युहन्ना 13
13
येसुडे़ॽ चोङ्साजिमि सराङ वासोक्पॽआ
1छुट्कारा चाड लेम्मा याक्लो, इगो मक्खाम्डेमबाङ बिदा लिनुङ पाबाबेॽ खे़ॽमे बेला लेन्सिॽ पोरोइटे़ लुनुङ येसुडे़ॽ लेडोक्टु, मोबा मक्खाम्डेमबेॽ टुघुबा खोमि टाङ्बाङ्जि चोङ्साजि, नम्नम ले़टुजे, मोबा खो खे़ॽमा बेलाठोकनोॽ नम्नम ले़टुजि।
2युडा येसु खोमि चोङ्साजिनुङ चामे़ॽनिङ्सिडे़। मोडोक्पेॽनोॽ सैतानडे़ॽ सिमोन इस्करियोतमि पसा यहुदा इस्करियोतमि निवाबेॽ येसु राःप्मेॽमे निवा ए़म्बेॽपेबॽआ ले़टा। 3पाबाडे़ॽ चोप अधिकार येसु पिटुए लुमे खा खोसे़ॽ लेसुए, मोबा का निवाहाङ्बाङ लेङ्इटिङेनुङ का निवाहाङ्बेॽनोॽ टेघे़ॽमे़ॽनिङ्सिङे लुमे खासो खोसे़ॽ लेसुए। 4मोबा येसु पुके़ॽनुङ खोमि अस्कोट इन्नुङ इक्के़ङ्बेॽ युक्सु, मोबा इक्को चेॽ सुम्रिकपेॽ हिगु। 5मोबा खोङ्बेॽ योङा सिप्नुङ खोमि चोङ्साजिमि सराङ वासोक्नुङ मो चेॽडे़ॽ टुःक्पेॽटुजि।
6सिमोन पत्रुसमि सराङ वासोक्सिॽ पोराक्माबेॽ खोसे़ॽ लुसु, “परभु, इमा हे़ने़ॽ काङ्मि सराङ वासोक्इन्डुए ?”
7येसुडे़ॽ खो लुसु, “के़ॽ इमाङ ले़ःॽमे़ॽनिङ्सिनुङे आयु हे़ने़ॽ लेसुनिबा, तर ए़क्साङ लेन्डुए।”
8पत्रुसडे़ॽ येसु लुसु, “हे़ने़ॽ के़ए़ सराङ इन्डोक्पेॽसो वासोक्मा फे़न्नि!”
येसुडे़ॽ खो लुसु, “हे़ने़ॽ का सराङ वासोक्मेॽङानिहोङ हे़न काङ्मि चोङ्सा लिनिबा।”
9मोबा सिमोन पत्रुसडे़ॽ येसु लुसु, “परभु, मोडोक्होङ्गो काङ्मि सराङ्रेॽ ने़ॽनि, तर हुकनुङ निन्डवाँसो वासोक्पेॽमा।”
10येसुडे़ॽ सिमोन पत्रुस लुसु, “नुहाबा लिबेबॽआ याॽमिमि सराङ्रेॽ वासोक्माहोङ नुबेये, खो चोखो लिबेबॽआ ले़ये। मोबा हे़निङ चोखो ले़न्डानिङे, तर चोपको ने़ॽनि।” 11इन्ढोङ्होङ खो धोका पिघुबा चोङ्सा खोसे़ॽ नुरोॽ लेसुए, मोडोगे़ॽ खोसे़ॽ लुसुजि, “हे़निङ चोपनोॽको चोखो ले़टानिङ्ने।”
