युहन्ना 14
14
चाइबमा, मरामनुङ हिङ्मवा
1येसुडे़ॽ चोङ्साजि लुसुजि, “हे़निङे़ॽ सुरता ए़ले़टानुमे। निवाहाङ्बेॽनुङ काबेॽ बिस्वास ले़टानुमे। 2के़ए़ पाबामि खिमबेॽ बेॽलो पेन्ढाम टुहा, का हे़निङ्मि लागि ठाउँ पोरोक्सिॽ खे़ॽमे़ॽनिङ्सिङे। माहा ठाउँ माॽआडाहोङ के़ॽ हे़निङ इडोॽ लुनिम्नानि। 3का खे़ॽनुङ हे़निङ्मि लागि ठाउँ पोरोक्इनुङे, मोबा फेरि टेजानुङ हे़निङ्सो का पेन्ढामबेॽ चिक्खे़ॽनिम्ने़। मोडोक्नोॽ मोबेॽ हे़निङ कानुङ सोरि पेङ्इन्डानिङे। 4का खे़ॽमे़ॽनिङ्सिङे ठाउँमि राम हे़निङे़ॽसो लेन्डानुमे।”
5थोमाडे़ॽ येसु सिप्सु, “परभु, हे़न हाम्बेॽ खे़ॽमे़ॽनिङ्सिये मो कानिङे़ॽ लेसुङ्मानि, मोबा हे़न खे़ॽठाम राम चाहिँ इन्डोक्टे लेमे़ ?”
6येसुडे़ॽ खो लुसु, “राम, चाइबमा मोबा हिङ्मवा कानोॽ ले़ङे। काबाङ हाइखा असाबाङ्सो निवाहाङ पाबामि खिमबेॽ रुक्हेमिने। 7आयुरो हे़निङे़ॽ का नुरोॽ लेन्डानुमे, मोडोक्नोॽ काङ्मि पाबासो लेसानुमे। हागोएबाङ खो लेन्डानुमे, इन्ढोङ्होङ हे़निङे़ॽ खो खाङ्बेटानुमे।”
8मोबा फिलिपडे़ॽ लुसु, “हे परभु, कानिङ पाबा खाङ्मेॽमाना, मोडोक्होङ कानिङ के़ॽए़ये।”
9येसुडे़ॽ खो लुसु, “फिलिप, आयुरो का हे़निङ्नुङ टुङे, मोडोॽसो हे़ने़ॽ का लेङानिबा ? का खाङ्खुबे़ॽ पाबासो खाङ्बेटुए। हे़ने़ॽ का खाङ्नुङ्सो ‘कानिङ पाबा खाङ्मेॽमाना’ लुनुङ इन्डोक्टे लुये ? 10का पाबाबेॽ टुङे, पाबा काबेॽ टुये लुनुङ इमा हे़निङे़ॽ बिस्वास ले़टानुम्ने ? के़ॽ हे़निङ लुबॽआ बचन काङ्मि निवाबाङ लुबॽआ ने़ॽनि, तर काबेॽ टुघुबा पाबाडे़ॽ खोमि योम्बोक काबाङ ले़ःॽमे़ॽनिङ्सिन्डुए। 11का पाबाबेॽ टुङे, मोबा पाबा काबेॽ टुये लुमे खाबेॽ बिस्वास ले़टानुमे। मोडोॽ ने़न्निहोङ के़ॽ ले़ःॽपॽआ योम्बोक खाङ्नुङ काबेॽ बिस्वास ले़टानुमे।
12 “चइबानोॽ, के़ॽ हे़निङ लुनिम्ने़, असे़ॽ का बिस्वास ले़ङे, मोसे़ॽ के़ए़म्बाङ्सो बेॽहा योम्बोक ले़ःॽहेन्डुहा, इन्ढोङ्होङ का पाबा टुढामबेॽ खे़ॽमे़ॽनिङ्सिङे। 13हे़निङे़ॽ काङ्मि निङ्बेॽ इमाङ ङाःगानुमहोङ्सो, काबाङ पाबामि महिमा लिरो लुनुङ के़ॽ मो हे़निङ पिनिम्ने़। 14हे़निङे़ॽ के़ए़ निङ्बेॽ इमाङ ङाःगानुमहोङ्सो के़ॽ पिनिम्ने़।
पबित्रा होङ्निवामि लागि हेन्ज्रुङ
15 “हे़निङे़ॽ का नम्नम ले़न्डानिङ्होङ काङ्मि आग्या पालना ले़न्डानुमे। 16के़ॽ पाबानुङ बिन्ति ले़ःॽनुङ ङाःक्पेॽनिम्ने, खोसे़ॽ हे़निङ्मि लागि सानिङ हे़निङ्नुङ सोरि पेङ्नुङ सहायता ले़ःॽखुबा इक्को पाङ्बेये। 17खो होङ्निवा ले़ये, खोसे़ॽ चाइबमा राम्बेॽ राम्मा राप्मिये। मक्खाम्डेमबेॽहा याॽमिजिडे़ॽ खोबेॽ बिस्वास ले़ःॽहेसुजिने, इन्ढोङ्होङ मक्खाम्डेमडे़ॽ ना खो खाङ्डोक्इन्डुजे ना लेन्डुजे। तर खो हे़निङे़ॽ लेन्डानुमे, इन्ढोङ्होङ खो हे़निङ्नुङ्नोॽ टुये, खो हे़निङ होङ्सिॽयु पेङ्इये। 