोसे़ॽ खाङ्मुये। 10खोसे़ॽ निवाहाङ्मि पोम्बेॽ इमाङ ठिक ले़ये मोनोॽ खा खाङ्मुन्डुये इन्ढोङ्होङ का पाबाबेॽ खे़ॽमे़ॽनिङ्सिङे मोबा हे़निङे़ॽ का फेरि खाङ्डोक्हेसानुम्ने, 11खोसे़ॽ निवाहाङ्मि न्याय लुबॽआ इमाङ्डे लुमे खा खाङ्मेये, इन्ढोङ्होङ मक्खाम्डेमबेॽए हाङ्बा (सैतान) मि न्याय सिॽपेटे़।”
12 “के़ॽ हे़निङ लुमे खागो बेॽलोनोॽ टुहा, तर हागो इगोबाङ बेॽलो हे़निङे़ॽ लेहेसानुम्नि। 13तर चाइबमा रामबेॽ राम्मा राप्खुबा पबित्रा होङ्निवा लेङ्इये, मोबा खोसे़ॽनोॽ हे़निङ चाइबमा खामि टुम्बेॽ लुबेये। खो खोमि निवाबाङ यामुनिबा, खोसे़ॽ इमाङ खेम्इन्डुहा माहा खानोॽ हे़निङ लुबेये। मोबा ए़क्साङ लिहा खामि टुम्बेॽसो लुबेॽये 14के़ॽ लुबॽआ खानोॽ खोसे़ॽ हे़निङ लुन्डुएसे़ॽ के़ए़ महिमा ले़न्डुए। 15इमा इमा पाबानुङ टुहा, माहा काङ्मिन्नोॽ ले़हा। मोडोगे़ॽ के़ॽ लुनिम्ने़, इमाङ कानुङ टुहा माहा पबित्रा होङ्निवाडे़ॽ काबाङ लानुङ हे़निङ लुबेये।”
चोङ्साजिमि सोकनुङ हाङ्हाङ
16 “ए़डे़ॽ ए़क्साङ्बाङ हे़निङे़ॽ का फेरि खाङ्डोक्टानुम्ने, मोबा इॽछोॽ ए़क्साङ्बाङ का फेरि खाङ्डोक्इन्डानुमे।”
17मोबा खोमि आढा चोङ्सजिडे़ॽ खोजिदाङ्बा इडोॽ कासाङ सिम्घुसे़ॽचुसामि, “खोसे़ॽ कानिङ इमाङ लुबॽआ ? ‘इॽछोॽ ए़क्साङ हे़निङे़ॽ का खाङ्डोक्टानुम्ने, मोबा फेरि इॽछोॽ ए़क्साङ हे़निङे़ॽ का खाङ्डोक्इन्डानुमे’ मोबा फेरि इडोक्सो लुये ‘का पाबाबेॽ खे़ॽमे़ॽनिङ्सिङे’।” 18माहाजिडे़ॽ लुसुजि, “येसुडे़ॽ ‘ए़डे़ॽ ए़क्साङ’ लुबॽआ चाहिँ इमाङ्डे ? खोसे़ॽ इमाङ्मि टुम्बेॽ लुमे़ॽनिङ्सिन्डुए, कानिङे़ॽ लेनोॽ मे़लेहेसुङ्मा” कासाङ फाङ्सिघडामि।
19माहा चोङ्साजिडे़ॽ सिम्मा योक्मे़ॽनिङ्सिम्मे लुमे खा लेनुङ, येसुडे़ॽ इडोॽ लुसुजि, “के़ॽ हे़निङ इडोॽ लुसुङ ‘इॽछोॽ ए़क्साङ हे़निङे़ॽ का खाङ्डोक्टानुम्ने, मोबा फेरि ए़डे़ॽ ए़क्साङ हे़निङे़ॽ का खाङ्डोक्इन्डानुमे’ इमा हे़निङ इगो खामि टुम्बेॽ सिम्घुसे़ॽ चुमे़ॽनिङ्सिन्डानिङे ? 20चइबानोॽ हे़निङ लुनिम्ने़, हे़निङ हाःप्मिन्डानिङे, बिलाप ले़न्डानिङे, तर मक्खाम्डेमबेॽहा याॽमिजि साप्थाङ्इम्मे। हे़निङ हाःप्मिन्डानिङे, बिलाप ले़न्डानिङे, तर माहा चोप हाङ्हाङ्बेॽ फेङ्इहा। 21ओङे़क टोक्मा बेलाबेॽ खोम्मा खेःबेॽ सिॽइये, तर ओङे़क टोक्नुङ ए़क्साङ याक्लोहा खेः मिन्डेन्डुए, इन्ढोङ्होङ खोसे़ॽ इगो मक्खाम्डेमबेॽ इक्को चोङ याॽमि टोगुङ लुनुङ साप्थाङ्इये। 