12येसुडे़ॽ चोङ्साजिमि सराङ वासोक्सेडु मोबा इक्कोरेॽ चेॽ चाङ्नुङ फेरि खो पेना। मोबा खोसे़ॽ माहाजि इडोॽ सिप्सुजि, “इन्ढोङ के़ॽ हे़निङ्मि सराङ वासोगुङे हे़निङे़ॽ लेसानुमे ? 13हे़निङे़ॽ का ‘गुरु, परभु’ लुन्डानिङ, मोगो ठिकै लुन्डानुमे, इन्ढोङ्होङ का गुरुनुङ परभुनोॽ ले़ङे। 14का हे़निङ्मि परभुनुङ गुरु ले़टिङ्सो के़ॽ हे़निङ्मि सराङ वासोक्इटुङे, हे़निङे़ॽसो इक्कोसे़ॽ हाइकोमि सराङ वासोक्मा खे़ये। 15के़ॽ ले़टिडोक्नोॽ हे़निङे़ॽसो ले़टानुमे लुनुङ्नोॽ नमुना खाङ्मेॽनिम्ने़। 16चइबानोॽ हे़निङ लुनिम्ने़, मायोङ्बाबाङ सेउते बेॽएम्मा लिनिबा, मोबा लम्बवाँ लाघे़ॽखुबा, लम्बवाँ हाङ्घुबाबाङ बेॽएम्मा लिनिबा। 17हे़निङे़ॽ इघा खा लेनुङ मोडोक्नोॽ ले़टानुमहोङ आसिस चुप्मिन्डानुमे।
येसु राःप्मेॽखुबा चोङ्सा
(मत्ति २६:२०-२५; मरकुस १४:१७-२१; लुका २२:२१-२३)
18 “के़ॽ हे़निङ चोपमि टुम्बेॽ लुबॽआ ने़ॽनि। के़ॽ से़म्बॽआजि के़ॽ नुरोॽ लेनुङ्हाजि। तर ‘कानुङ सोरि चरेपा चाघुबानोॽ के़ए़ टेडिघरिक याॽमि लिये’ #
भजनसङ्ग्रह ४१:९ लुनुङ धारमिक नेॽचिराबेॽ साप्पॽआ खा पुरा लिमामिन्नोॽ इडोॽ लिसा। 19इगो खा लिमा याक्लोनोॽ हे़निङ लुमे़ॽनिङ्सिनुङे। मोडोगे़ॽ मो खा लिमाबेॽ कानोॽ खिरिस्ट ले़ङे लुनुङ हे़निङे़ॽ बिस्वास ले़न्डानुमे। 20चइबानोॽ के़ॽ हे़निङ लुनिम्ने़, ‘असे़ॽ के़ॽ पाङ्बॽआ याॽमिजि नुरोॽ सेवा ले़न्डुए मोसे़ॽ कासो सेवा ले़ये, मोबा का सेवा ले़ःॽखुबे़ॽ का पाङ्घुबासो सेवा ले़न्डुए’।”
21इघा खा लुसेॽनुङ येसु निवा टुक्साङ कासा, “चइबानोॽ हे़निङ लुनिम्ने़, हे़निङ्बाङ इक्कोसे़ॽ काङ्मि सतुरजिमि हुकपेॽ राःप्मेये।” 22येसुडे़ॽ असामि टुम्बेॽ लुबॽआ होला मिॽनुङ खोमि चोङ्साजि अलमलबेॽ सिॽनुङ खोजिदाङ्बा सिम्घुसे़ॽचुसामि। 23येसुमि चोङ्साजिबेॽ, खोसे़ॽ नम्नम ले़ःॽपॽआ चोङ्सा चाहिँ येसुमि हेप्सोक्पेॽ ने़न्नुङ पेम्मे़ॽनिङ्सिडा। 24मोबा सिमोन पत्रुसडे़ॽ मो खुप्नुङ लुसु, “हे़ने़ॽ सिम्घै, येसुडे़ॽ इगो खा असामि टुम्बेॽ लुबॽआडे ?”