18के़ॽ हे़निङ टुहुराडोॽ याःॽयासुङ्नि, का फेरि हे़निङ्बेॽ लेङ्इङे़। 19हागो इॽछोॽ ए़क्साङ मक्खाम्डेमबेॽहा याॽमिजिडे़ॽ का खाङ्डोक्हेमिने, तर हे़निङे़ॽ चाहिँ का खाङ्डोक्हेन्डानुमे। का हिङ्रिक ले़ःॽपॽआसे़ॽ हे़निङ्सो हिङ्रिक लिन्डानिङे। 20मो याक ‘का पाबाबेॽ टुङे, मोबा हे़निङ काबेॽ टुन्डानिङे, का हे़निङ्बेॽ टुङे’ लुनुङ लेन्डानुमे। 21असे़ॽ काङ्मि आग्या पालना ले़न्डुए मोसे़ॽ का नम्नम ले़ये। मोबा का नम्नम ले़ःॽखुबा काङ्मि पाबाडे़ॽसो नम्नम ले़न्डुए। के़ॽ मो नम्नम ले़नुङेनुङ खोबेॽ खाङ्मुङे।”
22(यहुदा इस्करियोत) चाहिँ ने़ॽनि हाइको यहुदाडे़ॽ येसु सिप्सु, “परभु, हे़न कानिङ्बेॽ चाहिँ खाङ्मुये, तर मक्खाम्डेमबेॽहाजिबेॽ चाहिँ ने़ॽनि, लुनुङ हे़ने़ॽ इमाङ लुबॽआ ?”
23येसुडे़ॽ खो लुसु, “असे़ॽ का नम्नम ले़ये, मोसे़ॽ काङ्मि बचन पालना ले़न्डुए मोबा काङ्मि पाबाडे़ॽसो खो नम्नम ले़न्डुएनुङ कानिङ खोबेॽ लेन्नुङ खोनुङ पेङ्इन्डिङ्मे। 24तर का नम्नम मे़ले़ःॽखुबे़ॽ के़हा बचन पालना ले़टुनि। हे़निङे़ॽ खेम्बॽआ इगो बचन काङ्मि ने़ॽनि, तर का पाङ्घुबा पाबाबाङ ले़ङ्इटे़।
25 “इघा खा हे़निङ्नुङ सोरि टुमाबेॽनोॽ लुबेनिम्ने़। 26तर पाबाडे़ॽ काङ्मि निङ्बेॽ पबित्रा होङ्निवा हे़निङ्बेॽ पाङ्इन्डुए, खोसे़ॽनोॽ हे़निङ चोप खा इःबेये मोबा के़ॽ लुबॽआ चोप खा हे़निङ मिॽमा राप्मिये।
27 “के़ॽ हे़निङ्नुङ सान्ति याःॽयानुङे। के़ॽ काङ्मि सान्ति हे़निङ पिनिम्ने़। मो सान्ति इगो मक्खाम्डेमडे़ॽ पिबॽआडोॽमा ने़ॽनिबा। हे़निङ्मि निवा दुःखि मे़लिरो, मोबा मे़ङ्किस्सिरो। 28‘का इगोबाङ खे़ॽमे़ॽनिङ्सिङे, मोबा फेरि हे़निङ्बेॽ लेङ्इङे़’ के़ॽ हे़निङ लुबॽआ खागो खेम्बेटानुम। हे़निङे़ॽ का नम्नम ले़न्डानुमहोङ्गो का पाबाबेॽ खे़ॽमे़ॽनिङ्सिङे लुबॽआ खा खेम्नुङ साप्थाक्सानिङे, इन्ढोङ्होङ पाबागो काबाङ महान ले़ये। 29इघा खा पुरा लिमाबेॽ हे़निङे़ॽ का बिस्वास ले़न्डानुमे लुनुङ इघा चोप खा लिमा याक्लोनोॽ हे़निङ लुबेनिम्ने़। 30का हे़निङ्नुङ हागो बेॽलो खा यामुङानि, इन्ढोङ्होङ इगो मक्खाम्डेममि हाङ्बा लेम्मे़ॽनिङ्सिये। तर खोसे़ॽ का इमाङ्सो ले़ःॽहेङानिबा। 31तर के़ॽ पाबा नम्नम ले़नुङे मोबा खोसे़ॽ आग्या ले़टिडोॽ के़ॽ ले़नुङे लुमे खा चोप याॽमिजिडे़ॽ लेसुजिरो लुनुङ ले़नुङे। येपोगानिङे, कानिङ इगो ठाउँबाङ खडि।”
सध्या निवडलेले:
युहन्ना 14: YAMP
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2023, Wycliffe Bible Translators, Inc. and Nepal Bible Society