22मोडोक्नोॽ आयु हे़निङ सोकबेॽ टुन्डानिङे, तर का फेरि हे़निङ चुप्सिॽ लेम्माबेॽ हे़निङ साप्थाङ्मानुङ हाङ्हाङ ले़न्डानुमे। मो हाङ्हाङ असे़ॽसो हे़निङ्बाङ ङाप्खे़ॽहेसुजिनि। 23मो याक हे़निङे़ॽ का इमाङ्सो सिप्सानिङ्ने। चइबानोॽ के़ॽ हे़निङ लुनिम्ने़, हे़निङे़ॽ के़ए़ निङ्बेॽ पाबानुङ इमाङ ङाःगानुमहोङ्सो, खोसे़ॽ मो हे़निङ पिये। 24आयुरोगो हे़निङे़ॽ काङ्मि निङ्बेॽ इमाङ्सो मे़ङाःक्टिॽटानुमे। ङाःगानुमे मोबा हे़निङे़ॽ चुप्मिन्डानुमे। इडोॽ हे़निङ्मि हाङ्हाङ पुरा लिरो।
येसुडे़ॽ मक्खाम्डेम हेजाबॽआ
25 “आयुरो चाहिँ हे़निङ्नुङ खानवाबाङ यामुमे़ॽनिङ्सिङे, तर मोडोक्मा बेलासो लेम्मे़ॽनिङ्सिये, मोडोक्पेॽ का फेरि हे़निङ्नुङ खानवाबेॽ यामुङानि। तर पाबामि टुम्बेॽ छे़ङ्गै हे़निङ लुनिम्ने़। 26मोडोक्पेॽ के़ॽ हे़निङ्मि लागि पाबानुङ ङाःक्पेॽमा पाप्निबा, इन्ढोङ्होङ हे़निङ आम्निटाङ्बे़ॽ के़ए़ निङ्बेॽ ङाःइन्डानुमे। 27पाबा खोमटाङ्बे़ॽ हे़निङ नम्नम ले़ये, इन्ढोङ्होङ हे़निङे़ॽ का नम्नम ले़टानिङ मोबा का निवाहाङ्बाङ लेम्बॽआ लुनुङ बिस्वास ले़ए़टानुम। 28का पाबाबाङ्नोॽ इगो मक्खाम्डेमबेॽ लेम्बॽआ, हागो फेरि मक्खाम्डेम याःॽयानुङ पाबाबेॽनोॽ खे़ॽमे़ॽनिङ्सिङे।”
29खोमि चोङ्साजिडे़ॽ लुसुजि, “हागोगो हे़ने़ॽ खानवाबाङ ने़ॽनि, छे़ङ्गै इःमे़ॽनिङ्सिन्डुए। 30हागो कानिङे़ॽ लेसुङ्मा, हे़ने़ॽ चोप खा लेन्डुहा, मोबा हे़न असे़ॽसो सिम्मा पाप्निबा, इन्ढोङ्होङ सिम्मा याक्लोनोॽ हे़ने़ॽ लेबेन्डुहा, हे़न चइबानोॽ निवाहाङ्बाङ्नोॽ लेम्बॽआ ले़ये।”
31येसुडे़ॽ माहाजि सिप्सुजि, “इमा हागो हे़निङे़ॽ बिस्वास ले़न्डानुमे ? 32खेप्सानुमे, बेला लेम्बेटे़, मोडोक्पेॽ हे़निङ हाम्बेॽको हाम्बेॽ फक्खे़न्डानिङे। हे़निङ टाङ्बा टाङ्बामि खिमबेॽ खे़ॽपेन्डानिङे मोबा काङ्दाङ्बा याःॽयान्डानिङे। तर का काङ्दाङ्बा लिङानि, इन्ढोङ्होङ कानुङ काङ्मि पाबा टुये।
33 “हे़निङ कानुङ टुमाबेॽ सान्ति चुप्हेसानुमे लुनुङ के़ॽ हे़निङ इघा चोप खा लुबॽआ। मक्खाम्डेमबेॽ हे़निङे़ॽ खेः आङ्मा खे़ये, तर ए़क्किसिसानिङे इन्ढोङ्होङ के़ॽ मक्खाम्डेम हेजाबेटुङे।”
सध्या निवडलेले:
युहन्ना 16: YAMP
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2023, Wycliffe Bible Translators, Inc. and Nepal Bible Society