25मो चोङ्से़ॽ येसुमि हेप्सोक्पेॽ ने़न्नुङ्नोॽ येसु सिप्सु, “परभु, मो याॽमि असाडे ?” 26येसुडे़ॽ लुसु, “के़ॽ चरेपामि हे़क्फे़क अङगुरमि खे़ँवाबेॽ सोक्नुङ असा पिनुङे़, के़ॽ लुबॽआ याॽमि मोनोॽ ले़ये।” मोबा खोसे़ॽ चरेपामि हे़क्फे़क सिमोन इस्करियोतमि पसा यहुदा इस्करियोत पिसु। 27यहुदाडे़ॽ चरेपा चामासोरोॽ खोमि निवाबेॽ सैतान पे़ःॽयुसा। मोबा येसुडे़ॽ खो इडोॽ लुसु “हे़ने़ॽ इमाङ ले़ःॽमा मिॽइटुए, मो चान्डो ले़ःॽपेसे।” 28तर येसुडे़ॽ इन्ढोङ यहुदा इडोॽ लुसुए, लुमे खा मोबेॽ चासिॽ पेङ्घुबा असे़ॽसो मे़लेसुजि। 29माहाजिबेॽ आढाजिडे़ॽ इडोॽ मिडुजि, यहुदानुङ याङ्सुप टुये, मोडोगे़ॽ येसुडे़ॽ खो चाडमि लागि पाप्मिहा खा इम्बेसे लुबॽआ होला मिडुजि मोबा आढाजिडे़ॽ चाहिँ इमाङ मे़ॽनिङ्हाजि इमा इमा हाबेॽसिॽ पाङ्बॽआ होला मिॽटुजि। 30मोबा चरेपा चामासोरोॽनोॽ यहुदा खे़ॽपेसा। मोडोक्पेॽ सेन्डा लिघे़ॽपॽआ ले़टा।
येसुडे़ॽ इक्को चोङ आग्या पिबॽआ
31यहुदा पाखे़ॽयु खेप्पेनुङ ए़क्साङ येसुडे़ॽ लुसु, “हागो याॽमिमि पसा महिमित लिनुङ, खोबेॽ निवाहाङ महिमित लिटे़। 32याॽमिमि पसाबेॽ निवाहाङ महिमा लिसाहोङ निवाहाङ खोमटाङ्बे़ॽ याॽमिमि पसामि महिमा ले़न्डुए, खोसे़ॽ इगो योम्बोक चान्डोनोॽ ले़न्डुए।
33 “होउ के़हा नानिजि, का हागो इॽछोॽरेॽ हे़निङ्नुङ टुङे। के़ॽ यहुदि डायोङ्बाजि लुडिडोॽ हे़निङ्सो लुनिम्ने़, हे़निङे़ॽ का योॽइन्डानिङे हाम्बेॽ का खे़ॽमे़ॽनिङ्सिङे, मोबेॽ हे़निङ लेङ्हेसानिङ्नि। 34हागो हे़निङ इक्को चोङ आग्या पिनिम्ने़, के़ॽ हे़निङ नम्नम ले़टिडोक्नोॽ हे़निङ्मि रुम्बेॽसो इक्कोसे़ॽ हाइको नम्नम ले़ःॽखुसे़ॽचुमे़। 35हे़निङ्टाङ्बा इक्कोसे़ॽ हाइको नम्नम ले़ःॽखुसे़ॽ चुसानिङ्होङ, याॽमिजिडे़ॽ हे़निङ के़हा चोङ्साजि लुनुङ लेम्मे।”
पत्रुसडे़ॽ रेम्डेॽपॽआ
(मत्ति २६:३१-३५; मरकुस १४:२७-३१; लुका २२:३१-३४)
36सिमोन पत्रुसडे़ॽ येसु सिप्सु, “हे परभु, हे़न हाम्बेॽ खे़ॽमे़ॽनिङ्सिये ?”
येसुडे़ॽ लुसु, “का हाम्बेॽ खे़ॽमे़ॽनिङ्सिङे, मोबेॽ हे़न आप्हेनिबा, तर ए़क्साङ गो हे़न कानुङ आप्मिये।”
37पत्रुसडे़ॽ लुसु, “परभु, के़ॽ इन्ढोङ हे़न टिङ्हेनानि ? हे़ने़ए़ लागि का सिमा सिॽहोङ्सो सिहेङे।”
38येसुडे़ॽ लुसु, “इमा काङ्मि लागि सिहेये ? चइबानोॽ हे़न लुन्ने़, हे़ने़ॽ का सुमखेॽ लेङानि मे़लुरेॽलो वागिया माक्मि वापा ओःक्निबा।”
सध्या निवडलेले:
युहन्ना 13: YAMP
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2023, Wycliffe Bible Translators, Inc. and Nepal Bible Society
